Matié 11
11
1Kɔ́ɔk, aká Yésus mɛɛ́lɛ́ úmááman apítíánɛn popíónyí pɛ́ɛ́yɛ́ pá páát na páandíɛ, waatɔk akáánɛ́ ó kuól kuónyónyí ne kukéme pufuŋ pú Támbák á pa pálɛ́k pé kiénsi kí kitɔŋ umaápá.
Iŋówúnín yi Isáaŋ ni iŋondínyínyí i Yésus
(Lúk 7.18-35)
2Isáaŋɛ etuúsí mapá á kiansí kí imbíne, kɔ́ɔk wɔɔ́p pɔ́ɔ́yɔ meelínyélinyé mé Kilíis. Waatɔ́m popíónyí pɛ́ɛ́yɛ́ ó kuówún wɔ́ ɛ́ɛ́: 3«Púnyɛ akɛɛ́ anyɛ ewú wɛɛsikɛɛnɛnɛ́ kuól ééy kúnyaánɛ tuɛ́kɛsikɛɛnɛn kupééti oloti?» 4Yésuse woondinyi pɔ́ ɛ́ɛ́: «Ánuupɔ́ kuatíán Isáaŋɛ epú nuɔ́pɔnɛ́ɛ nuond nuɛ́nɛn: 5pepútepute ɛ́ɛ́kɛɛ́nɛn, pikóndi ɛ́ɛ́ndɛ, pekúnúkun kanyi pasukúná, patúkúlútukɔl ɔ́ɔ́pɔn, pikú ɛ́ɛ́nyukɛn á pilɔ́ŋ, péékémén pɔsúkɔsukɔ insɔ́m yi indámb. 6Peseé ne ewú wɛɛ́nyɛ́ɛ́lɛɛ́ utikuá ó pusíó pú kisiɛ́n kíámɛ!»
7Popíónyí pí Isáaŋ mɛɛlɛ́ pákaayuúkán, Yésuse woond ɔ́ kuɔyɔn embúl ú pɛɛnd epú púyoosoné Isáaŋɛ: «Kiákí nuányíyɔɔ́k ó kuoyoósón ɔ́ kiɔ́sɔ́kɔlíɔ́? Nupal enú emfúnu nyuŋanɛ́ á? 8Akáánɛ́, kiákí núányíípɛ́ kuɛ́n? Mɔɔnd ɔpísɔnɔ́ indífɔnɔ́ siindámb á? Maná epé pɔ́písɔnɔnɛ́ indífɔnɔ́ siindámb nyɛ kɔɔ́mɔ pefuŋ nyɔ́mbitɔnɛ́ɛ. 9Kiákí kɔk núányíípɛ́ kuɛ́n? Eŋémímekélíe má Támbák á? Ɛ́ɛ́ɛ, yɔɔ́núɔ́yɔn, kukányɛn eŋémímekélíe má Támbák. 10wɔ́ púnyɛɛ́ puɔ́ŋɔ́ kɛ́ɛ́yɛ́ ó pusíó ɛ́ɛ́: Índɛ́, yoófookosi oŋoyí insɔ́m waamɛ kááwɔ ó pusíó, ɛ́ɛ́ wɛ́ɛ́yɛ́n iŋilí yaawɔ. 11Kémuémue yɔɔ́núɔ́yɔn é péépé kitikit pámaámɛ́n é nipundí ní akáandɔ́, tɛ woomoómí umapásí utisuunɔ́k kukányɛn Isáaŋ Etuúsíe; ɛ́ kuɛ́n kɔk, weekétikétie é Pufuŋ pú mɛnɛ́mɛnɛ́ɛ nyɛ kiandákáand kukányɛn wɔ́. 12Kuetúm aká Isáaŋ Etuúsí maátál ekéme, kuasiám nínúan, Pufuŋ pú muɛnɛ́ nyɛ é pitíí; epé pénuenesié áákaamba kuɔk pɔ́. 13Peémímekélíe má Támbák kitikit no pikotí, mɔɔyɔ́ pufuŋ pú Támbák kuasiám á kisikɛl kí Isáaŋ. 14wɔ́ unyɛɛ́ Elié wɛɛsikɛɛnɛnɛ́ kuosiondó, índɛ nuákaamba kuɔ́p peseé. 15Ewú unyɛɛ́ ni itú ɛɛlɛ́ wɔ́ɔp! 16Ínyɛ kuketi nipakɛ́ enie káányí! nínyɛ imfúényée na paápayɔ́ pɔɔnyɔ́mbítɔ́n é nilumen ní pɛɛnd pɔ́ɔyɔn pɔ́kúɔ́p ɛ́ɛ́:
17Tumɔ́tɔ́ŋɔ́ inselí tɛ ɛ́ɛ́ núpínite!
Tumɔ́tɔ́ŋɔ́ pilɛ́l pí nikú, tɛ ɛ́ɛ́ núpíyɛ́kɛlitɛ!
18«Yɔɔ́kɔɔyɔ anakáanɛ́ ɛ́ kuɛl ɛ́ɛ́, Isáaŋɛ woól, utinyáan, utipuwáan, pákanyi ɛ́ɛ́ meéne mɛ́ɛ́yɛ́ tipá indɛ́ndɛ́nɛ. 19Muɔ́nɔ́ u mɔɔnd moól, waányáan, waápúwáan, pɔ́ɔ́kɔɔyɔ ɛ́ɛ́ unyɛ ɔkulɔ́, epuwúúsí. Unyɛ ekúl u petúúsí lemfué na pafalfal! Maná pémeményí ɛ́ɛ́ tutátú tú Támbák nyɛ indɛ́ndɛ́nɛ kɛ́ɛ́yɛ́ é meelínyélínyée.»
Ɔsúk na papálɛ́k pá Kalilée
(Mat 10.15; Lúk 10.12-15)
20Akáanɛ́ kɔk, Yésuse woond ɛ́ kutɛ́mbɛlɛn papálɛk epé umoósól kuɛlɛ pisey kɔ́ɔk, ɛ́ kuɛlɛ ɛ́ɛ́ pátimapíkúŋɔn: 21wɔ́ ɛ́ɛ́: «Ɔsúk naawɔ Kolasɛ́ɛŋ! Ɔsúk naawɔ Pɛtɛsáyíta! Á kiákí ɛ́ɛ́ pisey imɛɛ́lɛ́ kuanɔ́ siɛ́kɛ́píɛlɛ́ é Tíil nɔ Sitɔ́ɔŋ kasí tɔɔm pemeépíkín é pulík ɛ́ɛ́ pápíkúŋɔn. 22Ɛ́ɛ́ɛ, yɔɔ́núɔ́yɔn, ɔ́ puɔ́s pú isɔ́ɔ́sɔ, Tíili nɔ Sitɔ́ɔŋɔ tiónyísoló apia inséésítényí ɛlɛɛ́ panúɛ.
23Aaŋú kɔk, Kapɛlinawúmu atiányípá
anyálíkán kuám mɛnɛ́mɛnɛ́ɛ. Aányíkɔɔn ké eŋulúm ú niku!
Á kiákí ɛ́ɛ́ pisey pímɛɛ́píɛ́lɛ́ kuawɔ síɛ́kɛ́píɛ́lɛ́ Sɔɔtɔ́m#11.23 Sɔ́tɔm mapá Pálɛ́k Támbák meépikiki akiáki ɛ́ɛ́ pɛɛnd pɛ́y mapá ifíl táasɛ. usiápá kɔ́ɔ́k kuasiám ínanɔ. 24Yɔɔ́núɔ́yɔn, ɔ́ puɔ́s pú isɔ́ɔ́sɔ, kitɔŋ kí Sɔ́tɔ́ɔm tiónyísoló apia inséésítényí ɛlɛɛ́ panúɛ.»
Ne Síí nɔ Muɔ́nɔ́
(Lúk 10.21-22)
25Á kiátakáánɛ́ kisikɛl, Yésuse wɔɔkɔ́l nukal, ukanyi ɛ́ɛ́: «Yoókuómokosi Taat, Ɔkɔ́n u mɛnɛ́mɛnɛ́ɛ ne kúúsí, epú ɛmɛɛ́nɛmbɛ́n patátútatɔ ne pemenyí, etíínyi púú á tuútayútáyɔ́. 26Ɛ́ɛ́ɛ Taat, yá ánakáánɛ́ ɔmɔɔ́pɔ́k púú kááwɔ kɔ́ ɔtɛ́m peseé. 27Taatɛ́ɛ umiímfá puum. Tɛ mɔɔnd utipá umenyen Muɔ́nɔ́, ɛsiɛ́ Síí, tɛ mɔɔnd utipá umenyen Síí ɛsiɛ́ Muɔ́nɔ́, ne ewú Muɔ́nɔ́ pílɔ́ɔ́ŋɔnɛ́ kutíínyi wɔ́ Síí.
Ɔ́nukɔ́l kimɔŋɔl kiámɛ
28«Ónuólón kuamɛ panɔ́ peem nuɛ́nɛnɛ́ muyú na pinúá, niiŋú iŋanúfá kupíɔ́yɛt. 29Ɔ́nukɔ́l kimɔŋɔl kíámɛ, núpíkin káámɛ kí iŋónyítónyí á kiákí ɛ́ɛ́ inyɛ ɔtɛ́m owoókón, epísélésí, kúúkɔ́ nukaányípia kupíɔ́yɛt. 30Ɛ́ɛ́ɛ, kimɔŋɔl kíámɛ tipá muyú ɛ́ kusɛmb, kinúá kíámɛ nyɛ kuwa.»
Právě zvoleno:
Matié 11: yav
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2026, CABTAL
