ዬሱሲ ኪቴዳዋንቱ ኦሱዋ 22
22
1«ታናዳን ኣማኒያዋንቶ፥ ታ ኣዋቶ፥ ታኒ ሃዒ ሂንቴንቶ ኦዲያ ዬዉዋ ሲሲቴ!» 2ጳዉሎሲ ኡንቱንቶ ኢብራዪስፄ ቃላን ሃሳዪያዋ ሲሲዴ፥ ካሴፔ ሎይ ጮዑ ጊና ኢ ሃዋዳን ያጌዳ።
3«ታኒ ኪልቂያን ዴዒያ ፄርሴሴን ዬሌታዴ፥ ሃ ካታማን ጋማሊያሊ ታና ታማሪሲና ዲጫዴ፥ ኑ ኣዋቱዋ ሂጊያካ ሚኒሳ ታማራዴ፥ ሃቼ ሂንቴ ኡባይ ሃኒያዋዳንካ፥ ታኒ ፆሳ ዬዉዋሲ ሴሌቲያ ኣዪሁዳ ኣሳ። 4ታኒ ማጫ ኣሳኔ ኣቱማ ኣሳ ኦይቃ ኦይቃዴ ቃሾ ጎሌን ዬጌዳ ኣሳኔ፥ ሃ ኦጊያ ካሊያ ኣሳ ዎሳና ጋካናሲ ሜቶዳ ኣሳ። 5ሃዋዳንካ፥ ቃሲ፥ ቄሳቱዋ ኡባቱዋ ካፑኔ ጪማ ኡባ ሺቁ ታዋ ማርካታናው ዳንዳዬ፤ ታኒ ዳማስቆን ዴዒያ ኡንቱንቱ ኢሻቱዋ ኣዪሁዳቱዋሲ፥ ኡንቱንቱፔ ዳቢዳቢያ ኣካዴ፥ ሄዋን ዴዒያ ኣሳቱ ቃሼቲዴ ሙሬታናዳን፥ ዬሩሳላሜ ኡንቱንታ ኣሃናው ያ ባዲ።
ጳዉሎሲ ኪሪስቶሳኮ ሲሜዳ ባሬ ሲማባ ኦዴዳ
(ኪት 9፡1-19፤ 26፡12-18)
6«ታኒ ባዴ ዳማስቆ ማቴዳ ዎዴ፥ ሴታ ጋላሳ ጊዲሺን፥ ቆፔናን ሳሉዋፔ ዎልቃማ ፖዑ ታ ማታን ዩዪ ኣዴ ፖዔዳ። 7ታኒ ሳዓን ኩንዳ ኡታዴ፥ ‹ሳዖላ፥ ሳዖላ፥ ታና ኣያው ዬዴርሳይ?› ጊያ ቃላ ሲሳዲ።
8«ታኒ ዛራዴ፥ ‹ታ ጎዳው፥ ኔኒ ኦኔ?› ያጋዲ።
«ሄዋፔ ጉዬ፥ ‹ታኒ ኔኒ ዬዴርሲያ ናዚሬቲያ ዬሱሳ› ያጌዳ። 9ታናና ኢቲፔ ዴዒያዋንቱ ፖዑዋ ቤዒዴ ያዬዲኖ፤ ሺን ታው ሃሳዪያዋ ቃላ ሲሲቤይኪኖ።
10« ‹ታ ጎዳው፥ ታኒ ኣያ ኡዶ?› ያጋዲ።
«ጎዳይ ታና፥ ‹ዴንዳዴ ዳማስቆ ባ። ኔኒ ኦናው ፆሳይ ቆፔዳ ኡባባይ ኔው ያኒ ኦዴታናዋ› ያጌዳ። 11ሄ ዎልቃማ ፖዑዋ ዲራው፥ ታ ኣይፊ ቆቂና፥ ታናና ዴዒያ ኣሳቱ ታ ኩሺያ ኦይቂዴ፥ ታና ጎቺና፥ ዳማስቆ ጋካዲ።
12«ዳማስቆን ዴዒያ ኣዪሁዳ ኡባይ ሎይ ቦንቺያ ኢቲ ሃናኒያ ጊያ ቢታኒ፥ ኑ ሂጊያሲ ኣዛዜቲዴ፥ ፆሳው ኢሜቴዳ ኣሳ። 13ሃናኒ ታኮ ዪዴ፥ ታ ማታን ኤቂዴ ታና፥ ‹ታ ኢሻው ሳዖላ፥ ፄላ› ያጌዳ። ታኒ ሄ ዎዴ ሄ ማንዒያንካ ኣኮ ፄላ ኣጋዲ።
14«ኢ ታና ሃዋዳን ያጌዳ፤ ‹ኑ ኣዋቱዋ ፆሳይ ኔኒ ኣ ቆፋ ኤራናው፥ ኣ ፂሎ ናዓ ቤዓናዉኔ ኣ ዶናፔካ ሃሳያ ሲሳናው ኔና ካሴና ዶሬዳ። 15ኣዪሲ ጎፔ፥ ኔኒ ቤዔዳባኔ ሲሴዳባ ኣሳ ኡባ ሲንን ኣው ማርካታናሳ። 16ሃዒካ ኣያው ጋሚዓይ? ዴንዳዴ ፃማቄታ፤ ኣ ሱን ፄሳዴ፥ ኔ ናጋራፔካ ሜጬታ› ያጌዳ።
17«ታኒ ጉዬ ዬሩሳላሜ ሲማዴ ጌሻ ጎሊያን ዎሲሺን፥ ታ ኣያናን ጊዳዲ። 18ጎዳይ ታና፥ ‹ኤሌላዴ፥ ዬሩሳላሜ ኬሳ ኣያው ጎፔ፥ ኔኒ ታው ሃዋን ማርካቲያዋ ኣሳይ ኣኬና› ያጊሺን ታኒ ኣ ቤዓዲ።
19«ታኒ፥ ‹ታ ጎዳው፥ ኣዪሁዳ ዎሳ ጎሊያ ኡባን ኔና ኣማኒያዋንታ ኦይቃዴ ዋዳዋኔ ቃሾ ጎሊያን ዬጌዳዋ ኡንቱንቱ ኤሪኖ። 20ኡንቱንቱ ኔ ማርካ ኢስፂፋኖሳ ዎያ ዎዴ፥ ታኒ ሄ ዬዉዋ ኤኖ ጋዲ። ቃሲ ኡንቱንቱ ሚዪያን ኤቃዴ፥ ኣ ዎያዋንቱ ማዩዋ ናጋይ› ያጌዳ።
21«ጎዳይ ታና፥ ‹ታኒ ኔና ኣዪሁዳ ጊዴና ኣሳኮ ሃኮሳ ኪቲያ ዲራው ባ› ጌዳ» ያጌዳ።
ጳዉሎሲ ሮሜ ኣሳ ጊዲያዋ ቆንጪሴዳ
22ጳዉሎሲ ሄ ቃላ ሃሳያና ጋካናው ኣሳይ ኢ ጊያዋ ሲሴ፤ ሄዋፔ ጉዪያን፥ ባሬንቱ ኮሻ ቁ ኦዴ፥ «ሃዋ ጋዲያፔ ዪሳ፤ ኢ ዴዓናው ቤሴና» ያጌዲኖ።
23-24ኡንቱንቱ ዋሲሺን፥ ባሬንቱ ማዩዋ ቦላው ኦሊሺኒኔ ባና ጫርኩዋን ላሊሺን፥ ኦላ ካፑ ዎታዳራቱ ጳዉሎሳ ባሬንቱ ዴዒያሳ ኣፋና ማላ ኣዛዜዳ። ቃሲ ኣሳይ ኣዪሲ ሄዋዳን ኣቦላ ዋሴዲኖንቶ ኤራናው፥ ጳዉሎሳ ሊሱዋን ሾጫና ማላ፥ ኡንቱንታ ኣዛዜዳ። 25ሺን ዎታዳራቱ ጳዉሎሳ ዳፉዋን ሚኒሲ ቃቼዳ ዎዴ፥ ጳዉሎሲ ባሬ ማታን ኤቄዳ ፄታቱዋ ካፑዋ፥ «ሮሜ ጋዲያ ኣሳ ፒርዳይ ባይናን ሾጪያዌ ሂንቴንቶ ዎጌ?» ያጌዳ።
26ሄዋ ፄታቱዋ ካፑ ሲሴዳ ዎዴ፥ ኦላ ካፑዋኮ ቢዴ፥ «ሃ ቢታኒ ሮሜ ኣሳ። ኔኒ ኣያ ኦና ቆፓይ?» ያጊዴ ኦቼዳ።
27ኦላ ካፑ ጳዉሎሳኮ ሺቂዴ፥ «ኔኒ ሮሜ ኣሴ? ታው ኦዳ» ያጌዳ።
ጳዉሎሲ፥ «ኤ» ያጌዳ።
28ኦላ ካፑ ጳዉሎሳው ዛሪዴ፥ «ታኒ ሃ ዛሬቴ ዳሮ ሚሻን ሻማዲ» ያጌዳ።
ሺን ጳዉሎሲ፥ «ታኒ ሄ ዜሬፔ ዬሌታዲ» ያጌዳ።
29ሄዋ ዲራው፥ ጳዉሎሳ ቢዳናው ቆፔዳዋንቱ ማንዒያን ኣፔ ሻኬቲ ኣጌዲኖ። ኦላ ካፑካ ጳዉሎሲ ሮሜ ኣሳ ጊዴዳዋ ኤሬዳ ዎዴ ያዬዳ፤ ኣዪሲ ጎፔ፥ ሳንላታን ኣ ቃሺሲ ዎዳ።
ጳዉሎሲ ኣዪሁዳቱዋ ሻንጋቱዋኮ ሺቄዳ
30ዎንቴ ጋላሲ ኦላ ካፑ፥ ኣዪሁዳቱ ጳዉሎሳ ኣዪሲ ሞቴዲኖንቶኔ ጌሺዴ ኤራናው ኮዪዴ፥ ጳዉሎሳ ቢሌዳ። ያቲዴ ቄሳቱዋ ካፓቱኔ ኣሳይ ኡባይ ሺቃና ማላ ኣዛዜዳ፤ ቃሲ ጳዉሎሳ ዱጌ ዎዴ፥ ኡንቱንቱ ሲንን ኤሴዳ።
Právě zvoleno:
ዬሱሲ ኪቴዳዋንቱ ኦሱዋ 22: dwrENT
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
© 2011, Wycliffe Bible Translators, Inc. All rights reserved.
Zjisti více o Ooratha Caaquwaa