Tur. 23
23
Israera úuntri̱n Papru timia
1Papru Yúsnan pujurniu náamkari̱n úmamkes iis “Wí shuartiram antuktarum. Úchichik tuke yamaisha Yus íimmianum péṉker wekainuitjiai” tímiayi. 2Papru nuna takui̱ Yúsnan pujurniu uuntri̱ Ananías ni suntari̱n Paprui̱ ayamas pujuarmia nuna “Wenunam awattiarum” tímiayi. 3Tutai Papru chichaak “Tsej, jimiará chichamtinia iimiata, Yus amincha asutiámattawai. Muisais akupeana nuna umíatsui tusam yajauch túrutattsam pujame. Enta, ¿nuiṉkia urukamtia Muisais timia nuka iniaisam ame suntarum winia asutiátarum tame?” tímiayi. 4Tura nuna takui̱ nui̱ wajarmia nu Páprun chicharainiak “¿Maaj, amesha Yúsnan pujurniu úuntri̱sha imiá yajauchisha chichaream?” 5Tutai Papru chichaak “Yatsuru, wisha Yúsnan pujurniu uuntri̱ áutskaitia tíchamjai. Nékaitkiunka núnaka tícha̱a̱jai. Kame wisha nékajai Yus Chichamnum tawai ‘Atumí uuntri̱ yajauch chicharkairap’ Jiin. 22:28 tawai” tímiayi.
6-8Israer shuara úuntri̱ya̱ jimiará írutka ármiayi. Satuséu aents tura nuyá̱ Pariséu aents nusháa írutkan Pápruka nekaamiayi. Kame Satuséu aentska jakamunmaya̱ nantaktincha Yusa suntarí̱sha aentsu wakaní̱sha tura iwianchcha atsawai tiniu ármiayi. Antsu Pariséu aentska nuka ashí awai, tiniu ármiayi. Nuna nekáa Papru kakantar chichaak “Wikia Pariséu áentsuitjiai. Wí shuarsha Pariséu áiniawai. Wikia ashí shuar jakamunmaya̱ ukunam nantaktin átatui tu jintíamun nekaatai tusar itiariármiayi” tímiayi. Tura Papru nuna takui̱ Pariséu aents tura Satuséu aentssha nuamtak kajernaikiarmiayi. Túrunawar kánasaraṉ nusháa nusháa enentáimprarmiayi. 9Nuiṉkia ashí aents charaatum ajarmiayi. Tura Israer shuara jintinniuri̱ Pariséunam írutka armia nu wajakiar chicharainiak “Jú̱ aishmaṉ tunaan peṉké túrichuiti. Yusa suntari̱ chíkich wakancha nin nekas chichaschamashi. ¿Ya neka?” tiármiayi. 10Ti charaatum ajainiakui kapitián Páprun achia̱rchartimpiash tusa suntaran untsuk “Ji̱i̱ktiarum túrarum suntar pujamunam awayá̱tarum” tímiayi. 11Nuyá̱ kashi Papru Uuntri̱ mesekra ipiatuk “Kakaram ajasta Papru. Ju̱i̱ Jerusaréṉnum winia ujakárumna núnismek Rúmanmasha ujaktatme” tímiayi.
Papru mátin wakerukma
12Nuyá̱ kashin tsawa̱rmatai Israer shuar Páprun maatai tusar chichaman jurusármiayi. “Papru máchkurkia yurumtsuk tura peṉké úmutsuk matsamsattaji. Máachrikia yajauchiniam yumiṉkramu atai” tiármiayi. 13Nuna tiarmia nuka kuaraintia naṉkaamas ármiayi. 14Tura Yúsnan pujurniu úuntri̱n tura Israer shuar úuntri̱ncha weriar “Papru máchkurkia peṉké yurumtsuk pujustatji. Máachrikia yajauchiniam yumiṉkramu atái taji. 15Tuma asamtai ashí Yúsnan pujurniu náamkari̱ji̱a̱i̱ kapitián seatarum, Papru tatí tusarum. ‘Kashin Papru itiata, titiarum. Papru tana nu iisha nekas nekaatai tusar wakeraji’ titiarum. Túrawakrumin iisha maatai tusar niṉkia táatsa̱i̱ṉ nákaktatji” tiármiayi.
16Tura Papru awe̱ nú chichaman antuk suntar pujamunam taa Páprun ujakmiayi. 17Tuma asamtai Pápruka suntara úuntri̱n untsuk “Ju̱ uchi uunt kapitiánnium jukitia. Nisha chichaman takakui” tímiayi. 18Kapitiáncha uchin uunt kapitiánnium ejé chichaak “Papru eṉkeamu pujana nu winia untsurak ‘Ju̱ uchi uunt kapitiánnium jukitia. Chichaman takakui’ túrutui” tímiayi. 19Uunt kapitiáncha nú uchin eṉkeki̱ arantach jukí̱ chicharuk “¿Warí turuttiaj tame?” tímiayi. 20Tutai uchi chichaak “Israer shuar Páprun chichaman jurusárai. ‘Papru túramuri̱ ti paant nekaatai tusar kashin Israer shuara úuntri̱i̱n ejetarum’ turamartatui. 21Tura amesha nuna takui̱ anturkaip. Kuaraintia naṉkaamas jintiá akirtua pujuráiniawai. Tura ‘Papru máchkurkia yurumtsuk tura úmutsuk matsamsattaji’ tuíniawai. Tuma asamtai yamaisha ámin tití tusa nákarmainiawai” tímiayi uchi. 22Tura kapitiáncha uchin chicharuk “Ame túrutmena nu chíkich aents peṉké ujakaraip” tímiayi. Nuna ti uchin akupkámiayi.
Akupin Píriksai̱ ejemu
23Nuya̱ṉka kapitiáncha suntara úuntri̱n jímiaran itiá chichaak “Urum kashi ajapéṉ ajastatuk ai̱ untsurí suntar ikiaankarta. Jimiará sian aya náwek tura sataintia kawainium eketka nuyá̱ chíkich jimiará sian náṉkiji̱a̱i̱ṉ Sesarianam wétin iwiarata. 24Páprusha kawainium ekemkatin iwiarturta. Túrarum péṉkerak akupin Píriksai̱ ejetarum” tímiayi. 25Tura niji̱a̱i̱ ju̱ chichaman áatrar akuptúkmiayi.
26“Tí peṉker akupin Píriks, wikia Krautiu Rísias ju̱ papin áatjame. 27Israer shuar jú̱ aishmaṉkan maatai tusar wakeruiniak achikiármiayi. Tura nisha Rúmanmaya̱ áentsuitkiui wikia nuna nekaan suntarja̱i̱ werin jukimjiai. 28Wikia ¿urukamtaik achikiáruit? tusan Yúsnan pujurniu náamkari̱n nin jukimjiai. 29Páprunka ii uuntri̱ akupkámuri̱n umíatsui tusar nin kajeriarmiayi. Pápruka yajauch túrachu asa mantamnachminiuyayi. Sepunmasha eṉkemáchminiuyayi. 30Tura wisha Israer shuar nin mátniun chichaman jurusman nekaan amiin akuptajme. Nuya̱sha nin kajerainia nunasha tajai ‘Atumsha Píriksai̱ werum átum warinma kajerarum nu titiarum’ tajai.
Ayu. Jú̱chiniak tájame.”
Nuna tu áatar akuptúkmiayi.
31Tura suntarsha ni uuntri̱ timia nútiksaraṉ Páprun kashi Antipatris péprunam júkiarmiayi. 32Kashin tsawa̱rar suntar aya náwek wéarmia nuka waketrarmiayi. Tura kawainium eketrainiaka Pápruja̱i̱ wéarmiayi. 33Sesarianam jeawar papin Píriksan súsarmiayi. Tura Pápruncha nui̱ ejeniarmiayi.
34Akupniúsha papí áujsua amik Páprun aniasmiayi “Amesha, ¿tui̱ akiiniaitiam?” Tutai “Sirisianmaya̱itjiai” tímiayi. 35Nuna takui̱ akupin chichaak “Wátskea kajertamainia nu taar turamainiakui anturkatjame” tímiayi. Tura nuya̱ṉka suntar íisarat tusa úunt akupin Irutisa je̱e̱n awayá̱ apujsamiayi.
Právě zvoleno:
Tur. 23: jiv
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
©2009 Avant Ministries in cooperation with Wycliffe Bible Translators, Inc. All rights reserved.