Ansa 28
28
1Vuma vu gbani-gbani u tsu suma ta̱,
kpamu ko vuza wi lo a kuguva yi ba,
ama aza a usuɓi a tsu shamgba ta̱
n utsura tsu kawu.
2A makyan ma na baci iɗika yi a ugbamiwasuvu,
yi ta̱ n aza o tsugono n a̱bunda̱i,
ama vuza vu cicoꞋo n kuyeve
u tsu tuka̱ ta̱ ida̱shi i ma̱ta̱na̱.
3Vuza vu tsugono na u doroi uma a̱ ni,
wi ta̱ an mini ma na ma̱ la̱nga̱sa̱i ili i kashina.
4Aza a na a̱ ka̱sukpa̱i wila̱,
i ta̱ a kucikpa uma a gbani-gbani,
ama aza a na i kutono wila̱,
i ta̱ a tsurala n uma a gbani-gbani
5Uma a gbani-gbani e yeve ukuna u mayun ba,
ama aza a na i a̱ kula̱nsa̱ Vuzavaguɗu
e yeve ta̱ mayin.
6U laꞋa ta̱ n kugaꞋan vo okpo vuza vu unambi m ma̱riki,
a na vo ko okpo vuza vu uciyi n uye u gbani-gbani.
7Vuza vu na u tonoi wila̱, maku mu ugboji maꞋa,
ama vuza vu na wi a̱ cija̱Ꞌa̱ n ka̱ka̱ra̱shi
u tsu ronoko ta̱ esheku a̱ ni ili i wono.
8Vuza vu na baci u ɓolongi udukuyan u ni
a̱ ubuta̱ u kuneke kutan n kodokpotsu ka̱ a̱bunda̱i.
wi ta̱ o kuɓolongu ku vuza vu na wi
a kuyaꞋan ka aza a unambi kasingai.
9Vuma u iwan baci kutono wila̱,
ko avasa a̱ ni feu, ili yu unata i ɗa.
10Vuza vu na u tonoi n aza kuyaꞋan kamayun
a uye u gbani-gbani
wi ta̱ a̱ kuyikpa̱ punu a maza ma̱ ni,
ama aza a na i n unushi ba,
i ta̱ a̱ kuciya̱ ili yu uka̱ni i singai.
11Vuza vu uciyi u ci ɗika ta̱ ka̱ci ka̱ ni
a̱yi vuza vu ugboji ɗa,
ama vuza vu unambi u laꞋi ta̱,
e kuyeve ili i na yi i singai.
12Makyan ma na baci aza a usuɓi a̱ ciya̱i ulyaꞋi,
yaba dem u ci yaꞋan ta̱ ka̱ɗiva̱,
Ama ɗa baci vuza vu gbani-gbani u ciya̱i tsugbayin,
uma a̱ tsu ka̱na̱ ta̱ kusheɗeku.
13Vuza vu na baci u sokongi unushi u ni,
wi a̱ kusaꞋwa kuciya̱ ulyaꞋi ba,
ama yaba dem vu na u shika̱i ɗa u iwain u ɗa,
i ta̱ a kupana asuvayali a̱ ni.
14Vuza vu una̱singai u ɗa vuma vu na
ayin tutu u tsu pana wovon u ka̱shile,
ama vuza vu na u kpanduki ka̱ɗu ka̱ ni
u tsu uwa ta̱ atakaci.
15Tsu yura̱ i kawu
ko ma̱shi ma̱ ka̱fa̱da̱,
ta vuma vu gbani-gbani vu tsugono wi
a̱ ubuta̱ u uma a na i n a̱ɓa̱nki ba nannai.
16Mogono ma gbani-gbani mi n kuyeve ba,
ama vuza vu na baci u iwain kodokpotsu ka̱ a̱bunda̱i
u ci ciya̱ ta̱ wuma wu ugaɗi.
17Vuza vu na mpasa n vuma vu na wu unai mi o kutono yi,
wi ta̱ o ku okpo vuza vi ilaɗi adama o wovon ali ukpa̱,
Ka̱ta̱ vuza vu yoku u ɓa̱nka̱ yi ba.
18Vuza vu na baci u yaꞋin nwalu n singai
wi ta̱ a̱ kuda̱sa̱ngu m ma̱ta̱na̱,
ama vuza vu na uye u ni u gbani-gbani ɗa,
wi ta̱ a̱ kuyikpa̱ gogoꞋo lo.
19Vuza vu na baci u cimbai kashina ka̱ ni,
wi ta̱ a̱ kuciya̱ ili n a̱bunda̱i,
ama vuza vu na wi a ida̱shi i gbani
wi ta̱ o ku okpo vuza vu unambi ayin tutu.
20Vuza vu ma̱riki wi ta̱ a̱ kuciya̱ una̱singai,
ama vuza vu na u tsu la̱nsa̱ uciyi u gogoꞋo,
wi ta̱ a ku uwa atakaci.
21Kuciga aza o yoku, a̱ ka̱sukpa̱ aza o yoku u gaꞋan ba,
n nannai dem vuma wi ta̱ a ku nusa
adama a ilikulyaꞋa.
22Vuza vu ulyopi u ci ciga ta̱ u ciya̱ uciyi gogoꞋo,
u yeve a na unambi u ɗa wi a kuvana yi ba.
23Yaba dem vu na u ɓarangi tovu
wi ta̱ a̱ kuciya̱ ucikpi a ukocishi,
u laꞋa vuza vu na wi nu una̱ wu uyoꞋo.
24Vuza vu na u bokoi ucanuku
wu esheku a̱ ni ko wa̱ a̱na̱ku a̱ ni
ɗa u danai, <<Na lo unushi u ɗa ba.>>
ka̱ja̱Ꞌa̱ ka vuza vu munuka kaꞋa.
25Vuza vu kutsa̱n u tsu tuka̱ ta̱ n vishili,
ama vuza vu na baci u zuwai katsura u Vuzaguɗu,
wi ta̱ a̱ kuciya̱ ulyaꞋi.
26Vuza vu na baci u tsu zuwaka
ka̱ci ka̱ ni katsura kalau, kaꞋa,
ama yaba dem vu na u walai n cicoꞋo,
wi ta̱ a̱ ku da̱sa̱ngu m ma̱ta̱na̱.
27Yaba dem vu na u ci neke aza a unambi ba̱ri,
wi a kunamba ili ba,
ama a̱yi na u tsu la̱na̱ le ba
i ta̱ a kuyaꞋanka yi una̱wuya n a̱bunda̱i.
28Ayin ana baci vuza vu gbani-gbani u ciya̱i tsugbayin,
uma a̱ tsu ka̱na̱ ta̱ kusheɗeku.
ama ayin na baci vuza vu gbani-gbani u kuwa̱i,
aza a usuɓi a tsu lyaꞋa ta̱ kelime a̱ ka̱tsuma̱ ku uciyi m ma̱ta̱na̱.
©️2025 Language Development and Translation Initiative (LDTI)