Тархъанлъи 6
6
1Гьебмехалъ БЕТӀЕРГЬАНАС Мусада абуна: «Гьанже дуда бихьила пиргӀавнасе Дица гьабулеб жо. Дир Гучаб квералъул бакӀлъи бихьидал, гьес гӀизраилал риччан тезе руго; Дир гучаб квералъул бакӀлъи бихьидал, гьес гьел жидерго улкаялдаса къватӀире къотӀизе руго».
2Аллагьас Мусада абуна: «Дун вуго БЕТӀЕРГЬАН!
3Дун загьирлъана Ибрагьимие, ИсхӀакъие ва Якъубие ХӀалкӀолев Аллагь#6:3 ХӀалкӀолев Аллагь – жугьутӀ мацӀалда, Эль-Шадай. хӀисабалда, БЕТӀЕРГЬАН#6:3 БЕТӀЕРГЬАН – жугьутӀ мацӀалда, ЙГЬВГЬ. абураб Дир цӀар гьезие загьирлъун букӀинчӀо. 4Гьезие чияраблъун букӀараб Ханааналъул ракь гьезие кьезе амру гьабуна Дица ва гьезулгун КъотӀи гьабуна. 5Хадуб Дида рагӀана мисриязул зулмуялда гъоркь гӀизраилал угьдулел куц ва Дирго КъотӀиги ракӀалде щвана. 6Гьединлъидал гӀизраилазда абе: „Дун вуго БЕТӀЕРГЬАН, ва Дица нуж Мисриялъул зулмуялда гъоркьа нахъе рачине руго ва лагълъиялдаса тархъан гьаризе руго. Дица хвасар гьарила нуж: Мисриялде Дир квер борхун буго ва жазаби кутакал рукӀине руго. 7Дица нуж Дирго халкълъун хьихьила ва Дун нужер Аллагьлъун вукӀина. Гьеле гьеб мехалда лъала нужеда Мисриялъул зулмуялда гъоркьа нуж къватӀире рачарав нужер БЕТӀЕРГЬАН Аллагь Дун вукӀин. 8Дица нуж рачина Ибрагьимие, ИсхӀакъие ва Якъубие кьезе Дун гьедараб ракьалде ва гьеб нужее кьела. Дун вуго БЕТӀЕРГЬАН“».
9Мусаца гьеб кинабго гӀизраилазда бицана, амма гьез гьесухъ гӀинцин тӀамичӀо, щайгурелъул вахӀшияб зулмуялъ гьезул ракӀ бекун, хьулги буссун букӀана. 10БЕТӀЕРГЬАНАС Мусада абуна:
11«Инеги ун, пиргӀавнасда – Мисриялъул пачаясда – абе жиндирго улкаялдаса гӀизраилал нахъе риччаян!»
12Амма Мусаца БЕТӀЕРГЬАНАСДА абуна: «ГӀизраилалцин дихъ гӀенеккулел гьечӀони, пиргӀавн кин дихъ гӀенеккилев? ЦӀакъ кӀал-мацӀ гьечӀев чи вугелъул дун».
Мусалги Гьарунилги гӀагарлъи
13БЕТӀЕРГЬАН кӀалъана Мусадаги Гьарунидаги. Гьес ритӀана гьел гӀизраилазухъе ва пиргӀавнасухъе, ай Мисриялъул пачаясухъе, гӀизраилал Мисриялдаса къватӀире рачеян амругун.
14Гьале гьезул тухумазул кӀудиял.
ГӀизраилил тӀоцеве гьавурав васасул, ай Рувимил васал – Енох, Палу, ХӀецрон ва Карми. Гьездасан рачӀана Рувимил тухумал.
15Шимеонил васал – Емуэл, Ямин, Огьад, Яхин, Цохар ва Ханааналдаса гӀадамалъ гьавурав Шаул. Гьездасан рачӀана Шимеонил тухумал.
16Гьале Левийил васазул цӀарал, кӀудияздаса байбихьун: Гершон, Кехат ва Мерари. (Левийица бана нусиялда лъебералда анкьго сон.)
17Гершонил васал – Ливни ва ШимгӀи, гьезул тухумалгун.
18Кехатил васал – Амрам, Ицгар, Хеврон ва ГӀузиэл. (Кехатица бана нусиялда лъебералда лъабго сон.)
19Мерарил васал – Махли ва Муши.
Гьел ккола Левийидасан лъугьарал тухумал – кӀудияздаса байбихьун.
20Амрамица ячун йикӀана жиндирго инсул яц Йохевед, гьелъ гьесие гьаруна Гьарунги Мусаги. (Амрамица бана нусиялда лъебералда анкьго сон.)
21Ицгарил васал – КъорахӀ, Нефег ва Зихри.
22ГӀузиэлил васал – Мишаэл, Элцафан ва Ситри.
23Гьаруница ячана ГӀаминадавил яс ва НахӀшонил яц Элишева. Гьелъ гьесие гьаруна Надав, Авигьу, Элеазар ва Итамар.
24КъорахӀил васал – Асир, Элканагь ва Авиасаф. Гьездасан рижана КъорахӀил тухумал.
25Гьарунил вас Элеазарица ячана Путиэлил ясазул цояй ва гьезие гьавуна Пинхас.
Гьеле левийилазул тухумазул кӀудиял умумул.
26Мусаги Гьарунги ккола: «ГӀизраилазул халкъ Мисриялдаса къватӀибе баче», – ян жидеде БЕТӀЕРГЬАНАС амру гьабурал чагӀи.
27Гьединго, Мусаги Гьарунги ккола гӀизраилазул халкъ Мисриялдаса къватӀибе бачинелъун пиргӀавнасда кӀалъарал чагӀи.
Гьарун Мусае гӀоло кӀалъай
28Мисриялда Мусадехун кӀалъалеб мехалда, 29БЕТӀЕРГЬАНАС абуна: «Дун вуго БЕТӀЕРГЬАН! ПиргӀавнасда – Мисриялъул пачаясда – бице Дица дуда абунщинаб», – ин.
30Амма Мусаца БЕТӀЕРГЬАНАСДА абуна: «КӀал-мацӀалъул гьунар гьечӀев чи вуго дун – пиргӀавн кин дихъ гӀенеккилев?» – ин.
Právě zvoleno:
Тархъанлъи 6: АварАК
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© Институт перевода Библии, 2005-2023