Éxodo 12
12
Qechpa kaqkunata Tayta Dios ushakäsishqan
1Egiptulachöraq Israel runakuna kaykäyaptinmi Moiséstawan Aarónta Tayta Dios nirqan: 2<<Kay killami qamkunapaq wata qalaykunan killa kanqa. 3Lapan Israel runakunata wilayay kay killa chunka junaqcho carnishta karpis o malta chïvuta karpis cada wayicho kamarikuyänanpaq. 4Juk wayicho walkaqla kayashpan lapanta mana ushayänanpaq kashqanta tantiyarqa pishtayashqan uywata ushaypa mikuyänanpaq vecïnunwan shuntakäyäsun. 5Carnish kaptinpis chïvu kaptinpis juk watayuqta y sänuta akrayäsun.
6<<Say akrayashqan uywata sararäyäsun kay killa chunka chusku junaqyaq. Say tardina lapan Israel runakuna say uywata pishtayanqa. 7Nirkur wayikunapa numbralninkunatapis quiciunninkunatapis uywapa yawarninwan lushiyanqa. 8Saynöpis say sakayla aysata kankaylapa mikuyanqa iwjiq jachantinta#12.8 Wakin runakunaqa asqaq niyanmi. Iwjiq jachata mikuyänanpaq Tayta Dios nirqan Egiptucho nakayashqanta yarpäyänanpaqmi. y levadüraynaq tantantinta. 9Chawalanpa ni calduypaqa ama mikuyanqasu. Saypa trukanqa kankaylapa mikuyanqa aysanta, umanta, chakinta, pachanta, shonqunta, natinninta y ruruntapis. 10Waraynin tutapaqqa imatapis ama pusüsiyanqasu. Pusuq kaqtaqa lapanta rupasiyanqa. 11Mödanankunatapis lanqinkunatapis jatishlana y tukrunkunatapis aptashlana say kankash aysata apuräla mikuyanqa. Say Pascua fiestataqa#Lev. 23.5; Núm. 9.1-5; 28.16; Deut. 16.1-2; Mat. 26.1-2, 17-29; Mar. 14.1-2, 12-25; Luc. 22.1-2, 7-19; 1Cor. 5.7. noqapa jutïcho rurayanqa.
12<<Say sakay intëru nacionpa päsarmi lapan Egipto runakunapa qechpa kaq surinkunata y lapan uywankunapa punta yuriq orqu wawankunatapis wanusishaq. Sayno wanusirmi Egipto runakuna adorayashqan diosninkunata manakaqman churashaq. Noqami Tayta Dios kaykä. 13Wayi punkuykicho yawar lushiraykaqta rikarqa päsakushaqmi. Saymi Egipto runakunata wanusirpis Israel runakunataqa ni juklaylatapis wanusishaqsu.
14<<Say junaqtaqa wata wata imaypis ama qonqäyankisu. Saypa trukanqa noqa Tayta Diosta adorayämashpayki jatun fiestata rurayanki. Say nishqäkunaqa imayyaqpis leymi qamkunapaq y qamkunapita miraqkunapaqpis kanqa.
15<<Fiesta qalaykushqan junaqpita qanchis junaqnintin levadüraynaq tantata mikuyanki. Punta kaq junaqchömi wayikikunapita lapan levadürata jitariyanki. Say semäna levadürayuq tantata mikuq kaqtaqa Israel runakunapita qarquyanki. 16Punta kaq junaq y qanchis kaq junaq adorayämänaykipaq shuntakäyanki. Say junaqkuna ima aruytapis ama aruyankisu. Mikuytami isanqa mikuyänaykipaq yanukuyanki.
17<<Levadüraynaq Tantata Mikuna fiestata#Éxo. 23.15; 34.18; Lev. 23.6-8; Núm. 28.17-25; Deut. 16.3-8. rurar Egiptupita jorqushqäta imaypis yarpäyanki. Say fiestata imayyaqpis wata wata rurayanki qamkunapis y qamkunapita miraqkunapis. 18Punta kaq killa chunka chusku junaq tardipita qalaykur levadüraynaq tantata mikuyanki ishkay chunka juk (21) junaq tardiyaq. 19Say qanchis junaqkuna wayikikunacho levadüra ama kasunsu. Say junaqkuna levadürayuq tantata mikuq kaqtaqa Israel runakunapita qarquyanki Israel mayiki kaptinpis o jäpa runa kaptinpis. 20Say junaqkuna levadürayuqtaqa ama imatapis mikuyankisu. Maycho tarpis levadüraynaq tantalata mikuyanki>>.
21 Tayta Dios sayno niptinmi Israel mayor runakunata qayaykasir Moisés nirqan: <<Pascua mikuyta mikuyänanpaq carnishta karpis o chïvuta karpis cada wayicho pishtayäsun. 22Say uywapa yawarninta juk matiman chaskiyanki. Nirkur hisöpu jachata yawarman tulpurkur punkuykikunapa numbralninkunata y quiciunninta lushiyanki. Say sakay pasa manaraq waraptinqa wayikikunapita ama yarquyankisu. 23Egipto runakunapa qechpa surinkunata wanusinanpaq Tayta Dios päsar wayi punkukunataraqmi rikanqa. Punkupa numbralnincho y quiciunnincho yawar lushiraykaqta rikarqa päsakunqami. Wanusikuq ángel wayikikunaman yaykunanta manami pay kachapanqasu.
24<<Pascua fiestata rurayänaykipaq nishqätaqa imaypis mana qonqaypa rurayanki. Qamkunapita miraqkunapis saynöla imayyaqpis rurayanqa. 25Tayta Dios promitiyäshushqayki nacionman yaykurpis mana qonqaypa Pascua fiestata rurayanki. 26<¿Imanirtaq kay fiestata ruransi?> nir surikikuna tapuyäshuptiki 27kayno wilapäyanki: <Wata wata uywata pishtar Pascua fiestata ruransi Israel mayinsikunapa wayinkunapa Tayta Dios Egiptucho päsashqanta yarpänansipaqmi. Saypa päsar Egipto runakunapa surinkunata wanusirpis Israel mayinsikunapa surinkunata manami wanusirqansu. Tayta Dios sayno salvashqanpita payta adorarmi Pascua fiestata ruransi> >>.
Sayno Moisés niptinmi lapan Israel runakuna qonqurpakuykur Tayta Diosta adorayarqan. 28Saymi Moiséstawan Aarónta Tayta Dios nishqannöla lapanta rurayarqan.
29Say sakay pulan paqasmi Tayta Dios wanusirqan Egipto runakunapa lapan qechpa surinkunata.#Éxo. 4.22-23. Sayno wanusirqan Faraónpa qechpa olqu surinpita qalaykur carcilcho wichqaraykaq runapa qechpa olqu surinyaqmi. Saynölami wanusirqan lapan uywakunapa punta yuriq orqu wawankunatapis. 30Cada wayicho qechpa surinkuna wanuyaptinmi Faraónpis, mandäsiqninkunapis y lapan Egipto runakunapis say sakay fiyupa waqayarqan.
Israel runakuna Egiptupita yarquyashqan
31Say sakaylami Moiséstawan Aarónta qayaykasir Faraón nirqan: <<Qamkunapis Israel mayikikunapis kay nacionpita jukla aywakuyay. Kanan isanqa manakamashqaykino Tayta Diosta adoraq aywayay. 32Munayashqaykino uyshaykikunata, cabraykikunata y wäkaykikunata qatikurkur apurä aywayay. Tayta Diosta adorayashpayki noqapaqpis payta manakuykuyälanki>>.
33Egipto runakuna lapanpis wanuyänanpaq kayashqanta mansarirmi Israel runakunata jukla aywakuyänanpaq niyarqan. 34Saymi Israel runakuna artësantinta levadüraynaq mäsata jakunkunawan pituyarqan. Nirkurmi aparikurkur aywakuyarqan. 35Moisés nishqannölami Egipto runakunata manakuyarqan qoripita y qellaypita kaqtaqa imaykatapis. Saynölami manakuyarqan mödanakunatapis. 36Sayno manakuyaptinmi Egipto runakunapa yarpayninman Tayta Dios churarqan imatapis manakuyashqan kaqta qaraykuyänanpaq. Saynöpami Egipto runakunapata imaykantapis ali kaqtaqa apakuyarqan.#Éxo. 3.21-22.
37Ramesés partipita aywakurmi Israel runakuna Sucotmanpa aywayarqan. Egiptupita yarquq runakuna kayarqan soqta pachak waranqanömi (600,000), warmikunata y wamrakunata mana yupaylapa. 38Paykunawanmi mana Israel runakunapis askaq aywayarqan. Saypita yarqurmi runakuna qatiyarqan uyshakunata, cabrakunata y saysika wäkakunatapis. 39Egipto runakuna nacionninpita jukla qarquyaptinmi Israel runakuna mirkapankunata rurakuyänanpaqpis tiempu karqannasu. Saymi jamapäyashqancho levadüraynaq mäsa apayashlanpita tantata rurayarqan.
40Israel runakuna Egiptucho täyarqan chusku pachak kimsa chunka (430) watami.#Gén. 15.13; Gál. 3.17. 41Say watakuna cumplishqan junaqmi Tayta Dios kuyashqan runakuna trïbunpa trïbunpa Egiptupita yarqakayämurqan. 42Say sakaymi Israel runakunata Tayta Dios yanaparqan Egiptupita yarqayämunanpaq. Cada watami say yarquyashqan junaq chaptin lapan Israel runakuna Tayta Diosta warati adorayanqa. Israel runakunapita miraq kaqkunaqa imaypis sayno rurayanqa.
Pascua fiestata imano rurayänanpaqpis tantiyasishqan
43Saypitanami Moiséstawan Aarónta Tayta Dios nirqan: <<Kaynömi Pascua fiestata rurayanki. Pascuapaq pishtayashqayki uywapa aysanta jäpa runaqa ama mikunqasu. 44Rantiyashqayki ashmaynikikunami isanqa cuerpunta señalakush kaqkuna mikuyanqa. 45Say uywapa aysanta ni jäpa runapis ni arupakuqpis ama mikunqasu. 46Saynöpis wayilaykikunacho mikuyanki. Wayipita juklämanqa ama jorquyankisu ni tulunkunatapis ama pakiyankisu.#Núm. 9.12; Juan 19.36. 47Israel runakuna lapanpis saynöla rurayanqa.
48<<Mayqanpis jäpa runakuna qamkuna kaqcho tashpan Pascua fiestacho mikuyta munarqa wayincho kaq lapan olqukuna señalakuyanqa. Señalakurqa paykunapis Israel runanöna kayashpanmi Pascua mikuyta mikuyanqa. Manaraq señalakurqa manami pipis say uywapa aysanta mikunmansu. 49Qamkunacho taq jäpa runakuna señalakuyashqannöla Pascua mikuyta mikuyänanpaq jinan nacioncho yuriqkunapis señalakuyanqa>>.#Núm. 9.14.
50Saymi Israel runakuna lapanta rurayarqan Moiséstawan Aarónta Tayta Dios nishqannöla. 51Say junaqlami Egiptupita Israel runakunata tröpa tröparaq Tayta Dios jorqamurqan.
Právě zvoleno:
Éxodo 12: qvhB
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
© 2003, Wycliffe Bible Translators, Inc. All rights reserved.