ܥܒܳܕ̥̈ܶܐ ܕܰܫܠܺܝܚ̈ܶܐ 9
9
ܝܶܫܽܘܥ ܟܩܳܪܶܐ ܠܫܳܐܘܳܠ
ܥܒܳܕ̥̈ܶܐ 22:6‐16؛ 26:12‐18
1ܘܫܳܐܘܳܠ ܗܶܫ ܡܠܶܐ ܗ̄ܘܰܐ ܣܰܡܳܐ ܘܪܽܘܓ̥ܙܳܐ ܕܽܗ̄ܘ ܩܰܛܠܳܐ ܥܰܠ ܗ̄ܰܬّܰܠܡܺܝܕ̥̈ܶܐ ܕܡܳܪܰܢ. 2ܘܰܐܒ݄ܥ ܡܽܗ̄ܘ ܪܰܒܳܐ ܕܰܟّܳܗ̈ܢܶܐ ܕܳܗ̄ܒܶܐ ܠܶܗ ܐܶܓܪ̈ܳܬ̥ܳܐ ܠܰܟ̥ܢܽܘܫ̈ܳܬܳܐ ܕ݄ܒܕܰܪܰܡܣܽܘܩ، ܕܶܐܢ ܕܚܳܙܶܐ ܢܳܫ̈ܶܐ ܗܰܢܺܝ ܕܟ݄ܡܗܰܠܟ̥ܺܝ ܒܽܗ̄ܘ ܕܰܪܒܰܢܳܐ، ܓܰܒܪ̈ܶܐ ܐܰܘ ܢܶܫ̈ܶܐ، ܕܡܰܐܣ݄ܪّܶܗ ܡܰܝܬܰܠّܶܗ ܠܽܐܘܪܶܫܠܶܡ. 3ܘܺܗ̄ܝ ܢܰܩܠܐ ܕܰܐܙّܶܗ، ܘ݄ܡܩܰܪܰܒ̥ ܠܶܗ ܕܡܳܛܶܐ ܠܕܰܪܰܡܣܽܘܩ، ܡܶܚܕ̥ܳܐ ܢܽܘܗܪܳܐ ܡܰܢܗܰܪ ܠܶܗ ܐܰܥܠܶܗ ܡܺܗ̄ܝ ܫܡܰܝܳܐ، 4ܘܢܰܦ݄ܠ ܥܰܠ ܗ̄ܺܝ ܐܰܪܥܳܐ، ܘܫܰܡ݄ܥ ܩܳܠܳܐ ܕܟܳܐܡܰܪ ܠܶܗ: ”ܫܳܐܘܳܠ، ܫܳܐܘܳܠ، ܠܡ݄ܢ ܟܳܫܳܕܰܬ ܒ݄ܬ̥ܪܺܝ؟ ܥܰܣܩܳܐ ܝܳܐ ܐܰܥܠܳܟ̥ ܕܡܰܒ݄ܥܛܰܬ ܗ̄ܰܡܚ̈ܰܛܶܐ.“ 5ܗܺܝّܶܗ ܡܰܕܥܰܪ ܠܶܗ ܘܐܡ݄ܪ ܠܶܗ: ”ܡܰܢ ܗܰܬ، ܡܳܪܝ!“ ܘܡܳܪܰܢ ܐܡ݄ܪ ܠܶܗ: ”ܐܳܢܳܐ ܐ̱ܢܳܐ ܝܶܫܽܘܥ ܗ̄ܽܘ ܢܳܨܪܳܝܳܐ ܗܰܘܳܐ ܕܗܰܬ ܟܳܪ݄ܕ̥ܦܰܬ. 6ܐܶܠܳܐ ܩܘܿܡ ܥܒܰܪ ܠܺܗ̄ܝ ܡܕ̥ܺܝܢ̱ܬܳܐ، ܘܬܰܡܳܐ ܓܡܺܝܬ݄ܫܓ̥݄ܠ ܐܰܥܡܳܟ̥ ܥܰܠ ܗ̄ܽܘ ܡܶܕܶܐ ܕܟܳܠܳܙܰܡ ܠܳܟ̥ ܕܣܰܝܡܰܬ.“ 7ܘܰܓّܰܒ̥ܪ̈ܶܐ ܕܰܐܥܡܶܗ ܐܰܙ̈ܳܠܶܐ ܒܽܗ̄ܘ ܕܰܪܒܳܐ ܟܰܠ݄ܢ ܡܕܰܘܡܪ̈ܶܐ ܥܰܠ ܕܩܳܠܳܐ ܒܶܠܚܽܘܕ̥ܶܗ ܫ݄ܡܥܺܝ ܗ̄ܘܰܘ̱، ܐܶܠܳܐ ܢܳܫܳܐ ܠܳܐ ܡ݄ܚܙܶܐ ܗ̄ܘܰܐ ܠّܶܗ. 8ܘܩܰܝ݄ܡ ܫܳܐܘܳܠ ܡܺܗ̄ܝ ܐܰܪܥܳܐ ܘܥܰܝܢ̈ܳܬ̥ܶܗ ܦܬܺܝܚ̈ܶܐ ܐܶܠܳܐ ܠܳܐ ܡ݄ܚܙܶܐ ܗ̄ܘܰܝ ܠܶܗ ܡܶܕܶܐ. ܘ݄ܙܒ݄ܛّܶܗ ܒܺܐܝܕ̥ܶܗ ܘܡܰܥܒܰܪّܶܗ ܠܕܰܪܰܡܣܽܘܩ. 9ܘܗܳܠ ܠܰܬܠܳܬ̥ܳܐ ܝܰܘܡ̈ܶܐ ܠܳܐ ܡ݄ܚܙܶܐ ܗ̄ܘܰܝ ܠܶܗ ܡܶܕܶܐ ܘܠܰܐ ܐܟ̥ܺܝܠ ܠܶܗ ܘܠܳܐ ܫܬܶܐ ܠܶܗ.
10ܘ݄ܒܕܰܪܰܡܣܽܘܩ، ܟ݄ܬ ܗ̄ܘܰܐ ܬܰܠܡܺܝܕ̥ܳܐ ܐ݄ܫܡܶܗ ܚܰܢܰܢܝܳܐ. ܘܡܳܪܝܳܐ ܐܡ݄ܪ ܠܶܗ ܠܶܗ ܒܽܗ̄ܘ ܚܶܙܘܳܐ: ”ܚܰܢܰܢܝܳܐ!“ ܡܰܕܥܰܪ ܠܶܗ: ”ܟܰܐܠܺܝ ܐܳܢܳܐ، ܡܳܪܝ!“ 11ܘܡܳܪܰܢ ܐܡ݄ܪ ܠܶܗ ܠܶܗ: ”ܩܘܿܡ ܙܳܟ̥ ܠܽܗ̄ܘ ܕܰܪܒܳܐ ܕ݄ܟܡ݄ܩܪܶܐ ܬܪܺܝܨܳܐ، ܘܒܽܗ̄ܘ ܒܰܝܬܳܐ ܕܺܝܗܽܘܕ̥ܳܐ، ܡܫܰܐܶܠ ܥܰܠ ܫܳܐܘܳܠ ܕܟ݄ܬ ܝܳܐ ܡܺܗ̄ܝ ܡܕ̥ܺܝܢ̱ܬܳܐ ܕܛܰܪܣܳܘܣ، ܡܺܐܝܕ̥ܶܗ ܕܟܰܐܠܶܗ ܟ݄ܡܨܰܠܶܐ، 12ܘ݄ܚܙܶܐ ܠܶܗ ܒܽܗ̄ܘ ܚܶܙܘܳܐ ܠܓܰܒ̥ܪܳܐ ܕ݄ܐܫܡܶܗ ܚܰܢܰܢܝܳܐ ܕܥܰܒ݄ܪ ܘܡܰܚ݄ܬ ܠܶܗ ܐܺܝܕ̥ܳܐ ܐܰܥܠܶܗ ܠܰܫܰܢ ܕܡ݄ܦܬܳܚܺܝ ܥܰܝܢ̈ܳܬ̥ܶܗ.“ 13ܘܚܰܢܰܢܝܳܐ ܐܡ݄ܪ ܠܶܗ: ”ܡܳܪܝ، ܫܰܡ݄ܥ ܐ̱ܢܳܐ ܡܶܢ̱ ܓ̥ܰܠܰܒܶܐ ܥܰܠ ܗ̄ܽܘ ܓܰܒ̥ܪܰܢܳܐ ܕܡ݄ܩܰܐ ܒܺܝܫ̈ܳܬ̥ܳܐ ܣ݄ܡ ܠܶܗ ܥܰܡ ܗ̄ܰܩّܰܕ̈ܺܝܫܰܝܕ̥ܳܟ̥ ܒܽܐܘܪܶܫܠܶܡ. 14ܘܟܰܐܠܶܗ ܗܰܪܟܶܐ ܣܬܶܝ ܟ݄ܬ ܠܶܗ ܫܽܘܠܛܳܢܳܐ ܡܰܢ̱ ܪّܰܒ̈ܶܐ ܕܰܟّܳܗ̈ܢܶܐ ܕܡܰܐܣ݄ܪ ܠܟܘ̇ܠّܶܗ ܗܰܢܺܝ ܕܟܳܩܳܪ݄ܢ ܐ݄ܫܡܳܟ̥.“ 15ܘܐܡ݄ܪ ܠܶܗ ܠܶܗ ܡܳܪܝܳܐ: ”ܩܘܿܡ ܙܳܟ̥، ܥܰܠ ܕܟ݄ܬ ܝܳܐ ܣܶܦܳܩܳܐ ܡܢܰܩܝܳܐ ܐܶܠܺܝ ܕܛܳܥ݄ܢ ܐ݄ܫܡܺܝ ܒܰܝܢ ܗ̄ܰܥّܰܡ̈ܶܐ ܘܒܰܝܢ ܗ̄ܰܡّܰܠܟ̈ܶܐ ܘܒܰܝܢ ܗ̄ܰܢ ܐܰܒܢ̈ܶܐ ܕܺܐܝܣܪܳܐܶܝܠ، 16ܥܰܠ ܓ݄ܕܡܰܚܘܶܢܶܗ ܡ݄ܩܰܐ ܚܰܫܳܐ ܓ݄ܕܛܳܥ݄ܢ ܠܰܫܰܢ ܐ݄ܫܡܺܝ.“
17ܗܶܕܺܝ ܐܰܙّܶܗ ܚܰܢܰܢܝܳܐ ܠܽܗ̄ܘ ܒܰܝܬܳܐ ܠܓܰܒܶܗ، ܘܡܰܚܰܬ ܠܶܗ ܐܺܝܕ̥ܳܐ ܐܰܥܠܶܗ ܘܐܡ݄ܪ ܠܶܗ ܠܶܗ: ”ܐܰܚܽܘܢܺܝ ܫܳܐܘܳܠ، ܡܳܪܰܢ ܝܶܫܽܘܥ ܡܫܰܕܰܪ ܠܶܗ ܠܺܝ، ܗܰܘܳܐ ܕ݄ܚܙܶܐ ܐܶܠܳܟ̥ ܒܽܗ̄ܘ ܕܰܪܒܳܐ ܘܗܰܬ ܐܰܬ̥ܳܝܳܐ، ܠܰܫܰܢ ܕܡ݄ܦܬܳܚܺܝ ܥܰܝ̈ܢܳܬ̥ܳܟ̥ ܘܡ݄ܡܠܰܬ ܪܽܘܚܳܐ ܕܩܽܘܕܫܳܐ.“ 18ܘܒܺܗ̄ܝ ܫܳܥܬ̥ܰܝܕ̥ܰܗ، ܢܰܦ݄ܠ ܡܶܢ̱ ܥܰܝܢ̈ܳܬ̥ܶܗ ܡܶܕܶܐ ܕܟܳܕܳܡܶܐ ܠܰܩܠܳܦ̈ܶܐ، ܘ݄ܦܬܺܝܚܺܝ ܥܰܝܢ̈ܳܬ̥ܶܗ، ܘܩܰܝ݄ܡ ܥܰܡ݄ܕ̥. 19ܘܡ݄ܕ ܠܶܗ ܡܽܐܘܟܠܳܐ ܘܚܺܝܨ. ܘܦܰܝ݄ܫ ܟܡܳܐ ܝܰܘܡ̈ܶܐ ܓܰܒ ܗ̄ܰܬّܰܠܡܺܝܕ̥̈ܶܐ، ܗܰܢ݄ܟ ܕ݄ܒܕܰܪܰܡܣܽܘܩ.
ܫܳܐܘܳܠ ܟܟܳܪ݄ܙ ܒܕܰܪܰܡܣܽܘܩ
20ܘܒܺܗ̄ܝ ܫܳܥܬ̥ܰܝܕ̥ܰܗ، ܟܳܪ݄ܙ ܗ̄ܘܰܐ ܒܰܟ̥ܢܽܘܫ̈ܳܬ̥ܳܐ ܕܰܝّܽܘܕ̥̈ܳܝܶܐ ܥܰܠ ܝܶܫܽܘܥ ܕܗܺܝّܶܗ ܝܳܐ ܗ̄ܽܘ ܐܰܒܪܳܐ ܕܰܐܠܳܗܳܐ. 21ܘܟܽܘܠّܶܗ ܗܰܢܺܝ ܕܫ݄ܡܥܺܝ ܗ̄ܘܰܝ ܠܶܗ ܡܺܝܕܰܘܡܪܺܝ ܗ̄ܘܰܘ̱ ܘ݄ܐܡّܺܪ̱ܝ ܗ̄ܘܰܘ̱: ”ܠܰܝ̱ܬ ܝܳܐ ܗܰܢܳܐ ܕܫܳܕܶܐ ܗ̄ܘܰܐ ܒ݄ܬ̥ܪܶܗ ܕܟܽܘܠّܶܗ ܗܰܢܺܝ ܕܟܳܪܙܺܝ ܗ̄ܘܰܘ̱ ܒܽܗ̄ܘ ܐ݄ܫܡܰܢܳܐ ܒܽܐܘܪܶܫܠܶܡ؟ ܘܠܰܗ̄ܪܟܶܐ ܣܬܶܝ ܠܽܗ̄ܘ ܡܶܕܰܢܳܐ ܡܫܰܕ݄ܪ، ܠܰܫܰܢ ܕܡܰܐܣ݄ܪّܶܗ ܘܡܰܘܒܰܠّܶܗ ܠܰܪّܰܒ̈ܶܐ ܕܰܟّܳܗ̈ܢܶܐ؟“
22ܘܫܳܐܘܳܠ ܙ݄ܕ ܝܳܪܰܒ̥ ܗ̄ܘܰܐ ܒܽܗ̄ܘ ܚܰܝܠܳܐ، ܘܗܳܝܰܙ ܗ̄ܘܰܐ ܠܰܝّܽܘܕ̥̈ܳܝܶܐ ܕ݄ܒܕܰܪܰܡܣܽܘܩ ܘܡܰܚܘܶܐ ܗ̄ܘܰܐ ܕܰܗ̄ܢܳܐ ܝܳܐ ܡܫܺܝܚܳܐ. 23ܘܺܗ̄ܝ ܢܰܩܠܐ ܕܙܰܝܺܝܕܺܝ ܗ̄ܰܝّܰܘܡܰܝ̈ܕ̥ܶܗ ܬܰܡܳܐ، ܗ̄ܰܝّܽܘܕ̥̈ܳܝܶܐ ܣ݄ܡّܶܗ ܐܰܥܠܶܗ ܢܟ̥ܺܝܠܽܘܬ̥ܳܐ ܕܩܳܛܠܺܝ ܠܶܗ. 24ܘܫܳܐܘܳܠ ܐܰܕ̥݄ܥ ܒܽܗ̄ܘ ܦܰܚܳܐ ܕܳܐܒܥܺܝ ܗ̄ܘܰܘ̱ ܕܣܰܝܡܺܝ ܠܶܗ. ܘܢܳܛܪܺܝ ܗ̄ܘܰܘ̱ ܠܰܬّܰܪ̈ܥܶܐ ܕܺܗ̄ܝ ܡܕ̥ܺܝܢ̱ܬܳܐ ܒܠܰܠܝܳܐ ܘܒܺܐܝܡܳܡܳܐ ܠܰܫܰܢ ܕܩܳܛܠܺܝ ܠܶܗ. 25ܗ̄ܺܝ ܢܰܩܠܝܳܐ، ܗ̄ܰܬّܰܠܡܺܝܕ̥̈ܶܐ ܡܰܚ݄ܬّܶܗ ܒܽܗ̄ܘ ܣܰܠܳܐ ܘ݄ܡܛܰܘܛܰܚّܶܗ ܡܽܗ̄ܘ ܫܽܘܪܳܐ ܒܠܰܠܝܳܐ.
ܫܳܐܘܳܠ ܒܽܐܘܪܶܫܠܶܡ
26ܘܰܐܙّܶܗ ܠܽܐܘܪܶܫܠܶܡ، ܘܳܐܒܰܥ ܗ̄ܘܰܐ ܕܡܳܛܶܐ ܠܰܬّܰܠܡܺܝܕ̥̈ܶܐ. ܐܶܠܳܐ ܟܽܘܠّܶܗ ܙܰܝܥܺܝ ܗ̄ܘܰܘ̱ ܡܶܢܶܗ ܘܠ݄ܐ ܡܗܰܝܡܢܺܝ ܗ̄ܘܰܘ̱ ܕܬܰܠܡܺܝܕ̥ܳܐ ܝܳܐ. 27ܘܒܰܪܢܰܒܰܐ ܡܰܝܬܶܐ ܠܶܗ ܠܓܰܒ ܗ̄ܰܫܠܺܝܚ̈ܶܐ، ܘ݄ܡܬܰܢܶܐ ܠܰܗ ܠّܶܗ ܕܰܐܝܕܰܪܒܳܐ (ܫܳܐܘܳܠ) ܚܙܶܐ ܠܶܗ ܡܳܪܝܳܐ ܒܽܗ̄ܘ ܕܰܪܒܳܐ، ܘ݄ܕܐܰܝܕܰܪܒܳܐ ܫܓ̥ܺܝܠ ܐܰܥܡܶܗ، ܘܰܐܝܕܰܪܒܳܐ ܒܕܰܪܰܡܣܽܘܩ ܒܓܰܠܝܳܐ ܟܪ݄ܙ ܠܶܗ ܒ݄ܐܫܡܶܗ ܕܝܶܫܽܘܥ. 28ܘܦܰܝ݄ܫ ܟ݄ܐܙّܶܗ ܘܟܳܐܬ̥ܶܐ ܥܰܡ ܗ̄ܰܬّܰܠܡܺܝܕ̥̈ܶܐ ܒܽܐܘܪܶܫܠܶܡ، 29ܘܡ݄ܫܓ̥ܰܠ ܗ̄ܘܰܐ ܒ݄ܐܫܡܶܗ ܕܝܶܫܽܘܥ ܒܓܰܠܝܳܐ، ܘܕܳܪܰܫ ܗ̄ܘܰܐ ܥܰܡ ܗ̄ܰܝّܽܘܕ̥̈ܳܝܶܐ ܐܰܝܢܰܐ ܕܳܐܕ̥ܥܺܝ ܗ̄ܘܰܘ̱ ܒܽܗ̄ܘ ܝܰܘܢܳܝܳܐ. ܐܶܠܳܐ ܗ݄ܢّܶܝ ܐ݄ܒܥܺܝ ܗ̄ܘܰܘ̱ ܕܩܳܛܠܺܝ ܠܶܗ. 30ܘܺܗ̄ܝ ܢܰܩܠܐ ܕܰܐܕ̥ܺܝܥܺܝ ܗ̄ܰܢ ܐܰܚ̈ܽܘܢܳܢܶܐ ܡܰܝܬܰܠّܶܗ ܒܠܰܠܝܳܐ ܠܩܶܣܰܪܺܝܰܐ ܘܡܶܢ̱ ܬܰܡܳܐ ܡܫܰܕܰܪّܶܗ ܠܛܰܪܣܳܘܣ. 31ܐܶܠܳܐ ܗ̄ܺܝ ܥܺܕ̱ܬܳܐ ܕ݄ܒܟܽܘܠܰܗ ܝܺܗܽܘܕ̥ ܘܒ݄ܓܠܺܝܠܳܐ ܘ݄ܒܫܳܡܪܺܝܢ ܟ݄ܬ ܗ̄ܘܰܐ ܐܶܒܰܗ ܫܠܳܡܳܐ، ܘܡ݄ܒܢܳܝܳܐ ܗ̄ܘܰܐ ܘ݄ܡܗܰܠܟ̥ܳܐ ܗ̄ܘܰܐ ܒܺܗ̄ܝ ܙܽܘܥܬ̥ܳܐ ܕܰܐܠܳܗܳܐ، ܘܒܽܗ̄ܘ ܚܰܝܠܳܐ ܕܪܽܘܚܳܐ ܕܩܽܘܕܫܳܐ ܙܳܝܕܳܐ ܗ̄ܘܰܐ.
ܫܶܡܥܽܘܢ ܟܣܳܝ݄ܡ ܬܶܕ݄ܡܪ̈ܳܬ̥ܐ ܒܠܽܘܕ ܘ݄ܒܝܳܘܦܺܝ
32ܘܗܰܘܺܝ، ܕܺܗ̄ܝ ܢܰܩܠܐ ܫܶܡܥܽܘܢ ܟܳܪܰܟ̥ ܗ̄ܘܰܐ ܒܰܡܕ̥̈ܺܝܢܳܬ̥ܳܐ، ܢܰܚ݄ܬ ܘܰܐܬ̥ܺܝ ܠܓܰܒ ܗ̄ܰܩّܰܕ̈ܺܝܫܶܐ ܕܥܳܡܪܺܝ ܗ̄ܘܰܘ̱ ܒܺܗ̄ܝ ܡܕ̥ܺܝܢ̱ܬܳܐ ܕܠܽܘܕ. 33ܘ݄ܚܙܶܐ ܠܶܗ ܚܰܕ̱ ܓܰܒ̥ܪܳܐ ܕ݄ܐܫܡܶܗ ܐܰܢܺܝܰܣ، ܟܰܐܺܝܒ̥ܳܐ ܡܪܰܝܚܳܐ ܘ݄ܡܚܰܠܩܳܐ ܒ̈ܰܓّܰܠܶܐ، ܬܡܳܢܶܐ ܐ݄ܫܢ̈ܶܐ. 34ܘܐܡ݄ܪ ܠܶܗ ܠܶܗ ܫܶܡܥܽܘܢ: ”ܐܰܢܺܝܰܐ، ܝܶܫܽܘܥ ܡܫܺܝܚܳܐ ܡܰܢ݄ܚ ܠܳܟ̥، ܩܘܿܡ، ܘܗܰܬ ܡܬܰܪ݄ܨ ܗ̄ܰܓّܰܠܰܝ̈ܕ̥ܳܟ̥.“ ܘܡܶܚܕ̥ܳܐ ܩܰܝ݄ܡ. 35ܘܟܽܘܠّܶܗ ܗ̄ܰܢ ܢܳܫ̈ܶܐ ܕܠܽܘܕ ܘܣܰܪܳܘܢܰܐ ܚܙܰܠّܶܗ ܘܕܰܥܺܝܪܺܝ ܠܰܐܠܳܗܳܐ.
36ܘܟ݄ܬ ܗ̄ܘܰܐ ܒܺܗ̄ܝ ܡܕ̥ܺܝܢ̱ܬܳܐ ܕܝܳܘܦܺܝ ܚܕ̥ܳܐ ܬܰܠܡܺܝܕ̥ܬܳܐ ܕ݄ܐܫܡܰܗ ܛܰܒܺܝܬ̥ܰܐ، ܗܰܬ̥ܶܐ ܥܰܬ݄ܪܬܳܐ ܗ̄ܘܰܐ ܒܰܥܒܳܕ̥̈ܶܐ ܛܳܒ̥̈ܶܐ ܘܒܰܙّܶܕ̈ܩܳܬ̥ܳܐ ܕܣܰܝܡܳܐ ܗ̄ܘܰܐ. 37ܟܰܝܽܒ̥ ܠܰܗ ܒܰܝّܰܘܡ̈ܳܬ̥ܰܢ݄ܟ ܘܡܰܝܺܝܬ̥ܳܐ. ܘܡܰܣ݄ܚܝܰܠّܶܗ ܘܡܰܚܬّܰܠّܶܗ ܒܺܗ̄ܝ ܥܶܠܺܝܬ̥ܳܐ. 38ܘܫܰܡܺܝܥܺܝ ܗ̄ܘܰܘ̱ ܗ̄ܰܬّܰܠܡܺܝܕ̥̈ܶܐ ܕܫܶܡܥܽܘܢ ܒܺܗ̄ܝ ܡܕ̥ܺܝܢ̱ܬܳܐ ܕܠܽܘܕ ܝܳܐ، ܗܰܝܳܐ ܕܟ݄ܬܝܳܐ ܥܰܠ ܓܰܒܳܐ ܕܝܳܘܦܺܝ، ܘ݄ܡܫܰܕܰܪّܶܗ ܠܓܰܒܶܗ ܬܪܶܝ ܓܰܒܪ̈ܶܐ ܕܳܐܒܥܺܝ ܡܶܢܶܗ ܕܠܳܐ ܪܰܦܝܽܘܬ̥ܳܐ ܕܳܐܬ̥ܶܐ ܣܺܝܕܰܝّܶܗ. 39ܘܩܰܝ݄ܡ ܫܶܡܥܽܘܢ ܘܰܐܙّܶܗ ܐܰܥܡܰܝّܶܗ. ܘܺܗ̄ܝ ܢܰܩܠܐ ܕܰܐܬ̥ܺܝ، ܡܰܣܠܰܩّܶܗ ܠܺܗ̄ܝ ܥܶܠܺܝܬ̥ܳܐ. ܘܠܰܬܺܝܡܺܝ ܟܽܘܠّܶܗ ܗ̄ܰܢ ܐܰܪ̈ܡܠܳܬ̥ܳܐ ܘܟܰܠ݄ܢ ܚܶܕ̥ܳܪܶܗ ܘܒܳܟ̥݄ܢ ܗ̄ܘܰܘ̱ ܘܡܰܚܘ݄ܢ ܗ̄ܘܰܝ ܠܶܗ ܗ̄ܰܩّܶܡ݄ܣܝ̈ܳܬ̥ܳܐ ܘܰܠܒܽܘܫ̈ܶܐ ܗܰܢܺܝ ܕܳܗ̄ܒܳܐ ܗ̄ܘܰܐ ܠّܶܗ ܛܰܒܺܝܬ̥ܰܐ ܗ̄ܺܝ ܢܰܩܠܐ ܕܟ݄ܬ ܗ̄ܘܰܐ ܒܰܚّܰܝ̈ܶܐ. 40ܘܫܶܡܥܽܘܢ ܡܰܘܦܰܩ ܠܶܗ ܗ̄ܰܢ ܢܳܫ̈ܶܐ ܟܽܘܠّܶܗ ܠܰܪܒ̥ܰܠ، ܘ݄ܒܪ݄ܟ ܠܶܗ ܥܰܠ ܒܰܪ̈ܟܳܬ̥ܶܗ ܘ݄ܡܨܰܠܶܐ ܠܶܗ، ܘܕܰܥ݄ܪ ܠܓܰܒ ܗ̄ܺܝ ܫܠܰܕܳܐ ܘܐܡ݄ܪ ܠܶܗ: ”ܛܰܒܺܝܬ̥ܰܐ، ܩܽܘܡܺܝ!“ ܘ݄ܛܒܺܝܬ̥ܰܐ ܦܬ݄ܚ ܠܰܗ ܥܰܝܢ̈ܳܬ̥ܰܗ، ܘܺܗ̄ܝ ܢܰܩܠܐ ܕ݄ܚܙܶܐ ܠܰܗ ܠܫܶܡܥܽܘܢ ܝܰܬܺܝܒ̥ܳܐ. 41ܘ݄ܦܫ݄ܛ ܠܶܗ ܠܰܗ ܐܺܝܕ̥ܶܗ ܘܡܰܩܺܝܡܳܐ ܠܶܗ. ܘ݄ܩܪܶܐ ܠܶܗ ܠܰܩّܰܕ̈ܺܝܫܶܐ ܘܠܰܗ̄ܢ ܐܰܪ̈ܡܠܳܬ̥ܳܐ ܘܗܺܝܒ̥ܳܐ ܠܶܗ ܐܰܠّܶܗ، ܘܗܺܝّܰܗ ܒܰܚّܰܝ̈ܶܐ. 42ܘܗܰܬ̥ܶܐ ܗܰܘܝܳܐ ܝܕ̥ܺܝܥܬܳܐ ܒܺܗ̄ܝ ܡܕ̥ܺܝܢ̱ܬܳܐ ܟܽܘܠܰܗ، ܘܓ̥ܰܠܰܒܶܐ ܡܗܰܝܡܰܢّܶܗ ܒܡܳܪܰܢ. 43ܘܦܰܝ݄ܫ ܫܶܡܥܽܘܢ ܒܝܳܘܦܺܝ ܓ̥ܰܠܰܒܶܐ ܝܰܘܡ̈ܶܐ ܘܗܳܘܶܐ ܗ̄ܘܰܐ ܒܽܗ̄ܘ ܒܰܝܬܳܐ ܕܫܶܡܥܽܘܢ ܗ̄ܽܘ ܨܰܒ̥ܳܥܳܐ ܕܽܗ̄ܘ ܓܰܠܕܳܐ.
Právě zvoleno:
ܥܒܳܕ̥̈ܶܐ ܕܰܫܠܺܝܚ̈ܶܐ 9: ܟܬܒܐ
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Suryoyo Bible © 2024 Aramaic Bible Translation