Zakaliya 14
14
Yerusalemu na wantu wa maisi gamonga
1Lishaka lya Mtuwa Mlungu lyankwiza lyeni lopola yazilopolitwi kwa mwenga hazibagulangwi muwamu mwenu. 2Mtuwa Mlungu hakagajojoniri maisi goseri su kugukomanga mji gwa Yerusalemu. Shakapanu mji gwenu hagulopolwi na numba zyenu hazilopolwi, wadala wenu hawawabati kwa makakala. Nusu ya wenikaya wa mji hawajegerwi muwuhamisiya na nusu yanayisigali hapeniwatolwi kunja kumji. 3Su Mtuwa Mlungu hakalawi na kulikomanga na maisi galii ntambu yakalikomagiti lishaka lya nkondu. 4Lishaka ali hakagoloki mulugongu lwa mizeituni yaluwera kwagulawira mshenji mumji gwa Yerusalemu. Lugongu alu halubagulwi seemu mbili na lulalanda lukulu halulawiri kulawa kwagulawa mshenji mpaka kwaguzyeta mshenji. Nusu yimu hayigendi kushana na yimonga kusika. 5Mwenga hamtugi mululalanda alu, pakati pa migongu miwili ya Mtuwa Mlungu. Hamtugi gambira wazewi wenu ntambu yawatukigiti lilindimu lya litapaka muukolamlima wa mfalumi Uzia gwa Yuda. Shakapanu Mtuwa Mlungu gwangu hakizi na wantu wakuyi woseri.
6Lishaka ali hapenikuweri na langala, mpempu ama seluji. 7Haliweri lishaka lya gweka lyahera paluwala na pashiru, lishaka lyeni limanika na Mtuwa Mlungu. Pashimihi papasoka langala hayiweri.
8Shaka ashi mashi ga ukomu haganyililiki kulawa mji gwa Yerusalemu na nusu ya mashi aga hagagendi bahari ya kufuwa na nusu imonga kubahari ya Mediterania. Mashi aga hagendeleyi kunyililika shiyangazi gambira ntambu yagawera masika. 9Shaka ashi Mtuwa Mlungu hakaweri ndo mfalumi gwa isi yoseri. Yomberi hakaweri Mtuwa Mlungu gweka yakuyi na litawu lyakuyi haliweri lyagweka.
10Isi yoseri kwanjira Geba ya kushana mwa Yuda mpaka Rimoni kusika mwa Yerusalemu hayiweri gambira lalanda. Kumbiti mji gwa Yerusalemu haguweri pampindi na hagusigali pahala pakuyi, kwanjira ligomi lya Benjamini mpaka ligomi lya makashu na mpaka kuligomi lya pambwega na kwanjira shidwalingu sha Hanareli mpaka makamiru ga divayi ya mfalumi. 11Wantu hawalikali mumji gwa Yerusalemu poneka, hapeni paweri na maagamiziya goseri.
12Mtuwa Mlungu hakajegi malweri kwa wankondu wa Yerusalemu. Nshimba zawu haziwoli pawawera wakomu, masu gawu hagawoli pagawera mumalindi gakuyi na lulimi zyawu haziwoli payiwera mumilomu yawu.
13Mulishaka ali Mtuwa Mlungu hakawatendi wantu waweri na lyoga na kila muntu hakamkomangi myaguyi. 14Wantu wa Yuda hawalikomangi su kugulolera Mji gwa Yerusalemu na womberi hawajojonili ulunda wa zahabu na feza na nguwu zivuwa muisi.
15Malweri aga hagawapati farasi na punda na ngamiya na wankanyama woseri yawawera mungonjeru za wankondu.
16Shakapanu kila muntu yakaponikiti pakati pamaisi goseri yakiziti kugukomanga mji gwa Yerusalemu, hakizi Yerusalemu kila shinja kumguwira Mtuwa Mlungu gwa mashonta kila shinja gambira mfalumi na kutenda msambu gwa visasa. 17Payiwera isi yoseri pasipanu payigenda ndiri Yerusalemu kumguwira Mtuwa Mlungu yakana makakala goseri yakawera mfalumi, su mvula hapeni itowi muisi yakuyi. 18Payiwera Wamisri hawalemi kutenda msambu gwa visasa, Su Mtuwa Mlungu hakawakomangi kwa ulweli ulawulii, wakafiriti kuwakoma nawu maisi goseri yagalema kutenda msambu gwa visasa. 19Ayi ndo hayiweri nkomangu yayifira kuyipata isi ya Misri pamuhera na maisi yagatenda ndiri nemeru ya visasa.
20Lishaka ali kengeli zazitawaliritwi kwa farasi hazilembwi kwa visoweru avi, “Viwiga yaviwera munumba ya Mtuwa Mlungu vilumikwa.” Na mabakuli yagawera kulongolu kushitalawanda sha mabuhi. 21Kila shiwiga mumji gwa Yerusalemu na Yuda hashilumikwi kwa Mtuwa Mlungu gwa mashonta su woseri yawalaviya tambiku hawawezi kuvitola na kupwasilira vinofu lya tambiku. Shaka ashi hapenikaweri mshuwuza yoseri munumba nkulu ya Mtuwa Mlungu yakana makakala goseri.
The Bible version in the Pogoro Language. @The Word for The World International and Pogoro Language translation. All rights reserved.