ܥܒܳܕ̥̈ܶܐ ܕܰܫܠܺܝܚ̈ܶܐ 24
24
ܣܳܗܕ̈ܶܐ ܡܕ̈ܰܓܠܳܢܶܐ ܥܰܠ ܦܰܘܠܳܘܣ
1ܘܒ݄ܬ̥݄ܪ ܚܰܡܫܳܐ ܝܰܘܡ̈ܶܐ، ܢܰܚ݄ܬ ܚܰܢܰܢܝܳܐ ܗ̄ܽܘ ܪܰܒܳܐ ܕܰܟّܳܗ̈ܢܶܐ ܥܰܡ ܗ̄ܰܩّܰܫ̈ܶܐ ܘܥܰܡ ܛܰܪܛܽܠܳܘܣ ܗ̄ܽܘ ܟܳܪܽܘܙܳܐ، ܘܡܰܘܕ̥ܰܥّܶܗ ܠܽܗ̄ܘ ܫܰܠܺܝܛܳܐ ܥܰܠ ܦܰܘܠܳܘܣ. 2ܘܺܗ̄ܝ ܢܰܩܠܐ ܕ݄ܩܪܰܠّܶܗ (ܠܦܰܘܠܳܘܣ)، ܡܫܰܪܶܐ ܠܶܗ ܛܰܪܛܽܠܳܘܣ ܕܡܰܫܟܶܐ ܐܰܥܠܶܗ ܘܳܐܡ݄ܪ: ”ܒܫܰܝܢܳܐ ܪܰܒܳܐ ܟܚܳܝܺܝܢܰܐ ܒܺܗ̄ܝ ܛܰܝܒܽܘܬ̥ܰܝܕ̥ܳܟ̥، ܘܛܳܒ̈ܳܬ̥ܳܐ ܓ̥ܰܠܰܒܶܐ ܗܰܘܺܝ ܠܽܗ̄ܘ ܥܰܡܰܢܳܐ ܕܗܰܘܰܬ ܠܶܗ ܡܳܪܳܐ. 3ܘܟܽܘܠܰܢ ܒܟܽܘܠ ܕܽܘܟܬ̥ܳܐ ܟܡܰܘܕܺܝܢܰܐ ܠܺܗ̄ܝ ܛܰܝܒܽܘܬ̥ܰܝܕ̥ܳܟ̥، ܝܰܐ ܢܰܨܺܝܚܳܐ ܦܺܝܠܺܟܣ. 4ܘ݄ܕܠܳܐ ܡܰܘܩܪܺܝܢܰܐ ܐܰܥܠܳܟ̥ ܒܫܽܘ̈ܐܳܠܶܐ ܓ̥ܰܠܰܒܶܐ، ܟܳܐܒܰܥ ܐ̱ܢܳܐ ܡܶܢܳܟ̥ ܕܫܳܡܥܰܬ ܠܺܗ̄ܝ ܡܰܟܺܝܟ̥ܽܘܬ̥ܰܝܕ̥ܰܢ ܒܟܰܪܝܳܐ: 5ܚܙܶܐ ܠܰܢ ܗ̄ܽܘ ܓܰܒ̥ܪܰܢܳܐ ܕܟ݄ܬ ܝܳܐ ܡܰܚܪܒ̥ܳܢܳܐ ܘܡܰܩܺܝܡܳܢܳܐ ܕ݄ܫܓ̥ܽܘܫܝܳܐ ܠܟܘ̇ܠّܶܗ ܗ̄ܰܝّܽܘܕ̥̈ܳܝܶܐ ܕܒܺܗ̄ܝ ܐܰܪܥܳܐ ܟܽܘܠܰܗ، ܡܺܐܝܕ̥ܶܗ ܕܗܺܝّܶܗ ܝܳܐ ܗ̄ܽܘ ܪܺܝܫܳܐ ܕܽܗ̄ܘ ܝܽܘܠܦܳܢܳܐ ܕܰܗ̄ܢ ܢܳܨܪ̈ܳܝܶܐ. 6ܘܠܽܗ̄ܘ ܗܰܝܟܠܰܝܕ̥ܰܢ ܐܰܒ݄ܥ ܕ݄ܡܚܰܪ݄ܡ. ܘܺܗ̄ܝ ܢܰܩܠܐ ܕܨ݄ܕ ܠܰܢ ܐܰܒܺܝܥܺܝܢܰܐ ܕܕܰܝܢܺܝܢܰܐ ܠܶܗ ܐܟ̥ ܕܽܗ̄ܘ ܢܳܡܽܘܣܰܝܕ̥ܰܢ. 7ܘܰܐܬ̥ܺܝ ܐܰܥܠܰܢ ܠܽܘܣܺܝܳܘܣ، ܗ̄ܽܘ ܪܺܝܫܳܐ ܕܰܗ̄ܢ ܐܰܠܦܳܐ، ܘ݄ܒܚܰܝܠܳܐ ܪܰܒܳܐ ܡܰܦܠܰܛ ܠܶܗ ܡܶܢ̱ ܐܺܝܕَ̥̈ܳܬ̥ܰܢ، ܘ݄ܡܫܰܕܰܪ ܠܶܗ ܠܳܟ̥ ܝܳܐ. 8ܘܗܽܒ̥ ܠܶܗ ܦܽܘܩܕܳܢܳܐ ܠܰܡّܰܫ̈ܟܝܳܢܰܝܕ̥ܶܗ ܕܳܐܬ̥݄ܢ ܠܣܺܝܕ̥ܳܟ̥. ܘܟܺܝܒܳܟ̥ ܗ̄ܺܝ ܢܰܩܠܐ ܕ݄ܡܫܰܐܠܰܬ ܠܶܗ ܕ݄ܐܕ̥ܥܰܬ ܡܶܢܶܗ ܥܰܠ ܟܽܘܠّܶܗ ܗܰܢܺܝ ܕܡܰܫܟܺܝܢܰܐ ܐܰܥܠܶܗ.“
9ܘܰܝّܽܘܕ̥̈ܳܝܰܢ݄ܟ ܣܬܶܝ ܩܰܝܺܝܡܺܝ ܐܰܥܠܶܗ ܟ݄ܐܡّܺܪ̱ܝ: ܗܰܢܺܝ ܗܰܘܟ̥ܰܐ ܢܶܝ.
ܡܰܦܬܰܚ ܦܶܡܳܐ ܕܦܰܘܠܳܘܣ
10ܘ݄ܪܡ݄ܙ ܠܶܗ ܗ̄ܽܘ ܫܰܠܺܝܛܳܐ ܠܦܰܘܠܳܘܣ ܕܡ݄ܫܓ̥݄ܠ. ܘܡܰܕܥܰܪ ܠܶܗ ܦܰܘܠܳܘܣ ܘܐܡ݄ܪ ܠܶܗ: ”ܡܶܢ̱ ܐ݄ܫܢ̈ܶܐ ܓ̥ܰܠܰܒܶܐ ܟܳܐܕ̥ܰܥ ܐ̱ܢܳܐ ܕܟ݄ܬ ܗ̄ܰܬ ܗ̄ܽܘ ܕܰܝܳܢܳܐ ܕܽܗ̄ܘ ܥܰܡܰܢܳܐ، ܡܰܗ̄ܘܟ̥ܰܐ ܒ݄ܦܨܺܝܚܽܘܬ̥ܳܐ ܟܣܳܝܰܡ ܐ̱ܢܳܐ ܡܰܦܬܰܚ ܦܶܡܳܐ ܠܰܫܰܢܺܝ: 11ܟܺܝܒܳܟ̥ ܕ݄ܐܕ̥ܥܰܬ ܕܗܶܫ ܠܰܐ ܗ̄ܘܺܝ ܠܺܝ ܙ݄ܕ ܡܶܢ̱ ܬܪܰܥܣܰܪ ܝܰܘܡ̈ܶܐ ܕܣܰܠ݄ܩ ܐ̱ܢܳܐ ܠܽܐܘܪܶܫܠܶܡ ܕܣܳܓ̥ܰܕ̥ ܐ̱ܢܳܐ. 12ܘܠܳܐ ܚܙܰܠّܰܗ ܠܺܝ ܕܟܳܡ݄ܫܓ̥ܰܠ ܐ̱ܢܳܐ ܥܰܡ ܢܳܫܳܐ ܒܽܗ̄ܘ ܗܰܝܟܠܳܐ، ܘܠܳܐ ܕܟܳܡܰܠܬܰܡ ܐ̱ܢܳܐ ܢܳܫ̈ܶܐ ܠܳܐ ܒܰܟܢܽܘܫ̈ܳܬ̥ܰܬّ̥ܶܗ ܘܠܳܐ ܒܺܗ̄ܝ ܡܕ̥ܺܝܢ̱ܬܳܐ، 13ܘܠܳܐ ܟܡܳܛܶܐ ܒܺܐܝܕ̥̈ܰܝّܶܗ ܕܡܰܚܘ݄ܢ ܩܽܘܕ̱ܡܳܟ̥ ܥܰܠ ܗ̄ܽܘ ܡܶܕܶܐ ܕܳܐܥܕܳܐ ܟܡܰܫܟ݄ܢ ܐܰܥܠܺܝ. 14ܐܶܠܳܐ ܗܰܬ̥ܶܐ ܟܡܰܘܕܶܐ ܐ̱ܢܳܐ: ܐܶܒܶܗ ܒܽܗ̄ܘ ܝܽܘܠܦܳܢܰܢܳܐ ܕܟ݄ܐܡّܺܪ̱ܝ، ܐܶܒܶܗ ܟܥܳܒܰܕ ܐ̱ܢܳܐ ܠܰܐܠܳܗܳܐ ܕܰܒّܰܒܳܢ̈ܰܝܕ̥ܺܝ، ܘܳܐܢܳܐ ܟ݄ܡܗܰܝܡܰܢ ܐ̱ܢܳܐ ܒܟܽܘܠ ܡܶܕܶܐ ܕ݄ܟܬ̥ܺܝܒ̥ ܒܽܗ̄ܘ ܢܳܡܽܘܣܳܐ ܘܒܰܗ̄ܢ ܢܒܺܝ̈ܶܐ. 15ܘܳܐܢܳܐ ܟ݄ܬ ܠܺܝ ܣܰܒܪܳܐ ܒܰܐܠܳܗܳܐ، ܗ̄ܽܘ ܣܰܒܪܳܐ ܕܗ݄ܢّܶܝ ܣܬܶܝ ܟ݄ܬّܶܗ: ܓܕܽܗ̄ܘܝܳܐ ܩܝܰܡܬܳܐ ܕܰܡّܺܝ̈ܬ̥ܶܐ ܠܰܛّܳܒ̥̈ܶܐ ܘܠܰܚّܰܪ̈ܒܶܐ. 16ܡܰܗ̄ܘܟ̥ܰܐ ܟܥܳܒ̥ܰܕ ܐ̱ܢܳܐ ܓ̥ܰܠܰܒܶܐ ܠܰܫܰܢ ܕܳܗ̄ܘܶܐ ܠܶܒܺܝ ܬ̥ܢܺܝܚܳܝܳܐ ܩ݄ܕ̱ܡ ܐܰܠܳܗܳܐ ܘܩ݄ܕ̱ܡ ܗ̄ܰܢ ܢܳܫ̈ܶܐ ܒܟܽܘܠ ܙܰܒܢܳܐ. 17ܘܒ݄ܬ̥݄ܪ ܓ̥ܰܠܰܒܶܐ ܐ݄ܫܢ̈ܶܐ، ܐܰܬ̥ܺܝ ܐ̱ܢܳܐ ܠܓܰܒ ܗ̄ܰܢ ܐܰܒܢ̈ܶܐ ܕܽܗ̄ܘ ܥܰܡܰܝܕ̥ܺܝ ܕܳܗ̄ܒܶܐ ܐ̱ܢܳܐ ܙܶܕܰܩܬܳܐ، ܘܕ݄ܡܩܰܪܰܒ̥ ܐ̱ܢܳܐ ܩܽܘܪܒܳܢܳܐ. 18ܘܗܰܢܺܝ ܚܙܰܠّܰܗ ܠܺܝ ܒܽܗ̄ܘ ܗܰܝܟܠܳܐ ܘܳܐܢܳܐ ܕܰܟ̥ܝܳܐ، ܠܳܐ ܥܰܡ ܟܶܢܫܳܐ ܘܠܳܐ ܒ݄ܫܓ̥ܽܘܫܝܳܐ. 19ܐܶܠܳܐ ܗܰܢܺܝ ܕܣ݄ܡّܶܗ ܫܓ̥ܽܘܫܝܳܐ ܝܽܘܕ̥̈ܳܝܶܐ ܕܰܐܬ̥݄ܢ ܡܶܢ̱ ܐܰܣܺܝܰܐ ܢܶܝ، ܐܰܝܢܰܐ ܕܠܳܙܰܡ ܗ̄ܘܰܐ ܕܩܰܝܡܺܝ ܐܰܥܡܺܝ ܩܽܘܕ̱ܡܳܟ̥ ܘ݄ܕܡܰܫܟ݄ܢ ܗ̄ܽܘ ܡܶܕܶܐ ܕܟ݄ܬّܶܗ ܐܰܥܠܺܝ. 20ܐܰܘ ܗܰܢܺܝ ܛܪܳܐ ܐ݄ܡّܺܪ̱ܝ ܡ݄ܢ ܚܰܪܒܽܘܬ̥ܳܐ ܚܙܰܠّܶܗ ܐܶܒܺܝ ܗ̄ܺܝ ܢܰܩܠܐ ܕܩܰܝ݄ܡ ܐ̱ܢܳܐ ܩ݄ܕ̱ܡ ܗ̄ܽܘ ܟܢܽܘܫܝܰܬّ̥ܶܗ؟ 21ܐܶܠܳܐ ܚܕ̥ܳܐ ܡܶܠܬ̥ܳܐ ܗܰܬ̥ܶܐ ܕܡܰܙܥܰܩ ܠܺܝ ܘܐܡ݄ܪ ܠܺܝ ܘܳܐܢܳܐ ܩܺܝܡܳܐ ܒܰܝܢܳܬ̥ܰܝّܶܗ: ܥܰܠ ܗ̄ܺܝ ܩܝܰܡܬܳܐ ܕܰܡّܺܝ̈ܬ̥ܶܐ ܟܳܗ̄ܘܶܐ ܠܺܝ ܕܺܝܢܳܐ ܐܰܕܝܰܘܡܰܐ ܩܽܘܕ̱ܡܰܝܟ̥ܽܘ.“
ܗ̄ܽܘ ܢܶܟ̥ܠܳܐ ܕܦܺܝܠܺܟܣ ܗ̄ܽܘ ܫܰܠܺܝܛܳܐ
22ܘܦܺܝܠܺܟܣ، ܥܰܠ ܕܳܐܕ̥ܰܥ ܗ̄ܘܰܐ ܠܽܗ̄ܘ ܕܰܪܒܰܢܳܐ ܓ̥ܰܠܰܒܶܐ ܛܳܒ̥ܳܐ، ܡܰܟܠܶܐ ܠܶܗ ܗ̄ܽܘ ܕܺܝܢܳܐ ܘܐܡ݄ܪ ܠܰܗ ܠّܶܗ: ”ܡ݄ܐ ܕܰܐܬ̥ܺܝ ܗ̄ܽܘ ܪܺܝܫܳܐ ܕܰܗ̄ܢ ܐܰܠܦܳܐ، {ܠܽܘܣܺܝܳܘܣ}، ܓ݄ܕܫܳܡܰܥ ܐ̱ܢܳܐ (ܘܕܳܝܰܢ ܐ̱ܢܳܐ) ܒܰܝܢܳܬ̥ܰܝܟ̥ܽܘ.“
23ܘܗܽܒ̥ ܠܶܗ ܦܽܘܩܕܳܢܳܐ ܠܽܗ̄ܘ ܩܶܢܛܪܽܘܢܳܐ ܕܢܳܛܪܺܝ ܠܦܰܘܠܳܘܣ ܒ݄ܬ̥ܢܺܝܚܽܘܬ̥ܳܐ، ܘܠܳܐ ܡܰܟܠ݄ܢ ܢܳܫܳܐ ܡܰܢ̱ ܚّܰܒ̥ܪ̈ܳܢܰܝܕ̥ܶܗ ܕ݄ܡܫܰܡܫܺܝ ܠܶܗ. 24ܘܒ݄ܬ̥݄ܪ ܟܡܳܐ ܝܰܘܡ̈ܶܐ، ܡܫܰܕܰܪ ܠܶܗ ܦܺܝܠܺܟܣ ܘܺܗ̄ܝ ܐܰܢ̱ܬ̥ܬܰܝܕ̥ܶܗ ܕܽܘܪܣܺܠܰܐ ܕܟ݄ܬ ܗ̄ܘܰܐ ܗܽܘܕ̥ܰܝܬܳܐ ܩܪܰܠّܶܗ ܠܦܰܘܠܳܘܣ ܘܫܰܡܺܝܥܺܝ ܡܶܢܶܗ ܥܰܠ ܗ̄ܺܝ ܗܰܝܡܳܢܽܘܬ̥ܳܐ ܕ݄ܡܫܺܝܚܳܐ. 25ܘܺܗ̄ܝ ܢܰܩܠܐ ܕ݄ܫܓ̥ܺܝܠ ܐܰܥܡܰܝّܶܗ ܥܰܠ ܗ̄ܺܝ ܙܰܕܺܝܩܽܘܬ̥ܳܐ ܘܥܰܠ ܗ̄ܺܝ ܩܰܕܺܝܫܽܘܬ̥ܳܐ ܘܥܰܠ ܗ̄ܽܘ ܕܺܝܢܳܐ ܕ݄ܓܕܳܐܬ̥ܶܐ، ܦܺܝܠܺܟܣ ܡܠܶܐ ܙܽܘܥܬ̥ܳܐ ܘܐܡ݄ܪ ܠܶܗ: ”ܙܳܟ̥ ܐܳܥܕܳܐ، ܘܺܗ̄ܝ ܢܰܩܠܐ ܕܳܗ̄ܘܶܐ ܠܺܝ ܙܰܒܢܳܐ ܓ݄ܡܫܰܕܰܪ ܐ̱ܢܳܐ ܒ݄ܬ̥ܪܳܟ̥.“
26ܘܗܺܝّܶܗ ܚܳܫܰܒ̥ ܗ̄ܘܰܐ ܕܦܰܘܠܳܘܣ ܕܳܗ̄ܒܶܐ ܗ̄ܘܰܝ ܠܶܗ ܫܽܘܚܕܳܐ (ܙܽܘܙ̈ܶܐ)، ܡܰܗ̄ܘܟ̥ܰܐ ܒܟܽܘܠ ܙܰܒܢܳܐ ܡܫܰܕܰܪ ܗ̄ܘܰܐ ܡܰܝܬܶܐ ܗ̄ܘܰܐ ܘܡ݄ܫܓ̥ܰܠ ܗ̄ܘܰܐ ܐܰܥܡܶܗ. 27ܘܒ݄ܬ̥݄ܪ ܕ݄ܡܟܰܡܶܠ ܠܶܗ ܬܰܪܬܶܝ ܐ݄ܫܢ̈ܶܐ، ܫܰܠܺܝܛܳܐ ܚܪܶܢܳܐ ܐܰܬ̥ܺܝ ܒܕܽܘܟܬ̥ܶܗ ܕܡ݄ܩܪܶܐ ܗ̄ܘܰܐ ܦܳܪܩܺܝܳܘܣ ܦܺܗܣܛܳܘܣ. ܘܦܺܝܠܺܟܣ، ܐܟ̥ ܕܣܳܝ݄ܡ ܛܳܒ̥ܽܘܬ̥ܳܐ ܥܰܡ ܗ̄ܰܝّܽܘܕ̥̈ܳܝܶܐ، ܛܪܶܐ ܠܶܗ ܠܦܰܘܠܳܘܣ ܝܰܣܺܝܪܳܐ (ܒܽܗ̄ܘ ܚܒܽܘܫܝܳܐ).
Právě zvoleno:
ܥܒܳܕ̥̈ܶܐ ܕܰܫܠܺܝܚ̈ܶܐ 24: ܟܬܒܐ
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Suryoyo Bible © 2024 Aramaic Bible Translation