Mika 1
1
1Mtuwa Mlungu, kayoweriti na Mika muntu kulawa Moresheti, mushaka shakakolitimlima Yotamu mfalumi gwa Yuda na shaka shilii Ahazi pakaweriti mfalumi gwa Yuda na shaka shilii Hezekiya pakaweriti mfalumi gwa Yuda, Mika kawoniti mirandu yoseri ayi kuusu Samaria na Yerusalemu.
Samaria na Yerusalemu wankudaya
2Mpikaniri mwenga wantu wa maisi goseri.
Gwee pasipanu na vintu vyoseri vyaviwera amu mpikaniri.
Mtuwa Mlungu kakwiza kuwatoza,
Mtuwa katakula pakawera munumba yakuyi kumpindi.
3Guloli! Mtuwa Mlungu kankwiza kulawa pahala pakuyi pakulikala,
hakasuluki na kugendagenda pampindi pa pasipanu.
4Migongu hayiyumbuki pasi pa nzayu zakuyi
handa lisega kumotu
na malalanda hagapalasiki,
handa mashi ntambu yaganyilirika kalongola muluseleru.
5Goseri aga galawira toziya ya makosa ga wiwuka wa Yakobu na madoda ga wiwuka wa Israeli. Gaa yakaweza kulawumu Israeli? Payiwera Samaria ndo mji gwakuyi mkulu! Gaa kaweza kuyitendera ukontola Yuda? Payiwera Yerusalemu ndo mji gwakuyi mkulu! 6Su Mtuwa Mlungu kalonga hangu, mji gwa Samaria hanigutendi kuwera mahami na malambu gawu ga mizabibu hanigamemiziyi mabuwi. Na mabuwi hanigabilingisiyi mumalalanda na miyanjiru yakuyi haniyibawangi. 7Vinyagu vyakuyi havipantangwi vipandivipandi na mafupu gakuyi goseri ga Numba ya Mlungu hagapambirwi motu. Mana mafupu gakuyi galawirana na malipu ga mndiyandiya na hagatenderwi kayi kuwalipa wahumba.
8Shakapanu neni handili na kudaya, hag'endig'endi shivula na pota kuvala vilwatu. Hambotangi gambira shibweta na kudaya handa lisisigira. 9Vironda vya Samaria hapeni viponi, vironda vyeni viraa viyipatiti Yuda, visoka ligomi lya Yerusalemu, pahala pawalikala wantu waneni.
Wankondu wankuyikanka Yerusalemu
10Namshibwera shisoweru ashi aku Gati ama namlira. Wantu wa Beti Leafra mgalagati mumadiku kwa hinginiku. 11Mwenga wantu wa Shafiri, mgendi shivula na yamwanasoni. Mwenga wiwuka wa Zaanani namulawa kunja kumji gwenu. Shaka pampikinira wantu wa Beti Ezeri wankulira, toziya utanga wawu kwa mwenga uwusiwa. 12Walii yawalikala Maroti wankugalagata kwa utama pawahepera utanga, toziya Mtuwa Mlungu hakajegi maangamiziya muligomi lya Yerusalemu 13Mwenga wenikaya kulawa Lakishi, muwatawi farasi yawatuga nentu mumbutuka za nkondu. Mwenga muweriti shanjiru sha vidoda kwa mhinga gwa Sayuni, mana makontola ga Israeli gawonikiti kwaku. 14Su haguwapanani Moresheti Gati lifupu lya kuwagambira wagendi. Mji gwa Akizibu hapeni guwatangi wafalumi wa Israeli.
15Mwenga yamulikala Maresha Mlungu hakawajegeri lishonta lya wankondu na hawalopoli mji gwenu. Shakapanu wakulu wa Israeli hawatugili Adulamu. 16Mwenga wantu wa Yuda mumogi vikubuli toziya ya wana wenu yamuwafira, mana wana wenu hawatolwi kugenda kuuhamisiwu.
The Bible version in the Pogoro Language. @The Word for The World International and Pogoro Language translation. All rights reserved.