Hoseya 6
6
Koya vidoda yaviwerandiri nakaka
1Wantu wa Israeli walonga hangu, tugendi twakamwuyiri Mtuwa Mlungu! Mweni katupapula, kumbiti vinu mweni hakatuponiziyi. Mweni katutenda, kumbiti mweni hakatuponiziyi vironda vyetu. 2Pa mashaka mawili hakatupanani ukomu kayi na lishaka lya tatu hakatuzyukisiyi su tuwezi kulikala pamuhera nayomberi. 3Su tufiruwa kummana Mtuwa Mlungu. Mana kwiza kwakuyi ndo nakaka handa mandawira putiputi, mweni hakatwizili gambira mvula za mbangi, ama mvula za kuyalira zyazitowera litapaka.
4Kumbiti Mtuwa Mlungu kalonga hangu. Mwenga wantu wa Israeli niwatenderi shishi? Mwenga wantu wa Yuda niwatenderi shishi? Ufiru wenu kwaneni ndo gambira lifukafuka lya mandawira ama mangami yagagamira kalongola. 5Ndo mana niwakangala kwa njira ya wambuyi wa Mlungu, niwagamiziya kwa visoweru vyangu, toza yaneni ilawa handa kulangala. 6Mana shanishifira kwamwenga ndo ufiru kumbiti tambiku ndiri, Kummana Mlungu ndo kulaviyandiri tambiku za kulunguziwa.
7Kumbiti mulilemiti lipatanu lyaneni ntambu yamtenditi kumji gwa Adamu, aku mweritindiri waminika. 8Gileyadi ndo mji gwa wakontola, gumemiziwa mwazi. 9Watambika wa Mlungu wawera gambira wapoka ntambu yawamlotera muntu munjira. Wankuwalaga wantu munjira kugenda Shekemu, wankutenda ukontola mkulu nentu. 10Mona mlandu gwa kukalaziya nentu muwamu mwa Waisraeli. Wantu wa Israeli wankutugira wamlungu wamonga, nakaka Waisraeli wajimirikandiri kulongolu kwa Mlungu.
11Na gwenga Yuda ntambu iraayi, nikutulira shaka sha kukukomanga toziya ya shilii shagutenditi.
The Bible version in the Pogoro Language. @The Word for The World International and Pogoro Language translation. All rights reserved.