Matié 16
16
Melinsí má pisikɛl
(Mál 8.11-13; Mat 12.38-39; Lúk 11.16,29; 12.54-56)
1Pafalisiɛ́ŋ na Pasatusiyɛ́ŋ mepísíítín Yésuse ɛ́ɛ́ pɔ́tɔlɛk wɔ, póówun wɔ́ ɛ́ɛ́ utíínyi pɔ́ pulinsí púólinoné ku Támbák. 2Ukanyi kɔ́ɔ́p ɛ́ɛ́: «Kisɛ́ndɛ kua nuɛlɛ ɛ́ɛ́ kuɔ́m nyɛ peseé, á kiákí ɛ́ɛ́ mɛnɛ́mɛnɛ́ɛ nyɛ ɛŋɛ́ndúkɛ́n. 3Kúnyaánɛ ɛ́ɛ́ Kuɔ́m pálana, nuɛlɛ ɛ́ɛ́ kuɔ́m kaná ɔpílɔk, á kiákí ɛ́ɛ́ mɛnɛ́mɛnɛ́ɛ ééfúte. Akáání nuémenyen kuanɔn melinsí mɛ́ mɛ́mɛnɛ́mɛnɛ́ɛ, melinsí má kisikɛl ekie nutipá numenyen kuanɔn mɔ́ɔ. 4Kilɔk kí ipakɛ́ nutiányípá nuɔ́pinɔn Támbákɛ́ɛ nuówon pulinsí! É pulinsí kɔk, pétiényinúékí púlotí ɛsiɛ́ pulinsí pú Yunas.» Weeténikenyi pɔ́ akáánɛ́ waayɔk.
Epú Pafalisiɛ́ŋ na Pasatusiyɛ́ŋ nyɛɛ́
(Mál 8.14-21; Lúk 12.1-6)
5Pááyuukan nakúnɛ u asaá, popiiónyí pɛ́ɛ́yɛ́ péépíeliti kukɔ́l, pilɛ́ɛt. 6Yésus kanyi kɔ́ɔ́p ɛ́ɛ́: «Nupíkeŋenyesi, ánupínyaŋɛt ne kinyútukie kí Pafalisiɛ́ŋ na Pasatusiyɛ́ŋ.» 7Popíónyí póond é kupíŋunye pɔ́ɔ́ nɔ́ pɔ́ɔ ɛ́ɛ́ «tutimɔ́ɔ́kɔ́l pilɛ́ɛt.» 8Yésuse weemeny, wɔ́ kɔ́ɔ́p ɛ́ɛ́: «Pɛɛnd pɔ́ muɔ́nɔ́ u pipíóndínyí ɔtɛ́m, kiákí nuanunanɛ́ anakáánɛ́ á kati kukɔ́l pilɛ́ɛtɛ? 9Numanyi kɔk nutiɔ́p á? Nutipá nupítááka pilɛ́ɛt pitáan tumaápitɛ́n tukɔ́n tutáan tú pɛɛnd á? Musááŋ múnɛk numaákusikan é piénsi pímɔɔ́lɔpɔ́? 10Nutipá nuand apítááka pilɛ́ɛt pitíndát neémue tumaápitɛ́n tukɔ́n tú pɛɛnd túni, musááŋ múnɛk numaákúsíkan? 11Kiákí nutiányípá nuɔ́pɔn ɛ́ɛ́ indimánúkálan ɛ́ pilɛ́ɛt, aká insíɔ́núɔ́yɔn ɛ́ɛ́: Ánupínyááŋá kinyútukie kí Pafalisiɛ́ŋ na Pasatusiyɛ́ŋ.» 12Pɔ́ɔ́kɔɔ́p kɔk ɛ́ɛ́ utimákála kinyútukie kí pilɛ́ɛt, ɛ́ɛ́ pápínyáŋa kíɛ, maná iŋónyítónyí i Pafalisiɛ́ŋ na Pasatusiyɛ́ŋ.
Piɛ́l máátáp Yésuse aná muɔ́nɔ́ u Támbák
(Mál 8.27-30; Lúk 9.18-21)
13Páámán é kiénsi kí kuúsí kí Sisali u Fílip, Yésuse woówun popíónyí pɛ́ɛ́yɛ́ ɛ́ɛ́: «Ɔ́ kuɔyɛt kú pɛɛnd, ɛ́nyɛ́ inyɛɛ́ niiŋúɛ Muɔ́nɔ́ u mɔɔnd e?» 14Póondinyi ɛ́ɛ́: «Pólotí ɔ́ɔ́kɔɔyɔ ɛ́ɛ́ Isáaŋ Etuúsíe, epe Elie, pólotí kɔk ɛ́ɛ́lɛ ɛ́ɛ́ Selemie kúnyaánɛ́ ɛ́ɛ́ eŋémímekélíe má Támbák olotí.» 15wɔ́ kɔ́ɔ́p ɛ́ɛ́: «Panɔ́ kɔk nuɔ́kɔ́ɔyɔ ɛ́ɛ́ inyɛ ɛ́nyɛ é?» 16Símun Píɛl kɔ́lɔn nukál woondinyi ɛ́ɛ́: «Anyi Kilíise, Muɔ́nɔ́ u Támbákɛ́ɛ wɔɔkɔ́si.» 17Waand ɔkɔ́l nukál Yésus kanyi ɛ́ɛ́: «Imak naawu Símun, kinɔ́k kí Yonas, á kiákí ɛ́ɛ́ utipá mɔɔnd umányikutíán puɔ, maná Taatɛ́ɛ unyɛɛ́ mɛnɛ́mɛnɛ́ɛ. 18Yɔɔ́kuɔyɔn: Anyi Piɛ́lɛ, á nitányí nikáánɛ́ yaányíkusikanɛ́ ɔlɔŋ wáámɛ ú peétépí, pukaaka pú nikú tiányandá apia imbéki kɔ́ɔ́p. 19Yaányíkufá pitipek pí Puŋaaŋa pú mɛnɛ́mɛnɛ́ɛ; epú aányísuukanɛ́ e kúúsí púányípá pusuúkán mɛnɛ́mɛnɛ́ɛ, epú oónyóóluneé é kuúsí púányípá puólúnón mɛnɛ́mɛnɛ́ɛ.» 20Waakányi kɔk ó popíónyí pɛ́ɛ́yɛ́ ɛ́ɛ́ pátitíán mɔɔndɛ unyi Kilíise.
Yésus météékí nikú níɛ́yí na kuam kúɛ́yí á pilɔ́ŋ
(Mál 8.31-33; Lúk 9.22)
21Kutúm akáánɛ́, Yésuse weetúm é kutíínyenyi popíónyí pɛ́ɛ́yɛ́ ɛ́ɛ́ waápian ɛ́ɛ́ úyɔɔk Yelúsalɛm, wɛ́ɛ́n iŋɛ́n kí imbɔ́k sí posíósíó, na pafunɔ́fɔn pɔɔkɔ́n ne pemenyí pikotí, pɔ́ɔ́n wɔ́, ɔ́ puɔ́s púkátátúɛ, wáám á pilɔ́ŋ. 22Piɛ́lɛ, wɔɔkɔ́ɔ́kɛt wɔ́ á masía, wɔɔyitɛn wɔ́ ɛ́ɛ́: «Támbák kunyáŋɛk á puɔ, Ɔkɔ́n! Aákóo, pukáánɛ́ tíákuámɛ́n!» 23wɔ́ kɔk, upíkɛkɛlɛ, waatían Piɛ́lɛ ɛ́ɛ́: «apá kaáyɛ́ɛ káámɛ é kélém, Sáátan! Anyi imbúpén yaamɛ á kiákí ɛ́ɛ́ imbítáákítɛ́n síáwɔ tipá sí Támbák, maná sí pɛɛnd.»
Epú púówoné ɔ́ kuɔŋ é Yésus
(Mál 8.34–9.1; Lúk 9.23-27)
24Kúúkɔ́ Yésus mɛɛ́lɛ́ ó popíónyí pɛ́ɛ́yɛ́ ɛ́ɛ́: «Índɛ mɔɔnd ákamba ɛ́ɛ́ wɔ́ɔŋ káámɛ, upísáŋɔn wɔ́ muɛ́t, úsɛmbɛ kolóse wɛɛyɛ́, wɔ́ɔŋ káámɛ. 25É kémuémue, ewú wambanɛ́ ɛ́ɛ́ úkááka kusɔ́t kúɛ́yí, éényínyími kɔ́ɔ; maná ewú weényínyímesié kúsɔ́t káámɛ ó pusíó áányítáŋap kɔ́ɔ. 26Kayí pinamɛ́ɛ mɔɔnd áányítáŋapɛɛ́ á kupia kúúsí kitikit, índɛ usienyími kusɔ́t kúɛ́yɛ! kayí Puandɛ́ɛ mɔɔnd nyɛɛ́ kueki ɔ́ kuɔ́nd kusɔ́t kúɛ́yɛ́! 27ɛ́ kuɛ́n kɔk Muɔ́nɔ́ u mɔɔnd koól ne Peéŋele pɛ́ɛ́yɛ́ á puŋaaŋa pú Síí wɛɛyɛ́: Akáánɛ́ woónyóondinyi siki mɔɔndɛ, yá aná umɛɛ́ndɛ. 28É kémuémue, yɔɔ́núɔ́yɔn, é péépé pɛ́nyɛɛ́ akɛ, táásɛ tíékú kati kuɛ́n Muɔ́nɔ́ u mɔɔnd óólon aná efuŋ.»
Právě zvoleno:
Matié 16: yav
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2026, CABTAL
