ܥܒܳܕ̥̈ܶܐ ܕܰܫܠܺܝܚ̈ܶܐ 21
21
ܗ̄ܽܘ ܡܰܐܙܠܳܐ ܕܠܽܐܘܪܶܫܠܶܡ
1ܘ݄ܦܪܺܝܫܺܝܢܰܐ ܡ݄ܢّܶܗ ܘܰܐܙّܰܢ ܬܪܺܝܨܳܐ ܠܺܗ̄ܝ ܓܙܺܝܪܬܳܐ ܕܩܳܘ، ܘܠܽܗ̄ܘ ܝܰܘܡܳܐ ܚܪܶܢܳܐ ܐܰܬ̥ܺܝܢܰܐ ܠܪܳܘܕܳܘܣ، ܘܡܶܢ̱ ܬܰܡܳܐ ܠܦܰܐܛܰܪܰܐ. 2ܘܬܰܡܳܐ ܚܙܶܐ ܠܰܢ ܣܦܺܝܢ̱ܬܳܐ ܐܰܙܳܠܬܳܐ ܠܦܽܘܢܺܝܩܺܝ، ܘܣܰܠܺܝܩܺܝܢܰܐ ܐܶܒܰܗ ܘܰܐܙّܰܢ. 3ܘܡܰܛܺܝܢܰܐ ܗܳܠ ܠܺܗ̄ܝ ܓܙܺܝܪܬܳܐ ܕܩܽܘܦܪܳܘܣ، ܘ݄ܛܪܝܳܐ ܠܰܢ ܡܽܗ̄ܘ ܓܰܒܳܐ ܕܽܗ̄ܘ ܣܶܡܳܠܳܐ ܘܰܐܬ̥ܺܝܢܰܐ ܠܣܽܘܪܺܝܰܐ. ܘܡܶܢ̱ ܬܰܡܳܐ ܡܰܛܺܝܢܰܐ ܠܨܽܘܪ، ܡܺܐܝܕ̥ܶܗ ܕܬܰܡܳܐ ܟܰܠܝܳܐ ܗ̄ܺܝ ܣܦܺܝܢ̱ܬܳܐ ܕܡܰܢܚܬܳܐ ܗ̄ܽܘ ܛܰܥܢܰܝܕ̥ܰܗ.
4ܘܺܗ̄ܝ ܢܰܩܠܐ ܕ݄ܚܙܶܐ ܠܰܢ ܬܰܡܳܐ ܬܰܠܡܺܝܕ̥̈ܶܐ، ܦܰܝܫܺܝܢܰܐ ܓܰܒܰܝّܶܗ ܫܰܒ̥ܥܳܐ ܝܰܘܡ̈ܶܐ. ܘܟܽܘܠ ܝܰܘܡܳܐ ܐ݄ܡّܺܪ̱ܝ ܗ̄ܘܰܘ̱ ܠܦܰܘܠܳܘܣ، ܒܪܽܘܚܳܐ، ܕܠ݄ܐ ܐܙّܶܗ ܠܽܐܘܪܶܫܠܶܡ. 5ܘܒ݄ܬ̥݄ܪ ܡܰܢ̱ ܝّܰܘܡ̈ܳܬ̥ܰܢܺܝ، ܢܰܦܺܝܩܺܝܢܰܐ ܕ݄ܐܙّܰܢ ܒܽܗ̄ܘ ܕܰܪܒܳܐ، ܘܟܽܘܠّܶܗ ܥܰܡ ܗ̄ܰܢ ܐܰܒܢ̈ܰܬّ̥ܶܗ ܘܰܗ̄ܢ ܢܺܫ̈ܰܬّ̥ܶܗ ܢܰܦܺܝܩܺܝ ܐܰܥܡܰܢ ܗܳܠ ܠܰܪܒ̥ܰܠ ܡܺܗ̄ܝ ܡܕ̥ܺܝܢ̱ܬܳܐ، ܘܒܰܪܺܝܟܺܝ ܥܰܠ ܒܰܪ̈ܟܳܬ̥ܰܝّܶܗ ܘ݄ܡܨܰܠܰܠّܶܗ. 6ܘ݄ܢܫ݄ܩ ܠܰܢ ܠ݄ܚܕ̥ܳܕ̥̈ܶܐ، ܘܣܰܠܺܝܩܺܝܢܰܐ ܠܺܗ̄ܝ ܣܦܺܝܢ̱ܬܳܐ، ܘܰܬّܰܠܡܺܝܕ̥̈ܶܐ ܕܰܥܺܝܪܺܝ ܠܰܒّܳܬ̈ܰܬّ̥ܶܗ. 7ܘܰܐܚܢܰܐ ܐܰܙّܰܢ ܡܶܢ̱ ܨܽܘܪ ܘܰܐܬ̥ܺܝܢܰܐ ܠܺܗ̄ܝ ܡܕ̥ܺܝܢ̱ܬܳܐ ܕܥܰܟܽܘ، ܘܗܽܒ̥ ܠܰܢ ܫܠܳܡܳܐ ܠܰܗ̄ܢ ܐܰܚ̈ܽܘܢܳܢܶܐ ܕܬܰܡܳܐ ܘܢܰܚܺܝܬܺܝܢܰܐ ܣܺܝܕܰܝّܶܗ ܚܰܕ̱ ܝܰܘܡܳܐ. 8ܘܒܽܗ̄ܘ ܝܰܘܡܳܐ ܚܪܶܢܳܐ، ܢܰܦܺܝܩܺܝܢܰܐ ܠܩܶܣܰܪܺܝܰܐ، ܘܰܐܙّܰܢ ܢܰܚܺܝܬܺܝܢܰܐ ܒܽܗ̄ܘ ܒܰܝܬܳܐ ܕܦܺܝܠܺܝܦܳܘܣ ܗ̄ܽܘ ܡܣܰܒܪܳܢܳܐ ܕܟ݄ܬ ܝܳܐ ܚܰܕ̱ ܡܰܢ̱ ܫّܰܒ̥ܥܳܐ، 9ܘܟ݄ܬ ܗ̄ܘܰܝ ܠܶܗ ܐܰܪܒܰܥ ܒܢ̈ܳܬ̥ܳܐ ܒܬ̥ܽܘ̈ܠܳܬ̥ܳܐ ܕܡ݄ܬܢܰܒ݄ܢ ܗ̄ܘܰܘ̱. 10ܘܺܗ̄ܝ ܢܰܩܠܐ ܕܦܰܝܺܝܫܺܝܢܰܐ ܬܰܡܳܐ ܝܰܘܡ̈ܶܐ ܓ̥ܰܠܰܒܶܐ، ܢܰܚ݄ܬ ܗ̄ܘܰܐ ܡܶܢ̱ ܝܺܗܽܘܕ̥ ܚܰܕ̱ ܢܒܺܝܳܐ ܕ݄ܐܫܡܶܗ ܐܰܓ̥ܰܒܳܘܣ، 11ܘܥܰܒ݄ܪ ܠܣܺܝܕ̥ܰܢ ܘܡ݄ܕ ܠܶܗ ܗ̄ܽܘ ܡܶܐܣܰܪ ܚܰܨܳܐ ܕܦܰܘܠܳܘܣ ܘܡܰܐܣ݄ܪ ܠܶܗ ܐܺܝܕ̥̈ܳܬ̥ܶܗ ܘܪ̈ܰܓ̥ܠܳܬ̥ܶܗ ܕܪܽܘܚܶܗ، ܘܐܡ݄ܪ ܠܶܗ: ”ܗܰܘܟ̥ܰܐ ܟܳܐܡ݄ܪ ܪܽܘܚܳܐ ܕܩܽܘܕܫܳܐ: ܗ̄ܽܘ ܓܰܒ̥ܪܳܐ ܡܳܪܳܐ ܕܽܗ̄ܘ ܚܰܨܰܢܳܐ ܓܡܰܐܣܪܺܝ ܠܶܗ ܗ̄ܰܝّܽܘܕ̥̈ܳܝܶܐ ܒܽܐܘܪܶܫܠܶܡ ܘ݄ܓܡܰܫܠܡܺܝ ܠܶܗ ܒܺܐܝܕ̥̈ܶܐ ܕܰܥّܰܡ̈ܶܐ.“
12ܘܺܗ̄ܝ ܢܰܩܠܐ ܕܫܰܡܺܝܥܺܝܢܰܐ ܗ̄ܽܘ ܡܰܐܡܪܰܢܳܐ، ܐܰܒܺܝܥܺܝܢܰܐ ܡܶܢܶܗ ܐܰܚܢܰܐ ܘܰܗ̄ܢ ܐܰܒܢ̈ܶܐ ܕܽܗ̄ܘ ܐܰܬ̥ܪܳܐ ܕܠ݄ܐ ܐܙّܶܗ ܠܽܐܘܪܶܫܠܶܡ. 13ܗܶܕܺܝ ܡܰܕܥܰܪ ܠܶܗ ܦܰܘܠܳܘܣ ܘܐܡ݄ܪ ܠܶܗ: ”ܡ݄ܢ ܟܣܰܝܡܺܝܬܽܘ ܕܟܳܒܳܟ̥ܺܝܬܽܘ ܘܬܳܒ̥ܪܺܝܬܽܘ ܠܶܒܺܝ. ܐܳܢܳܐ ܡܛܰܝܒܳܐ ܐ̱ܢܳܐ ܠܳܐ ܒܶܠܚܽܘܕ̥ ܠܰܗ̄ܢ ܐܰܣܽܘܪ̈ܶܐ، ܐܶܠܳܐ ܗܳܠ ܠܽܗ̄ܘ ܡܰܘܬܳܐ ܒܽܐܘܪܶܫܠܶܡ ܡܶܢ̱ ܚܠܳܦ ܐ݄ܫܡܶܗ ܕܡܳܪܰܢ ܝܶܫܽܘܥ ܡܫܺܝܚܳܐ.“
14ܘܺܗ̄ܝ ܢܰܩܠܐ ܕܠܳܐ ܡܰܨ݄ܬ̥ ܠܶܗ ܐܰܥܠܰܢ ܟܰܠܺܝܢܰܐ ܘܐܡ݄ܪ ܠܰܢ: ”ܛܪܳܐ ܗ̄ܘܶܐ ܗ̄ܽܘ ܨܶܒܝܳܢܳܐ ܕܡܳܪܰܢ ܝܶܫܽܘܥ!“
15ܘܒ݄ܬ̥݄ܪ ܡܰܢ̱ ܝّܰܘܡ̈ܰܢܺܝ، ܡܛܰܝܰܒ ܠܰܢ ܪܽܘܚܰܝܢܰܐ ܘܣܰܠܺܝܩܺܝܢܰܐ ܠܽܐܘܪܶܫܠܶܡ. 16ܘܗ݄ܢ ܡܰܢ̱ ܬّܰܠܡܺܝܕ̥̈ܶܐ ܐܰܬ̥݄ܢ ܐܰܥܡܰܢ ܡܶܢ̱ ܩܶܣܰܪܺܝܰܐ ܘܡ݄ܕّܶܗ ܐܰܥܡܰܝّܶܗ ܚܰܕ̱ ܐܰܚܽܘܢܳܐ ܡܰܢ̱ ܬّܰܠܡܺܝܕ̥̈ܶܐ ܩܰܕ̱ܡܳܝ̈ܶܐ، ܐ݄ܫܡܶܗ ܡܢܰܣܳܘܢ ܕܟ݄ܬ ܗ̄ܘܰܐ ܡܶܢ̱ ܩܽܘܦܪܳܘܣ ܠܰܫܰܢ ܕܡܰܩܒܶܠ ܠܰܢ ܒܽܗ̄ܘ ܒܰܝܬܰܝܕ̥ܶܗ.
ܦܰܘܠܳܘܣ ܒܽܐܘܪܶܫܠܶܡ
17ܘܺܗ̄ܝ ܢܰܩܠܐ ܕܰܐܬ̥ܺܝܢܰܐ ܠܽܐܘܪܶܫܠܶܡ، ܗ̄ܰܢ ܐܰܚ̈ܽܘܢܳܢܶܐ ܡܰܩܒܰܠّܰܗ ܠܰܢ ܒ݄ܦܨܺܝܚܽܘܬ̥ܳܐ. 18ܘܒܽܗ̄ܘ ܝܰܘܡܳܐ ܚܪܶܢܳܐ، ܥܰܒܺܝܪܺܝܢܰܐ ܥܰܡ ܦܰܘܠܳܘܣ ܠܓܰܒ ܝܰܥܩܽܘܒ، ܘܟܽܘܠّܶܗ ܗ̄ܰܩّܰܫ̈ܶܐ ܬܰܡܳܐ ܣܺܝܕ̥ܶܗ ܗ̄ܘܰܝܢܶܝ. 19ܘ݄ܕܪܶܐ ܠܰܢ ܫܠܳܡܳܐ ܐܰܥܠܰܝّܶܗ، ܘܦܰܘܠܳܘܣ ܐܡ݄ܪ ܠܰܗ ܠّܶܗ ܚܕ̥ܳܐ ܒ݄ܬ̥݄ܪ ܗ̄ܺܝ ܚܪܶܬܳܐ ܟܽܘܠ ܡܶܕܶܐ ܕܣ݄ܡ ܠܶܗ ܐܰܠܳܗܳܐ ܒܰܝܢ ܗ̄ܰܥّܰܡ̈ܶܐ ܒܺܗ̄ܝ ܬܶܫܡܶܫܬܰܝܕ̥ܶܗ. 20ܘܺܗ̄ܝ ܢܰܩܠܐ ܕܫܰܡܺܝܥܺܝ، ܡܫܰܒܰܚّܶܗ ܠܰܐܠܳܗܳܐ ܘܐܡ݄ܪّܰܗ ܠܶܗ: ”ܟܚܳܙܰܬ، ܝܰܐ ܐܰܚܽܘܢܰܝܕ̥ܰܢ، ܐܰܠܦܰܝ̈ܳܐ ܡܰܗ̄ܢ ܢܳܫ̈ܶܐ ܕܺܝܗܽܘܕ̥ ܡܗܰܝܡܰܢّܶܗ، ܘܗܰܢܺܝ ܟܽܘܠّܶܗ ܛܰܢܳܢ̈ܶܐ ܢܶܝ ܥܰܠ ܗ̄ܽܘ ܢܳܡܽܘܣܳܐ (ܕܡܽܘܫܶܐ). 21ܘܫܰܡܺܝܥܺܝ ܐܰܥܠܳܟ̥ ܕ݄ܟܡܰܘܠܦܰܬ ܠܰܝّܽܘܕ̥̈ܳܝܶܐ ܕܟ݄ܬ ܢܶܝ ܒܰܝܢ ܗ̄ܰܥّܰܡ̈ܶܐ ܘܟ݄ܐܡّܰܪ̱ܬ ܛܪܳܐ ܠܳܐ ܓ݄ܙܪܺܝ (ܡܛܰܗܪܺܝ) ܠܰܗ̄ܢ ܐܰܒܢ̈ܰܬّ̥ܶܗ، ܘ݄ܛܪܳܐ ܠܳܐ ܡܗܰܠܟ̥ܺܝ ܥܰܠ ܗ̄ܰܥܝܳܕ̥̈ܶܐ ܕܽܗ̄ܘ ܢܳܡܽܘܣܳܐ. 22ܘܡܺܐܝܕ̥ܶܗ ܕܓ݄ܕܫܳܡܥܺܝ ܕܰܐܬ̥ܰܬ ܠܰܗ̄ܪܟܶܐ، 23ܣܘܿܡ ܗ̄ܽܘ ܡܶܕܶܐ ܕ݄ܐܡّܺܪ̱ܝܢܰܐ ܠܳܟ̥: ܟ݄ܬ ܠܰܢ ܐܰܪܒܥܳܐ ܓܰܒܪ̈ܶܐ ܕܟ݄ܬ ܢܶܝ ܢܕ̥ܺܝܪ̈ܶܐ ܠܰܫܰܢ ܕܡܺܝܕܰܟ݄ܢ. 24ܡܰܘܒܶܠ݄ܢ ܘܙܳܟ̥ ܣ݄ܡ ܕܽܘܟܳܝܳܐ (ܓܙܽܘܪܬܳܐ) ܐܰܥܡܰܝّܶܗ، ܘܡܰܨܪܰܦ ܐܰܥܠܰܝّܶܗ ܠܰܫܰܢ ܗ̄ܽܘ ܩܝܳܨܳܐ ܕܣܰܥܪܰܝّܶܗ، ܘܗܰܘܟ̥ܰܐ ܟܡܺܝܕ̥ܳܥܳܐ ܠܟܽܘܠ ܚܰܕ̱ ܕܽܗ̄ܘ ܡܶܕܶܐ ܕܐܡܺܝܪ ܐܰܥܠܳܟ̥ ܕ̈ܽܘܓܠܶܐ ܝܳܐ، ܘܗܰܬ ܟ݄ܡܗܰܠܟ̥݄ܬ ܥܰܠ ܗ̄ܽܘ ܢܳܡܽܘܣܳܐ ܘܢ݄ܛܪܰܬ ܠܶܗ. 25ܘܠܰܐܝܢܰܐ ܕ݄ܡܗܰܝܡܰܢّܶܗ ܡܰܢ̱ ܥّܰܡ̈ܶܐ، ܐܰܚܢܰܐ ܟܬ̥ܽܒ̥ ܠܰܢ ܐܰܠّܶܗ ܕܢܳܛܪܺܝ ܪܽܘܚܰܝّܶܗ ܡܽܗ̄ܘ ܡܽܐܘܟܠܳܐ ܕܰܕّܶܒܚ̈ܶܐ (ܠܰܚّܰܢ̈ܦܶܐ) ܘܡܺܗ̄ܝ ܙܳܢܝܽܘܬ̥ܳܐ ܘܡܽܗ̄ܘ ܚܢܺܝܩܳܐ ܘܡܽܗ̄ܘ ܐܰܕܡܳܐ.“
26ܗ̄ܺܝ ܢܰܩܠܝܳܐ، ܦܰܘܠܳܘܣ ܡܰܘܒܶܠ ܠܶܗ ܗ̄ܰܓّܰܒ̥ܪ̈ܶܐ، ܒܽܗ̄ܘ ܝܰܘܡܳܐ ܚܪܶܢܳܐ، ܘܣ݄ܡ ܠܶܗ ܕܽܘܟܳܝܳܐ ܐܰܥܡܰܝّܶܗ ܘܥܰܒ݄ܪ ܐܰܙّܶܗ ܠܽܗ̄ܘ ܗܰܝܟܠܳܐ ܘܡܰܘܕ̥ܰܥ ܠܰܗ ܠّܶܗ ܥܰܠ ܗ̄ܽܘ ܬܝܳܡܳܐ ܕܰܝّܰܘܡ̈ܶܐ ܕܽܗ̄ܘ ܕܽܘܟܳܝܳܐ ܗܳܠ ܕܟܽܘܠ ܚܰܕ̱ ܡ݄ܢّܶܗ ܡܩܰܕܰܡ ܠܶܗ ܩܽܘܪܒܳܢܳܐ.
ܗ̄ܰܝّܽܘܕ̥̈ܳܝܶܐ ܟܨܰܝܕܺܝ ܠܦܰܘܠܳܘܣ
27ܘܺܗ̄ܝ ܢܰܩܠܐ ܕܡܰܛܺܝ ܗ̄ܽܘ ܝܰܘܡܳܐ ܕܰܫّܰܒ̥ܥܳܐ، ܗ݄ܢ ܡܰܢ̱ ܝّܽܘܕ̥̈ܳܝܶܐ ܕܡܶܢ̱ ܐܰܣܺܝܰܐ ܚܙܰܠّܶܗ ܒܽܗ̄ܘ ܗܰܝܟܠܳܐ، ܘܡܰܩ݄ܡّܶܗ ܗ̄ܽܘ ܥܰܡܳܐ ܟܽܘܠܶܗ ܐܰܥܠܶܗ ܘ݄ܙܒ݄ܛّܶܗ، 28ܘܗ݄ܢّܶܝ ܟܡܰܙܥܩܺܝ ܘܡܰܫܟ݄ܢ ܘܟ݄ܐܡّܺܪ̱ܝ: ”ܝܰܐ ܓܰܒܪ̈ܶܐ، ܗ̄ܰܢ ܐܰܒܢ̈ܶܐ ܕܺܐܝܣܪܳܐܶܝܠ، ܡܥܰܕܶܪܽܘ! ܗܰܢܳܐ ܝܳܐ ܗ̄ܽܘ ܓܰܒ̥ܪܳܐ ܕ݄ܟܡܰܘܠ݄ܦ ܡܩܰܒ݄ܠ ܕܽܗ̄ܘ ܥܰܡܰܝܕ̥ܰܢ ܒܟܽܘܠ ܕܽܘܟܬ̥ܳܐ، ܘ݄ܡܩܰܒ݄ܠ ܕܽܗ̄ܘ ܢܳܡܽܘܣܳܐ ܘ݄ܡܩܰܒ݄ܠ ܕܽܗ̄ܘ ܐܰܬ̥ܪܰܢܳܐ، ܘܡܰܥܒܰܪ ܠܶܗ ܣܬܶܝ ܗ̄ܰܚّܰܢ̈ܦܶܐ ܠܽܗ̄ܘ ܗܰܝܟܠܳܐ ܘ݄ܡܚܰܪܰܡ ܠܶܗ ܠܽܗ̄ܘ ܐܰܬ̥ܪܰܢܳܐ ܗ̄ܽܘ ܡܩܰܕܫܳܐ.“
29ܡܺܐܝܕ̥ܶܗ ܕ݄ܚܙܰܠّܶܗ ܐܰܥܡܶܗ ܠ݄ܛܪܳܘܦܺܝܡܳܘܣ ܕܡܶܢ̱ ܐܶܦܶܣܳܘܣ، ܘ݄ܚܫܽܒّ̥ܶܗ ܕܥܰܒ݄ܪ ܥܰܡ ܦܰܘܠܳܘܣ ܠܽܗ̄ܘ ܗܰܝܟܠܳܐ. 30ܘܗܰܘܺܝ ܫܓ̥ܽܘܫܝܳܐ ܒܺܗ̄ܝ ܡܕ̥ܺܝܢ̱ܬܳܐ ܟܽܘܠܰܗ، ܘܽܗ̄ܘ ܥܰܡܳܐ ܟܽܘܠܶܗ ܠܰܬ݄ܡ ܘ݄ܙܒ݄ܛّܶܗ ܠܦܰܘܠܳܘܣ ܘ݄ܡܓܰܪܓܰܫّܶܗ ܠܰܪܒ̥ܰܠ ܡܽܗ̄ܘ ܗܰܝܟܠܳܐ، ܘܡܶܚܕ̥ܳܐ ܣܟ̥ܺܝܪܺܝ ܗ̄ܰܬّܰܪ̈ܥܶܐ.
ܗ̄ܰܦّܳܠܚ̈ܶܐ ܪ̈ܽܘܡܳܝܶܐ ܟܡܰܘܦܩܺܝ ܦܰܘܠܳܘܣ ܠܺܗ̄ܝ ܚܺܐܪܽܘܬ̥ܳܐ
31ܘܺܗ̄ܝ ܢܰܩܠܐ ܕܳܐܒܰܥ ܗ̄ܘܰܐ ܗ̄ܽܘ ܟܶܢܫܳܐ ܕܩܳܛܶܠ ܠܶܗ، ܫܰܡ݄ܥ ܗ̄ܽܘ ܪܺܝܫܳܐ ܕܺܗ̄ܝ ܓܽܘܕܳܐ ܕܰܗ̄ܢ ܐܰܠܦܳܐ ܕܺܗ̄ܝ ܡܕ̥ܺܝܢ̱ܬܳܐ ܟܽܘܠܰܗ ܩܰܝܺܝܡܳܐ. 32ܘܒܺܗ̄ܝ ܫܳܥܬ̥ܰܝܕ̥ܰܗ ܡ݄ܕ ܠܶܗ ܐܰܥܡܶܗ ܩܶܢܛܪܽܘܢܳܐ ܘܪ̈ܽܘܡܳܝܶܐ ܓ̥ܰܠܰܒܶܐ ܘܪܰܗܺܝܛܺܝ ܐܰܥܠܰܝّܶܗ. ܘܺܗ̄ܝ ܢܰܩܠܐ ܕ݄ܚܙܰܠّܶܗ ܠܪܺܝܫܳܐ ܕܰܗ̄ܢ ܐܰܠܦܳܐ ܘܠܰܪّܽܘܡܳܝ̈ܶܐ، ܟܰܠ݄ܢ ܡܽܗ̄ܘ ܡܰܚܝܳܐ ܠܦܰܘܠܳܘܣ. 33ܘ݄ܡܩܰܪܰܒ̥ ܠܶܗ ܡܶܢܶܗ ܗ̄ܽܘ ܪܺܝܫܳܐ ܘ݄ܙܒ݄ܛ ܠܶܗ، ܘܗܽܒ̥ ܠܶܗ ܦܽܘܩܕܳܢܳܐ ܕܡܰܐܣܪܺܝ ܠܶܗ ܒܬܰܪܬܶܝ ܫܶܫ̈ܠܳܬ̥ܳܐ. ܘܦܰܝ݄ܫ ܟ݄ܡܫܰܐܶܠ ܐܰܥܠܶܗ ܕܡܰܢܝܳܐ ܘܡ݄ܢ ܣ݄ܡ ܠܶܗ؟ 34ܘܗ݄ܢ ܡܽܗ̄ܘ ܥܰܡܳܐ ܐ݄ܡّܺܪ̱ܝ ܗ̄ܘܰܘ̱ ܡܶܕܶܐ، ܘܗ݄ܢ ܐ݄ܡّܺܪ̱ܝ ܗ̄ܘܰܘ̱ ܡܶܕܶܐ ܚܪܶܢܳܐ. ܘܡܰܙܥܩܺܝ ܗ̄ܘܰܘ̱ ܓ̥ܰܠܰܒܶܐ ܗܳܠ ܕܠܳܐ ܩܰܕ݄ܪ ܐܳܕ̥݄ܥ ܗ̄ܽܘ ܫܪܳܪܳܐ. ܘܗܽܒ̥ ܠܶܗ ܦܽܘܩܕܳܢܳܐ ܕܡܰܘܒܠܺܝ ܠܶܗ ܠܺܗ̄ܝ ܡܰܫܪܺܝܬ̥ܳܐ. 35ܘܺܗ̄ܝ ܢܰܩܠܐ ܕܡܰܛܺܝ ܦܰܘܠܳܘܣ ܠܰܕّܰܪ̈ܓ̥ܶܐ، ܗ̄ܰܪّܽܘܡܳܝ̈ܶܐ ܛܥ݄ܢّܶܗ ܠܦܰܘܠܳܘܣ ܡܽܗ̄ܘ ܙܚܳܡܳܐ ܕܽܗ̄ܘ ܥܰܡܳܐ، 36ܡܺܐܝܕ̥ܶܗ ܕܥܰܡܳܐ ܓ̥ܰܠܰܒܶܐ ܐܳܬ̥ܶܐ ܗ̄ܘܰܐ ܒ݄ܬ̥ܪܶܗ ܘܡܰܙܥܩܺܝ ܗ̄ܘܰܘ̱ ܘ݄ܐܡّܺܪ̱ܝ ܗ̄ܘܰܘ̱: ”ܡܽܘܕܶܗ!“
ܦܰܘܠܳܘܣ ܟܣܳܝ݄ܡ ܡܰܦܬܰܚ ܦܶܡܳܐ
37ܘܺܗ̄ܝ ܢܰܩܠܐ ܕܡܰܛܺܝ ܕܥܳܒ݄ܪ ܠܺܗ̄ܝ ܡܰܫܪܺܝܬ̥ܳܐ، ܦܰܘܠܳܘܣ ܐܡ݄ܪ ܠܶܗ ܠܪܺܝܫܳܐ ܕܰܗ̄ܢ ܐܰܠܦܳܐ: ”ܕܛܳܪܰܬ ܠܺܝ ܕܡ݄ܫܓ̥ܰܠ ܐ̱ܢܳܐ ܐܰܥܡܳܟ̥؟“ ܘܗܺܝّܶܗ ܐܡ݄ܪ ܠܶܗ ܠܶܗ: ”ܩܰܝ ܟ݄ܐܕ̥ܥܰܬ ܡ݄ܫܓ̥ܳܠܰܬ ܒܝܰܘܢܳܝܳܐ؟ 38ܠܰܝ̱ܬ ܗ̄ܰܬ ܗ̄ܽܘ ܡܶܨܪܳܝܳܐ ܕܡܶܩ݄ܕ̱ܡ ܡܰܢ̱ ܝّܰܘܡ̈ܰܢܺܝ ܣ݄ܡ ܠܳܟ̥ ܫܓ̥ܽܘܫܝܳܐ ܘܡܰܘܦܰܩ ܠܳܟ̥ ܐܰܪܒܥܳܐ ܐܰܠܦܳܐ ܓܰܒܪ̈ܶܐ ܣܰܝܳܡ̈ܶܐ ܕܒܺܝܫ̈ܳܬ̥ܳܐ ܠܽܗ̄ܘ ܡܰܕ̥ܒܪܳܐ.“
39ܐܡ݄ܪ ܠܶܗ ܦܰܘܠܳܘܣ: ”ܐܳܢܳܐ ܓܰܒ̥ܪܳܐ ܝܽܘܕ̥ܳܝܳܐ ܐ̱ܢܳܐ ܡܶܢ̱ ܛܰܪܣܳܘܣ ܕܩܺܝܠܺܝܩܺܝܰܐ، ܡܕ̥ܺܝܢ̱ܬܳܐ ܝܺܕ̥݄ܥܬܳܐ، ܐܶܒܰܗ ܗܰܘܺܝ ܐ̱ܢܳܐ. ܟܳܐܒܰܥ ܐ̱ܢܳܐ ܡܶܢܳܟ̥ ܕܛܳܪܰܬ ܠܺܝ ܕܡ݄ܫܓ̥ܰܠ ܐ̱ܢܳܐ ܥܰܡ ܗ̄ܽܘ ܥܰܡܳܐ.“ 40ܘܺܗ̄ܝ ܢܰܩܠܐ ܕ݄ܛܪܶܐ ܠܶܗ، ܩܰܝ݄ܡ ܦܰܘܠܳܘܣ ܥܰܠ ܗ̄ܰܕّܰܪ̈ܓ̥ܶܐ ܘ݄ܦܫ݄ܛ ܠܶܗ ܘܡܰܪܡܰܫ ܠܶܗ ܐܺܝܕ̥ܶܗ ܠܽܗ̄ܘ ܥܰܡܳܐ. ܘܺܗ̄ܝ ܢܰܩܠܐ ܕܟܰܠ݄ܢ، ܫܓ̥ܺܝܠ ܐܰܥܡܰܝّܶܗ ܒܽܗ̄ܘ ܠܶܫܳܢܳܐ ܕܰܥّܶܒܪ̈ܳܝܶܐ ܘܐܡ݄ܪ ܠܰܗ ܠّܶܗ:
Právě zvoleno:
ܥܒܳܕ̥̈ܶܐ ܕܰܫܠܺܝܚ̈ܶܐ 21: ܟܬܒܐ
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Suryoyo Bible © 2024 Aramaic Bible Translation