Ɓalɔma 5

Klisito anesu anujonokiso nɔ atɨ Asɔɓɨɨ

1Ɨtakɨtakɨ ngɨyɛ, dɔ Asɔɓɨɨ a꞉tɨsɨka tɨa sɨkanɨ ndʉ ɓombi ɓɔta ngbingbii apɛɨ angɔ, ingbaa akɔ báya, isu nɔ atɨ Asɔɓɨɨ, ta tɨa nɔ majɨɔ amati ɔ Makweso Yeso Klisito. 2Ya ɨngbaa akɔ báya, ɨyɛ Yeso, atɨganɨa-ɔɔ ɨngbaa yɔ majɨɔ kɔ Asɔɓɨɨ, ʉka isu, ta-ɔɔ ɓɛmaɛ akʉʉ ɔngɔ. Kʉɓanɨ, isu, tanɔ ɨmbʉka, nɔ, tanɨkwa ɨgyagya, nɔ napɨana mʉtɨma, dɔ, tanɨnɨanɨa nɔ ʉbɨba wɔ Asɔɓɨɨ. 3Akʉʉ ɔ yaka ngɨyɛnɛnɨ, ta kʉ nɔ ɨgyagya akɔ ikoko ngɨyɛ tanɨdya, dɔ, ɨyɔ akɛ, yanesu aninjo aɓio nɔ mʉtɨma wɔta ʉta. 4Mʉtɨma wɔta ʉta ngʉwɔnanɨ wenjo mombi báya yɔ ingono, nɔ, báya yɔ ingono yɔngɔ, yenjo tɨa mombi akɔɓio nɔ yaka ngɨyɛ anapɨa-ɔɔ mʉtɨma akʉʉ ɔngɔ. 5Yaka ngɨyɛnɛnɨ, mombi anapiana-ɔɔ mʉtɨma, yangenjiso soni, dɔ, Asɔɓɨɨ a꞉to ɓʉkʉnda ngʉɓangɔ amati ɔ mɨtɨma ngɨyeso, ɨngbaa akɔ Mʉtɨma wɔta Tu ngʉwa a꞉tinjo. 6Dɔ, angbinga ngɨa ta꞉ɓio-ɔɔ sɔkɔmʉ nɔ angu pɔ bele, Yeso a꞉wekio ɓombi ɓɔta ɓɨɓɨ, akɔ angbinga ngɨa Asɔɓɨɨ a꞉tambanaka. 7Ya ndɨ ɓʉkaɨ akɔbaya awekio mangɛ, gʉtʉ mangɛ ɔngɔ ɔɓieni ta mombi ata ngbingbii? Adiga mombi eneni abaya bayanɨ, aniwekio mombi ata iɗo. 8Yakamɛngana, Asɔɓɨɨ a꞉tɨpana ɓʉja ɓɔ ɓʉkʉnda ngʉɓangɔ pananɨ, dɔ Yeso, a꞉tɨwekio angbinga ngɨa isu, ta꞉ɓio-sɨ-ɔɔ ta amati ɔ ɓʉɓɨɓɨ. 9Ɨtakɨtakɨ ngɨyɛ, tanɨnɨanɨa ndʉ ɓombi ɓɔta ngbingbii apɛɨ Asɔɓɨɨ, ɨngbaa akɔ ingwo yɔ Yeso. Ɨyɛnɛnɨ, yakɔpana aɓʉmba ɓɔ, a꞊tɨɓwanakiso sina ɓwanakisoni, ambɔ ʉnganga wɔ Asɔɓɨɨ watɨkwamʉ akʉʉ eso. 10Ya ɓanɨ, ngbinga ngɨa ta꞉ɓio jɛnɛ-ɔɔ ɓakwa ɓɔ Asɔɓɨɨ, ɨyɔ, a꞉tɨjonokiso nayɔ ɨngbaa akɔ ingwo yɔ mwana angɔ. Ndʉ taɓio ɓɔ tɔjonokieni naɓo ɓanɨ, yakɔsugo ingono ɓɔ Asɔɓɨɨ a꞊tɨheiso ta heisoni ɨngbaa akɔ uɓei ngʉwɔ mwana angɔ. 11Yakamɛngana, akʉʉ ɔ ɨyɛnɛnɨ iɓomu, tɔkwananɔ anɨkwa ɨgyagya nɔ Asɔɓɨɨ ɨngbaa akɔ Makweso Yeso Klisito ngɨa, a꞉tɨjonokiso ɨtakɨtakɨ ngɨyɛ ɨhɔ nɔ atɨ Asɔɓɨɨ tɨa jonokisoni.

Adamʉ nɔ Klisito

12Ngbanga kʉɓanɨ, ɓʉɓɨɓɨ ɓa꞉kumonio amati ɔ dɔdɔ ɨngbaa akɔ mombi mʉngana, kʉdɔ, ɓʉɓɨɓɨ ɓɔngɔ, ɓe꞉njo tɨa ingwo. Ingwo yɛ꞉ka akʉʉ ɔ ɓombi ɓaɓomu ta nɔ ɨngbaa mɛngana ngɨyɛnɛnɨ, dɔ ɨɓɔ ɓaɓomu, ɓa꞉kɨa ɓʉɓɨɓɨ. 13Ɓʉɓɨɓɨ ɓa꞉ɓio akɔ dɔdɔ ta pɛɨ ngɨa Asɔɓɨɨ e꞉njo-ɔɔ mapanʉ alɨkɔndɔ lɔ Musa. Yakamɛngana, mapanʉ kɔɓienimʉ, ɓangɔkwanana asugo yaka akʉʉ ɔ ɓʉɓɨɓɨ. 14Ɨnadɔ, anɨngwa akɔ angbinga ngɨa ɔ Adamʉ, aɓɔya akɔ Musa, ingwo ya꞉ɓio tɨta apananiso angu ngɨangɔ, gʉtʉ ta akʉʉ ɔ ɓombi ngʉɓa ɓa꞉kɨamʉ ɓʉɓɨɓɨ, ngbanga nɔ ʉɓa Adamʉ a꞉kɨa, akɔɓundo ʉpanʉ wɔ Asɔɓɨɨ. Adamʉ a꞉ɓio isisenio yɔ mombi ngɨa ɔsisekio jɛnɛ anɨka. 15Yakamɛngana, apɛpɛ ɔ ɨjɨɔ ngɨa Asɔɓɨɨ angɔmʉ ngbanga nɔ ɓʉɓɨɓɨ ngʉɓɔ Adamʉ. Ya ingono ɓɔ, ɓombi ɓaja, ɓa꞉wo akʉʉ ɔ ɓʉɓɨɓɨ ɓɔ mombi mʉngana, ngɨa ta ananɨ. Yakamɛngana, ɨjɨɔ ngɨa Asɔɓɨɨ a꞉tinjo yanɔ dada ata mʉja nɔgbɛ. Asɔɓɨɨ a꞉tinjo apɛpɛ ngɨananɨ akɔ ɨjɨɔ, ɨngbaa akɔ mombi mʉngana, Yeso Klisito. Asɔɓɨɨ a꞉pananiso ɨkɔndɔ kpala ngɨangɔ, nɔ iɗo iɗo akɔ ɓombi ɓaja, ɨngbaa akɔ Yeso Klisito. 16Nɔ ɓata, apɛpɛ ngɨa Asɔɓɨɨ akʉ di, nɔ yaka ngɨyɛ ya꞉chwɛanɨa akʉʉ ɔ ɓʉɓɨɓɨ ɓɔ mombi mʉngana ngɨananɨ. Yaɓanɨ dɔ, mʉkɔmbʉ ngʉwa ɓa꞉kio akɔ yaka yɔ ɓʉɓɨɓɨ ɓɔ mombi mʉngana, we꞉njo tɨa mʉkɔmbʉ akʉʉ ɔ ɓombi ɓaɓomu. Yakamɛngana, apɛpɛ ɔ ɨjɨɔ ngɨyɛ Asɔɓɨɨ, e꞉njo tɨa ɓɔ ɓombi ɓɨnɨanɨa apɛɨ angɔ ndʉ ɓombi ɓɔta ngbingbii, gʉtʉ ndʉ ɓa꞉ɓio nɔ ɓʉɓɨɓɨ kʉ ɓʉja. 17Ya ingono ɓɔ ingwo ya꞉pananiso angu ngɨangɔ akʉʉ ɔ mombi mʉngana, nɔ kʉ akʉʉ ɔ ɓʉɓɨɓɨ ɓɔ mombi mʉngana. Yakamɛngana, kʉ ɨngbaa akɔ mombi mʉngana, Yeso Klisito, ɨyɛ Asɔɓɨɨ e꞉njo-ɔɔ ɓombi yaka yɛta ɨja: ɓombi ɓaɓomu ngʉɓa ɓanɨnɨanɨa nɔ ɨjɨɔ yɛta ɨja ngɨa Asɔɓɨɨ, nɔ, apɛpɛ ɔ tɛa ngɨangɔ anacho ɓombi aɓio ngbingbii, ɓa꞊dya sina uɓei nɔ, ɓʉngama ɨngbaa akɔ Klisito. 18Kʉɓanɨ, ɓakɔkio mʉkɔmbʉ wɔ ɓombi ɓaɓomu, akʉʉ ɔ ɓʉɓɨɓɨ ɓɔ mombi mʉngana. Ngbanga kʉɓanɨ, ɓombi ɓaɓomu ɓaɓaɓoonokie, nɔ, ɓanɔ uɓei akʉʉ ɔ mʉkyananakɨa, wɔta ngbingbii ngʉwɔ mombi mʉngana. 19Nɔ ɓata kʉndʉ mombi mʉngana a꞉ɗɛa ʉpanʉ wɔ Asɔɓɨɨ, kʉdɔ, ɓombi ɓaja ɓɛ꞉ka ɓombi ɓɔta ɓɨɓɨ. Ya ngbanga kʉɓanɨ, mombi mʉngana a꞉kyananakɨa ʉpanʉ wɔ Asɔɓɨɨ, kʉdɔ, ɓombi ɓaja ɓɛ꞊nɨanɨa sina ndʉ ɓombi ɓɔta ngbingbii apɛɨ Asɔɓɨɨ. 20Ɨyɛ ndʉ mapanʉ kɛ꞉ka, kʉdɔ, ɓʉɓɨɓɨ ɓɛ꞉ka tɨa kʉ ɓʉja nɔgbɛ. Yakamɛngana, akɔ ɨda ngɨyɛ ɓʉɓɨɓɨ ɓa꞉nɔta-ɔɔ ɓʉja, ɨjɨɔ yɔ Asɔɓɨɨ yɛ꞉ka tɨa kʉ ɨja nɔgbɛ. 21Kʉɓanɨ, ɨyɛ ndʉ ɓʉɓɨɓɨ ɓa꞉pananiso angu ngɨangɔ ɨngbaa akɔ ingwo, ngbanga kʉɓanɨ, ɨjɨɔ yɔ Asɔɓɨɨ ya꞉pananiso angu muɓomu akɔnacho ɓombi anɨka ngbingbii apɛɨ Asɔɓɨɨ, iɗo ambɔ ɓɨnɨanɨa nɔ uɓei wɔ mago nɔ mago, amatɨ ɔ Makweso Yeso Klisito.

Právě zvoleno:

Ɓalɔma 5: buuN

Zvýraznění

Kopírovat

Porovnat

Sdílet