ܣܶܦܪܳܐ ܕ݄ܒܪܺܝܬ̥ܳܐ 14
14
1ܘܗܰܘܺܝ ܒܰܝّܰܘܡ̈ܶܐ ܕܳܐܡܰܪܦܶܠ ܗ̄ܽܘ ܡܰܠܟܳܐ ܕܣܶܢܥܳܪ، ܘܳܐܪܺܝܽܘܟ̥ ܗ̄ܽܘ ܡܰܠܟܳܐ ܕܕܰܠܰܣܳܪ، ܘܟܰܪܕܠܰܥܡܰܪ ܗ̄ܽܘ ܡܰܠܟܳܐ ܕܥܺܝܠܰܡ، ܘܬܰܪܥܶܠ ܗ̄ܽܘ ܡܰܠܟܳܐ ܕܰܓّܰܠܳܝ̈ܶܐ (ܕܰܥّܰܡ̈ܶܐ)، 2ܘܣ݄ܡّܶܗ ܩܪܳܒܳܐ ܥܰܡ ܒܳܪܳܥ ܗ̄ܽܘ ܡܰܠܟܳܐ ܕ݄ܣܕ̥ܽܘܡ، ܘܥܰܡ ܒܰܪܫܳܥ ܗ̄ܽܘ ܡܰܠܟܳܐ ܕܥܳܡܽܘܪܳܐ، ܘܫܶܢܳܐܒ ܗ̄ܽܘ ܡܰܠܟܳܐ ܕܳܐܕܳܡܳܐ، ܘ݄ܫܡܳܐܺܝܪ ܗ̄ܽܘ ܡܰܠܟܳܐ ܕ݄ܨܒܽܘܐܺܝܡ، ܘܽܗ̄ܘ ܡܰܠܟܳܐ ܕܒܳܠܳܥ ܕܟ݄ܬ ܝܳܐ ܨܳܥܳܪ. 3ܟܽܘܠّܶܗ ܗܰܢܺܝ ܠܰܬܺܝܡܺܝ ܠܽܗ̄ܘ ܫܰܠܒ̥ܳܐ ܕܰܣܕ̥ܽܘܡܳܝ̈ܶܐ، ܗ̄ܽܘ ܝܰܡܳܐ ܕܺܗ̄ܝ ܡܰܠܚܳܐ. 4ܬܪܰܥܣܰܪ ܐ݄ܫܢ̈ܶܐ ܥܒ̥݄ܕّܶܗ ܥܰܒܕܽܘܬ̥ܳܐ ܠܟܰܪܕܠܰܥܡܰܪ، ܘܒܺܗ̄ܝ ܫܰܢ̱ܬܳܐ ܕܰܬܠܳܬ̥ܰܥܣܰܪ ܩܰܝܺܝܡܺܝ ܐܰܥܠܶܗ. 5ܘܒܺܗ̄ܝ ܫܰܢ̱ܬܳܐ ܕܰܗ̄ܢ ܐܰܪܒܰܥܣܰܪ ܐܰܬ̥ܺܝ ܟܰܪܕܠܰܥܡܰܪ ܘܰܡّܰܠܟ̈ܶܐ ܕܰܐܥܡܶܗ ܘ݄ܡܚܰܠّܶܗ ܠܰܓّܰܒܳܪ̈ܶܐ ܕ݄ܒܥܶܣܬܳܪܽܘܬ ܩܽܘܪܢܺܝܡ ܘܠܰܚّܺܝܨ̈ܶܐ ܕܰܐܒّܶܗ، ܘܠܰܨّܰܢܳܥ̈ܶܐ ܕܒܰܫܘܳܐ ܩܽܘܪܝܰܬܺܝܡ. 6ܘܠܰܚّܰܘܪ̈ܳܝܶܐ ܒܰܛّܽܘܪ̈ܶܐ ܕܣܳܥܺܝܪ، ܗ݄ܠ ܠܺܗ̄ܝ ܒܰܛܡܳܐ ܕܦܳܪܳܢ ܕܒܽܗ̄ܘ ܡܰܕ̥݄ܒܪܳܐ 7ܘܕܰܥܺܝܪܺܝ ܘܰܐܬ̥݄ܢ ܠܥܰܝܢ ܕܺܝܢܳܐ ܕܟ݄ܬ ܝܳܐ ܪܩܶܡ، ܘ݄ܡܚܰܠّܶܗ ܠܟܽܘܠّܶܗ ܗ̄ܰܪّܺܝܫܳܢ̈ܶܐ ܕܰܥܡܳܠܩܳܝ̈ܶܐ ܘܠܰܗ̄ܢ ܐܳܡܽܘܪ̈ܳܝܶܐ ܣܬܶܝ ܕܝܳܬܒ̥ܺܝ ܗ̄ܘܰܘ̱ ܒܥܰܝܢ ܓܳܕ.
8ܘܢܰܦ݄ܩ ܗ̄ܽܘ ܡܰܠܟܳܐ ܕ݄ܣܕ̥ܽܘܡ ܘܽܗ̄ܘ ܡܰܠܟܳܐ ܕܥܳܡܽܘܪܳܐ ܘܽܗ̄ܘ ܡܰܠܟܳܐ ܕܳܐܕܳܡܳܐ ܘܽܗ̄ܘ ܡܰܠܟܳܐ ܕ݄ܨܒܽܘܐܺܝܡ ܘܽܗ̄ܘ ܡܰܠܟܳܐ ܕܒܳܠܳܥ ܕܟ݄ܬ ܝܳܐ ܨܳܥܳܪ. ܟܽܘܠّܶܗ ܗܰܢܺܝ ܣ݄ܡّܶܗ ܩܪܳܒܳܐ ܒܽܗ̄ܘ ܫܰܠܒ̥ܳܐ ܕܰܣܕ̥ܽܘܡܳܝ̈ܶܐ، 9ܥܰܡ ܟܰܪܕܠܰܥܡܰܪ ܗ̄ܽܘ ܡܰܠܟܳܐ ܕܥܺܝܠܰܡ ܘܬܰܪܥܶܠ ܗ̄ܽܘ ܡܰܠܟܳܐ ܕܰܓܶܠܳܝ̈ܶܐ (ܕܰܥّܰܡ̈ܶܐ)، ܘܳܐܡܰܪܦܶܠ ܗ̄ܽܘ ܡܰܠܟܳܐ ܕܣܶܢܥܳܪ ܘܳܐܪܺܝܽܘܟ̥ ܗ̄ܽܘ ܡܰܠܟܳܐ ܕܕܰܠܰܣܳܪ، ܐܰܪܒܥܳܐ ܡܰܠܟ̈ܶܐ ܥܰܠ ܚܰܡܫܳܐ. 10ܘܒܽܗ̄ܘ ܫܰܠܒ̥ܳܐ ܕܰܣܕ̥ܽܘܡܳܝ̈ܶܐ ܟ݄ܬ ܗ̄ܘܰܘ̱ ܒܺܐܪ̈ܶܐ ܒܺܐܪ̈ܶܐ ܕܩܺܝܪܳܐ. ܘܥܰܪܺܝܩܺܝ ܗ̄ܽܘ ܡܰܠܟܳܐ ܕ݄ܣܕ̥ܽܘܡ ܘܽܗ̄ܘ ܡܰܠܟܳܐ ܕܥܳܡܽܘܪܳܐ ܘܢܰܦܺܝܠܺܝ ܬܰܡܳܐ، ܘܰܚܪ̈ܶܢܶܐ ܕܦܰܝܺܝܫܺܝ، ܥܰܪܺܝܩܺܝ ܠܽܗ̄ܘ ܛܽܘܪܳܐ. 11ܘܡ݄ܕّܶܗ ܟܽܘܠّܶܗ ܗ̄ܰܩّܰܢ̈ܝܳܢܶܐ ܕ݄ܣܕ̥ܽܘܡ ܘ݄ܕܥܳܡܽܘܪܳܐ، ܘܟܽܘܠܶܗ ܗ̄ܽܘ ܡܽܐܘܟܠܰܬّ̥ܶܗ ܘܰܐܙّ݄ܢ. 12ܘܡ݄ܕّܶܗ ܠܽܘܛ ܗ̄ܽܘ ܐܰܒܪܳܐ ܕܽܗ̄ܘ ܐܰܚܽܘܢܳܐ ܕܰܐܒܪܳܡ ܘܠܽܗ̄ܘ ܩܰܢܝܳܢܰܝܕ̥ܶܗ ܘܰܐܙّ݄ܢ، ܘܗܺܝّܶܗ ܝܰܬܺܝܒ̥ܳܐ ܗ̄ܘܰܐ ܒ݄ܣܕ̥ܽܘܡ.
13ܘܰܐܬ̥ܺܝ ܡܰܢ ܕܦܰܠ݄ܛ (ܦܰܠ݄ܬ) ܘܡܰܘܕ̥ܰܥ ܠܶܗ ܠܰܐܒܪܳܡ ܗ̄ܽܘ ܥܶܒܪܳܝܳܐ، ܕܗܺܝّܶܗ ܝܰܬܺܝܒ̥ܳܐ ܗ̄ܘܰܐ ܒܶܝܬ̥ ܒܰܠܽܘܛܳܐ ܕܡܰܡܪܶܐ ܗ̄ܽܘ ܐܳܡܽܘܪܳܝܳܐ، ܗ̄ܽܘ ܐܰܚܽܘܢܳܐ ܕܥܳܢܺܝܪ ܘܽܗ̄ܘ ܐܰܚܽܘܢܳܐ ܕܰܐܫܟܽܘܠ. ܘܗܰܢܺܝ ܣ݄ܡّܶܗ ܩܝܳܡܳܐ ܥܰܡ ܐܰܒܪܳܡ. 14ܘܫܰܡ݄ܥ ܐܰܒܪܳܡ ܕ݄ܫܒܶܐ ܗ̄ܽܘ ܐܰܒܪܳܐ ܕܽܗ̄ܘ ܐܰܚܽܘܢܰܝܕ̥ܶܗ. ܘܗܽܒ̥ ܠܶܗ ܙܰܝܢ̈ܶܐ ܠܰܥܠܰܝܡ̈ܰܝܕ̥ܶܗ ܗ̄ܰܢ ܐܰܒܢ̈ܶܐ ܕܽܗ̄ܘ ܒܰܝܬܰܝܕ̥ܶܗ، ܬܠ݄ܬ̥ܡܳܐܐ ܘ݄ܬܡܳܢܰܥܣܰܪ. ܘ݄ܫܕܶܐ ܠܶܗ ܒ݄ܬ̥ܪܰܝّܶܗ ܗ݄ܠ ܕܳܢ. 15ܘܢܰܦܺܝܠܺܝ ܐܰܥܠܰܝّܶܗ ܡܶܢ̱ ܬܪܶܝ ܓܰܒ̈ܶܐ ܒܠܰܠܝܳܐ ܗܺܝّܶܗ ܘܰܓܪ̈ܶܝܥܰܝܕ̥ܶܗ. ܘ݄ܡܚܰܢّܶܗ، ܘ݄ܫܕܰܠّܶܗ ܒ݄ܬ̥ܪܰܝّܶܗ ܗ݄ܠ ܠܚܽܘܒܳܐ ܡܽܗ̄ܘ ܣܶܡܳܠܳܐ ܕܕܰܪܡܣܽܘܩ. 16ܘܡܰܕܥܰܪ ܠܶܗ ܗ̄ܽܘ ܩܰܢܝܳܢܳܐ ܟܽܘܠܶܗ، ܘܡܰܕܥܰܪ ܠܶܗ ܠܽܘܛ ܗ̄ܽܘ ܐܰܒܪܳܐ ܕܽܗ̄ܘ ܐܰܚܽܘܢܰܝܕ̥ܶܗ ܘܽܗ̄ܘ ܩܰܢܝܳܢܰܝܕ̥ܶܗ ܡܰܕܥܰܪ ܠܶܗ، ܘܠܰܗ̄ܢ ܢܶܫ̈ܶܐ ܘܠܽܗ̄ܘ ܥܰܡܳܐ ܣܬܶܝ.
17ܘܢܰܦ݄ܩ ܗ̄ܽܘ ܡܰܠܟܳܐ ܕ݄ܣܕ̥ܽܘܡ ܠܩܰܕ̱ܡܽܘܬ̥ܶܗ ܒ݄ܬ̥݄ܪ ܕܕܰܥ݄ܪ، ܗ̄ܺܝ ܢܰܩܠܐ ܕ݄ܬܒ̥݄ܪ ܠܶܗ ܟܰܪܕܠܰܥܡܰܪ ܘܰܡّܰܠܟ̈ܶܐ ܕܰܐܥܡܶܗ ܒܽܗ̄ܘ ܥܽܘܡܩܳܐ ܕܫܰܘܳܐ، ܕܟ݄ܬ ܝܳܐ ܗ̄ܽܘ ܥܽܘܡܩܳܐ ܕܰܡّܰܠܟ̈ܶܐ. 18ܘܡܰܠܟܺܝܙܕܶܩ ܗ̄ܽܘ ܡܰܠܟܳܐ ܕܫܳܠܺܝܡ، ܡܰܘܦܰܩ ܠܶܗ ܠܰܚܡܳܐ ܘܚܰܡܪܳܐ، ܘܗܺܝّܶܗ ܟܽܘܡܪܳܐ ܗ̄ܘܰܐ ܕܰܐܠܳܗܳܐ ܗ̄ܽܘ ܡܪܰܝܡܳܐ. 19ܘ݄ܡܒܰܪܰܟ̥ ܠܶܗ ܘܐܡ݄ܪ ܠܶܗ: ”ܡܒܰܪܟ̥ܳܐ ܝܳܐ ܐܰܒܪܳܡ ܡܰܢ̱ ܐܠܳܗܳܐ ܗ̄ܽܘ ܡܪܰܝܡܳܐ ܡܳܪܳܐ ܕܺܗ̄ܝ ܫܡܰܝܳܐ ܘܕܺܗ̄ܝ ܐܰܪܥܳܐ. 20ܘ݄ܡܒܰܪܟ̥ܳܐ ܝܳܐ ܐܰܠܳܗܳܐ ܡܪܰܝܡܳܐ، ܕܗܽܒ̥ ܠܶܗ ܗ̄ܰܒܥܶܠܕ̈ܒܳܒܰܝܕ̥ܳܟ̥ ܒܺܐܝܕ̥̈ܳܬ̥ܳܟ̥.“ ܘܗܽܒ̥ ܠܶܗ ܠܶܗ ܚܰܕ̱ ܡܶܢ̱ ܥܰܣܪܳܐ ܡܶܢ̱ ܟܘ̇ܠ ܡܶܕܶܐ. 21ܘܐܡ݄ܪ ܠܶܗ ܗ̄ܽܘ ܡܰܠܟܳܐ ܕ݄ܣܕ̥ܽܘܡ ܠܰܐܒܪܳܡ: ”ܗܰܒ̥ ܠܺܝ ܗ̄ܰܢ ܢܰܦܫ̈ܳܬ̥ܳܐ، ܘܗܰܬ ܗܘܰܝ ܡܳܪܳܐ ܠܽܗ̄ܘ ܩܰܢܝܳܢܳܐ.“ 22ܘܐܡ݄ܪ ܠܶܗ ܐܰܒܪܳܡ ܠܽܗ̄ܘ ܡܰܠܟܳܐ ܕ݄ܣܕ̥ܽܘܡ: ”ܡܰܥܠܶܐ ܠܺܝ ܐܺܝܕ̥̈ܳܬ̥ܺܝ ܠܓܰܒ ܐܰܠܳܗܳܐ ܡܪܰܝܡܳܐ ܕܗܺܝّܶܗ ܝܳܐ ܡܳܪܳܐ ܕܺܗ̄ܝ ܫܡܰܝܳܐ ܘܕܺܗ̄ܝ ܐܰܪܥܳܐ، 23ܕܠ݄ܐ ܓܡܳܝܰܕ ܐ̱ܢܳܐ ܡܶܕܶܐ، ܡܽܗ̄ܘ ܚܽܘܛܳܐ ܗ݄ܠ ܠܰܫّܽܘܒܰܩ̈ܶܐ ܕܽܗ̄ܘ ܡܣܳܢܳܐ، ܘܠܳܐ ܡܶܕܶܐ ܡܽܗ̄ܘ ܩܰܢܝܳܢܰܝܕ̥ܳܟ̥، ܕܠܳܐ ܐܡّܰܪ̱ܬ: ܐܳܢܳܐ ܣ݄ܡ ܠܺܝ ܐܰܒܪܳܡ ܥܰܬܺܝܪܳܐ، 24ܣܛܰܪ ܡܽܗ̄ܘ ܡܶܕܶܐ ܕܰܐܟ̥݄ܠّܶܗ ܗ̄ܰܥܠܰܝܡ̈ܶܐ. ܘܰܡܢ̈ܰܘܳܬ̥ܳܐ ܕܰܓّܰܒ̥ܪ̈ܶܐ ܕܰܐܬ̥݄ܢ ܐܰܥܡܺܝ، ܥܳܢܺܝܪ ܘ݄ܐܫܟܽܘܠ ܘܡܰܡܪܶܐ، ܗ݄ܢّܶܝ ܛܪܳܐ ܡܰܝܕܺܝ ܗ̄ܰܡܢ̈ܰܘܳܬ̥ܰܬّ̥ܶܗ.“
Právě zvoleno:
ܣܶܦܪܳܐ ܕ݄ܒܪܺܝܬ̥ܳܐ 14: ܟܬܒܐ
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Suryoyo Bible © 2024 Aramaic Bible Translation