Matié 21
21
Kupíkini kú Yésus Yelúsalɛm
(Mál 11.1-11; Lúk 19.28-40; Isŋ 12.12-16)
1Yésuse embúl no popíónyí pɛ́ɛ́yɛ́ mɛɛlɛ́ pákanyi mekúye ne Yelúsalɛm, masiá nɔ kitɔŋ kí Pɛtifasé, kɔ́ ɔkɛ́l ú poolifié, Yésuse waatɔ́m popíónyí pɛ́ɛ́yɛ́ páandɛ́ 2wɔ́ kɔ́ɔ́p ɛ́ɛ́: «Ánuupɔ́ ɔ́ kitɔŋ kinyɛɛ́ káánɔ́ ó pusíó, núɛ́lɛ́ núméépíkin, nukítikenyi apaŋapipiɛ asuúkán nɔ muɔ́nɔ́ wɛɛyɛ́, núsulun wɔ nuŋólin na wɔ́. 3Índɛ mɔɔnd sionúówun puandá? Ónuondínyí wɔ́ ɛ́ɛ́: Ɔkɔ́n áápian insaná na wɔ́, pákaná anúyap núyɔɔk na wɔ́ kɔ́ɔk nɔ kɔ́ɔk.» 4Puandá kitikit mɛpíɛ́lɛ́ ɛ́ɛ́ nukál nú peémímekélíe má Támbák píwóónyi núɔyɔnɛ́ ɛ́ɛ́ 5Ɔ́nuɔyítɛ́n ɔmbúl u Síyon: Índí Efuŋ u ɔkɔ́n waawɔ ukáánɛ́ epíselési, woókoólon kuawɔ amákátán ká apaŋapipiɛ nɔ muɔ́nɔ́ wɛɛyɛ́. 6Popíónyí páayɔɔk pɛ́ɛ́kɛɛl aná Yésus maápítɛ́n pɔ́. 7Póokoólin Yésuse ne pulúk pukáánɛ́ nɔ muɔ́nɔ́ wɛɛyɛ́. Páátála indífɔnɔ́ siɔ́p é pilindi pí melúk, Yésuse waapúlɔk á mɔ́ɔ. 8Embúl ú pɛɛnd pɛnɛ indífɔnɔ́ siɔ́p kí iŋilí, pólotí áákan tukasikásí kí iŋilí ó kukóli wɔ́. 9Imbúl sí pɛɛnd símoófoókón ne esí símɔɔ́ŋɔ́n kɛ́ɛ́yɛ́ áákinan Yésuse tupéképék pɔ́ɔyɔ ɛ́ɛ́: «Oosána Muɔ́nɔ́ u Tafíit! peseé ne ewú woóloné ɛ́ kisiɛ́n kí Ɔkɔ́n! Oosána kɔɔm okúnóo mɛnɛ́mɛnɛ́ɛ!» 10Aká Yésus meépíkín Yelúsalɛm, pálɛ́k kitikit weepíéyitin. Póond ó kupíówon ɛ́ɛ́: «Ɛ́nyɛ́ ewu é?» 11imbúl sí pɛɛnd síondinyi ɛ́ɛ́: «Eŋémí mekelié Yésuse u Náásalɛt á Kalilée.»
Yésuse ne petúúsí á kitamb
(Mál 11.15-19; Lúk 19.45-48; Isŋ 2.13-16)
12Yésuse weepíkin á kitamb kí Támbák woond á kukúúŋa ne petúúsi no poóndí á kitamb kí Támbák, upelikenyenyi pinyáli pí peséndí muenyí, ukuusenyi ɔnyɔ́lí yé petúúsi tukɔlɔɔ́mbɔ. 13Yésus ɔ́ɔ́yɔn pɔ́ ɛ́ɛ́: «Támbák ɔ́ɔ́kɔɔyɔ kɛ́ɛ́yɛ́ kí imfiɔ́ŋ ɛ́ɛ́: Páányípílan kiansi kíámɛ ɛ́ɛ́ kiansi kí imbísókólí; maná panɔ́ numééyí kɛ́ɛ embíki ú peépi!» 14Pepútepute no pikóndí péépísíítin Yésuse akáánɛ́ á kitamb kí Támbák, weéŋuki pɔ́ɔ. 15Pɔkɔ́n pá pafunɔ́fɔn ne pemenyí pikotí páápínyúkusɛt, aká pɛ́mɛɛ́l pɛ́ɛ́nɛn pisey epí úmɛ́nyɛɛ́kɛ́t kuɛl, paápayɔ́ óond pékéme á kitamb, pɔ́ɔyɔ ɛ́ɛ́: «Oosána nɔ Muɔ́nɔ́ u Tafíit!» 16Pɔ́ɔkɔyitɛn Yésuse ɛ́ɛ́: «Ɔɔ́kɔɔ́pɔn epú pɔ́ɔyɔnɛ́ á?» Yésuse woondinyi pɔ́ ɛ́ɛ́ yɔɔ́kɔɔ́pɔn: «Nutimaláaŋ ɔmfíɔ́ŋ ewe ɛ́ɛ́: É níití ní paápayɔ́ ne piendine eényíŋúmesié?» 17É kélém akáánɛ́ waayap pɔ́ akáanɛ waám á pálɛ́k waayɔɔk Petaní á kuapítɛ́m kɔ́ɔk.
Yésus mɔ́nyɔmɔ́ pufikié
(Mál 11.12-14,20-25)
18Kuɔ́m pálana Yésus mɛɛlɛ́ woondon á pálɛ́k kiɛmɛ́ɛm kiɛmɛ́ɛm, insaná yɛɛkɛtikɛn wɔ́. 19Woombin eŋís wɛɛ́n putɛ́ pápílanɛ́ ɛ́ɛ́ pufikié masiá ni iŋilí, weepísíítin pɔ, maná tɛ kuɛ́n masamɔ́ ɛsiɛ́ piányi. Ukanyi ɛ́ɛ́: «Tɛ ɔ́ puɔ́s atiányandá kuómo pusamɔ́!» Kɔ́ɔk nɔ kɔ́ɔk pufikié púákálakat. 20Popíónyí pé Yésus ɛ́ɛ́nɛn anakáánɛ́, póond é kusímile, póówon ɛ́ɛ́: «Tiɛkiɛ́ pufikié mányikálákát yá yá akɛ?» 21Yésuse woondinyi pɔ́ ɛ́ɛ́: «Kémuémue, yɔɔ́núɔ́yɔn puɔ: índɛ nuápianan pipíóndínyí ɔtɛ́m nuond nutiákán imfɛ́lɔ́, nuɛ́nyɛ́ɛl kutápɔk aná ímɛ́nyɛɛlɛ́ pufikié, panɔ́ muɛ́t nuɔ́nyɔ́ɔ́yitɛn ɔkɛ́l ewe ɛ́ɛ́: Atɔk kopíómbín ká asaá, púɛ́nyípíɛl. 22Puandá kitikit nuɔ́nyɔ́ɔ́ŋɔnɛ́ Támbákɛ́ɛ kí imbísókólí no pi píóndínyí ɔtɛ́m nuányípia.»
Iŋówúnín i Pɛyúútɛn á pukaaka pú Yésus
(Mál 11.27-33; Lúk 20.1-8)
23Yésuse weepíkin á kitamb kí Támbák woond ó kuónyonyi. Posiósíó nɔ pɔkɔ́n pá pafunɔ́fɔn péépísíítin Yésuse, pɔ́ kɛ́ɛ́yɛ́ ɛ́ɛ́: «Á pukaaka puányí ɛɛlɛnɛ́ maandá eme? Ɛ́nyɛ́ wáányíkufá pukaaka pú kuɛlɛ mɔ?» 24Yésuse woondinyi pɔ́ ɛ́ɛ́: «Iŋú kákáámɛ ínúówun iŋówúnín, índɛ nusiŋondinyi á yɛ́ɛ iŋúɛ kákáámɛ ínútían kɔɔ́mɔ pukaaka íŋólinonée ɛ́ kuɛlɛ mɔ. 25Ɛ́nyɛ́ umaátɔ́m Isáaŋɛ ɛ́ɛ́ útuenen? Támbákɛ́ɛ ééy pɛɛnd?» Póond á kupiánuna pɔ́ɔ nɔ pɔ́ɔ: «Índɛ tusiondinyi ɛ́ɛ́ Támbákɛ́ɛ umaátɔ́m wɔ́, úkaná otúówun ɛ́ɛ́ kiákí numɛɛ́lɛ́ nutiátáp mekélié mɛ́ɛ́yɛ́? 26Índɛ tusiondinyi ɛ́ɛ́ pɛɛnd, embúl ú pɛɛnd kaná kuɛl ɛ́ɛ́ tiɛkiɛ́, á kiákí ɛ́ɛ́ peem ápítááka ɛ́ɛ́ Isáaŋ nyɛ eŋémímekélíe má Támbák.» 27Akáánɛ́ póókondinyi ɛ́ɛ́: «Tutipá tumenyene.» Yésuse woondinyi ɛ́ɛ́: «Iŋú kákáámɛ indipá inúɔ́yɔn kɔɔ́mɔ pukaaka íŋólinonée ɛ́ kuɛlɛ maandá makáánɛ́.»
Pulinsí ɔ́ pinɔ́k píandɛ́
28«Yésuse waand kuówun pɔ́ɔ, kiákí nupítáákanɛ́ é pulinsí epue: mɔɔnd omotí mapián pinɔ́k píandɛ́: weepísíítin wɔɔkɔ́n wɔ́ kɛ́ɛ́yɛ́ ɛ́ɛ́: Muɔ́nɔ́, apá ó puólí káámɛ é kisíén ínanɔ. 29Muɔ́nɔ́ woondinyi wɔ́ ɛ́ɛ́: aákóo, indipá imbílɔ́ɔ́ŋɔ; mɔnɔ́ kisunsɔ́ akáánɛ́, weeséndi imbítáákítɛn, waayɔɔk é kisíén kí sí. 30Síí weepísíítin kinɔ́k kíɛ́yɛ́ kí káandíɛ, wɔɔyitɛn wɔ́ puandá púmoómí. Muɔ́nɔ́ ukáandíɛ kanyi ɛ́ɛ́: Taat yaáyuukan; maná tɛ ɛ́ɛ́ úyuukɛ. 31Á pakáánɛ́ peem páandɛ uníní úmɛ́nyɛɛlɛ́ kuɔyɛt kú sí wɛɛyɛ́?» Póókondinyi wɔ́ ɛ́ɛ́: «Ukutúan.» Yésuse kɔ́ɔ́p ɛ́ɛ́: kémuémue yɔɔ́núɔ́yɔn «Petúúsi lemfué nɛ piɛndɛndɛ áányitúan káánɔ́ é Pufuŋ pú Támbák. 32Ɛ́ kuɛ́n kɔk, Isáaŋ moól é kunútíínyi iŋilí yi indɛ́ndɛ́nɛ tɛ ɛ́ɛ́ nuátap wɔ́: Petúúsí lemfué nɛ piɛndɛndɛ pɔ́ páákaátap wɔ, panɔ́ numɔtɔɔ́ nuɛ́nɛn anakáánɛ́ tɛ ɛ́ɛ́ núpíkúŋɔn á kuátap mekélíe má Támbák.»
Pulinsí ɔ́ pilɔk pí peelí moóli
(Mál 12.1-12; Lúk 20.9-19)
33Yésuse kɔ́ɔ́p ɛ́ɛ́: «Ɔ́nupítɔ́líkɛ́n pulinsí púlotí epue.» Mɔɔnd omotí, waapunda kisíén kí masamɔ́ má makɛp. Wɔɔpɔŋ kɛ́ɛ nɔ ɔmindɛ́, waawáak atányí yɔ ɔnɔ́k ú masamɔ́ má makɛp, woond waawáak kinyáli kiinyáŋímát kɔ́ ɔkɛ́k; é kélém akáánɛ́ weekeeki peelímoólí, waayɔɔk kɛ́ ɛŋɛnd. 34Kisikɛl kí nioko mɛɛlɛ́ kí kepísííténe waatɔ́m peelímoólí pɛ́ɛ́yɛ́ kú epé pɔ́kɔtɔnɛ́ɛ é kisíén ɛ́ɛ́ pátúmɛn wɔ́ níɛ́yí niap. 35Maná pekííkí kisíén pɛ́ɛtikɛn peelímoólí pámaátɔ́m: omoómí péekite wɔ́ kinɔ́kɔ́ kɔ́nɔk, olotí pɔ́ɔ́kɔɔ́n wɔ́, omotí kɛ́kɛ́yí páalaŋan wɔ́ atányí ɔ́ kuɔ́n wɔ́. 36Muɛ́t kisíén waand atɔ́m peelímoólí kutek kutápɔk pákutúan; maná pekííkí páákand kuɛl pilɔŋ pímoómí. 37É kuesúkín, waatúmɛn pɔ́ muɔ́nɔ́ wɛɛyɛ́, wɔɔpíɔ́yitɛn ɛ́ɛ́: Pákaná ɔkɔ́l muɔ́nɔ́ áámɛ ɔ́ niɔlɔ́. 38Maná pekííkí kisíén mɛɛlɛ́ nɛ kuɛ́n wɔ páapíkálɛt ɛ́ɛ́: Ɛ́nyɛɛlɛ́ túɔ́n wɔ, wɔ́ unyɛɛ́ muɛ́t piyáya, túsíen ne kiséé. 39Páátál wɔ́ imbɔk, pááyɔɔk nɛɛyɛ́ nakúnɛ u ɔmindɛ́, póond pɔ́ɔ́n wɔ. 40«Aká kɔk muɛ́t kisíén ányáasiámánɛ́ wɛɛ́nyɛ́ɛl tiɛkíɛ́ nɔɔpɔ́ é?» 41Póondinyi wɔ́ ɛ́ɛ́: «waányíman kuɔ́nɔ pilɔk pí pekííki kisíén pakáánɛ́ kati insíkíle, woond weeki kisíén ɔ́ pɔsɔ́k pólotí, epé péényékenyé wɔ́ níɛ́yí niap á kisikɛl.» 42Yésus kanyi kɔ́ɔ́p ɛ́ɛ́: «Numapási nutianɔ́n aná nukál nunyɛɛ́ kí imfiɔ́ŋ núɔ́yɔnɛ́ ɛ́ɛ́:
Nitányí ení peweékí mɛɛ́yɛkɛ́
ní nímɛɛ́síɛ́yɛ́ endímbí ú kiansi;
púnyi puólí pú Ɔkɔ́n:
pú kuáya kuáya kásɔ́ ké eŋis,
43púúpú inúɔ́yɔnɛ́ kɔk ɛ́ɛ́: Támbák áányísúkat Pufuŋ púɛ́yɛ́ káánɔ́, é kueki nikúli níónyóómóné masamɔ́ kutek. 44Ewú waányíkuaninɛ́ á nitányí nikáánɛ́ áányíkandakand, ewú nitányí nikáánɛ́ áányíkuaninɛ́ wɔ, níányíman ɛsɛsɛ wɔ.» 45Pɔkɔ́n pá pafunɔ́fɔn na Pafalisiɛ́ŋ pɔ́ɔ́kɔɔ́p ɛ́ɛ́ melinsí eme Yésus ményitííyí pɔ́ óyooson pɔ́. 46Páákambɛt ɛ́ɛ́ pɛ́ɛtikin wɔ́ maná páápia puwaá ne embul ú pɛɛnd, á kiákí ɛ́ɛ́ pámapá pɔ́kɔ́lɔn Yésuse ɛlɛɛ́ eŋemí mekélíe má Támbák.
Právě zvoleno:
Matié 21: yav
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2026, CABTAL
