Ansa 1
1
Ugiti u kuyeve
1Ansa a Sulemanu kolobo ka Dawuda mogono mi Isaraila.
2Na ɗa ansa a na a̱ kuɓa̱nka̱ wu,
adama a na vu ciya̱ cicoꞋo n ugbari,
adama e kuyeve kadanshi
ka na ki n atakaci e kuyeve,
3adama a na a̱ ciya̱,
kuyotsongusu ku kuyongo ku na ku yotsoi n ugbari,
a kuyaꞋan ili i na yi mejege n usuɓi,
n ili i na yi derere,
4adama a kuzuwa ka̱ta̱m ka̱ ciya̱ wuma u na u yotsoi
u zuwa a̱ɗa̱nga̱ni a̱ ciya̱
kuyeve n kuyaꞋan kusheshe ku singai,
5aza o cicoꞋo kpamu a zuwa atsuvu,
ka̱ta̱ o doku a̱ ciya̱ kuyeve,
yaꞋan aza e kuyeve kpamu
a̱ ciya̱ uɓa̱nki,
6adama a na a̱ ciya̱ kuyeve ku ansa n agisana,
kadanshi ka aza o cicoꞋo n iteꞋe.
7Wovon u Vuzavaguɗu, ɗaɗa ugiti u kuyeve,
ama alau o goyo ta̱ cicoꞋo n ugbari.
Tsuɓari a ukuna u kukondo
8Pana, Maku ma̱ va̱,
pana kadanshi ke esheku a̱ nu,
ka̱ta̱ kpamu vu varuku
kuyotsongusu ka̱ a̱na̱ku a̱ nu ba,
9i ta̱ o ku okpo tsu okolokolo a kaci ka̱ nu,
an vudolu vu kuɗeku
adama a na a kala kuɗeku ku nu.
10Maku ma̱ va̱, aza a unushi a kparasa wu baci,
ka̱ta̱ vu ushuku le ba.
11Ɗa baci a danai,
<<Ta̱wa̱ n a̱tsu,
tsu bana tsu bopo tsu laꞌa utsura u vuma vu yoku,
tsu tsuwa̱ mpasa ma aza a babu unushi.
12YaꞋan tsu soɗongu le n wuma tsu kpenle,
tsa aza a na a̱ gida̱la̱i a kubana e kpenle,
13ci ta̱ a̱ kuciya̱ uciyi n a̱bunda̱i,
ka̱ta̱ tsu shatangu iꞋuwa i tsu n ucanuku u gbani,
14ta̱wa̱ vu gbaɓa ka̱ci n a̱tsu,
ka̱ta̱ tsu pece ili i na tsu bokoi.>>
15Maku ma̱ va̱, ka̱ta̱ vu bana ubuta̱ koɓolo n ele ba,
yaꞋan daꞋangi n uye u le,
16adama a na i ta̱ m moloko a̱ ubuta̱ u kuyaꞋan ka gbani-gbani,
gogoꞋo lo ɗa a̱ tsu tsuwa̱n mpasa n vuma.
17Gbani ɗa azuku maza
a̱ a̱shi manu ma na a cigai kuka̱na̱.
18IcuꞋu i uma a nanlo,
ka̱ci ke le kaꞋa i a kuzuwaka maza.
e ci reme ili ba, wuma u le ɗa koci.
19Yaba dem vu na wi a̱ kula̱nsa̱ kodokpotsu ka na a̱ ciya̱i n uye singai ba,
a ukocishi wuma u le u ɗa u tsu okpo punu.
Tsuɓari adama a ku iwan cicoꞋo
20Zuwa atsuvu vu pana,
cicoꞋo ci ta̱ e meɗevile a uye u gbayin,
ci ɗa̱ngusa̱ ta̱ ka̱la̱ka̱tsu a̱ utsutsu u likuci,
21a gaɗi vu ubuta̱ u na uma dem a ci yaꞋan oɓolo.
u salai a uye-uye
a kadanshi a utsutsu u kuꞋuwatai ku likuci.
22<<Ali n wannai ɗai, a̱ɗa̱ a̱ta̱m ya ku lyaꞋa kelime n unambi wu ugboji u ɗa̱?
Ali wannai ɗai, a̱ɗa̱ aza a ulami
i kulyaꞋa kelime n ulami u ɗa̱,
alau kpamu iwain kuyeve?
23Ishi baci i zuwa ta̱ atsuvu i panai uɓarangi u va̱.
Mi ishi a kudana ɗa̱ ili i na yi a̱ ka̱ɗu ka̱ va̱,
mi ta̱ a kuzuwa ɗa̱ i yeve kusheshe ku va̱.
24Ama ana n ɗekei ɗa̱, i iwain kupanaka mu,
n nekenei ɗa̱ kukiye ku va̱,
i kpa̱ɗa̱i kubonoko ugboji,
25ana i iwain odoki a̱ va̱ ra̱ka̱,
kpamu i ciga uɓarangi u va̱ ba,
26Mi ta̱ o ku zoꞋoso ɗa̱,
a makyan ma kawuya ka̱ ciya̱i ɗa̱,
mi ta̱ a kuyaꞋanka ɗa̱ ulami,
a makyan ma na ma̱dukpa̱ ma̱ ta̱wa̱i ɗa̱,
27ayin a na baci atakaci a̱ ta̱wa̱i ɗa̱
tsu uguyi u gbayin,
ayin a na baci kawuya ka̱ pura̱ngi ɗa̱ tsu kabatalikpau.
28<<Ka̱ta̱ e ɗeke mu,
ama mi a̱ ku ushuku ba.
i ta̱ a̱ kula̱nsa̱ mu a̱ ubuta̱ dem,
ama i a̱ kuciya̱ mu ba.
29Adama a na a iwan ta̱ kuyeve,
kpamu a zagba a pana wovon u Vuzavaguɗu ba,
30ana a iwain odoki a̱ va̱ ra̱ka̱,
kpamu i ciga uɓarangi u va̱ ba,
31adama a nannai i ta̱ a̱ kuciya̱
katsupu ka gbani-gbani ke le,
ka̱ta̱ a takacika n ka gbani-gbani ke le ka.
32A̱ta̱m a̱ tsu kuwa̱ ta̱
adama a unambi wu ugboji u le,
ukpa̱ɗi u kuzuwaka wa alau u tsu una le
33Ama yaba dem vu na baci u panakai mu,
wi ta̱ a̱ kuda̱sa̱ngu m ma̱ta̱na̱.
u yongo kpamu asuvu a ida̱shi
ko wovon wi ili i na i ku uka yi muna.>>
©️2025 Language Development and Translation Initiative (LDTI)