Salmos 144
144
Ipasonquitaqueri pincatsari Tasorentsi
(Ivampoyeane David)
1¡Icameetsatasanotaque Notasorentsite,
iriotaque jocaacoventanari!
Iriotaque oametanari jaoca noncanteari nomanatea.
2Iriotaque queariotatsiri tsipatapinitanari, jocaacoventanari,
notsititari eiro ineanteetanatsi, oipacaacoventanari;
iriotaque nojocaari, ticaacoventanari,
iriotaque cantacashiretiriri atiripee ipincatsatantanari.
3Notasorentsite, ¿jaoca ijitari atiri piquenqueshireacotantariri, aisati pineacameetsatantariri?
4Yora atiri iquempetaro anenqui;
iquempetacaro tsimancaiteri intsipaite avishi.
5Notasorentsite, pisoquijanaque inquitequi, paniireapee;
pincatiapeero toncaaripee, oncachaajencatanajeta.
6Pimporecacayeri porecatsiri onquempetanaquea imanayeetiro chacopipee,
poimishiajeitanteariri quisajeitimpiri.
7Ponijayenaro pitasorenca poneachari jenoqui;
poavisaacotena yoashinoncaaquena pashinisati atiri,
iquempejeitacaro antearoite incajare;
8iriotaque tseeyajeitachari vancashitarori iracosanori,
icantashita: “Nomoncaratero nocantiri”.
9Notasorentsite, nocoi nompampoyempiro iroaquerari pampoyeantsi,
nompampoyeacoventantempiro salterio.
10Avirotaque matacairiri yanaacotanti pincatsariyetatsiri;
aisati pojocaacoventaqueri David, yora quemisantimpiri.
11Poavisaacotena, eiro yoanteetanatsi.
Pojocaacoventena, eiro yanaacotantanatsi pashinisati,
yora tseeyajeitachari vancashitarori iracosanori;
icantashiveeta; “Nomoncaratero nocantiri”.
12Yora notomipee aiquero ijatatii iquimoyeti;
iquempejeitacaro shiocayetatsiri;
ora noshintopee oquempetacaro otincamipee pancotsi quisotacairori.
13Ora noquempoyeantarori panquirentsipee,
ojaasanotaca paitapeerica oanarontsiyetatsiri.
Aisati iriori novishatepee
ishequiasanotanaque catsini noashitomashitepeequi.
14Maaroni novacatepee ontsomonteyetanaque,
omoncaratiro ontimanteariri, tecatsi jocatsine.
Cameetsa catsini nosavicajeiti nonampiqui, te nontsaroajeiteji.
15¡Iquimoshirejeiti atiripee otimimoyetiri maaroni ocapee!
¡Iquimoshirejeiti yora yashitajari Tasorentsi Pincatsari!
Právě zvoleno:
Salmos 144: cni
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
© 2008, 2015, Wycliffe Bible Translators, Inc. All rights reserved.