ܐܶܓܰܪܬ̥ܳܐ ܠܰܪّܽܘܡܳܝ̈ܶܐ 2
2
ܗ̄ܽܘ ܕܺܝܢܳܐ ܟܺܐܢܳܐ ܕܰܐܠܳܗܳܐ
1ܡܰܗ̄ܘܟ̥ܰܐ، ܠܰܝ̱ܬ ܠܳܟ̥ ܡܰܦܬܰܚ ܦܶܡܳܐ، ܐܳܘ ܒܰܪܢܳܫܳܐ، ܕ݄ܟܕܳܝ݄ܢ ܗ̄ܽܘ ܚܰܒ̥ܪܰܝܕ̥ܶܗ، ܒܰܗ̄ܝܳܐ ܕ݄ܟܕܰܝܢܰܬ ܚܰܒ̥ܪܳܟ̥، ܪܽܘܚܳܟ̥ ܟܕܰܝܢܰܬ. ܘܗܰܬ ܒܽܗ̄ܘ ܡܶܕܶܐ ܕܟܳܕܰܝܢܰܬ ܥܰܝܢ ܗ̄ܺܝ ܡܶܕܶܐ ܟܣܰܝܡܰܬ. 2ܘܟܳܐܕ̥ܥܺܝܢܰܐ ܕܽܗ̄ܘ ܕܺܝܢܳܐ ܕܰܐܠܳܗܳܐ ܒܟܺܐܢܽܘܬ̥ܳܐ ܝܳܐ ܥܰܠ ܐܰܝܢܰܐ ܕ݄ܟܣܰܝܡܺܝ ܗ̄ܰܥܒܳܕ̥̈ܰܢܺܝ. 3ܘܡ݄ܢ ܟܚܳܫܒ̥ܰܬ، ܐܳܘ ܒܰܪܢܳܫܳܐ، ܕ݄ܟܕܰܝܢܰܬ ܠܰܗ̄ܢܺܝ ܕ݄ܟܣܰܝܡܺܝ ܗ̄ܰܥܒܳܕ̥̈ܰܢܺܝ ܘܗܰܬ ܣܬܶܝ ܟܣܰܝܡܰܬّܶܗ؟ ܩܰܝ ܟܺܝܒܳܟ̥ ܥܳܪܩܰܬ ܡܽܗ̄ܘ ܕܺܝܢܳܐ ܕܰܐܠܳܗܳܐ؟ 4ܐܰܘ ܥܰܠ ܗ̄ܺܝ ܒܰܣܺܝܡܽܘܬ̥ܳܐ ܪܰܒܬ̥ܳܐ ܕܰܐܠܳܗܳܐ ܘܥܰܠ ܠܶܒܶܗ ܗ̄ܽܘ ܪܘܺܝܚܳܐ ܘܥܰܠ ܗ̄ܽܘ ܦܽܘܪܣܳܐ ܕܗܽܒ̥ ܠܶܗ ܠܳܟ̥ ܟܡܰܡܪܚܰܬ! ܘܩܰܝ ܠ݄ܐ ܟ݄ܐܕ̥ܥܰܬ ܕܺܗ̄ܝ ܒܰܣܺܝܡܽܘܬ̥ܳܐ ܕܰܐܠܳܗܳܐ ܠܺܗ̄ܝ ܬܝܳܒܽܘܬ̥ܳܐ ܟܡܰܝܬܝܳܐ ܠܳܟ̥؟ 5ܐܶܠܳܐ ܡܺܗ̄ܝ ܩܰܫܝܽܘܬ̥ܳܐ ܕܠܶܒܳܟ̥ ܕܠ݄ܐ ܟܬܰܝܒܰܬ ܟܣܰܝܡܰܬ ܠܳܟ̥ ܣܺܝܡܬܳܐ ܕܪܽܘܓ̥ܙܳܐ ܠܽܗ̄ܘ ܝܰܘܡܳܐ ܕܽܗ̄ܘ ܪܽܘܓ̥ܙܳܐ، ܘܠܽܗ̄ܘ ܓܶܠܝܳܢܳܐ ܕܽܗ̄ܘ ܕܺܝܢܳܐ ܟܺܐܢܳܐ ܕܰܐܠܳܗܳܐ، 6ܕܟܳܗ̄ܒܶܐ ܠܟܽܘܠ ܚܰܕ̱ ܐܟ̥ ܕܽܗ̄ܘ ܥܒܳܕ̥ܰܝܕ̥ܶܗ. 7ܠܰܐܝܢܰܐ ܕܒܺܗ̄ܝ ܡܣܰܝܒܪܳܢܽܘܬ̥ܳܐ ܕܰܥܒܳܕ̥̈ܶܐ ܛܳܒ̥̈ܶܐ ܟ݄ܐܒܥܺܝ ܬܶܫܒܽܘܚܬܳܐ ܘܺܐܝܩܳܪܳܐ ܘܠܳܐ ܚܪܳܒ̥ܳܐ، ܓܕܳܗ̄ܒܰܠّܶܗ ܚܰܝ̈ܶܐ ܕ݄ܠܥܳܠܰܡ. 8ܘܰܐܝܢܰܐ ܕܟܳܡܥܰܢܬܺܝ ܘܠ݄ܐ ܟܫ݄ܡܥܺܝ ܠܽܗ̄ܘ ܫܪܳܪܳܐ، ܐܶܠܳܐ ܠܺܗ̄ܝ ܚܛܺܝܬ̥ܳܐ ܟܫ݄ܡܥܺܝ ܘ݄ܟܡܰܩܒܠܺܝ، (ܐܰܠܳܗܳܐ) ܓܕܳܗ̄ܒܰܠّܶܗ ܪܽܘܓ̥ܙܳܐ ܘܚܶܡܬܳܐ، 9ܘܥܳܩܬܳܐ ܘܫܽܘܢܳܩܳܐ ܠܟܽܘܠ ܚܰܕ̱ ܕܣܳܝ݄ܡ ܒܺܝܫ̈ܳܬ̥ܳܐ، ܒܺܗ̄ܝ ܩܰܕ̱ܡܰܝܬܳܐ ܠܰܝّܽܘܕ̥̈ܳܝܶܐ ܘܒ݄ܬ̥݄ܪ ܠܰܗ̄ܢ ܐܰܪ̈ܡܳܝܶܐ. 10ܘܫܽܘܒܚܳܐ ܘܺܐܝܩܳܪܳܐ ܘ݄ܫܠܳܡܳܐ ܠܟܽܘܠ ܚܰܕ̱ ܕܣܳܝ݄ܡ ܛܳܒ̥̈ܳܬ̥ܳܐ، ܒܺܗ̄ܝ ܩܰܕ̱ܡܰܝܬܳܐ ܠܰܝّܽܘܕ̥̈ܳܝܶܐ ܘܒ݄ܬ̥݄ܪ ܠܰܗ̄ܢ ܐܰܪ̈ܡܳܝܶܐ. 11ܡܺܐܝܕ̥ܶܗ ܕܠܰܝܬ ܬܰܪܬܶܝ ܦ̈ܳܬ̥ܳܬ̥ܳܐ ܓܰܒ ܐܰܠܳܗܳܐ: 12ܐܰܝܢܰܐ ܕܠܳܐ ܡܽܗ̄ܘ ܢܳܡܽܘܣܳܐ (ܕܡܽܘܫܶܐ) ܚܰܛ݄ܢ، ܠܳܐ ܡܽܗ̄ܘ ܢܳܡܽܘܣܳܐ (ܕܡܽܘܫܶܐ) ܟܡܺܝܣܰܟܪܺܝ. ܘܰܐܝܢܰܐ ܕܒܽܗ̄ܘ ܢܳܡܽܘܣܳܐ ܚܰܛ݄ܢ، ܡܽܗ̄ܘ ܢܳܡܽܘܣܳܐ ܓܡܺܝܕܳܢܺܝ. 13ܡܺܐܝܕ̥ܶܗ ܕܠܳܐ ܗ̄ܰܫّܰܡܳܥ̈ܶܐ ܕܽܗ̄ܘ ܢܳܡܽܘܣܳܐ ܟܺܐܢ̈ܶܐ ܢܶܝ ܩ݄ܕ̱ܡ ܐܰܠܳܗܳܐ، ܐܶܠܳܐ ܗ̄ܰܣّܰܝܳܡ̈ܶܐ ܕܽܗ̄ܘ ܢܳܡܽܘܣܳܐ ܢܶܝ ܗ̄ܰܙّܰܕ̈ܺܝܩܶܐ. 14ܘܰܥّܰܡ̈ܶܐ ܕܠܰܝ̱ܬّܶܗ ܢܳܡܽܘܣܳܐ، ܡܽܗ̄ܘ ܟܝܳܢܰܬّ̥ܶܗ ܕܣܰܝܡܺܝ ܐܟ̥ ܕܽܗ̄ܘ ܢܳܡܽܘܣܳܐ؛ ܗܰܢܺܝ ܥܰܡ ܕܠܰܝ̱ܬ ܗ̄ܘܰܐ ܠّܶܗ ܢܳܡܽܘܣܳܐ، ܠܪܽܘܚܰܝّܶܗ ܗܰܘ݄ܢ ܢܳܡܽܘܣܳܐ. 15ܘܗ݄ܢّܶܝ ܟܡܰܚܘ݄ܢ ܗ̄ܽܘ ܥܒܳܕ̥ܳܐ ܕܽܗ̄ܘ ܢܳܡܽܘܣܳܐ ܟܬ̥ܺܝܒ̥ܳܐ ܝܳܐ ܥܰܠ ܠܶܒܰܝّܶܗ، ܘ݄ܟܣܳܗܕ̥ܳܐ ܐܰܥܠܰܝّܶܗ ܗ̄ܺܝ ܬܺܐܪܬܰܬّ̥ܶܗ ܐܶܡܰܐ ܕܰܡّܰܚܫ̈ܒܳܬ̥ܰܬّ̥ܶܗ ܟܬܳܒ̥ܪܝ ܚܕ̥ܳܕ̥̈ܶܐ ܐܰܘ ܟܠܳܚܡܺܝ ܚܕ̥ܳܕ̥̈ܶܐ، 16ܒܽܗ̄ܘ ܝܰܘܡܳܐ ܕܕܳܝ݄ܢ ܐܰܠܳܗܳܐ ܗ̄ܰܟّܰܣܝ̈ܳܬ̥ܳܐ ܕܰܗ̄ܢ ܢܳܫ̈ܶܐ ܐܟ̥ ܕܽܗ̄ܘ ܡܓܰܠܝܘ̇ܢ ܕܺܝܕ̥ܺܝ، ܒܝܶܫܽܘܥ ܡܫܺܝܚܳܐ.
ܗ̄ܽܘ ܕܺܝܢܳܐ ܕܟܳܐܕ̥ܥܺܝ ܗ̄ܽܘ ܢܳܡܽܘܣܳܐ
17ܘܶܐܢ ܗܰܬ ܕܝܽܘܕ̥ܳܝܳܐ ܟܡ݄ܩܪܰܬ، ܘܥܰܠ ܗ̄ܽܘ ܢܳܡܽܘܣܳܐ ܟܡ݄ܬ̥ܟ̥ܳܠܰܬ، ܘܒܰܐܠܳܗܳܐ ܟܡܶܫܬܰܒܗܪܰܬ، 18ܕܟܳܐܕ̥ܥܰܬ ܗ̄ܽܘ ܨܶܒܝܳܢܰܝܕ̥ܶܗ، ܘ݄ܟܦܳܪܫܰܬ ܗ̄ܰܘّܳܠܝ̈ܳܬ̥ܳܐ ܕܝܰܠܺܝܦܰܬ ܡܽܗ̄ܘ ܢܳܡܽܘܣܳܐ، 19ܘ݄ܬܟܺܝܠܰܬ ܥܰܠ ܪܽܘܚܳܟ̥ ܕ݄ܡܕܰܒܪܳܢܳܐ ܕܰܣّܰܡܝ̈ܶܐ ܗܰܬ، ܘܢܽܘܗܪܳܐ ܕܰܐܝܢܰܐ ܕܟ݄ܬܢܶܝ ܒܽܗ̄ܘ ܥܰܡܛܳܢܳܐ، 20ܘ݄ܡܗܰܕܝܳܢܳܐ ܕܰܣّܰܟ̥̈ܠܶܐ، ܘܡܰܠܦܳܢܳܐ ܕܰܛܠܳܝ̈ܶܐ، ܘܟ݄ܬ ܠܳܟ̥ ܗ̄ܺܝ ܨܽܘܪܬܳܐ ܕܺܗ̄ܝ ܝܕ̥ܰܥܬܳܐ ܘܕܽܗ̄ܘ ܫܪܳܪܳܐ ܒܽܗ̄ܘ ܢܳܡܽܘܣܳܐ، 21ܗܰܢ ܢܰܩܠܐ ܗܰܬ ܕܟܳܡܰܘܠܦܰܬ ܠܰܚܪ̈ܶܢܶܐ، ܠܢܰܦܫܳܟ̥ ܠ݄ܐ ܟܡܰܘܠܦܰܬ؟ ܘ݄ܕܟܳܟ݄ܪܙܰܬ ܕܠܳܐ ܓܳܢܒ̥ܺܝ، ܘܗܰܬ ܟܳܓ݄ܢܒ̥ܰܬ؟ 22ܘ݄ܕܟ݄ܐܡّܰܪ̱ܬ ܕܠܳܐ ܓܰܝܪܺܝ، ܘܗܰܬ ܟܳܓܰܝܪܰܬ؟ ܘܗܰܬ ܕܟܳܡܚܰܩܪܰܬ ܗ̄ܰܨّܰܠܡ̈ܶܐ، ܟܳܓ݄ܢܒ̥ܰܬ ܗ̄ܽܘ ܒܰܝܬܳܐ ܡܩܰܕܫܳܐ؟ 23ܘܗܰܬ ܕ݄ܟܡܶܫܬܰܒܗܪܰܬ ܒܽܗ̄ܘ ܢܳܡܽܘܣܳܐ، ܒܰܗ̄ܝܳܐ ܕܟܳܥܳܒܪܰܬ ܥܰܠ ܗ̄ܽܘ ܢܳܡܽܘܣܳܐ ܟܳܡܨܰܥܪܰܬ ܠܰܐܠܳܗܳܐ؟ 24ܐ݄ܫܡܶܗ ܕܰܐܠܳܗܳܐ ܡܶܢ̱ ܦܳܬ̥ܰܝܟ̥ܽܘ ܟܡܺܝܓܰܕ݄ܦ ܒܰܝܢ ܗ̄ܰܥّܰܡ̈ܶܐ، ܐܟ̥ ܕ݄ܟܬ̥ܺܝܒ̥. 25ܡܺܐܝܕ̥ܶܗ ܕܺܗ̄ܝ ܓܙܽܘܪܬܳܐ ܟ݄ܡܗܰܢܝܳܐ ܠܳܟ̥ ܐܶܢ ܕ݄ܣܰܝܡܰܬ ܒܽܗ̄ܘ ܢܳܡܽܘܣܳܐ، ܘܶܐܢ ܕܥܳܒܪܰܬ ܥܰܠ ܗ̄ܽܘ ܢܳܡܽܘܣܳܐ، ܗ̄ܺܝ ܓܙܽܘܪܬܰܝܕ̥ܳܟ̥ ܗܰܘܝܳܐ ܥܽܘܪܠܽܘܬ̥ܳܐ. 26ܘܶܐܢ (ܗܰܢ ܢܳܫ̈ܶܐ ܕܺܗ̄ܝ) ܥܽܘܪܠܽܘܬ̥ܳܐ ܟܢܳܛܪܺܝ ܗ̄ܽܘ ܦܽܘܩܕܳܢܳܐ ܕܽܗ̄ܘ ܢܳܡܽܘܣܳܐ، ܠܳܐ ܟܰܐܠܶܗ ܟܡ݄ܚܫܳܒ̥ܺܝ ܡܺܗ̄ܝ ܓܙܽܘܪܬܳܐ؟ 27ܘܗܰܢ݄ܟ ܕܒܽܗ̄ܘ ܟܝܳܢܰܬّ̥ܶܗ ܡܺܗ̄ܝ ܥܽܘܪܠܽܘܬ̥ܳܐ ܢܶܝ ܘ݄ܟܣܰܝܡܺܝ ܗ̄ܽܘ ܢܳܡܽܘܣܳܐ ܓܕܰܝܢܺܝ ܠܳܟ̥ ܗܰܬ ܕܟ݄ܬ ܠܳܟ̥ ܗ̄ܽܘ ܟܬ̥ܳܒ̥ܳܐ ܘܺܗ̄ܝ ܓܙܽܘܪܬܳܐ ܘ݄ܟܬܳܒ̥ܪܰܬ ܗ̄ܽܘ ܢܳܡܽܘܣܳܐ. 28ܡܰܗ̄ܘܟ̥ܰܐ، ܠܳܐ ܒܽܗ̄ܘ ܡܶܕܶܐ ܕ݄ܟܡܰܚܘܶܐ ܡܶܢ̱ ܠܰܪܒ̥ܰܠ ܟܳܗ̄ܘܶܐ ܗ̄ܽܘ ܝܽܘܕ̥ܳܝܳܐ، ܘܠܳܐ ܒܽܗ̄ܘ ܡܶܕܶܐ ܕܡ݄ܚܙܶܐ ܒܽܗ̄ܘ (ܩܛܳܥܳܐ ܕܽܗ̄ܘ) ܒܰܣܪܳܐ ܟܳܗ̄ܘܝܳܐ ܓܙܽܘܪܬܳܐ. 29ܐܶܠܳܐ ܗ̄ܽܘ ܝܽܘܕ̥ܳܝܳܐ ܗܰܘܳܐ ܝܳܐ ܕܟ݄ܬ ܝܳܐ ܡܶܢ̱ ܠܰܘܓ̥݄ܠ، ܘܺܗ̄ܝ ܓܙܽܘܪܬܳܐ ܗܰܝܳܐ ܝܳܐ ܕܟ݄ܬ ܝܳܐ ܕܽܗ̄ܘ ܠܶܒܳܐ، ܒܺܗ̄ܝ ܪܽܘܚܳܐ ܘܠܳܐ ܒܽܗ̄ܘ ܟܬ̥ܳܒ̥ܳܐ، ܐܰܝܢܰܐ ܕܽܗ̄ܘ ܫܽܘܒܚܰܝܕ̥ܰܗ ܠܰܝ̱ܬ ܝܳܐ ܡܰܗ̄ܢ ܢܳܫ̈ܶܐ ܐܶܠܳܐ ܡܰܢ̱ ܐܠܳܗܳܐ.
Právě zvoleno:
ܐܶܓܰܪܬ̥ܳܐ ܠܰܪّܽܘܡܳܝ̈ܶܐ 2: ܟܬܒܐ
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Suryoyo Bible © 2024 Aramaic Bible Translation