Matiu 3
3
Noa gloku mae Jon Siublahi
(Mak 1:1-8; Luk 3:1-18; Jon 1:19-28)
1Ka naga'e teke au te au Jisas Naesaret ie, mae Jon Siublahi ne ghaghazalaza u Grorogo te Keli gne ka nau nagou ka provens Judia. 2Magne ne lepo eu'ani ka nanonire, “Atha koko puhimi te di'are, eigna naga'e God nate funei frunira noa nanonire la thata mei hui!” 3Mae profet Aesaea neke kulu lepo eu'ani neigna mae Jon,
“Kahe mae kaina poapola fabi'o eu'ani ke hnuagna nau nagou ie,
‘Tarabana nabrau gna Lod,
e'ei fakeli hnimoto mala tei teigna magne ie.’ ”#3:3 Aesaea 40:3.
4Mae Jon gne pipichi ka pohe teke e'ei ka nakla kamel, ni noa hnugha ie e'ei ka guli buluka. Euwateuwe, gano te ngamu magne re u cheche ni jujurukuli. 5Chuku nanonidi Jerusalem ni ka nau te hui ka provens Judia, ni ka nau te au falithuza Kho'u bi'o Jodan teure ne kafua krapu mei ne farogo ka magne. 6Hatimare mei ne lepo fataklera nakhibodire, euwateuwe mae Jon ne fasiublahi ra ka Kho'u bi'o Jodan.
7Chuku mae Farisi ni mae Sadiusi eulanauwa te mei ka hnimoto te fasiublahi nanoni mae Jon gne, eigna hatimare ngagura lanauwa te siublahi nodi ka magne. Agnoni kate kofira hatimare re, mae Jon ne lepo eu'ani, “Ghotolu jateula pholi euwa! Eigna ghotolu lase muamugna lui! Mae ihei teke lepo harighamu ghotolu te mala mei siublahi, ni mala pelo kokoza noa di'atagna God tela thatai mei hui ie teuwe? 8Koko sonighotolu puhimi te di'are, mala jateula sisi te khuakuda eu nakahramire, falalase gna u nakahra valu ie. 9Tovi lepoza koba ghotolu ne kohlo hui thaimi ka nathagna God, ni ne vikegna mae Ebraham thaimi teuwe. Eigna me lepoza lana rei ka ghotolu ie, God gne tangomana aulana te e'ei vikegna mae Ebraham ka thina te kofira ghotolu ire! 10Ni gignoa igne ie, God la tarabana hui mala fatera nanoni fate'o te theome hoho'i nakahradire, jateula kahe mae te tarabana mala rave soru gazu ia euwa. U gazu fate'o te theome saro sisi te keli re, magne kaina ie na rave sorura ni koko laora ka kha'aghi.
11“Rei fasiublahighamu ghotolu ka u kho'u mala falalase gna te ho'ignagnafa ghotolu ie. Ni kahe mae te tufuni noilaghi lui ie, kaina mei ke leghugu rei. Magne kaina ie fasiublahighamu ghotolu ka Tharunga te Blahi ni ka kha'aghi. Magne mae ke uluguni rei, rei theome thokagu te atha koko noa sadolo magne re. 12Eigna magne au noa noilaghi mala fatera nanoni te hui re. Tutu'ani, magne kaina fafatera ihei te kohlo re ka ihei te theome kohlo re. Jateula mae ihei te fafatera gano te keli re ka gano te di'a ra euwa. Te keli re magne kaina nana'a ka noa suga ie, ni te di'are mala koko lao ka kha'aghi te the'o ka lemegna ie.”
Jisas ne siublahi ka mae Jon
(Mak 1:9-11; Luk 3:21-22)
13Ka naga'e Jon te fasiublahi ra nanonire, Jisas ne mei lanauwa funugna Galili ne dufu Jodan mala siublahi ka magne. 14Mae Jon ne tho'anoa te fasiublahiza Jisas ie, ne lepo eu'ani ka magne, “Rei na jame te thokagu mala siublahi ka ghoe ie, ne fahneuwa te mei ghoe ka rei gnea?”
15Agnoni, Jisas ne lepo eu'ani ka mae Jon, “Eiza sonighoe gignoa igne mala leghuza au tapa hna te ngaguza God ie.” Eume, mae Jon ne fa'uveza magne ne fasiublahiza.
16Ke leghugna te siublahi ie, Jisas ne kegra ka geri kho'u ie. Ka hnimoto teugne lanauwa, manga ie ne thora hariza magne, ni magne ne kofiza noa Tharunga Blahi God ie ne soru mei jateula kahe bahlu eu ne togha ka magne. 17Agnoni, kahe naogla ne lepo eu'ani mei funugna klia, “Igne tufuni mae Thugu rei. Rei tufuni nahmaza ni hneghaza eu magne.”
© 2025 SIL Solomon Islands