زَكَرِيَّا 7
7
العدالة مُهِمّة من الصيام
1وَ فِي الْيَوْم الرَّابِعْ هَنَا الشَّهَرْ التَّاسِعْ الْأُسْمَهْ كِسْلُو فِي السَّنَةْ الرَّابْعَةْ هَنَا حُكُمْ الْمَلِكْ دَارِيُوسْ، اللّٰهْ حَجَّى لِزَكَرِيَّا. 2وَ بَيْت إِيلْ شَرَاصَرْ قَايِدْ عَسْكَرْ الْمَلِكْ وَ عَسْكَرَهْ رَسَّلَوْا نَاسْ لِيَشْحَدَوْا اللّٰهْ. 3وَ رَسَّلَوْهُمْ أَشَانْ يَسْأَلَوْا رُجَالْ الدِّينْ فِي بَيْت اللّٰهْ الْقَادِرْ وَ الْأَنْبِيَاء وَ يُقُولُوا: «أَوَّلْ أَنِحْنَ قَاعِدِينْ نُصُومُوا وَ نَبْكُوا فِي الشَّهَرْ الْخَامِسْ أَشَانْ نِذَّكَّرَوْا دَمَارْ هَنَا بَيْت اللّٰهْ. وَ هَسَّعْ دَا، وَاجِبْ نِسَوُّوهْ وَلَّا لَا؟»
4وَ دَاهُو اللّٰهْ الْقَادِرْ حَجَّى لَيِّ وَ قَالْ: 5«قُولْ لِكُلَّ شَعَبْ الْبَلَدْ وَ لِرُجَالْ الدِّينْ:
‹وَكِتْ صُمْتُوا وَ حِزِنْتُوا
فِي الشَّهَرْ الْخَامِسْ وَ السَّابِعْ،
وَ دَا مِنْ مُدَّةْ 70 سَنَةْ،
صِيَامْكُو دَا لَيِّ أَنَا وَلَّا؟
6وَ وَكِتْ أَكَلْتُوا وَ شِرِبْتُوا،
مَا لِنُفُوسْكُو بَسْ وَلَّا؟›»
7اللّٰهْ حَجَّى مِثِلْ دَا بِوَاسِطَةْ الْأَنْبِيَاء هَنَا زَمَانْ. وَ دَا وَكِتْ سُكَّانْ مَدِينَةْ الْقُدُسْ وَ حِلَّالْهَا الْمُحَوِّقِينْهَا قَاعِدِينْ فِي رَاحَةْ وَ صَحَرَاءْ نَقَبْ وَ سَهَلَةْ شَفِيلَةْ مَلَانِينْ بِسُكَّانْ.
8وَ اللّٰهْ حَجَّى لَيِّ وَ قَالْ: 9«دَاهُو اللّٰهْ الْقَادِرْ قَالْ:
‹أَحْكُمُوا بِالْحَقّ وَ الْعَدَالَةْ
وَ خَلِّي أَيِّ وَاحِدْ يِسَوِّي لِأَخُوهْ
الْخَيْر وَ الرَّحْمَةْ.
10مَا تَظُلْمُوا الْأَرْمَلَةْ وَ لَا الْأَتِيمْ
وَ لَا الْأَجْنَبِي وَ لَا الْمِسْكِينْ.
وَ خَلِّي نَادُمْ مَا يِشِيلْ نِيَّةْ
لِيِسَوِّي الْفَسَالَةْ لِأَخُوهْ.›»
11وَ لَاكِنْ هُمَّنْ أَبَوْا مَا يُخُطُّوا بَالْهُمْ. قَوَّوْا رُوسَيْهُمْ وَ سَدَّوْا أُدْنَيْهُمْ أَشَانْ مَا يَسْمَعَوْا. 12وَ هُمَّنْ قَوَّوْا قَلِبْهُمْ مِثِلْ حَجَرْ أَشَانْ مَا يَسْمَعَوْا شُرُوطْ التَّوْرَاةْ وَ الْكَلَامْ الْاللّٰهْ الْقَادِرْ رَسَّلَهْ لَيْهُمْ بِوَاسِطَةْ رُوحَهْ وَ بِوَاسِطَةْ الْأَنْبِيَاء هَنَا زَمَانْ. وَ دَا بَسْ سَبَبْ الْغَضَبْ الشَّدِيدْ هَنَا اللّٰهْ الْقَادِرْ.
13وَ فِي شَانْ دَا، اللّٰهْ الْقَادِرْ قَالْ: «مِثِلْ أَنَا نَادَيْتهُمْ وَ هُمَّنْ مَا سِمْعَوْنِي، هُمَّنْ كُلَ يِنَادُونِي وَ أَنَا مَا نَسْمَعْهُمْ. 14وَ أَنَا شَتَّتُّهُمْ عَلَيْ كُلَّ الْأُمَمْ الْأَبَداً مَا يَعَرْفُوهُمْ. وَ بَعَدْ شَتَّتُّهُمْ، الْبَلَدْ خِرْبَتْ وَ مَا فِي الْيَمْشِي لَيْهَا وَ لَا الْيَجِي مِنْهَا. وَ بَلَدْهُمْ السَّمْحَةْ دِي، سَوَّوْهَا خَرَابْ.»
Právě zvoleno:
زَكَرِيَّا 7: ع.د.ت19
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
La Bible en arabe tchadien © Alliance biblique du Tchad, 2019