Ansa 22
22
1Kula ku usingai ku laꞋa ta̱ udukuyan wa̱ a̱bunda̱i,
mapasa ma singai ma laꞋa ta̱ uciyi wa azurufa n azanariya.
2Vuza vu uciyi n vuza vu unambi ili i te i ɗa,
adama a na Ka̱shile kaꞋa ka yaꞋin le dem.
3Vuza vu ugboji u tsu ene ta̱ kawuya ka̱ta̱ u katsukpa kaꞋa,
ama ka̱mici ka̱ tsu ka̱na̱ ta̱ nwalu ali u takacika.
4Uka̱ni u kaci n wovon u Ka̱shile,
u tsu tuka̱ ta̱ n uciyi n tsugbayin n wuma wu ugaɗi.
5Uye u vuma vu gbani-gbani
wi ta̱ n awana m maza
ama vuza vu na wu erei ka̱ci ka̱ ni
wi ta̱ a ku katsukpa le.
6Yotsongu maku uye u na wa kutono,
ko u kutsa ba ci wi a kucinukpa n u ɗa ba.
7Vuza vu uciyi u tsu lyaꞋaka ta̱
vuza vu unambi tsugono,
vuza vo okopu kagbashi kaꞋa
e ekiye a vuza na u ci neke okopu.
8Yaba dem vu na u ca̱Ꞌi ka gbani-gbani,
wi ta̱ ku kyaꞋa kawuya,
kudoro ku na wi o kudoro uma
ki ta̱ o kukotso.
9Vuza vu kuneꞋe ba̱ri
wi ta̱ a̱ kuciya̱ una̱singai,
adama a na u tsu peceke ta̱
aza a unambi ilikulyaꞋa i ni.
10YaꞋan daꞋin n vuza vu ulami, vishili vi ta̱ a kulaza,
mavura n ishikushi mi ta̱ o kukotso.
11Vuza vu na u cigai ka̱ɗu ka ciɗa
n kasingai a kadanshi ka̱ ni,
wi ta̱ o ko okpo ka̱ja̱Ꞌa̱ ko mogono.
12A̱shi a̱ Ka̱shile i ta̱ a̱ kula̱na̱ ene a yaꞋan mejege,
ama u tsu iwan ta̱ kadanshi ka unambi u ma̱riki.
13Korogo ka tsu dana ta̱,
<<Kawu wi ta̱ lo pulai.>>
ko, <<Mu uta̱ baci wi ta̱ a ku una mu a uye.>>
14Una̱ u kashakanlai wi ta̱ tsu kpenle ku uga̱vi,
vuza vu na baci Ka̱shile ki a wupa n a̱yi
wi ta̱ a̱ kuyikpa̱ punu.
15Tsulau ci ta̱ a̱ ka̱ɗu ka maku,
ama mashashau mi ta̱ o kuloko yi tsu ɗa.
16Vuza vu na baci u doroi aza a unambi,
adama a na u ciya̱ udukuyan,
n vuza vu na u tsu yaꞋanka vuza udukuyan kuneꞋe,
ra̱ka̱ vi le i ta̱ o ko okpo aza a unambi.
Kadanshi ko cicoꞋo
17Zuwa atsuvu vu pana kadanshi ka vuza vu cicoꞋo,
ka̱ta̱ vu yaꞋan n ili i na mi a kupiꞋisaka wu,
18adama a na wi ta̱ a kugaꞋan,
ɗa baci vu zuwai le a̱ ka̱ɗu ka̱ nu,
ka̱ta̱ o yongo makyan dem a̱ una̱ u nu.
19Adama a na vu neke ta̱ katsura ka̱ nu u Vuzavaguɗu,
mi ta̱ a kupiꞋisaka wu e le anana.
20N ɗanaka wu ta̱ ansa kamangankupa,
i ta̱ ɗika n kadanshi ko odoki n kuyeve ku singai,
21a kupiꞋisaka wu ukuna u mayun
n kadanshi ka na vu kuneke katsura
adama a na vu ushuku mayin
u vuza vu na u suki nu.
22Ka̱ta̱ vu isa vuza vu unambi ili,
adama a na a̱yi vuza vu unambi ba,
ka̱ta̱ vu doro vuza vu unambi ubuta̱ wa afada ba,
23adama a na Vuzavaguɗu wi ta̱ a kushamgba ka le,
ka̱ta̱ wu una aza a na a unai le.
24Ka̱ta̱ vu yaꞋan cija̱Ꞌa̱ n vuza
va asuvusuɗukpi ba,
ka̱ta̱ vu gbaɓa ka̱ci ka̱ nu
n vuza vu wupa gogoꞋo lo ba,
25talo va tono uye u ni
ka̱ta̱ vu uka ka̱ci ka̱ nu a maza.
26Ka̱ta̱ vo okpo vuza vu kushamkpa vuza a̱ ubuta̱ wo okopu ba,
ko vo okpo magan adama a kutan ba,
27adama a na ɗa baci vi ciya̱i
ili i na vu kutsupaka ba,
i ta̱ a kuɗika ivaꞋamkpatsu i nu
a lazaka.
28Ka̱ta̱ vu takpa katali ke kureꞋe
ka na ikaya i nu i zuwai ba.
29Vu tsu e ene ta̱ kafuɗi ku ulinga
a̱ ubuta̱ wu ulinga u ni?
Wi ta̱ a kuyaꞋanka ngono ulinga,
ama wi a kuyaꞋanka aza a na a̱ kpa̱ɗa̱i kufuɗa ulinga ba.
©️2025 Language Development and Translation Initiative (LDTI)