Emosu 2
2
Atakaci a iɗika i Mowabu
1Vuzavaguɗu u danai,
<<Aza a Mowabu a yaꞋan ta̱ unushi wu ucigi u ka̱ɗu,
o doku a yaꞋin unushi a̱ ka̱tsuma̱ unushi,
mi a̱ kuka̱sukpa̱ kutakacika le ba.
Adama a na o songu ta̱ etele o mogono ma Edom ɗa o bonokoi a ɗa kokomo. 2Adama a nannai, mi ta̱ a̱ kusuꞋuku Mowabu n akina,
a na a kusongu ubuta̱ u kusheɗeku u Keriyotu.
Aza a Mowabu i ta̱ a̱ kukuwa̱ n wovon,
a makyan ma na osoji i o yoroli i kuvon,
a̱ kulika̱ kavana.
3Vuzavaguɗu u danai,
mi ta̱ a ku una mogono ma Mowabu,
n aza e kelime a̱ likuci ya.>>
Atakaci a iɗika i Yahuda
4Vuzavaguɗu u danai.
<<Aza a Yahuda a yaꞋan ta̱ unushi wu ucigi u ka̱ɗu,
a lyaꞋa ta̱ kelime n kuyaꞋan unushi a̱ ka̱tsuma̱ ku unushi,
mayun mi ta̱ a kutakacika le.
Adama a na o goyo ta̱ kuyotsongusu ku va̱,
a iwain kutono wila̱ u va̱,
a̱ma̱li aꞋuwa a na ikaya i le,
o tonoi a zuwai le kuka̱sukpa̱ uye.
5Adama a nanai, mi ta̱ a̱ kusuꞋuku Yahuda n akina,
o songu mashilya ma Urushelima.>>
Atakaci wa aza a Isaraila
6Vuzavaguɗu u danai.
<<Aza a Isaraila a yaꞋan ta̱ unushi wu ucigi u ka̱ɗu,
a lyaꞋa ta̱ kelime n kuyaꞋan unushi a̱ ka̱tsuma̱ ku unushi,
mayun mi ta̱ a kutakacika le,
adama a na e denge ta̱ aza a usuɓi adama a kutan ka azurufa,
aza a unambi kpamu adama ataka a ku uka. 7A dasai a aza a unambi n ene e le,
tsu kubuta̱ ki iɗika,
a ci yaꞋan afada a usuɓi wa aza a na i atakaci ba,
Kesheku n maku ma̱ ni a kuvaku n vuka vu te.
Ta a̱ la̱nga̱sa̱i kula ku ciɗa ku va̱ nannai.
8E kelime ka atalilyuka dem a tsu vaku ta̱,
a ntogu n na e nekei tsa aguta,
o kusoꞋo ma̱ra̱ ma na isai wa aza a na i o kutono kutan.
9<<Ama adama e le a ɗa mu unai aza a Amoriya,
ele na ugaɗi u le tsu nɗanga n Sida,
utsura u le tsu nɗanga n Oku.
Mu unai umaci u le n aralu e le.
10Mpa ɗa mu utuka̱i ɗa̱ a iɗika i Masar,
ɗa n tonoi n a̱ɗa̱ e meremune a̱ya̱ amangere,
adama a na i lyaꞋa uka̱ni wi iɗika ya aza Amoriya.
11Ɗa n zagbai aza o yoku a̱ ka̱tsuma̱ ka̱ muku n ɗa̱ okpo eneki,
aza o yoku tankpamu a̱ ka̱tsuma̱ ko olobo a̱ ɗa̱ okpoi nzagbi.
Ko ta nanai ba, aza a Isaraila?>>
Mpa Vuzavaguɗu n dansai.
12<<Ama ɗa i zuwai nzagbi n soꞋi ma̱ra̱,
ɗa kpamu i danai eneki <Yi o kudoku kuyaꞋan kene ba.>
13<<Gogo na, mi ta̱ a kuzuwaka ɗa̱ a̱miki,
tsu na ucanuku u tsu laꞋa majaki a̱bunda̱i.
14Ko aza a ilaɗi i a kufuɗa kusuma ba,
aza a utsura i ta̱ o ku okpo babu utsura,
osoji i a kufuɗa ku isa ka̱ci ke le ba.
15Atain a kufuɗa kushamgba kuyaꞋan kuvon ba,
kosoji ka ilaɗi ka ku laꞋaka ba,
akumbi odoku a kufuɗa ku isa wuma u le ba. 16Ali n ovonshi a utsura feu,
i ta̱ a kusuma oshomboɗi a kanna ka nanlo ka.>>
Mpa Vuzavaguɗu n dansai.
©️2025 Language Development and Translation Initiative (LDTI)