ܥܒܳܕ̥̈ܶܐ ܕܰܫܠܺܝܚ̈ܶܐ 8

ܗ̄ܽܘ ܣܰܝܦܳܐ ܩܰܕ̱ܡܳܝܳܐ

1ܘܫܳܐܘܳܠ، ܡܶܢ̱ ܠܶܒܶܗ ܗ̄ܘܰܐ ܕܡ݄ܩܛ݄ܠ (ܐܶܣܛܶܦܰܢܳܘܣ)، ܘ݄ܡܫܰܘܬܦܳܐ (ܘ݄ܡܫܰܪܟܳܐ) ܗ̄ܘܰܐ ܒܽܗ̄ܘ ܩܰܛܠܰܝܕ̥ܶܗ. ܘܗܰܘܺܝ ܗ̄ܘܰܐ ܒܽܗ̄ܘ ܝܰܘܡܰܘܳܐ ܣܰܝܦܳܐ ܪܰܒܳܐ ܥܰܠ ܗ̄ܺܝ ܥܺܕ̱ܬܳܐ ܕܒܽܐܘܪܶܫܠܶܡ، ܘ݄ܡܒܰܪܒܙܺܝ ܟܽܘܠّܶܗ ܒܰܩّ݄ܪ̈ܝܰܘܳܬ̥ܳܐ ܕܺܝܗܽܘܕ̥ ܘܒܰܝܢ ܗ̄ܰܫّܳܡܪ̈ܳܝܶܐ، ܣܛܰܪ ܡܰܢ̱ ܫܠܺܝܚ̈ܶܐ ܠܚܽܘܕ̥ܰܝّܶܗ. 2ܘܓܰܒ̥ܪ̈ܶܐ ܡܗܰܝܡܢ̈ܶܐ ܡܟܰܢܦܰܠّܶܗ ܘ݄ܩܒ̥݄ܪّܶܗ ܠܶܐܣܛܶܦܰܢܳܘܣ ܘܟܰܪܝܰܠّܶܗ ܓ̥ܰܠܰܒܶܐ ܐܰܥܠܶܗ. 3ܘܫܳܐܘܳܠ ܡܰܩ݄ܡ ܗ̄ܘܰܝ ܠܶܗ ܣܰܝܦܳܐ ܥܰܠ ܗ̄ܺܝ ܥܺܕ̱ܬܳܐ ܕܰܐ‌ܠܳܗܳܐ، ܥܳܒܰܪ ܗ̄ܘܰܐ ܠܰܒّܳܬ̈ܶܐ ܘ݄ܡܓܰܪܓܰܫ ܗ̄ܘܰܐ ܠܰܓّܰܒ̥ܪ̈ܶܐ ܘܠܰܗ̄ܢ ܢܶܫ̈ܶܐ ܘܡܰܫܠܰܡ ܗ̄ܘܰܐ ܠّܶܗ ܠܽܗ̄ܘ ܚܒܽܘܫܝܳܐ.

ܗ̄ܺܝ ܣܒܰܪܬ̥ܳܐ ܟܡܳܛܝܳܐ ܠܰܫّܶܡܪ̈ܳܝܶܐ

4ܘܗܰܢ݄ܟ ܕ݄ܡܒܰܪܒܙܺܝ ܟܳܪܟ̥ܺܝ ܗ̄ܘܰܘ̱ ܘܟܳܪܙܺܝ ܗ̄ܘܰܘ̱ ܗ̄ܺܝ ܡܶܠܬ̥ܳܐ ܕܰܐ‌ܠܳܗܳܐ. 5ܘܦܺܝܠܺܝܦܳܘܣ ܢܰܚ݄ܬ ܗ̄ܘܰܐ ܠܺܗ̄ܝ ܡܕ̥ܺܝܢ̱ܬܳܐ ܕܰܫّܳܡܪ̈ܳܝܶܐ ܘܟܳܪܰܙ ܗ̄ܘܰܐ ܠّܶܗ ܥܰܠ ܡܫܺܝܚܳܐ. 6ܘܺܗ̄ܝ ܢܰܩܠܐ ܕܫ݄ܡܥܺܝ ܗ̄ܘܰܘ̱ ܗ̄ܽܘ ܡܰܐܡܪܰܝܕ̥ܶܗ، ܗ̄ܰܢ ܢܳܫ̈ܶܐ ܕܬܰܡܳܐ ܡܰܨܺܝܬ̥ܺܝ ܗ̄ܘܰܘ̱ ܐܰܥܠܶܗ ܘܡܰܫܪܺܝ ܗ̄ܘܰܘ̱ ܠܟܽܘܠ ܡܶܕܶܐ ܕܳܐܡܰܪ ܗ̄ܘܰܐ ܥܰܠ ܕܚܳܙ݄ܢ ܗ̄ܘܰܘ̱ ܗ̄ܰܢ ܐܳܬ̥ܘ̈ܳܬ̥ܳܐ ܕܣܳܝܰܡ ܗ̄ܘܰܐ، 7ܡܺܐܝܕ̥ܶܗ ܕܓ̥ܰܠܰܒܶܐ ܕܟ݄ܬ ܗ̄ܘܰܝܢܶܝ ܙܒܺܝ̈ܛܶܐ ܡܰܢ̱ ܪّܽܘܚ̈ܶܐ ܒܺܝܫ̈ܶܐ ܡܰܙܥܩܺܝ ܗ̄ܘܰܘ̱ ܒܩܳܠܳܐ ܥܶܠܳܝܳܐ ܘܢܳܦܩܺܝ ܗ̄ܘܰܘ̱ ܡ݄ܢّܶܗ، ܘ݄ܚܪ̈ܶܢܶܐ ܡܪ̈ܰܝܚܶܐ ܘ݄ܚܓ̥ܺܝܪ̈ܶܐ ܢܰܝ݄ܚّܶܗ. 8ܘ݄ܦܨܺܝܚܽܘܬ̥ܳܐ ܪܰܒܬ̥ܳܐ ܗܰܘܺܝ ܗ̄ܘܰܐ ܒܺܗ̄ܝ ܡܕ̥ܺܝܢ̱ܬܰܝܳܐ.

ܣܺܝܡܽܘܢ ܗ̄ܽܘ ܚܰܪܳܫܳܐ

9ܘܟ݄ܬ ܗ̄ܘܰܐ ܬܰܡܳܐ ܓܰܒ̥ܪܳܐ ܚܰܕ̱ ܕ݄ܐܫܡܶܗ ܣܺܝܡܳܘܢ. ܗܰܢܳܐ ܗܰܘܺܝ ܗ̄ܘܰܝ ܠܶܗ ܙܰܒܢܳܐ ܝܰܪܺܝܟ̥ܳܐ ܝܰܬܺܝܒ̥ܳܐ ܒܺܗ̄ܝ ܡܕ̥ܺܝܢ̱ܬܰܝܳܐ. ܘܒܰܚّܰܪ̈ܫܰܝܕ̥ܶܗ، ܡܰܛܥܶܐ ܗ̄ܘܰܐ ܠܽܗ̄ܘ ܥܰܡܳܐ ܕܰܫّܳܡܪ̈ܳܝܶܐ، ܘܡܰܘܪܰܒ̥ ܗ̄ܘܰܐ ܪܽܘܚܶܗ، ܘܳܐܡܰܪ ܗ̄ܘܰܐ ܥܰܠ ܢܰܦܫܶܗ: ”ܐܳܢܳܐ ܪܰܒܳܐ ܐ̱ܢܳܐ.“ 10ܘܟܽܘܠّܶܗ ܗ̄ܰܪّܰܒ̈ܶܐ ܘܰܗ̄ܢ ܢܰܥܺܝܡ̈ܶܐ ܐ݄ܙّ݄ܢ ܗ̄ܘܰܘ̱ ܒ݄ܬ̥ܪܶܗ ܘ݄ܐܡّܺܪ̱ܝ ܗ̄ܘܰܘ̱: ”ܗܰܢܳܐ ܝܳܐ ܗ̄ܽܘ ܚܰܝܠܳܐ ܪܰܒܳܐ ܕܰܐ‌ܠܳܗܳܐ.“ 11ܘܟܽܘܠّܶܗ ܡܗܰܝܡܢܺܝ ܗ̄ܘܰܝ ܠܶܗ ܥܰܠ ܕܙܰܒܢܳܐ ܝܰܪܺܝܟ̥ܳܐ ܒܰܚّܰܪ̈ܫܰܝܕ̥ܶܗ ܡܕܰܘܡܪܺܝ ܠܶܗ. 12ܘܺܗ̄ܝ ܢܰܩܠܐ ܕܡܰܫ݄ܪّܶܗ ܠܦܺܝܠܺܝܦܳܘܣ ܕ݄ܡܣܰܒܰܪ ܗ̄ܘܰܐ ܗ̄ܺܝ ܡܰܠܟܽܘܬ̥ܳܐ ܕܰܐ‌ܠܳܗܳܐ ܒ݄ܐܫܡܶܗ ܕܡܳܪܰܢ ܝܶܫܽܘܥ ܡܫܺܝܚܳܐ ܥܳܡܕ̥ܺܝ ܗ̄ܘܰܘ̱ ܓܰܒ̥ܪ̈ܶܐ ܘܢܶܫ̈ܶܐ. 13ܘܣܺܝܡܳܘܢ ܣܬܶܝ ܡܗܰܝܡܰܢ ܗ̄ܘܰܝ ܠܶܗ ܘܥܰܡ݄ܕ̥، ܘܰܐܙّܶܗ ܡܰܛܺܝ ܠܦܺܝܠܺܝܦܳܘܣ. ܘܺܗ̄ܝ ܢܰܩܠܐ ܕܚܳܙܶܐ ܗ̄ܘܰܐ ܗ̄ܰܢ ܐܳܬ̥ܘ̈ܳܬ̥ܳܐ ܘܰܚّܰܝ̈ܠܶܐ ܪ̈ܰܒܶܐ ܕܗܳܘ݄ܢ ܗ̄ܘܰܘ̱ ܒܺܐܝܕ̥ܶܗ ܕܦܺܝܠܺܝܦܳܘܣ ܚܳܙܶܐ ܗ̄ܘܰܐ ܬܶܗܪܳܐ ܘܕܽܘܡܳܪܳܐ. 14ܘܺܗ̄ܝ ܢܰܩܠܐ ܕܫܰܡܺܝܥܺܝ ܗ̄ܰܫܠܺܝܚ̈ܶܐ ܕܒܽܐܘܪܶܫܠܶܡ ܕܽܗ̄ܘ ܥܰܡܳܐ ܕܰܫّܳܡܪ̈ܳܝܶܐ ܡܰܩܒ݄ܠ ܠܶܗ ܗ̄ܺܝ ܡܶܠܬ̥ܳܐ ܕܰܐ‌ܠܳܗܳܐ ܡܫܰܕܰܪّܶܗ ܠܓܰܒܰܝّܶܗ ܫܶܡܥܽܘܢ ܟܶܐܦܳܐ ܘܝܽܘܚܰܢܳܢ. 15ܘܰܐܬ̥݄ܢ ܘ݄ܡܨܰܠܰܠّܶܗ ܐܰܥܠܰܝّܶܗ ܕܡܰܩܒܠܺܝ ܪܽܘܚܳܐ ܕܩܽܘܕܫܳܐ، 16ܡܺܐܝܕ̥ܶܗ ܕܗܶܫ ܠܰܝ̱ܬ ܗ̄ܘܰܐ ܥܰܠ ܚܰܕ̱ ܡ݄ܢّܶܗ، ܘܥܳܡܕܺܝ ܗ̄ܘܰܘ̱ ܒ݄ܐܫܡܶܗ ܕܡܳܪܰܢ ܝܶܫܽܘܥ ܒܶܠܚܽܘܕ̥ܶܗ. 17ܗ̄ܺܝ ܢܰܩܠܝܳܐ ܡܰܚܬܺܝ ܗ̄ܘܰܘ̱ ܐܰܥܠܰܝّܶܗ ܐܺܝܕ̥ܳܐ ܘܡܰܩܒܠܺܝ ܗ̄ܘܰܘ̱ ܪܽܘܚܳܐ ܕܩܽܘܕܫܳܐ.

ܗ̄ܽܘ ܒܥܳܝܳܐ ܒܺܝܫܳܐ ܕܣܺܝܡܽܘܢ

18ܘܺܗ̄ܝ ܢܰܩܠܐ ܕ݄ܚܙܶܐ ܠܶܗ ܣܺܝܡܳܘܢ ܕܒܽܗ̄ܘ ܬܶܚܺܝܬܳܐ ܕܺܗ̄ܝ ܐܺܝܕ̥ܳܐ ܕܰܫܠܺܝܚ̈ܶܐ ܟܡܺܝܬܰܗܽܒ̥ܝܳܐ ܪܽܘܚܳܐ ܕܩܽܘܕܫܳܐ، ܡܩܰܕܰܡ ܠܰܗ ܠّܶܗ ܙܽܘܙ̈ܶܐ، 19ܘܐܡ݄ܪ ܠܰܗ ܠّܶܗ: ”ܗܰܒ̥ܽܘ ܠܺܝ ܐܶ‌ܠܺܝ ܣܬܶܝ ܗ̄ܽܘ ܫܽܘܠܛܳܢܰܢܳܐ: ܕܰܐܝܢܰܐ ܕܡܰܚ݄ܬ ܐ̱ܢܳܐ ܐܰܥܠܶܗ ܐܺܝܕ̥ܳܐ ܡܰܩܒ݄ܠ ܪܽܘܚܳܐ ܕܩܽܘܕܫܳܐ.“ 20ܫܶܡܥܽܘܢ ܟܶܐܦܳܐ ܐܡ݄ܪ ܠܶܗ ܠܶܗ: ”ܗ̄ܰܙّܽܘܙ̈ܰܝܕ̥ܳܟ̥ ܐܰܥܡܳܟ̥ ܐ݄ܙّ݄ܢ ܠܺܗ̄ܝ ܓܺܗܰܢܳܐ، ܥܰܠ ܕ݄ܚܫܽܒ̥ ܠܳܟ̥ ܕܺܗ̄ܝ ܡܰܘܗܰܒܬܳܐ ܕܰܐ‌ܠܳܗܳܐ ܒܰܙّܽܘܙ̈ܶܐ ܟܡ݄ܙܒ̥ܳܢܳܐ. 21ܠܰܝ̱ܬ ܠܳܟ̥ ܠܳܐ ܣܰܗܡܳܐ ܘܠܳܐ ܡܢܳܬ̥ܳܐ ܒܺܗ̄ܝ ܗܰܝܡܳܢܽܘܬ̥ܰܬ̥ܶܐ، ܥܰܠ ܕܠܶܒܳܟ̥ ܠܰܝ̱ܬ ܝܳܐ ܬܪܺܝܨܳܐ ܩ݄ܕ̱ܡ ܐܰ‌ܠܳܗܳܐ. 22ܐܶ‌ܠܳܐ ܬܘܿܒ ܡܺܗ̄ܝ ܒܺܝܫܽܘܬ̥ܰܝܕ̥ܳܟ̥ ܗܰܬ̥ܶܐ، ܘܺܝܒܰܥ ܡܰܢ̱ ܐ‌ܠܳܗܳܐ، ܟܺܝܬ ܕܡ݄ܫܒܳܩܳܐ ܠܳܟ̥ ܗ̄ܺܝ ܢܟ̥ܺܝܠܽܘܬ̥ܳܐ ܕܠܶܒܳܟ̥، 23ܥܰܠ ܕ݄ܟܚܳܙܶܢܳܟ̥ ܢܰܦܫܳܐ ܡܰܪ̱ܝܪܬܳܐ ܘܡܰܐܣܪܳܐ ܒ݄ܚܛܺܝܬ̥ܳܐ.“ 24ܡܰܕܥܰܪ ܠܶܗ ܣܺܝܡܳܘܢ ܘܐܡ݄ܪ ܠܶܗ: ”ܗܰܬܽܘ ܝܺܒܰܥܽܘ ܡܰܢ̱ ܐ‌ܠܳܗܳܐ ܡܶܢ̱ ܚܠܳܦܺܝ ܕܠܳܐ ܐܬ̥ܶܐ ܐܰܥܠܺܝ ܡܶܕܶܐ ܡܰܗ̄ܢܺܝ ܕܐܡ݄ܪܟ̥ܽܘ.“ 25ܘܫܶܡܥܽܘܢ ܘܝܽܘܚܰܢܳܢ، ܒ݄ܬ̥݄ܪ ܕ݄ܣܗ݄ܕّܶܗ ܘܡܰܘܠܦ݄ܢّܶܗ ܗ̄ܺܝ ܡܶܠܬ̥ܳܐ ܕܰܐ‌ܠܳܗܳܐ ܕܰܥܺܝܪܺܝ ܠܽܐܘܪܶܫܠܶܡ. ܘ݄ܡܣܰܒܰܪّܶܗ ܒܓ̥ܰܠܰܒܶܐ ܩ݄ܪ̈ܝܰܘܳܬ̥ܳܐ ܕܰܫّܳܡܪ̈ܳܝܶܐ.

ܦܺܝܠܺܝܦܳܘܣ ܘܽܗ̄ܘ ܡܗܰܝܡܢܳܐ ܕܡܶܢ̱ ܟܽܘܫ

26ܘ݄ܫܓ̥ܺܝܠ ܗ̄ܽܘ ܡܰܠܰܐܟ̥ܳܐ ܕܡܳܪܝܳܐ ܥܰܡ ܦܺܝܠܺܝܦܳܘܣ ܘܐܡ݄ܪ ܠܶܗ ܠܶܗ: ”ܩܘܿܡ ܙܳܟ̥ ܠܽܗ̄ܘ ܬܰܝܡܢܳܐ ܒܽܗ̄ܘ ܕܰܪܒܳܐ ܕܽܗ̄ܘ ܡܰܕ̥ܒܪܳܐ ܕ݄ܟܢܳܚ݄ܬ ܡܶܢ̱ ܐܽܘܪܶܫܠܶܡ ܠܓܰܙܰܐ.“ 27ܘܩܰܝ݄ܡ ܐܰܙّܶܗ. ܘ݄ܬܦܺܝܩ ܐܶܒܶܗ ܚܰܕ̱ ܡܗܰܝܡܢܳܐ ܕܳܐܬ̥ܶܐ ܗ̄ܘܰܐ ܡܶܢ̱ ܟܽܘܫ، ܘܫܰܠܺܝܛܳܐ ܗ̄ܘܰܐ ܕܩܰܢܕܰܩ ܗ̄ܺܝ ܡܰܠ݄ܟܬ̥ܳܐ ܕܰܟّܽܘܫܳܝ̈ܶܐ. ܗܺܝّܶܗ ܫܰܠܺܝܛܳܐ ܗ̄ܘܰܐ ܥܰܠ ܟܽܘܠܶܗ ܗ̄ܽܘ ܓܰܙܰܝܕ̥ܰܗ. ܗܰܢܳܐ ܐܰܬ̥ܺܝ ܗ̄ܘܰܐ ܕܣܳܓ̥݄ܕ ܒܽܐܘܪܶܫܠܶܡ. 28ܘܺܗ̄ܝ ܢܰܩܠܐ ܕܕܰܥ݄ܪ ܕ݄ܐܙّܶܗ، ܝܳܬܰܒ̥ ܗ̄ܘܰܐ ܥܰܠ ܗ̄ܺܝ ܡܰܪܟܰܒܬ̥ܳܐ ܘܩܳܪܶܐ ܗ̄ܘܰܐ ܒܶܐܫܰܥܝܳܐ ܗ̄ܽܘ ܢܒܺܝܳܐ. 29ܘܺܗ̄ܝ ܪܽܘܚܳܐ ܐܡ݄ܪ ܠܰܗ ܠܦܺܝܠܺܝܦܳܘܣ: ”ܡܩܰܕ݄ܡ ܡܛܰܝ ܠܺܗ̄ܝ ܡܰܪܟܰܒܬ̥ܳܐ.“ 30ܘܺܗ̄ܝ ܢܰܩܠܐ ܕ݄ܡܩܰܕܰܡ ܠܶܗ، ܫܰܡ݄ܥ ܕܟܳܩܳܪܶܐ ܒܶܐܫܰܥܝܳܐ ܗ̄ܽܘ ܢܒܺܝܳܐ. ܘܐܡ݄ܪ ܠܶܗ ܠܶܗ: ”ܩܰܝ ܟ݄ܐܕ̥ܥܰܬ ܡ݄ܢ ܟܳܩܳܪܰܬ؟“ 31ܘܗܺܝّܶܗ ܐܡ݄ܪ ܠܶܗ: ”ܐܰܝܕܰܪܒܳܐ ܟܺܝܒܺܝ ܕܳܐܕ̥ܰܥ ܐ̱ܢܳܐ ܕܠܳܐ ܢܳܫܳܐ ܡܰܘܠܰܦ ܠܺܝ.“ ܘܰܐܒ݄ܥ ܡܶܢ̱ ܦܺܝܠܺܝܦܳܘܣ ܕܣܳܠ݄ܩ ܘܝܳܬܽܒ̥ ܐܰܥܡܶܗ. 32ܘܽܗ̄ܘ ܨܚܳܚܳܐ ܕܩܳܪܶܐ ܗ̄ܘܰܐ ܐܶܒܶܗ ܗܰܢܳܐ ܗ̄ܘܰܐ: ”ܐܟ̥ ܕܽܗ̄ܘ ܦܰܪܳܐ ܡܰܘܒ݄ܠ (ܡܬܰܘܒ݄ܠ) ܠܽܗ̄ܘ ܢܚܳܪܳܐ، ܘ݄ܐܟ̥ ܕܺܗ̄ܝ ܥܘܳܢܳܐ ܩ݄ܕ̱ܡ ܗ̄ܽܘ ܩܰܝܳܨܳܐ ܫܰܬܺܝܩܳܐ ܗ̄ܘܰܐ. ܘܗܰܘܟ̥ܰܐ ܠܳܐ ܦܬ݄ܚ ܠܶܗ ܦܶܡܶܗ. 33ܘܒܺܗ̄ܝ ܡܰܟܺܝܟ̥ܽܘܬ̥ܰܝܕ̥ܶܗ، ܡܽܗ̄ܘ ܚܒܽܘܫܝܳܐ ܘܡܽܗ̄ܘ ܕܺܝܢܳܐ ܡܰܘܒ݄ܠ (ܡܬܰܘܒ݄ܠ). ܥܰܠ ܗ̄ܽܘ ܕܳܪܰܝܕ̥ܶܗ ܡܰܢ ܟܡ݄ܫܓ̥݄ܠ؟ ܘܰܚّܰܝ̈ܰܝܕ̥ܶܗ ܟܡ݄ܫܩܳܠܺܝ ܡܺܗ̄ܝ ܐܰܪܥܳܐ؟“ 34ܘܽܗ̄ܘ ܡܗܰܝܡܢܰܘܳܐ ܐܡ݄ܪ ܠܶܗ ܠܦܺܝܠܺܝܦܳܘܣ: ”ܟܳܐܒܰܥ ܐ̱ܢܳܐ ܡܶܢܳܟ̥ ܕ݄ܐܡّܰܪ̱ܬ ܠܺܝ: ܗ̄ܽܘ ܢܒܺܝܳܐ، ܥܰܠ ܡܰܢ ܐܡܺܝܪܳܐ ܠܶܗ ܗܰܬ̥ܶܐ؟ ܥܰܠ ܢܰܦܫܶܗ ܐܰܘ ܥܰܠ ܢܳܫܳܐ ܚܪܶܢܳܐ؟“

35ܗ̄ܺܝ ܢܰܩܠܝܳܐ ܦܺܝܠܺܝܦܳܘܣ ܦܬ݄ܚ ܠܶܗ ܦܶܡܶܗ ܘ݄ܡܫܰܪܶܐ ܠܶܗ ܡܽܗ̄ܘ ܟܬ̥ܳܒ̥ܰܢܳܐ ܕܟܳܡܣܰܒܰܪ ܠܶܗ ܥܰܠ ܡܳܪܰܢ ܝܶܫܽܘܥ. 36ܘܗ݄ܢّܶܝ ܐܰܙ̈ܳܠܶܐ ܒܽܗ̄ܘ ܕܰܪܒܳܐ، ܡܰܛ݄ܢ ܠܕܽܘܟܬ̥ܳܐ ܚܕ̥ܳܐ ܕܟܺܝܬ ܐܶܒܰܗ ܡܰܝ̈ܶܐ. ܘܐܡ݄ܪ ܠܶܗ ܗ̄ܽܘ ܡܗܰܝܡܢܰܘܳܐ: ”ܟܰܐܠ݄ܢ ܡܰܝ̈ܶܐ! ܡ݄ܢܝܳܐ ܕܡܰܟܠܶܐ ܗ̄ܽܘ ܥܡܳܕ̥ܰܝܕ̥ܺܝ؟“ 37ܦܺܝܠܺܝܦܳܘܣ ܐܡ݄ܪ ܠܶܗ: ”ܟܺܝܒܳܟ̥ ܐܶܢ ܕ݄ܡܗܰܝܡܢܰܬ ܡܶܢ̱ ܟܽܘܠܶܗ ܠܶܒܳܟ̥.“ ܘܗܺܝّܶܗ ܡܰܕܥܰܪ ܠܶܗ ܐܡ݄ܪ ܠܶܗ: ”ܐܳܢܳܐ ܟ݄ܡܗܰܝܡܰܢ ܐ̱ܢܳܐ ܕܝܶܫܽܘܥ ܡܫܺܝܚܳܐ ܗ̄ܽܘ ܐܰܒܪܳܐ ܕܰܐ‌ܠܳܗܳܐ ܝܳܐ.“ 38ܘܗܽܒ̥ ܠܶܗ ܦܽܘܩܕܳܢܳܐ ܕܟܳܠܝܳܐ ܗ̄ܺܝ ܡܰܪܟܰܒܬ̥ܳܐ. ܘܢܰܚܺܝܬܺܝ ܗ̄ܰܬܪܶܝ ܠܰܡّܰܝ̈ܶܐ، ܘܦܺܝܠܺܝܦܳܘܣ ܡܰܥܡܰܕ̥ ܠܶܗ ܠܽܗ̄ܘ ܡܗܰܝܡܢܰܘܳܐ. 39ܘܺܗ̄ܝ ܢܰܩܠܐ ܕܣܰܠܺܝܩܺܝ ܡܰܢ̱ ܡّܰܝ̈ܶܐ، ܗ̄ܺܝ ܪܽܘܚܳܐ ܕܡܳܪܝܳܐ ܢܬ݄ܫ ܠܰܗ ܠܦܺܝܠܺܝܦܳܘܣ، ܘܽܗ̄ܘ ܡܗܰܝܡܢܰܘܳܐ ܠܳܐ ܚܙܶܐ ܠܶܗ، ܐܶ‌ܠܳܐ ܐܰܙّܶܗ ܗ̄ܘܰܐ ܦܨܺܝܚܳܝܳܐ ܒܽܗ̄ܘ ܕܰܪܒܰܝܕ̥ܶܗ. 40ܘܦܺܝܠܺܝܦܳܘܣ ܚܙܶܐ ܒܰܐܙܳܘܛܳܘܣ، ܘܡܶܢ̱ ܬܰܡܳܐ ܟܳܪܰܟ̥ ܗ̄ܘܰܐ ܘ݄ܡܣܰܒܰܪ ܗ̄ܘܰܐ ܒܟܽܘܠّܶܗ ܗ̄ܰܡܕ̥ܺܝ̈ܢܳܬ̥ܳܐ ܗܳܠ ܕܡܰܛܺܝ ܠܩܶܣܰܪܺܝܰܐ.

Právě zvoleno:

ܥܒܳܕ̥̈ܶܐ ܕܰܫܠܺܝܚ̈ܶܐ 8: ܟܬܒܐ

Zvýraznění

Sdílet

Kopírovat