Luke 15
15
1အငြီးကုအွယ့် တခွမ်ကောက်စာဖုန်းနောင် ပလူးလီခိုဟစာဖုန်းကားကအိုအွယ့် အီနာကာ ကိုယ်တော်ယေရှုတရာတာထွို့ လေးလိုကာ။ 2အွယ့်မဲ့ ဖာရိရှဲဖုန်း နောင် ကျမ်ဒါဆရာဖုန်းအွယ့် " ပလူးဒွိုးပလားဒွို အိုကိုနောင် ပလူးလီခိုဟစာဖုန်းကာဟ အန်ကိုအိုကို ထိုင်နောင် အာကာအယ်"ဒင်ပျက်လိုကာနိန်းအွယ့်။ 3ထွို့မဲ့ ကိုယ်တော်ယေရှုအွယ့် မိန့်လေ အာကာ တတိုက်တွိုန့်ဒွိုးဘာဒွို 4"နားကကုအွယ့် ဘဲအို အဘာအယားထွို့မဲ့ ဘဲဖုန်းကုအွယ့် မေတမာကေ့အဘာအွယ့် နားဒွို ဖီကေ့ဘဲအန်ခွူ့စီ့ခွူ့ဘာထွို့ အီစကွင်ဘဲကတာမာဒါအွယ့်ဘာ တွိုတွိ့ကမို့ မေဟနောဝ်။ 5ထွို့မဲ့ မေကွင်းမို့ခါ့ ယိုဘဲထွို့ဒင်ထန်ငင်တာလောင်ထွို့မဲ့ ဟောင်ကျိန်းယွမ်နောင် တဟွမ့်ခိုတဟွမ့်ပျော်ထွို့ 6"ငါးမို့ချာလီ ငါဘဲကတမာကေ့အွယ့်ဘာအွယ့်မဲ့ ဟွမ့်ခိုတွယ့်လိုကာငါးလုဲင်" အီဒေါင့်ယွမ်တီးယွမ်ဆောင့်စာဖုန်းနိန်းအွယ့်။ 7အွယ့်ကြားမဲ့ ငါးဒေါင့်နားက့ဒွို၊ လွို့ထိုင် ပလူခိုးလထွို့ နောင်တသံဝေကစာ အန်ခွူ့စီ့ခွူ့ပလား ပလူးမိုးတလီခိုဟအပလား ပြန်လှည်ကျိန်းချာဒါ့နောင် နောင်တသံဝေဂအွယ့် ဝိန်းခမ်းကုဒီ အီဟွမ့်ခိုလိုကာထိုင်။" 8"ပမွော်အပလားဆောင့်ဒီ ကွမ့်ဗီအိုအစီ့ပြားထွို့ အွယ့်ကုပါး အပြားကုအွယ့် မေစတမာကေ့ခါ့ အာအွယ့်အီမိုးနိန်းမာ။ အာအွယ့် လီမီးထွို့မဲ့ ဝေနဝေထွို့ အီကွင်ကြိုင်ကြိုင် တွိုတွို့ ကမို့မေဟနောဝ်။ 9ထွို့မဲ့ မေကွင်းမို့ခါ့ အာအွယ့် ဟောင့်ဖောဝ်းဖုန်းနောင် ယွမ်တီးစာဖုန်းထွို့ "ကတမာကေ့ဒါ ကွမ့်ဗီဒီ ပြန်မို့ချာလိအွယ့်မဲ့ ဟွမ်ခိုကာလုဲင်" အီဒေါင့်နိန်းအွယ့်။ 10ဗွမ့်နောင်အွယ့် ငါးဘာသဒေါင့်နားက့ဒွို၊ ပလူးအပလာ လှည့်လေဗွယ်ဖရာဆောင့် နောင် နောင်တသံဝေဂခါ့ ဗွယ်ဖရာ လွှော်ဖုန်းအွယ့်လဲ့ ဟွမ့်ခိုလိုကာ" မိန့်နိန်းအွယ့်။ 11ဒါ့အလိုင် ကိုယ်တော်မိန်းထိုင်ဒါ့ဒွို "အလိုင်ကုခါ့ ပလူးအပလားအွယ့် ဖုခုအိုအန်းတငြီ့။ 12အငြီးကု ဖုခုအပီပလားအွယ့် 'ဖား၊ ပန်ဖီ ငါကာလထွိုက်ဒါ အမွေဖုန်း' ကျွူအဖာ့နိန်းအွယ့်။အွယ့်မဲ့ အဖာအွယ့် ပန်ဖီးအာဖူခူအန်းတငြီ့ အာကပွိုင်ဆိုင်ဒါတာဖုန်း။ 13ငြီးဟ အာဖုခုအပီပလားအွယ့် ချွော်အမွေဖုန်းထွို့ စစွာ့ထန်ကေ့ ကန်လငါ့ကု။ အာအွယ့် ဖြုန်ကေ့အမွေဖုန်းထွို့ အိုလိုလေတိုတာ။ 14ထွို့မဲ့ ကွမ့်ဖုန်းထွိုင်လူးခိန်း ကန်ကုအွယ့် အိုဝီတအန်ကပ်တွိုလေအွယ့်မဲ့ တွိုလေ ဘဝတအန်အိုဟ၊တအို့အိုဟ။ 15အာအွယ့် လေးပလူးအိုကန်အွယ့်ကုစာ အပလားဆောင့်ထွို့ အန်ချန့်ခက်အာ မိုးတမိုးတာ။ ပလူးအွယ့်ပလားအွယ့် အန်ချန်အာထိန်ဖီ ထွို့ဖုန်း ကအိုဒါခြံကု။ 16အာအွယ့် တဝီလွမ်တွို့အွယ့်ကြားမဲ့ ထွို့ဖုန်းကအန်ဒါ စားဖုန်းမသဲ အာဘာတလခွင်အန်းကို။ ဒေါင့်မာလဲ့ လမာလဲ့လီဖီဟ အာတအန်ဖုန်း။ 17ကန်စစွက် အာတသိဖုန်းနျူးထန်ထွို့ 'ငါးဖာ့ယွမ်ကုဒီ့ တမိုးစာဖုန်း အိုဟေတန်လဲ့ အာကဆောင့်အွယ့် တအန်ခရာဖုန်း ပလန်ပလိုတန်။ မေငါးအိုရပ်ဒွိုးကုခါ့ တအန်းခရာလီအိုဟထွို့ အိုဝီဘာတာ။ 18ငါဒွို့ ထွိုင်ထွို့ လေးလေငါးဖာ့ဆောင့်ထွို့မဲ့'ဖား၊ ငါးဒွို ပျက်မာဗွယ်ဖရာထွို့ ပျက်မာပါ ငါးဖာ့အွယ့်မဲ့ ငါးဒွိုအိုနောင်အပျက်။ 19ကျန်မှတ်မဒွမ့်မာ ငါးဒွိုပျန့်ဖုအပလားမာ၊ မှတ်ဘို့နောင်စွမ်းအပလားငါးမထွို့ ငါးအီဒေါင့်နိန်းအွယ့်' အိုယူတာနိန်းအွယ့်။ 20ထွို့မဲ့ ဖုခုပီအွယ့် အိုငြီ့တာတထွိုင်းထွို့ ကျိန်းကျိန် အဖာ့ယွမ့်။ အာဖာ့အွယ့် အိုယားယာသျှီလေ အဖုခုပီထွို့မဲ့ သပီယွမ်တွို့တာ အာတာ။ ဝီးလေကြိုအာထွို့မဲံ ဖို့ထွိုနူ့အာ။ 21ထွို့မဲ့ ဖုခုပီးအွယ့် "ဖား၊ငါဒွို ပျက်မာဗွယ်ဖရာ ထွို့ ဖာ့လဲ့ ငါးပျက်မာဘာအွယ့်ကြားမဲ့ ငါအပျက်အို။ ကျန်မှတ်မဒွမ်မာ ငါပျန့်ဖုခုအပလားမာ" ဒေါင့်နိန်းအွယ့်။ 22ဒေါင့်မားလဲ့ အာဖာ့အွယ့် 'လေချွော်မွိုင့်မွိုင့်ကာ ကန်ကျိန်းခိုဖုန်းထွို့ ဖီတို့ဖီကာအာလုဲင်။ ဖီကျိကျွော့်စွူးထွို့ တွမ်ဖီလိုကာ ခင်ဖာလုဲင်။ 23အီမိုးတပျော်ပွဲတာ အန်းကောင်း ပူနန့်ဖု ထွို့ ဒွိုအန်ကာလုဲင်။ 24ငါးဖုခုဒွို့ စီ့ထွို့လိလဲ့ ဒွိုးခါ့ပြန်မွမ့်ချာဒါ့လိထွို့၊ တမာကေ့လဲ့ ဒွိုးခါ့ ပြန်မို့ချာဒါလိ' ဒေါင့်နိန်းအွယ့်ထွို့အာကမိုးလိုကာ တပျော်ပွဲ။ 25အွယ့်ခါ့အွယ့် ဖုခုဒူးဒီ အိုမိုးတမိုးလုဲင်ကု။ အာကျိန်းတွိုယွမ်းဆောင့်ကုခါ့ အာဟွမ့်ဘာ တချင်ဖုန်းနောင် တကျွူဖုန်းဇျီး။ 26အွယ့်မဲ့ အာအွယ့် ဟောင်လေးစွမ်းအပလားထွို့ ' အိုပျန့်လိုကာတဟနာဖုန်း' တစီ့နိန်းအွယ့်။ 27စွမ်းအွယ့်ပလားအွယ့် 'ဗွယ်ပွော်ခူ ကျိန်းတွိုနောင်ခရွိုင်ခရွိုင်ဆန်ဆန်အွယ့်မဲ့ ဗွယ်ဖာ့အွယ့် အန်ဒွိုပူနန့်ဖုထွို့ မိုးဖီတပျော်ပွဲတို' ဖရေနိန်းအွယ့်။ 28ဖုခုဒူးအွယ့်လဲ့ သဒွိုင်ယွမ်တွို့ထွို့ ယွမ်ကုငါလဲ့လီဘာသနွူးဟမဲ့ အာဖာ့အွယ့် ထန်ခုနောင့်ထွို့ ဒေါင့်နေဖီ ဖီကကျိန်နွူးယွမ်ကုလဲ့ 29အာအွယ့်" ငါးဒွို နာခံငါးဖာ့နိန်းပေါင်တျာမားမားထွို့ မိုလွူဖီးဘာလဲ့ ငါးဖာ့ဒွို ငါးတား အီအန်အိုနောင်ဖောဝ်း မိုပွဲခံဆျန်တာ ချိတ်ပီအဘာငါးလဲ့ လီဖီဖူဟ။ 30ဒေါင့်မာလဲ့ ဖုခုပီဒွိုးပလားဒွို ဖြုန်းငါးဖာ့ တကလွိုင်ဥစ္စာဖုန်းနောင် မေဖရေးဖုန်းလောင်ထွို့ ထွိုင်ကျိန်းတွိုချားဒါ့ခါ့ ဖားဒွို့ မိုးစီ့ပူနန့်ဖုထွို့ မိုးဖီဒါ့နောင် တပျော်ပွဲနောဝ်" ဒေါင့်နိန်းအွယ့်။ 31ထွို့မဲ့ အာဖာ့အွယ့် 'ငါ့ဖုခု၊ နားနုဲင့် အိုတစေစေတိုနောင်ငါး။ ငါးကပွိုင်းဒါ ဥစ္စာတကလွိုင်ဖုန်းဒွိုလဲ ပျန့်တိုနားတာ။ 32ဒေါင့်မာလဲ့ နားပွော်ဖုပီဒီ့ စီ့လိထွို့မဲ့ ဒွိုးခါ့ ပြန်မွမ့်ထန်ချာလိ၊ တမာကေ့လဲ့ ဒွိုးခါ့ ပြန်မိုးချာဒါ့လိ အွယ့်ကြားမဲ့ ကားဒွို အိုလူ ဟွမ်ခိုပျော်လိုကားဘာ' ဒေါင့်ဖုခုဒူ နိန်းအွယ့်" မိန့်နိန်းအွယ့်။
Právě zvoleno:
Luke 15: ltpv-rv
Zvýraznění
Sdílet
Porovnat
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
This translation of the Lahta Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
