ܐܶܓܰܪܬ̥ܳܐ ܠܰܪّܽܘܡܳܝ̈ܶܐ 11
11
ܗ̄ܰܢ ܢܳܫ̈ܶܐ ܡܢܰܩܝ̈ܶܐ ܕܦܰܝܺܝܫܺܝ
1ܐܶܠܳܐ ܟܳܐܡܰܪ ܐ̱ܢܳܐ: ܩܰܝ ܐܰܠܳܗܳܐ ܛܪܶܐ ܠܶܗ ܡܽܗ̄ܘ ܥܰܡܰܝܕ̥ܶܗ؟ ܠܳܐ، ܚܳܣ. ܘܟܰܐܠܺܝ ܐܳܢܳܐ ܣܬܶܝ ܡܶܢ̱ ܐܺܝܣܪܳܐܶܝܠ ܐ̱ܢܳܐ، ܡܽܗ̄ܘ ܙܰܪܥܳܐ ܕܰܐܒܪܳܗܳܡ، ܘܡܺܗ̄ܝ ܫܰܪܒܬ̥ܳܐ ܕܒܶܢܝܳܡܶܝܢ. 2ܐܰܠܳܗܳܐ ܠܳܐ ܛܪܶܐ ܠܶܗ ܡܽܗ̄ܘ ܥܰܡܰܝܕ̥ܶܗ، ܗܰܢܳܐ ܕܡܶܢ̱ ܡܶܩ݄ܕ̱ܡ ܐܳܕ̥ܰܥ ܗ̄ܘܰܝ ܠܶܗ. ܐܰܘ ܠ݄ܐ ܟ݄ܐܕ̥ܥܺܝܬܽܘ ܒܽܗ̄ܘ ܟܬ̥ܳܒ̥ܳܐ ܕܶܐܠܺܝܳܐ ܡ݄ܢ ܐܡ݄ܪ ܠܶܗ، ܗ̄ܺܝ ܢܰܩܠܐ (ܕܶܐܠܺܝܳܐ) ܡܰܫܟܶܐ ܗ̄ܘܰܐ ܠܰܐܠܳܗܳܐ ܥܰܠ ܗ̄ܰܢ ܐܰܒܢ̈ܶܐ ܕܺܐܝܣܪܳܐܶܝܠ ܘܳܐܡܰܪ ܗ̄ܘܰܐ: 3”ܡܳܪܝ: ܩܛ݄ܠّܶܗ ܠܰܗ̄ܢ ܢܒܺܝ̈ܰܝܕ̥ܳܟ̥، ܘܠܰܡّܰܕ̥̈ܒܚܰܝܕ̥ܳܟ̥ ܕܪܰܠّܶܗ، ܘܳܐܢܳܐ ܠܪܽܘܚܺܝ ܦܰܝ݄ܫ ܐ̱ܢܳܐ، ܘܟ݄ܐܒܥܺܝ ܩ݄ܛܠܺܝ ܠܺܝ.“
4ܘ݄ܒܓܶܠܝܳܢܳܐ، ܐܰܠܳܗܳܐ ܐܡ݄ܪ ܠܶܗ ܠܶܗ: ”ܟܰܐܠܺܝ ܛܪܶܐ ܠܺܝ ܠܪܽܘܚܺܝ ܫܰܒ̥ܥܰܐܠܦܳܐ ܓܰܒ̥ܪ̈ܶܐ ܕܥܰܠ ܒܰܪ̈ܟܳܬ̥ܰܝّܶܗ ܠܳܐ ܒܪ݄ܟّܶܗ ܘܠܳܐ ܣܓ̥݄ܕّܶܗ ܠܽܗ̄ܘ ܒܰܥܠܳܐ.“
5ܘܗܰܘܟ̥ܰܐ ܣܬܶܝ ܒܽܗ̄ܘ ܙܰܒܢܰܢܳܐ، ܐ݄ܫܡ݄ܢܬܳܐ ܦܰܝܺܝܫܺܝ ܡܰܢ̱ ܓّܰܒ̈ܝܶܐ (ܡܢܰܩܝ̈ܶܐ) ܕܒܺܗ̄ܝ ܛܰܝܒܽܘܬ̥ܳܐ. 6ܘܶܐܢ ܒܺܗ̄ܝ ܛܰܝܒܽܘܬ̥ܳܐ ܝܳܐ، ܠܰܝܬ ܝܳܐ ܡܰܢ̱ ܥܒܳܕ̥̈ܶܐ. ܘܶܐܢ ܠܳܐ، ܗ̄ܺܝ ܛܰܝܒܽܘܬ̥ܳܐ ܠܰܝ̱ܬ ܝܳܐ ܛܰܝܒܽܘܬ̥ܳܐ. ܘܶܐܢ ܒܰܥܒܳܕ̥̈ܶܐ ܝܳܐ، ܠܰܝ̱ܬ ܝܳܐ ܡܺܗ̄ܝ ܛܰܝܒܽܘܬ̥ܳܐ. ܘܶܐܢ ܠܳܐ، ܗ̄ܽܘ ܥܒܳܕ̥ܳܐ ܠܰܝ̱ܬ ܝܳܐ ܥܒܳܕ̥ܳܐ.
7ܡ݄ܢܝܳܐ ܗܰܢ ܢܰܩܠܐ؟ ܗ̄ܽܘ ܡܶܕܶܐ ܕܳܐܒܰܥ ܗ̄ܘܰܐ ܐܺܝܣܪܳܐܶܝܠ ܠܳܐ ܚܙܶܐ ܠܶܗ. ܐܶܠܳܐ ܗ̄ܺܝ ܐ݄ܫܡ݄ܢܬܳܐ ܕ݄ܓܒܶܐ ܠܶܗ (ܡܢܰܩܶܐ ܠܶܗ) ܐܰܠܳܗܳܐ ܚܙܶܐ ܠܰܗ، ܘܰܚܪ̈ܶܢܶܐ ܣܰܡ݄ܢ ܒܠܶܒܰܝّܶܗ. 8ܐܟ̥ ܕ݄ܟܬ̥ܺܝܒ̥: ”ܐܰܠܳܗܳܐ ܗܽܒ̥ ܠܶܗ ܐܰܠّܶܗ ܪܽܘܚܳܐ ܕܡܰܣ݄ܡܝܳܐ ܘܥܰܝܢ̈ܶܐ ܕܠܳܐ ܚܳܙ݄ܢ ܐܰܒّܶܗ ܘܰܐܕ̥̈ܢܶܐ ܕܠܳܐ ܫ݄ܡܥܺܝ ܗܳܠ ܠܰܐܕܝܰܘܡܰܐ.“ 9ܘܕܰܘܺܝܕ̥ ܣܬܶܝ ܐܡ݄ܪ ܠܶܗ: ”ܛܪܳܐ ܗ̄ܽܘ ܦܳܬܽܘܪܰܬّ̥ܶܗ ܦܰܚܳܐ ܗܳܘܶܐ ܩܽܘܕ̱ܡܰܝّܶܗ، ܘܽܗ̄ܘ ܐܰܓ̥ܪܰܬّ̥ܶܗ ܟܶܐܦܳܐ ܕܛܶܪܒܰܠܬܳܐ. 10ܘܥܰܝܢ̈ܳܬ̥ܰܝّܶܗ ܛܪܳܐ ܥ݄ܬܡܺܝ ܕܠܳܐ ܚܳܙ݄ܢ، ܘܚܰܨܰܝّܶܗ ܡܺܝܟ݄ܦ ܗ̄ܽܘ ܙܰܒܢܳܐ ܟܽܘܠܶܗ.“ 11ܘܗܶܫ ܟܳܐܡܰܪ ܐ̱ܢܳܐ: ܩܰܝ ܡܛܰܪܒܠܺܝ ܠܰܫܰܢ ܕܢܳܦܠܺܝ؟ ܠܳܐ، ܚܳܣ. ܐܶܠܳܐ ܒܺܗ̄ܝ ܛܶܪܒܰܠܬܳܐ ܕ݄ܡܛܰܪܒܠܺܝ، ܗܰܘ݄ܢ ܚܰܝ̈ܶܐ ܠܰܥّܰܡ̈ܶܐ، ܠܰܫܰܢ (ܗ݄ܢّܶܝ) ܕܗܳܘܰܠّܶܗ ܛܢܳܢܳܐ. 12ܘܶܐܢ ܗ̄ܺܝ ܛܶܪܒܰܠܬܳܐ ܕ݄ܡܛܰܪܒܠܺܝ ܗܰܘܝܳܐ ܥܽܘܬ̥ܪܳܐ ܠܽܗ̄ܘ ܥܳܠܡܳܐ، ܘܺܗ̄ܝ ܡܶܣܟܶܢܽܘܬ̥ܰܬّ̥ܶܗ ܗܰܘܝܳܐ ܥܽܘܬ̥ܪܳܐ ܠܰܥّܰܡ̈ܶܐ، ܡ݄ܩܰܐ ܙ݄ܕ ܓܕܽܗ̄ܘܝܳܐ ܗ̄ܺܝ ܥܰܬܺܝܪܽܘܬ̥ܰܬّ̥ܶܗ.
ܙܽܘܗܳܪܳܐ ܠܰܗ̄ܢܺܝ ܕ݄ܚܙܰܠّܶܗ ܗ̄ܺܝ ܛܰܝܒܽܘܬ̥ܳܐ
13ܘܰܐܠܟ̥ܽܘ ܟܳܐܡܰܪ ܐ̱ܢܳܐ ܠܟ̥ܽܘ ܝܰܐ ܥܰܡ̈ܶܐ: ܐܳܢܳܐ ܕܟ݄ܬ ܐ̱ܢܳܐ ܗ̄ܽܘ ܫܠܺܝܚܳܐ ܕܰܥّܰܡ̈ܶܐ، ܟ݄ܡܫܰܒܰܚ ܐ̱ܢܳܐ ܗ̄ܺܝ ܬܶܫܡܶܫܬܰܝܕ̥ܺܝ، 14ܟܺܝܬ ܕܳܗ̄ܒܶܐ ܐ̱ܢܳܐ ܛܢܳܢܳܐ ܠܽܗ̄ܘ ܥܰܡܰܝܕ̥ܺܝ، ܘܗ݄ܢ ܡ݄ܢّܶܗ ܡܰܝܬܶܐ ܐ̱ܢܳܐ ܠܰܚّܰܝ̈ܶܐ. 15ܐܶܢ ܕܽܗ̄ܘ ܪܽܘܚܩܰܬّ̥ܶܗ (ܡܰܢ̱ ܐܠܳܗܳܐ) ܫܠܳܡܳܐ ܠܽܗ̄ܘ ܥܳܠܡܳܐ ܗܰܘܺܝ، ܗܰܢ ܢܰܩܠܐ ܡ݄ܩܰܐ ܓܕܳܗ̄ܘܶܐ ܗ̄ܽܘ ܕܥܳܪܰܬّ̥ܶܗ، ܐܶܠܳܐ ܚܰܝ̈ܶܐ ܡܒܰܝܢ ܗ̄ܰܡّܺܝ̈ܬ̥ܶܐ. 16ܘܕܳܗ̄ܘܶܐ ܗ̄ܽܘ ܚܡܺܝܪܳܐ (ܪܺܝܫܺܝܬ̥ܳܐ) ܡܩܰܕܫܳܐ، ܗ̄ܽܘ ܠܰܝܫܳܐ ܣܬܶܝ (ܡܩܰܕܫܳܐ ܝܳܐ). ܘܕܳܗ̄ܘܶܐ ܗ̄ܽܘ ܘܰܪܺܝܕ̥ܳܐ ܡܩܰܕܫܳܐ، ܗ̄ܰܣّܰܘܟ̈ܶܐ ܣܬܶܝ (ܡܩܰܕ̈ܫܶܐ ܢܶܝ). 17ܘܶܐܢ ܡܰܢ̱ ܣّܰܘܟ̈ܶܐ ܩܛܺܝܥܺܝ، ܘܗܰܬ ܕܟ݄ܬ ܗ̄ܰܬ ܡܰܢ̱ ܙّܰܝܬܽܘܢ̈ܶܐ ܕܽܗ̄ܘ ܒܰܪܳܐ ܡܛܰܥܡܰܬ ܒܕܽܘܟܬ̥ܰܝّܶܗ ܘܗܳܘܰܬ ܫܰܘܬܳܦܳܐ (ܫܳܪܺܝܟܳܐ) ܠܽܗ̄ܘ ܥܶܩܳܪܳܐ ܘܠܺܗ̄ܝ ܕܶܗܢܺܝܬ̥ܳܐ (ܬܽܘܩܢܳܐ) ܕܰܙّܰܝܬܽܘܢ̈ܶܐ، 18ܠܳܐ ܡܺܝܫܰܒܗܪܰܬ ܥܰܠ ܗ̄ܰܣّܰܘܟ̈ܶܐ (ܕ݄ܩܛܺܝܥܺܝ). ܘܶܐܢ ܡܺܝܫܰܒܗܪܰܬ، ܝܕ̥ܰܥ ܕܠܳܐ ܗܰܬ ܗ̄ܰܬ ܕ݄ܟܛܳܥܢܰܬ ܗ̄ܽܘ ܘܰܪܺܝܕ̥ܳܐ، ܐܶܠܳܐ ܗ̄ܽܘ ܘܰܪܺܝܕ̥ܳܐ ܟܛܳܥܰܢ ܠܳܟ̥. 19ܘܟܺܝܬ ܕ݄ܐܡّܰܪ̱ܬ: ܗ̄ܰܣّܰܘܟ̈ܶܐ ܩܛܺܝܥܺܝ ܕܳܐܢܳܐ ܒܕܽܘܟܬ̥ܰܝّܶܗ ܡܛܰܥܰܡ ܐ̱ܢܳܐ. 20ܛܳܒ̥ܳܐ! ܗܰܢܺܝ ܥܰܠ ܕܠܳܐ ܡܗܰܝܡܰܢّܶܗ ܩܛܺܝܥܺܝ. ܘܗܰܬ ܥܰܠ ܕ݄ܡܗܰܝܡܰܢ ܠܳܟ̥ ܩܰܝܺܝܡ݄ܬ. ܠܳܐ ܡܰܥܠܰܬ ܪܽܘܚܳܟ̥، ܐܶܠܳܐ ܙܘܿܥ. 21ܘܶܐܢ ܐܰܠܳܗܳܐ ܠܳܐ ܡܰܪܚܰܡ ܠܶܗ ܥܰܠ ܗ̄ܰܣّܰܘܟ̈ܶܐ (ܩܰܕ̱ܡܳܝ̈ܶܐ) ܕܟ݄ܬܢܶܝ ܡܽܗ̄ܘ ܟܝܳܢܳܐ (ܕܽܗ̄ܘ ܐܺܝܠܳܢܳܐ)، ܟܺܝܬ ܕܰܐܥܠܳܟ̥ ܣܬܶܝ ܠܳܐ ܡܰܪܚ݄ܡ. 22ܗܰܢ ܢܰܩܠܐ ܚܙܰܝ ܒܺܗ̄ܝ ܒܰܣܺܝܡܽܘܬ̥ܳܐ ܘܒܺܗ̄ܝ ܩܰܫܝܽܘܬ̥ܳܐ ܕܰܐܠܳܗܳܐ: ܩܰܫܝܽܘܬ̥ܳܐ ܥܰܠ ܐܰܝܢܰܐ ܕܢܰܦܺܝܠܺܝ، ܘܒܰܣܺܝܡܽܘܬ̥ܳܐ ܐܰܥܠܳܟ̥، ܐܶܢ ܕܦܰܝܫܰܬ ܒܺܗ̄ܝ ܒܰܣܺܝܡܽܘܬ̥ܳܐ، ܘܶܐܢ ܠܳܐ ܗܰܬ ܣܬܶܝ ܓܡ݄ܩܛܳܥܰܬ. 23ܘܗܰܢ݄ܟ، ܐܶܢ ܕܰܥܺܝܪܺܝ ܘ݄ܡܗܰܝܡܰܢّܶܗ، ܗ݄ܢّܶܝ ܣܬܶܝ ܟܡܺܝܛܰܥܡܺܝ. ܐܰܠܳܗܳܐ ܟܺܝܒܶܗ ܕܕܳܥ݄ܪ ܡܛܰܥܰܡّܶܗ. 24ܘܶܐܢ ܗܰܬ ܕܒܽܗ̄ܘ ܟܝܳܢܰܝܕ̥ܳܟ̥ ܡܽܗ̄ܘ ܐܺܝܠܳܢܳܐ ܕܰܙّܰܝܬܽܘܢ̈ܶܐ ܕܽܗ̄ܘ ܒܰܪܳܐ ܩܛܺܝܥ݄ܬ، ܘ݄ܡܛܰܥܡܰܬ ܒܽܗ̄ܘ ܐܺܝܠܳܢܳܐ ܕܰܙّܰܝܬܽܘܢ̈ܶܐ ܛܳܒ̥̈ܶܐ ܕܠܰܝ̱ܬ ܗ̄ܘܰܐ ܡܽܗ̄ܘ ܟܝܳܢܰܝܕ̥ܳܟ̥، ܗܰܢ ܢܰܩܠܐ ܡ݄ܩܰܐ (ܫܪܳܪܳܐ ܝܳܐ) ܗܰܢ݄ܟ ܐܶܢ ܡܺܝܛܰܥܡܺܝ ܒܽܗ̄ܘ ܙܰܝܬܽܘܢܳܐ ܕܟ݄ܬ ܝܳܐ ܡܽܗ̄ܘ ܟܝܳܢܰܬّ̥ܶܗ.
ܗ̄ܺܝ ܛܰܝܒܽܘܬ̥ܳܐ ܕܰܐܠܳܗܳܐ ܟܡܰܝܕܳܐ ܟܽܘܠ ܢܳܫܳܐ
25ܝܰܐ ܐܰܚ̈ܽܘܢܳܢܰܝܕ̥ܺܝ: ܟܳܐܒܰܥ ܐ̱ܢܳܐ ܕ݄ܐܕ̥ܥܺܝܬܽܘ ܗ̄ܽܘ ܐ̱ܪܳܙܰܢܳܐ ܠܰܫܰܢ ܕܠܳܐ ܚ݄ܫܒ̥ܺܝܬܽܘ ܪ̈ܽܘܚܰܝܟ̥ܽܘ ܚܰܟܺܝܡ̈ܶܐ: ܗ̄ܺܝ ܣܰܡܝܽܘܬ̥ܳܐ ܕܽܗ̄ܘ ܠܶܒܳܐ ܕܗܰܘܝܳܐ ܠܗ݄ܢ ܡܰܗ̄ܢ ܢܳܫ̈ܶܐ ܕܺܐܝܣܪܳܐܶܝܠ ܠܙܰܒܢܳܐ ܟܰܪܝܳܐ ܗܰܘܝܳܐ، ܗܳܠ ܕܥܳܒܪܺܝ ܟܽܘܠّܶܗ ܗ̄ܰܥّܰܡ̈ܶܐ. 26ܘܺܗ̄ܝ ܢܰܩܠܝܳܐ، ܐܺܝܣܪܳܐܶܝܠ ܟܽܘܠܶܗ ܓܚܳܝܶܐ. ܐܟ̥ ܕ݄ܟܬ̥ܺܝܒ̥: ”ܡܶܢ̱ ܨܶܗܝܽܘܢ ܓܕܳܐܬ̥ܶܐ ܗ̄ܽܘ ܦܳܪܽܘܩܳܐ، ܘܓ݄ܕܬܳܠܶܐ ܗ̄ܺܝ ܚܛܺܝܬ̥ܳܐ ܡܶܢ̱ ܝܰܥܩܽܘܒ.“ 27”ܘܺܗ̄ܝ ܢܰܩܠܝܳܐ ܓܕܳܗ̄ܘܰܠّܶܗ ܩܝܳܡܳܐ ܐܰܥܡܺܝ، ܗ̄ܺܝ ܢܰܩܠܐ ܕܫܳܒܰܩ ܐ̱ܢܳܐ ܗ̄ܰܚ̈ܛܳܗܰܬّ̥ܶܗ.“ 28ܡܽܗ̄ܘ ܓܰܒܳܐ ܕ݄ܡܓܰܠܝܘ̇ܢ، (ܗ̄ܰܝّܽܘܕ̥̈ܳܝܶܐ) ܒܥܶܠܕ̈ܒܳܒܶܐ ܢܶܝ ܠܰܫܰܢܰܝܟ̥ܽܘ، ܐܶܠܳܐ ܒܽܗ̄ܘ ܓܒܳܝܳܐ ܕܰܐܠܳܗܳܐ، ܚܰܒܺܝܒ̈ܶܐ ܢܶܝ ܠܰܫܰܢ ܗ̄ܰܢ ܐܰܒܳܗ̈ܶܐ 29ܐܰܠܳܗܳܐ ܠ݄ܐ ܟܕܳܥ݄ܪ ܒܺܗ̄ܝ ܡܰܘܗܰܒܬܳܐ ܕܗܽܒ̥ ܠܶܗ، ܘܠܳܐ ܒܺܗ̄ܝ ܩܪܰܝܬܳܐ ܕ݄ܩܪܶܐ ܠܶܗ. 30ܘܒܶܗ ܐܰܝܕܰܪܒܳܐ ܗܰܬܽܘ ܣܬܶܝ ܥܰܨܝ̈ܶܐ ܗ̄ܘܰܝܬܽܘ ܘܠܳܐ ܫܰܡܺܝܥܺܝܬܽܘ ܠܰܐܠܳܗܳܐ ܡܶܢ̱ ܡܶܩ݄ܕ̱ܡ، ܘܳܐܥܕܳܐ ܡܰܪܚܰܡ ܠܶܗ ܐܰܥܠܰܝܟ̥ܽܘ، ܥܰܠ ܕܗ݄ܢّܶܝ ܥܰܨ݄ܢ ܘܠܳܐ ܫܰܡܺܝܥܺܝ. 31ܗܰܘܟ̥ܰܐ ܣܬܶܝ ܗܰܢܺܝ ܕܥܰܨ݄ܢ ܐܳܥܕܳܐ، ܐܟ̥ ܕܗܰܘܺܝ ܐܰܥܠܰܝܟ̥ܽܘ ܪ̈ܰܚܡܶܐ، ܐܰܥܠܰܝّܶܗ ܣܬܶܝ ܓܕܳܗ̄ܘ݄ܢ ܪ̈ܰܚܡܶܐ. 32ܘܰܐܠܳܗܳܐ ܚܒ݄ܫ ܠܶܗ ܠܟܽܘܠ ܚܰܕ̱ ܒܺܗ̄ܝ ܥܰܨܝܽܘܬ̥ܳܐ، ܠܰܫܰܢ ܕܣܳܝ݄ܡ ܪ̈ܰܚܡܶܐ ܥܰܠ ܟܽܘܠ ܚܰܕ̱.
ܐܰܠܳܗܳܐ ܠ݄ܐ ܟܡ݄ܕܪ݄ܟ
33ܐܳܗ، ܚܘܿܪ ܠܽܗ̄ܘ ܥܽܘܡܩܳܐ ܕܽܗ̄ܘ ܥܽܘܬ̥ܪܳܐ، ܘܺܗ̄ܝ ܚܶܟ̥ܡܬ̥ܳܐ ܘܺܗ̄ܝ ܝܕ̥ܰܥܬܳܐ ܕܰܐܠܳܗܳܐ، ܢܳܫܳܐ ܠܰܝܒܶܗ ܦܳܪ݄ܫ ܗ̄ܰܕّܺܝܢ̈ܰܝܕ̥ܶܗ ܘܕܳܪ݄ܫ ܗ̄ܰܕّܰܪ̈ܒܳܢܰܝܕ̥ܶܗ! 34”ܡܰܢܝܳܐ ܕܰܐܕ̥݄ܥ ܗ̄ܽܘ ܪܶܥܝܳܢܳܐ ܕܡܳܪܝܳܐ، ܐܰܘ ܡܰܢ ܗܰܘܺܝ ܠܶܗ ܚܰܟܺܝܡܳܐ؟ 35ܘܡܰܢܝܳܐ، ܕܡܶܢ̱ ܡܶܩ݄ܕ̱ܡ، ܗܽܒ̥ ܠܶܗ ܠܶܗ، ܘܒ݄ܬ̥݄ܪ ܕܰܥ݄ܪ ܡ݄ܕ ܠܶܗ ܡܶܢܶܗ؟“ 36(ܒ݄ܫܪܳܪܳܐ)، ܟܽܘܠ ܡܶܕܶܐ ܡܶܢܶܗ ܝܳܐ، ܘܶܐܒܶܗ ܝܳܐ، ܘܒܺܐܝܕ̥ܶܗ ܝܳܐ، ܐܶܠܶܗ ܫܽܘܒܚܳܐ ܘܒܽܘܪ̈ܟܳܬ̥ܳܐ ܠܥܳܠܰܡ ܥܳܠܡܺܝܢ. ܐܰܡܺܝܢ.
Právě zvoleno:
ܐܶܓܰܪܬ̥ܳܐ ܠܰܪّܽܘܡܳܝ̈ܶܐ 11: ܟܬܒܐ
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Suryoyo Bible © 2024 Aramaic Bible Translation