Tur. 11:17-18

Atumsha enentáimpratarum. Uunt Jesukrístun enentáimtusmiaj nui̱ iincha Yuska ni Wakaní̱n suramsamiaji. Tura iin suramsamiaj núnisaṉ Yus nincha ni Wakaní̱n súsarmiayi. Nuna tura asamtai wikia túrashtiniaiti Yusan títinkiaitiaj” tímiayi Pítiur. Tura Pítiur táman antukar mitia wáinkiar “Nekasaiti Israer shuarchancha ni enentái̱n yapaji̱áwarmatai tuke iwiaaku átinian Yuska nin súsaruiti” tiármiayi. Tusar Yusa náari̱n ti shiir awajsarmiayi.