ꤗꤢꤞꤢꤧ 24
24
ꤢꤨ꤭ ꤊ꤫ꤢꤦ꤬ ꤗꤢꤩ꤬ ꤒꤢ꤭ꤖꤚꤢꤪ꤬ꤊꤢꤧ꤭ ꤒꤢꤩ꤬ꤜꤢꤨ꤭ꤒꤢꤧ꤭ꤟꤥ꤭ ꤕꤢ꤭ ꤢ꤬ꤚꤤ꤬ꤢ꤬ꤊꤢꤧ꤭
(ꤗꤢ꤬ꤊꤢꤨ ꤁꤃:꤁-꤂, ꤜꤢꤨꤊꤢ꤬ ꤂꤁:꤅-꤆)
1ꤙꤣꤧ ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨ ꤓꤢꤩ꤬ꤡꤝꤢꤊꤢꤧ꤭ ꤘꤣ ꤒꤢꤩ꤬ꤜꤢꤨ꤭ꤒꤢꤧ꤭ꤟꤥ꤭ ꤠꤤ꤭ꤊꤢꤨ꤭ ꤢ꤬ꤋꤢꤩ꤭ꤔꤣꤧ꤬, ꤢ꤬ ꤋꤥ꤭ꤖꤢꤨꤡ꤫ꤢꤩ꤬ ꤒꤣꤧ꤬ꤟꤢꤩ꤬ ꤟꤢꤧ꤭ ꤘꤣ ꤜꤢꤨ꤭ꤥ꤬ ꤚꤣꤧ꤬ ꤢ꤬ ꤔꤢꤪ꤭ꤗꤢꤧ ꤜꤢꤨ꤭ ꤔꤢꤧ ꤒꤢꤩ꤬ꤜꤢꤨ꤭ꤒꤢꤧ꤭ꤟꤥ꤭ ꤘꤣ ꤢꤨ꤭ ꤤ꤬ꤏꤢꤪꤓꤢꤧ꤬ ꤜꤢꤨ꤭ ꤔꤣꤧ꤬ꤒꤣꤧ꤬ꤟꤢꤩ꤬꤯ 2ꤚꤣꤧ꤬ ꤢ꤬ ꤘꤣꤧꤟꤣꤧ꤭ ꤢ꤬ ꤋꤥ꤭ꤖꤢꤨꤡ꤫ꤢꤩ꤬ ꤒꤣꤧ꤬ꤟꤢꤩ꤬ ꤔꤢꤧ, “ꤜꤢꤪ꤭ ꤒꤢꤩ꤬ꤔꤣꤧ꤬ ꤒꤣꤧ꤬ꤟꤢꤩ꤬ ꤞꤤ꤭ ꤗꤢꤧꤓ꤫ꤣꤧ꤬ ꤜꤢꤪ꤭ ꤟꤢꤧ꤭? ꤠꤢꤧ꤭ ꤟꤢꤩꤜꤥ꤭ ꤡꤢꤪ ꤕ꤫ꤢꤩ꤬ ꤡꤣꤧ ꤞꤤ꤭, ꤜꤢꤪ꤭ ꤣꤧ꤭ ꤒꤣꤧ꤬ꤟꤢꤩ꤬ꤔꤣꤧ꤬, ꤢꤨ꤭ ꤊ꤫ꤢꤦ꤬ ꤟꤢꤧ꤭ ꤘꤢꤪ꤬ꤒꤢ꤭ꤖꤚꤢꤪ꤬ꤊꤢꤧ꤭ ꤜꤢꤪ꤭ ꤢ꤬ ꤕꤢ꤭꤯ ꤜ꤫ꤢꤪ꤬ ꤣꤧ꤭ꤒꤣꤧ꤬ꤟꤢꤩ꤬ꤔꤣꤧ꤬ ꤢ꤬ ꤥ꤬ꤡ꤫ꤢꤩ꤬ꤡꤢꤦ꤭ ꤕꤢ꤬ ꤜꤢꤨ꤭ ꤒꤣ꤬ꤗꤢꤩ꤭꤮ ꤒꤥ꤬ ꤕꤢ꤭꤯”
(ꤗꤢ꤬ꤊꤢꤨ ꤁꤃:꤃-꤁꤃, ꤜꤢꤨꤊꤢ꤬ ꤂꤁:꤇-꤁꤉)
3ꤙꤣꤧ ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨ ꤥ꤬ꤔꤢꤧ꤭ꤥ꤬ ꤘꤣ ꤢꤪꤜꤤꤠꤢ꤬ꤏꤥ꤬ꤋꤢꤨ꤬ ꤢ꤬ꤋꤢꤩ꤭ꤔꤣꤧ꤬, ꤢ꤬ ꤋꤥ꤭ꤖꤢꤨꤡ꤫ꤢꤩ꤬ ꤒꤣꤧ꤬ꤟꤢꤩ꤬ ꤟꤢꤧ꤭ꤥ꤬ꤖꤢꤦ꤬ ꤒꤢꤦꤘꤢꤦ꤬ ꤊꤣꤧ꤭ ꤜꤢꤨ꤭ ꤚꤣꤧ꤬ ꤛꤢꤩ꤬ꤞꤤ꤭ ꤟꤢꤩ ꤜꤢꤨ꤭ ꤔꤢꤧ, “ꤟꤢꤩꤏꤥ꤬ꤜꤥ꤭ ꤕ꤫ꤢꤩ꤬ꤊꤣꤧ꤭ꤗꤢꤧ ꤕꤢꤩ꤬ ꤘꤣ ꤔꤢꤧ꤬ ꤟꤢꤩ ꤕꤣꤧꤔꤢꤨ꤬ ꤒꤣꤧ꤬ꤟꤢꤩ꤬ꤔꤣꤧ꤬, ꤢ꤬ ꤊ꤫ꤢꤦ꤬ ꤓꤝꤢ꤭ꤓꤢꤧ꤬ ꤙꤢꤪꤋꤢꤩ꤭ꤒꤢꤩ꤭ ꤕꤢ꤭? ꤔꤢꤧ꤬ ꤊ꤫ꤢꤦ꤬ꤚꤢꤩ꤭ ꤟꤢꤧ꤭ ꤙꤢꤪꤋꤢꤩ꤭ꤒꤢꤩ꤭ ꤕꤢ꤭ ꤓꤥ꤭ꤚꤣꤧ꤬ ꤟꤢꤩ꤬ꤋꤢꤨ꤬ꤣꤧ꤭ ꤊ꤫ꤢꤦ꤬ ꤒꤣꤧ꤬ꤘꤢꤦ꤬ꤊꤢꤧ꤭ ꤙꤢꤪꤋꤢꤩ꤭ꤒꤢꤩ꤭ ꤕꤢ꤭ꤔꤣꤧ꤬ ꤒꤢꤩ꤬ꤋꤥꤒꤣꤧ꤬ꤊꤜꤤ ꤢ꤬ꤗꤢꤢ꤬ꤒꤢꤩ꤭ ꤒꤣ꤬ꤡꤣ꤬ꤡꤣ꤬ ꤊ꤫ꤢꤦ꤬ ꤥ꤬ꤜꤥ꤭ꤓꤢꤧ꤬ ꤚ꤫ꤣꤧ꤬ ꤕꤢ꤭ ꤟꤢꤧ꤭?”
4ꤙꤢꤧ꤬ꤡꤢꤩ꤬ ꤟꤢꤩꤏꤢꤦ꤬ ꤛꤢꤩ꤬ꤞꤤ꤭ ꤔꤢꤧ, “ꤚꤢꤪ꤬ꤚꤣꤧ ꤜꤢ꤭ꤋꤢꤧ꤭ ꤞꤤ꤭ꤔ꤫ꤢꤩ꤬ ꤔꤤ꤮, ꤔꤢꤪ꤭ꤢꤩꤜꤢ꤬ꤜꤣꤧ꤬ꤟꤥ꤭ ꤡꤝꤢꤚꤣꤧ ꤒ꤫ꤢꤧ꤬ ꤢꤨ꤭ ꤔꤢꤧ ꤞꤤ꤭ꤔ꤫ꤢꤩ꤬ ꤒ꤫ꤢꤧ꤬ꤗꤢꤩ꤬ ꤔꤤ꤮꤯ 5ꤗꤢꤩ꤬ꤒꤢꤩ꤭ꤟꤢꤩꤚꤣꤧ꤬ ꤊꤣꤧ꤬ꤛꤢꤧ꤭ ꤊ꤫ꤢꤦ꤬ ꤟꤢꤧ꤭ꤘꤢꤧꤊꤝꤢ ꤜꤣꤧ꤬ꤟꤥ꤭ꤜꤢꤧ꤬ ꤚꤣꤧꤘꤢꤦ꤬ ꤜꤢ꤭ꤋꤢꤧ꤭ ꤢ꤬ꤔ꤫ꤢꤩ꤬ ꤔꤢꤧ ꤠꤢꤧ꤭ꤗꤝꤤ꤭ ꤕꤢ꤭ ꤒꤣꤧ꤬ꤟꤢꤩ꤬ꤔꤣꤧ꤬ ꤢ꤬ ꤥ꤬ ꤢꤩꤜꤥ꤬ ꤕꤢ꤭, ꤚꤣꤧ꤬ ꤛꤢꤩ꤬ꤞꤤ꤭ ꤊ꤫ꤢꤦ꤬ ꤘꤢꤧꤊꤝꤢ ꤜꤣꤧ꤬ꤟꤥ꤭ ꤜꤢꤧ꤬ ꤚꤣꤧꤘꤢꤦ꤬ ꤜꤢ꤭ꤋꤢꤧ꤭ ꤢ꤬ꤔ꤫ꤢꤩ꤬ ꤔꤢꤧ, ‘ꤠꤢꤧ꤭ ꤗꤢ꤬ ꤋꤚꤤ’ ꤚꤣꤧ꤬ ꤛꤢꤩ꤬ꤞꤤ꤭ ꤊ꤫ꤢꤦ꤬ ꤢꤩꤜꤢ꤬ꤜꤣꤧ꤬ꤟꤥ꤭ ꤢꤩꤜꤥ꤬ ꤢꤨ꤭ ꤕꤢ꤭꤯ 6ꤞꤤ꤭ ꤊ꤫ꤢꤦ꤬ ꤔ꤫ꤤ꤬ꤟꤥ꤭ ꤒꤢꤩ꤬ꤏꤢꤒꤢꤩ꤬ꤕꤢ꤭ ꤘꤣ ꤢ꤬ ꤓꤝꤢ꤭ꤓꤢꤧ꤬ ꤊꤢꤨꤔ꤫ꤢꤧ꤬ ꤣꤧ꤭ꤔꤣꤧ꤬ꤒꤣꤧ꤬ꤟꤢꤩ꤬ ꤕꤢ꤭, ꤓꤥ꤭ꤒꤥ꤬ ꤞꤤ꤭ ꤊ꤫ꤢꤦ꤬ ꤔ꤫ꤤ꤬ꤟꤥ꤭ꤓꤥ꤭ ꤔ꤫ꤤ꤬ꤟꤥ꤭ꤜꤢꤧ꤬ ꤔꤢꤧ ꤢꤨ꤭ ꤊ꤫ꤢꤦ꤬ꤏꤢꤊ꤫ꤢꤦ꤬ꤕꤢ꤭ ꤜꤢꤨ꤭ ꤕꤢ꤭ ꤒꤣꤧ꤬ꤘꤢꤦꤚꤣꤧ꤬ ꤞꤤꤤ꤬ꤏꤢꤩ꤭ ꤙꤢꤩ꤬ꤛꤢꤪ꤬ꤙꤢꤩ꤬ꤞꤤ꤬ ꤒ꤫ꤢꤧ꤬ ꤜꤢ꤭ꤋꤢꤧ꤭ ꤒ꤫ꤢꤧ꤬ꤗꤢꤩ꤬ ꤔꤤ꤮꤯ ꤟꤢꤨꤣꤧ꤭ ꤒꤣꤧ꤬ꤟꤢꤩ꤬ ꤔꤣꤧ꤬ꤗꤢ꤬ ꤢ꤬ ꤙꤢꤩ꤬ ꤓꤝꤢ꤭ꤓꤢꤧ꤬ ꤔꤢꤧ꤭ ꤕꤢ꤭, ꤗꤢ꤬ꤔꤢꤧꤚꤣꤧ꤬ ꤣꤧ꤭ꤔꤣꤧ꤬ꤗꤢ꤬ ꤟꤢꤩ꤬ꤋꤢꤨ꤬ ꤊ꤫ꤢꤦ꤬ꤚꤢꤩ꤭ ꤒꤣꤧ꤬ꤘꤢꤦ꤬ ꤟꤣꤧꤔꤣꤧ꤬ ꤗ꤫ꤢ꤬ꤜꤢ꤭ꤟꤤꤒꤥ꤬꤯ 7ꤗꤢꤩ꤬ꤒꤢꤩ꤭ꤟꤢꤩꤚꤣꤧ꤬ ꤗꤤ꤭ꤡꤣ꤬ ꤒꤣ꤬ꤡꤣ꤬ ꤔꤢꤧ ꤒꤣ꤬ꤡꤣ꤬, ꤓꤣꤧ꤭ꤊ꤫ꤢꤩ꤬ ꤒꤣ꤬ꤊ꤫ꤢꤩ꤬ ꤔꤢꤧ ꤒꤣ꤬ꤊ꤫ꤢꤩ꤬ ꤊ꤫ꤢꤦ꤬ꤏꤢꤊ꤫ꤢꤦ꤬ꤕꤢ꤭ ꤜꤢꤨ꤭ ꤕꤢ꤭꤯ ꤊ꤫ꤢꤩ꤬ꤠꤤ꤭ꤊ꤫ꤢꤩ꤬ꤊꤢꤪ꤭ ꤔꤢꤧ ꤒꤣꤧ꤬ꤔꤢꤩꤓꤢꤪꤘꤤ꤭ ꤒꤣꤧ꤬ꤟꤢꤩ꤬ ꤊ꤫ꤢꤦ꤬ ꤥ꤬ꤓꤢꤧ꤬ꤓꤥ꤭ꤥ꤬ꤓꤢꤧ꤬ꤜꤢꤧ꤬ ꤜꤢꤪ꤭ꤕꤜꤤ꤭ ꤘꤣ ꤟꤢꤩ꤬ꤋꤢꤨ꤬ꤣꤧ꤭ ꤒꤣ꤬ꤖꤥ꤬ ꤓꤥ꤭ ꤒꤣ꤬ꤖꤥ꤬ ꤕꤢ꤭꤯ 8ꤜꤢꤪ꤭ ꤒꤢꤩ꤬ꤓꤝꤢ꤭ꤓꤢꤧ꤬ ꤣꤧ꤭ꤒꤣꤧ꤬ꤟꤢꤩ꤬ ꤔꤣꤧ꤬ꤗꤢ꤬ ꤗ꤫ꤢ꤬ꤕꤢ꤬ꤖꤢꤧ ꤒꤢꤩ꤬ꤡꤢ꤭ꤒꤢꤩ꤬ꤡꤢꤦ꤬ ꤢ꤬ ꤊꤢꤧ꤭ꤏꤢꤊꤢꤧ꤭ꤚꤢꤧ꤬ ꤘꤣ ꤢ꤬ꤞꤢꤧꤔꤢꤧ ꤖꤚꤢꤩ꤬ꤗꤢꤪ꤬ ꤊ꤫ꤢꤦ꤬ꤚꤢꤩ꤭ ꤖꤢꤨꤥ꤬ ꤟꤢꤪꤏꤢꤩ꤭ ꤗꤥꤕꤢ꤬ ꤔꤣꤧ꤬ꤖꤢꤧ꤯
9“ꤓꤥ꤭ꤚꤣꤧ꤬ ꤢꤨ꤭ ꤊ꤫ꤢꤦ꤬ꤕ꤫ꤢꤦ꤬ꤊ꤫ꤢꤦ꤬ꤡꤢꤪ꤭ ꤜꤢꤪ꤭ ꤞꤤ꤭ ꤕꤢ꤭, ꤢꤨ꤭ ꤊ꤫ꤢꤦ꤬ꤗꤢꤦ꤭ꤊ꤫ꤢꤦ꤬ꤕꤢꤪ꤬ ꤜꤢꤪ꤭ ꤞꤤ꤭ ꤕꤢ꤭ ꤓꤥ꤭ꤒꤥ꤬ ꤢꤨ꤭ ꤊ꤫ꤢꤦ꤬ ꤗꤢꤩ꤬ꤞꤣꤧ꤭ ꤞꤤ꤭ ꤕꤢ꤭꤯ ꤘꤣ ꤞꤤ꤭ ꤡꤢꤪ ꤔꤢꤧ ꤠꤢꤧ꤭ ꤢ꤬ꤋꤝꤢ꤬ꤢ꤬ꤋꤛꤢ꤭ꤚꤣꤧ꤬ ꤊꤣꤧ꤬ꤛꤢꤧ꤭ ꤕꤝꤢ꤭꤮ ꤒꤣ꤬ꤖꤚꤢꤩ꤬ ꤊ꤫ꤢꤦ꤬ ꤞꤤꤒꤣꤧ꤬ꤋꤥ꤭ ꤜꤢꤪ꤭ ꤞꤤ꤭ ꤕꤢ꤭꤯#ꤗꤢꤞꤢꤧ ꤁꤀:꤂꤂ 10ꤙꤣꤧꤔꤣꤧ꤬ꤋꤢꤩ꤭ ꤕꤢ꤭ ꤊꤣꤧ꤬ꤛꤢꤧ꤭ ꤊ꤫ꤢꤦ꤬ ꤠꤤ꤭ꤊꤢꤧ꤭ ꤢꤩꤜꤥ꤬ ꤢ꤬ ꤒꤢꤩ꤬ꤛ꤫ꤢꤦ꤬ꤒꤢꤩ꤬ꤔ꤫ꤢꤧ꤬ ꤕꤢ꤭꤯ ꤢ꤬ ꤊ꤫ꤢꤦ꤬ ꤤ꤬ꤏꤢꤩ꤭ꤢꤩ꤬ ꤜꤢꤨ꤭ꤗꤝꤤ꤭ ꤒꤣ꤬ꤖꤚꤢꤩ꤬ ꤔꤢꤧ ꤒꤣ꤬ꤖꤚꤢꤩ꤬ ꤕꤢ꤭꤯ ꤢ꤬ ꤊ꤫ꤢꤦ꤬ ꤞꤤꤒꤣꤧ꤬ꤋꤥ꤭ ꤚꤣꤧꤘꤢꤦ꤬ ꤜꤢꤪ꤭ ꤜꤢꤨ꤭ ꤒꤣ꤬ꤖꤚꤢꤩ꤬ ꤔꤢꤧ ꤒꤣ꤬ꤖꤚꤢꤩ꤬ ꤕꤢ꤭꤯ 11ꤓꤥ꤭ꤒꤥ꤬ ꤖꤚꤢꤩ꤬ꤖꤚꤥ꤬ ꤊꤜꤝꤢ꤬ꤜꤣꤧ꤬ꤟꤥ꤭ ꤢ꤬ꤔ꤫ꤢꤩ꤬ ꤒꤣꤧ꤬ꤟꤢꤩ꤬ ꤊ꤫ꤢꤦ꤬ ꤥ꤬ꤜꤥ꤭ꤓꤢꤧ꤬ ꤢꤩꤜꤥ꤬ ꤕꤢ꤭ ꤚꤣꤧ꤬ ꤢ꤬ ꤊ꤫ꤢꤦ꤬ ꤢꤩꤜꤢ꤬ꤜꤣꤧ꤬ꤟꤥ꤭ ꤢꤩꤜꤥ꤬ ꤢꤨ꤭ ꤕꤢ꤭꤯ 12ꤒꤢꤩ꤬ꤗꤢꤨꤗ꤫ꤢꤧ꤬ꤚꤤ꤬ꤡ꤫ꤢꤧ꤬ ꤥ꤬ꤓꤢꤧ꤬ꤢꤩ ꤢ꤬ꤋꤝꤢ꤬ꤢ꤬ꤋꤛꤢ꤭, ꤒꤢꤩ꤬ꤗꤥ꤬ꤚꤣꤧ ꤜꤢꤨ꤭ ꤒꤣ꤬ꤖꤚꤢꤩ꤬ ꤔꤢꤧ ꤒꤣ꤬ꤖꤚꤢꤩ꤬ ꤊ꤫ꤢꤦ꤬ ꤥ꤬ꤗ꤫ꤢꤩ꤬ ꤟꤢꤧ꤭ ꤔꤢꤧ ꤥ꤬ꤗ꤫ꤢꤩ꤬ ꤟꤢꤧ꤭ ꤕꤢ꤭꤯ 13ꤗꤢ꤬ꤔꤢꤧꤚꤣꤧ꤬ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤊꤣꤧ꤬ꤓꤢꤪ꤬ꤒꤣꤧ꤬ꤔꤢꤧ꤭ ꤥ꤬ꤊꤜꤢꤪ꤬ꤏꤢꤪꤗꤢ꤬ ꤘꤣ ꤢ꤬ ꤒꤢꤩ꤬ꤛ꤫ꤢꤦ꤬ꤒꤢꤩ꤬ꤔ꤫ꤢꤧ꤬ ꤢ꤬ꤊꤢꤨ꤭ ꤒ꤫ꤥ꤬ꤘꤣ ꤢ꤬ꤒꤣꤧ꤬ꤘꤢꤦ꤬ ꤒꤣꤧ꤬ꤟꤢꤩ꤬ꤔꤣꤧ꤬ ꤡꤢꤪꤗꤣꤧ꤬ꤚꤢꤧ꤬ ꤊ꤫ꤢꤦ꤬ ꤗꤢꤩ꤬ꤜꤣꤧ꤬ꤕꤜꤢꤩꤊꤢ꤬ ꤛꤢꤩ꤬ꤞꤤ꤭ ꤕꤢ꤭꤯#ꤗꤢꤞꤢꤧ ꤁꤀:꤂꤂ 14ꤓꤥ꤭ꤚꤣꤧ꤬ ꤗꤢꤪꤋꤢꤨ꤬ ꤢ꤬ꤓꤣꤧ꤭ꤊ꤫ꤢꤩ꤬ ꤢ꤬ ꤒꤢꤩ꤬ꤞꤤꤋꤚꤢꤦ꤭ꤗꤝꤤ꤭ꤜꤢ꤬ ꤣꤧ꤭ꤔꤣꤧ꤬, ꤢꤨ꤭ ꤊ꤫ꤢꤦ꤬ ꤟꤢꤩꤏꤥ꤬ꤘꤥ꤬ꤔꤢꤧ꤭ ꤔ꤫ꤤ꤬ꤟꤥ꤭ ꤜꤢꤪ꤭ ꤕ꤫ꤢꤩ꤬ ꤊꤣꤧ꤬ꤛꤢꤧ꤭ ꤥ꤬ ꤘꤣ ꤟꤢꤩ꤬ꤋꤢꤨ꤬ꤣꤧ꤭ ꤒꤣ꤬ꤙꤢ꤬ ꤜꤢꤪ꤭ ꤕꤢ꤭, ꤓꤣꤧ꤭ꤊ꤫ꤢꤩ꤬ ꤕꤝꤢ꤭ꤒꤣ꤬ꤊ꤫ꤢꤩ꤬ ꤊ꤫ꤢꤦ꤬ ꤔ꤫ꤤ꤬ꤟꤥ꤭ꤔꤢꤪ ꤜꤢꤪ꤭ꤓꤥ꤭ꤟꤣꤧ ꤒꤢꤩ꤬ꤋꤢꤧꤟꤢꤩꤏꤥ꤬ꤜꤥ꤭ꤒꤢꤩ꤬ꤣꤧ꤭ ꤕꤢ꤭ ꤒꤢꤦꤗꤢ꤬ ꤟꤢꤩ꤬ꤋꤢꤨ꤬ꤣꤧ꤭ ꤊ꤫ꤢꤦ꤬ ꤒꤣꤧ꤬ꤘꤢꤦ꤬ꤊꤢꤧ꤭ ꤔꤥ꤬ ꤖꤢꤧ꤯”
ꤒꤢꤩ꤬ ꤒꤣꤧ꤬ꤚꤢꤪ꤬ꤞꤢꤩ ꤞꤤꤤ꤬ꤏꤢꤩ꤭
(ꤗꤢ꤬ꤊꤢꤨ ꤁꤃:꤁꤄-꤂꤃, ꤜꤢꤨꤊꤢ꤬ ꤂꤁:꤂꤀-꤂꤄)
15ꤟꤢꤨꤔꤣꤧ꤬ꤚꤣꤧ꤬, “ꤞꤤ꤭ ꤊ꤫ꤢꤦ꤬ ꤗꤢꤧꤓ꤫ꤣꤧ꤬ ꤔꤢꤧ ꤒꤢꤩ꤬ꤞꤤꤛ꤫ꤢꤪ꤬ꤞꤤꤙꤤ꤭ ꤒꤥ꤭ꤙꤢꤩ꤬ ꤊꤣꤧ꤬ꤓꤢꤪ꤬ꤥ꤬ ꤘꤣ ꤒꤢꤩ꤬ꤜꤢꤨ꤭ꤒꤢꤧ꤭ꤟꤥ꤭ ꤊꤢꤨ꤭ ꤒꤥ꤬ ꤒꤣꤧ꤬ꤘꤢꤦꤚꤣꤧ꤬ ꤢ꤬ ꤊꤣꤧ꤬ꤓꤢꤪ꤬ꤥ꤬ ꤙꤣꤧꤔꤣꤧ꤬ ꤕꤢ꤭꤯ ꤚꤣꤧ꤬ ꤘꤣ ꤣꤧ꤭ ꤢ꤬ꤋꤝꤢ꤬ꤢ꤬ꤋꤛꤢ꤭, ꤢꤨ꤭ ꤊ꤫ꤢꤦ꤬ ꤘꤢꤧ꤬ꤥ꤬ꤚ꤫ꤢꤧ꤬ꤊꤢꤧ꤭ ꤒꤢꤩ꤬ꤜꤢꤨ꤭ꤒꤢꤧ꤭ꤟꤥ꤭ ꤕꤢ꤭꤯ ꤖꤚꤢꤩ꤬ꤖꤚꤥ꤬ ꤋꤢꤨ꤭ꤘꤢ꤬ꤔꤤ꤬ꤢꤩꤜꤢ꤬ ꤟꤢꤩꤏꤥ꤬ ꤓꤥ꤭ꤟꤣꤧ ꤒꤢꤩ꤬ꤞꤤꤛ꤫ꤢꤪ꤬ꤞꤤꤙꤤ꤭ ꤢ꤬ꤚꤤ꤬ꤢ꤬ꤊꤢꤧ꤭ ꤣꤧ꤭ꤟꤣꤧ꤯ ꤙꤣꤧ ꤞꤤ꤭ ꤗꤢꤧꤓ꤫ꤣꤧ꤬ꤟꤣꤧ ꤢ꤬ ꤓꤝꤢ꤭ꤓꤢꤧ꤬ꤟꤣꤧ ꤟꤢꤨꤣꤧ꤭ ꤢ꤬ꤋꤢꤩ꤭ ꤕꤢ꤭ꤔꤣꤧ꤬, ꤊꤣꤧ꤬ꤛꤢꤧ꤭ ꤘꤣ ꤢ꤬ ꤘꤢꤧ ꤜꤤ꤬ ꤣꤧ꤭ꤒꤣꤧ꤬ꤟꤢꤩ꤬ ꤒꤥ꤭ꤙꤢꤩ꤬ ꤞꤤꤑꤢꤩ꤭ꤕꤜꤥ꤭ ꤜꤢ꤭ꤋꤢꤧ꤭,#ꤘꤢ꤬ꤔꤤ꤬ꤢꤩꤜꤢ꤬ ꤉:꤂꤇, ꤁꤁:꤃꤁, ꤁꤂:꤁꤁ 16ꤓꤥ꤭ꤚꤣꤧ꤬ ꤙꤣꤧ ꤞꤤ꤭ ꤗꤢꤧꤓ꤫ꤣꤧ꤬ꤟꤣꤧ ꤒꤢꤩ꤬ꤓꤝꤢ꤭ꤓꤢꤧ꤬ ꤟꤢꤨꤣꤧ꤭ ꤟꤣꤧ ꤕꤢ꤭ ꤢ꤬ꤋꤢꤩ꤭ꤔꤣꤧ꤬, ꤊꤣꤧ꤬ꤛꤢꤧ꤭ ꤘꤣ ꤢ꤬ ꤥ꤬ ꤘꤣ ꤛꤢꤨꤘꤢ꤬ ꤊ꤫ꤢꤩ꤬ꤊꤢꤨ꤭ ꤒꤣꤧ꤬ꤟꤢꤩ꤬ ꤙꤢꤩ꤬ ꤊꤜꤢꤧ꤬ꤓꤢꤧ꤬ ꤜꤢ꤭ꤋꤢꤧ꤭ ꤘꤣ ꤏꤥ꤬ꤋꤢꤨ꤬ꤔꤣꤧ꤬꤯ 17ꤊꤣꤧ꤬ꤛꤢꤧ꤭ ꤊꤢꤩ꤬ ꤥ꤬ ꤘꤣ ꤟꤤ꤬ꤊꤢꤨꤊ꤫ꤥ꤬ ꤒꤣꤧ꤬ꤙꤛꤢ꤬ꤋꤢꤨ꤬ ꤒꤣ꤬ꤖꤚꤢꤩ꤬ꤖꤚꤢꤩ꤬ ꤔꤣꤧ꤬ ꤔꤢꤪ꤭ꤊꤜꤢꤧ꤬ꤒꤢ꤭ ꤖꤛꤢꤔ꤫ꤤ꤬ ꤒ꤫ꤢꤧ꤬ ꤢ꤬ ꤒꤢ꤭ꤗ꤫ꤥ꤬ꤒꤢ꤭ꤒꤢꤩ꤬ ꤘꤣ ꤟꤤ꤬ꤊꤢꤨ꤭ ꤔꤣꤧ꤬ꤒꤣꤧ꤬ꤟꤢꤩ꤬ ꤒ꤫ꤢꤧ꤬ꤗꤢꤩ꤬꤯#ꤜꤢꤨꤊꤢ꤬ ꤁꤇:꤃꤁ 18ꤊꤣꤧ꤬ꤛꤢꤧ꤭ ꤥ꤬ ꤘꤣ ꤜ꤫ꤢꤧ꤬ꤋꤢꤨ꤬ ꤒꤣꤧ꤬ꤟꤢꤩ꤬ꤔꤣꤧ꤬ ꤔꤢꤪ꤭ꤊꤢ꤬ ꤖꤛꤢꤔ꤫ꤤ꤬ ꤒ꤫ꤢꤧ꤬ ꤢ꤬ꤡꤢ꤬ꤊꤜꤢꤪ꤭ ꤒ꤫ꤢꤧ꤬ꤗꤢꤩ꤬꤯ 19ꤙꤣꤧꤔꤣꤧ꤬ꤋꤢꤩ꤭ꤕꤢ꤭ ꤔꤣꤧ꤬ ꤢ꤬ ꤊ꤫ꤢꤦ꤬ ꤏꤥ꤭ꤚꤢꤧ꤬ꤏꤥ꤭ꤖꤢ ꤕ꤫ꤢꤩ꤬ ꤔꤢꤧ꤬ꤡꤣꤧ ꤖꤚꤢꤩ꤬ꤗꤢꤪ꤬ ꤘꤣ ꤢ꤬ ꤥ꤬ ꤔꤢꤧ ꤢ꤬ꤟꤢꤪꤢ꤬ꤞꤢꤩ ꤒꤣꤧ꤬ꤟꤢꤩ꤬ ꤢ꤬ꤑꤢꤩ꤭ ꤔꤢꤧ ꤢ꤬ꤖꤢꤨ ꤤ꤬ꤔꤢꤨ ꤕꤢ꤬ꤜꤢꤨ꤭ ꤔꤣꤧ꤬ꤒꤣꤧ꤬ꤟꤢꤩ꤬ ꤢ꤬ꤑꤢꤩ꤭ ꤕꤢ꤭꤯ 20ꤞꤤ꤭ ꤙꤢꤩ꤬ ꤓꤢꤩ꤬ꤊꤜꤢꤧ꤬ ꤢ꤬ꤏꤣꤧꤢ꤬ꤋꤢꤩ꤭ ꤣꤧ꤭ꤔꤣꤧ꤬, ꤞꤢꤧꤟꤢꤨ ꤢ꤬ ꤊ꤫ꤢꤦ꤬ ꤒꤢ꤭ꤒꤥ꤭ ꤒ꤫ꤢꤧ꤬ ꤔꤢꤧ ꤊ꤫ꤢꤩ꤬ꤚ꤫ꤥ꤬ꤋꤢꤩ꤭ ꤒ꤫ꤢꤧ꤬ꤗꤢꤩ꤬ ꤒꤥ꤬ꤗꤢ꤬ꤔꤢꤧ ꤛꤢꤨꤘꤢ꤬ꤖꤢꤨ ꤢ꤬ ꤗ꤫ꤢꤪ꤬ꤔꤣꤧ꤭ꤘꤥ꤬ ꤒ꤫ꤢꤧ꤬ꤗꤢꤩ꤬ꤔꤣꤧ꤬, ꤊꤝꤤ꤭ꤡꤢꤪꤙꤢꤩ꤭ ꤜꤢ꤭ꤋꤢꤧ꤭ ꤔꤤ꤮꤯ 21ꤙꤣꤧꤔꤣꤧ꤬ꤋꤢꤩ꤭ꤕꤢ꤭ ꤒꤢꤩ꤬ꤕ꤫ꤢꤧ꤬ꤒꤢꤩ꤬ꤏꤢꤩ꤭ ꤔꤢꤧ ꤒꤢꤩ꤬ꤡꤢ꤭ꤒꤢꤩ꤬ꤡꤢꤦ꤬ ꤒꤣꤧ꤬ꤟꤢꤩ꤬ ꤊ꤫ꤢꤦ꤬ ꤥ꤬ꤓꤢꤧ꤬ ꤕꤢ꤭꤯ ꤘꤣ ꤟꤢꤩ꤬ꤋꤢꤨ꤬ ꤓꤝꤢ꤭ꤓꤢꤧ꤬ꤜꤢꤨ ꤕꤢ꤬ ꤒ꤫ꤥ꤬ꤊꤢꤨꤔ꤫ꤢꤧ꤬ ꤣꤧ꤭ꤔꤣꤧ꤬ ꤡꤣꤧ ꤙꤢꤩ꤬ꤙꤢꤩ꤬, ꤘꤣꤔꤥ꤬ꤘꤣꤋꤛꤢ꤭ ꤕꤢ꤭ ꤙꤢꤩ꤬ꤙꤢꤩ꤬, ꤒꤢꤩ꤬ꤕ꤫ꤢꤧ꤬ꤒꤢꤩ꤬ꤏꤢꤩ꤭, ꤒꤢꤩ꤬ꤡꤢ꤭ꤒꤢꤩ꤬ꤡꤢꤦ꤬ ꤘꤣ ꤗꤢꤧꤓ꤫ꤣꤧ꤬ꤔꤢꤪ ꤒꤣꤧ꤬ꤋꤢꤧ꤮ ꤒꤥ꤬ ꤒꤣꤧ꤬ꤟꤢꤩ꤬ꤔꤣꤧ꤬, ꤢ꤬ ꤊ꤫ꤢꤦ꤬ ꤥ꤬ꤓꤢꤧ꤬ ꤕꤢ꤭꤯#ꤘꤢ꤬ꤔꤤ꤬ꤢꤩꤜꤢ꤬ ꤁꤂:꤁, ꤒꤢꤩ꤬ꤘꤣꤧꤜꤥ꤭ꤓꤢꤧ꤬ ꤇:꤁꤄ 22ꤡꤢꤪꤗꤣꤧ꤬ꤚꤢꤧ꤬ ꤊꤢꤩ꤬ ꤗꤢꤩ꤬ꤖꤥ꤬ ꤕ꤫ꤢꤩ꤬ ꤒꤢꤩ꤬ꤡꤢ꤭ꤒꤢꤩ꤬ꤡꤢꤦ꤬ ꤣꤧ꤭ ꤢ꤬ꤏꤣꤧꤢ꤬ꤋꤢꤩ꤭ ꤒꤥ꤬ ꤟꤢꤩꤔꤣꤧ꤬, ꤊꤣꤧ꤬ꤛꤢꤧ꤭ ꤥ꤬ꤞꤣꤧ꤭ꤖꤚꤢꤩ꤬ꤙꤢꤩ ꤒꤣ꤬ꤖꤚꤢꤩ꤬ ꤒꤥ꤬꤯ ꤗꤢ꤬ꤔꤢꤧꤚꤣꤧ꤬ ꤡꤢꤪꤗꤣꤧ꤬ꤚꤢꤧ꤬ ꤜꤢ꤭ ꤗꤢꤧ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤔꤝꤢꤓꤢꤧ꤬ ꤣꤧ꤭ꤒꤣꤧ꤬ꤟꤢꤩ꤬ ꤢ꤬ꤕꤣꤧꤞꤢꤩ꤬ ꤢ꤬ꤋꤝꤢ꤬ꤢ꤬ꤋꤛꤢ꤭, ꤢ꤬ ꤊ꤫ꤢꤦ꤬ ꤗꤢꤩ꤬ꤖꤥ꤬ꤟꤢꤧ꤭ ꤢ꤬ꤏꤣꤧꤢ꤬ꤋꤢꤩ꤭ ꤕꤢ꤭꤯ 23ꤙꤣꤧꤔꤣꤧ꤬ꤢ꤬ꤋꤢꤩ꤭ꤕꤢ꤭ ꤔꤣꤧ꤬, ꤊꤣꤧ꤬ꤛꤢꤧ꤭ ꤒꤣ꤬ꤖꤚꤢꤩ꤬ꤖꤚꤢꤩ꤬ ꤊꤢꤩ꤬ ꤟꤢꤩ ꤔꤢꤧ, ‘ꤔꤢꤧ꤬ ꤟꤢꤧ꤭ ꤗꤢꤧꤗꤣꤧ꤭, ꤋꤚꤤ ꤥ꤬ꤙꤣꤧꤣꤧ꤭,’ ꤒꤥ꤬ꤗꤢ꤬ꤔꤢꤧ ‘ꤢ꤬ ꤥ꤬ ꤘꤣꤔꤣꤧ꤬,’ ꤢ꤬ ꤊ꤫ꤢꤦ꤬ ꤟꤢꤩ ꤞꤤ꤭ ꤟꤢꤨꤔꤣꤧ꤬ ꤕꤢ꤭ ꤒꤣꤧ꤬ꤘꤢꤦꤚꤣꤧ꤬ ꤛ꤫ꤢꤦ꤬ꤢꤩ꤬ ꤒ꤫ꤢꤧ꤬ ꤜꤢ꤭ꤋꤢꤧ꤭ ꤒ꤫ꤢꤧ꤬ꤗꤢꤩ꤬ ꤔꤤ꤮꤯ 24ꤗꤢꤩ꤬ꤒꤢꤩ꤭ꤟꤢꤩꤚꤣꤧ꤬ ꤖꤚꤢꤩ꤬ꤊꤜꤝꤢ꤬ ꤜꤣꤧ꤬ꤟꤥ꤭ ꤟꤢꤨ ꤋꤚꤤꤔꤣꤧ꤬ ꤔꤢꤧ ꤖꤚꤢꤩ꤬ꤊꤜꤝꤢ꤬ ꤜꤣꤧ꤬ꤟꤥ꤭ ꤟꤢꤨ ꤖꤚꤢꤩ꤬ꤖꤚꤥ꤬ ꤞꤤ꤭ ꤒꤣꤧ꤬ꤟꤢꤩ꤬ꤔꤣꤧ꤬ ꤢ꤬ ꤊ꤫ꤢꤦ꤬ ꤥ꤬ꤓꤢꤧ꤬ ꤢꤩꤜꤥ꤬ ꤕꤢ꤭꤯ ꤛꤢꤩ꤬ꤞꤤ꤭ ꤊ꤫ꤢꤦ꤬ ꤗꤢꤩ꤬ꤜꤥ꤭ ꤡ꤫ꤢꤧ꤬ ꤕ꤫ꤢꤩ꤬ ꤢꤨ꤭ ꤒꤢꤩ꤬ ꤘꤣ ꤢ꤬ ꤓꤢꤩ꤬ꤒꤣꤧ꤬ꤕꤢ꤬ ꤡꤣꤧ ꤢꤨ꤭ ꤔꤣꤧ꤬ꤒꤣꤧ꤬ꤟꤢꤩ꤬ ꤔꤢꤧ ꤒꤢꤩ꤬ꤋꤥꤒꤣꤧ꤬ꤊꤜꤤ ꤒꤣꤧ꤬ꤟꤢꤩ꤬ ꤕꤢ꤭꤯ ꤢ꤬ ꤊꤢꤩ꤬ ꤗꤢꤩ꤬ꤡ꤫ꤢꤧ꤬ ꤟꤢꤩꤔꤣꤧ꤬ꤗꤢ꤬ ꤢ꤬ ꤞꤤꤛ꤫ꤢꤦ꤬ ꤢꤩꤜꤢ꤬ꤜꤣꤧ꤬ꤟꤥ꤭ ꤔ꤫ꤤ꤬ ꤡꤣꤧ ꤊꤣꤧ꤬ꤛꤢꤧ꤭ ꤘꤣ ꤡꤢꤪꤗꤣꤧ꤬ꤚꤢꤧ꤬ ꤔꤝꤢꤖꤛꤢ ꤓꤥ꤭ꤟꤣꤧ ꤜꤢꤨ꤭ ꤔꤣꤧ꤬ ꤒꤣꤧ꤬ꤟꤢꤩ꤬ꤡꤣꤧ꤯ 25ꤒꤢꤩ꤬ꤗꤢꤩ꤬ꤢ꤬ꤔ꤫ꤢꤩ꤬ ꤣꤧ꤭ꤒꤣꤧ꤬ꤟꤢꤩ꤬ ꤟꤢꤧ꤭ꤒ꤫ꤥ꤬ ꤒꤢꤧ꤬ꤜꤢ꤭ꤟꤤꤒꤥ꤬ ꤢ꤬ꤋꤢꤩ꤭ꤔꤣꤧ꤬, ꤠꤢꤧ꤭ ꤘꤣꤧꤚꤢꤪ꤬ꤘꤣꤧꤚꤢꤩ꤭ ꤥ꤬ꤔꤢꤩ꤬ ꤕ꤫ꤢꤩ꤬ ꤟꤣꤧ ꤞꤤ꤭ ꤟꤣꤧ꤯
26“ꤟꤢꤨꤔꤣꤧ꤬ꤚꤣꤧ꤬ ꤊꤣꤧ꤬ꤛꤢꤧ꤭ ꤒꤣ꤬ꤖꤚꤢꤩ꤬ꤖꤚꤢꤩ꤬ ꤊꤢꤩ꤬ ꤟꤢꤩ ꤞꤤ꤭ ꤔꤢꤧ, ‘ꤡꤝꤢꤗꤢꤧ ꤜꤢ꤭ꤋꤢꤧ꤭ ꤗꤣꤧ꤭ꤜꤢꤩ, ꤗꤢꤩ꤬ꤏꤤꤛꤢ꤬ ꤥ꤬ꤘꤣ ꤜ꤫ꤢꤪ꤬ꤒꤣꤧ꤬ꤗꤢꤗꤢꤦ꤬ ꤊ꤫ꤢꤩ꤬ꤘꤢꤦ꤭ꤊꤢꤨ꤭ ꤔꤣꤧ꤬,’ ꤢ꤬ ꤊꤢꤩ꤬ ꤟꤢꤩ ꤞꤤ꤭ ꤒꤣꤧ꤬ꤘꤢꤦꤚꤣꤧ꤬ ꤡꤝꤢꤗꤢꤧ ꤜꤢ꤭ꤋꤢꤧ꤭ ꤒ꤫ꤢꤧ꤬ꤗꤢꤩ꤬ ꤔꤤ꤮꤯ ꤒꤥ꤬ꤗꤢ꤬ꤔꤢꤧ ꤢ꤬ ꤊꤢꤩ꤬ ꤟꤢꤩ ꤞꤤ꤭ ꤔꤢꤧ, ‘ꤢ꤬ ꤥ꤬ ꤙꤣꤧ ꤟꤤ꤬ꤘꤢꤪꤊꤢꤨ꤭ ꤣꤧ꤭ ꤖꤢꤧ,’ ꤢ꤬ ꤊꤢꤩ꤬ ꤟꤢꤩ ꤒꤣꤧ꤬ꤘꤢꤦꤚꤣꤧ꤬ ꤛ꤫ꤢꤦ꤬ꤢꤩ꤬ ꤒ꤫ꤢꤧ꤬ꤗꤢꤩ꤬ꤗꤢꤩ꤬꤯#ꤜꤢꤨꤊꤢ꤬ ꤁꤇:꤂꤃-꤂꤄ 27ꤗꤢꤩ꤬ꤒꤢꤩ꤭ꤟꤢꤩꤚꤣꤧ꤬ ꤟꤢꤨ ꤒꤣꤧ꤬ꤛ꤫ꤢ꤬ꤙꤢꤪ ꤒꤣꤧ꤬ꤋꤢꤩ꤭ꤓꤢꤧ꤬ ꤘꤣ ꤊ꤫ꤢꤩ꤬ꤞꤤꤓꤢꤩ꤬ ꤚꤣꤧ꤬ ꤊꤣꤧ꤬ꤛꤢꤧ꤭ ꤥ꤬ ꤘꤣ ꤊ꤫ꤢꤩ꤬ꤞꤤꤔꤥ꤭ ꤒꤣꤧ꤬ꤟꤢꤩ꤬ ꤗꤢꤧꤓ꤫ꤣꤧ꤬ꤔꤣꤧ꤬, ꤖꤚꤢꤩ꤬ꤜꤢꤨ꤬ꤊꤣꤧ꤬ꤛꤢꤧ꤭ ꤢ꤬ꤖꤢꤨꤖꤚꤢꤩ꤬ꤋꤢꤨ꤭ ꤗ꤫ꤢ꤬ꤟꤣꤧ ꤠꤢꤧ꤭ꤣꤧ꤭ ꤊ꤫ꤢꤦ꤬ ꤟꤢꤧ꤭ ꤕꤢ꤭ ꤗꤢ꤬ ꤢ꤬ ꤞꤢꤧ ꤟꤢꤨꤔꤣꤧ꤬ ꤕꤢ꤭꤯ 28ꤒꤢꤩ꤬ꤞꤢꤪ꤭ꤒꤢꤩ꤬ꤜꤢꤪ꤬ ꤥ꤬ꤙꤣꤧꤒꤢꤩ꤭꤮ ꤗꤢ꤬ ꤜꤣꤧ꤬ꤒꤢꤧ꤬ ꤥ꤬ꤕꤜꤢꤪ ꤙꤣꤧꤔꤣꤧ꤬꤯” #ꤜꤢꤨꤊꤢ꤬ ꤁꤇:꤃꤇
ꤖꤚꤢꤩ꤬ꤜꤢꤨ꤬ ꤢ꤬ꤖꤢꤨꤖꤚꤢꤩ꤬ꤋꤢꤨ꤭ ꤊ꤫ꤢꤦ꤬ ꤟꤢꤧ꤭ ꤢ꤬ꤚꤤ꤬ꤢ꤬ꤊꤢꤧ꤭
(ꤗꤢ꤬ꤊꤢꤨ ꤁꤃:꤂꤄-꤂꤇, ꤜꤢꤨꤊꤢ꤬ ꤂꤁:꤂꤅-꤂꤈)
29“ꤙꤣꤧ ꤒꤢꤩ꤬ꤡꤢ꤭ꤒꤢꤩ꤬ꤡꤢꤦ꤬, ꤒꤢꤩ꤬ꤕ꤫ꤢꤧ꤬ꤒꤢꤩ꤬ꤏꤢꤩ꤭ ꤢ꤬ꤏꤣꤧꤢ꤬ꤋꤢꤩ꤭ ꤥ꤬ꤓꤝꤢ꤭ꤓꤢꤧ꤬ ꤒꤣꤧ꤬ꤜꤝꤢ ꤓꤥ꤭ꤟꤣꤧ ꤕꤢ꤭ꤔꤣꤧ꤬, ꤒꤣ꤬ꤖꤥꤒꤥ꤬
‘ꤡꤢꤪꤗꤣꤧ꤬ꤚꤢꤧ꤬ ꤊ꤫ꤢꤦ꤬ ꤗꤢꤩ꤬ꤋꤤꤊꤢꤧ꤭ ꤒꤣꤧꤗ꤫ꤢꤪ꤬ ꤕꤢ꤭꤯ ꤜꤢꤩ꤭ ꤊ꤫ꤢꤦ꤬ ꤜꤤ꤭ ꤕꤢ꤬ꤒꤥ꤬ꤟꤣꤧ꤯ ꤏꤢꤩ꤬ ꤘꤣ ꤗꤢꤪꤜꤢꤩ꤭ ꤒꤣꤧ꤬ꤟꤢꤩ꤬ ꤊ꤫ꤢꤦ꤬ ꤜꤣꤧ꤬ꤒꤢ꤭ꤖꤚꤢꤪ꤬ꤊꤢꤧ꤭ ꤜꤢꤪ꤭ꤕꤢ꤭꤯ ꤡꤢꤪꤗꤣꤧ꤬ꤚꤢꤧ꤬ ꤊ꤫ꤢꤦ꤬ ꤗꤢꤩ꤬ ꤊꤣꤧ꤬ꤛꤤ꤬ꤊꤣꤧ꤬ꤛꤥ꤭ ꤜꤢꤪ꤭ ꤜꤢꤪ꤭ ꤗꤢꤪꤜꤢꤩ꤭ ꤢ꤬ ꤒꤢꤩ꤬ꤖꤚꤥ꤬ꤒꤢꤩ꤬ꤖꤚꤢꤧ꤬ ꤔꤣꤧ꤬ꤒꤣꤧ꤬ꤟꤢꤩ꤬ ꤕꤢ꤭꤯’#ꤛꤢ꤬ꤏꤛꤢꤛꤢ꤬ ꤁꤃:꤁꤀, ꤃꤄:꤄, ꤛꤣ꤬ꤟꤢꤩꤎꤢ꤬ꤊꤢꤩꤜꤢ꤬ ꤃꤂:꤇, ꤡꤛꤥ꤬ꤢꤩꤜꤢ꤬ ꤂:꤁꤀, ꤃:꤁꤅, ꤒꤢꤩ꤬ꤘꤣꤧꤜꤥ꤭ꤓꤢꤧ꤬ ꤆:꤁꤂
30“ꤙꤣꤧꤔꤣꤧ꤬ꤢ꤬ꤋꤢꤩ꤭ ꤕꤢ꤭ꤔꤣꤧ꤬, ꤖꤚꤢꤩ꤬ꤜꤢꤨ꤬ꤊꤣꤧ꤬ꤛꤢꤧ꤭ ꤢ꤬ꤖꤢꤨꤖꤚꤢꤩ꤬ꤋꤢꤨ꤭ ꤗ꤫ꤢ꤬ꤟꤣꤧ ꤠꤢꤧ꤭ꤣꤧ꤭ ꤢ꤬ꤒꤢꤩ꤬ꤟꤢꤧ꤭ ꤢ꤬ꤗꤢꤢ꤬ꤒꤢꤩ꤭ ꤊ꤫ꤢꤦ꤬ ꤥ꤬ꤜꤥ꤭ꤓꤢꤧ꤬ ꤘꤣ ꤗꤢꤪꤜꤢꤩ꤭ ꤕꤢ꤭꤯ ꤓꤥ꤭ꤚꤣꤧ꤬ ꤜꤢꤪ꤭ ꤊꤣꤧ꤬ꤛꤢꤧ꤭ ꤥ꤬ ꤘꤣ ꤊ꤫ꤢꤩ꤬ ꤕꤝꤢ꤭꤮ ꤒꤣ꤬ꤊ꤫ꤢꤩ꤬ ꤒꤣꤧ꤬ꤟꤢꤩ꤬ ꤊ꤫ꤢꤦ꤬ꤍ꤫ꤥ꤬ꤊ꤫ꤢꤦ꤬ꤟꤢꤩ꤬ ꤜꤢꤪ꤭ ꤕꤢ꤭꤯ ꤛꤢꤩ꤬ꤞꤤ꤭ ꤊ꤫ꤢꤦ꤬ ꤗꤢꤧꤓ꤫ꤣꤧ꤬ ꤜꤢ꤭ꤋꤢꤧ꤭ ꤖꤚꤢꤩ꤬ꤜꤢꤨ꤬ꤊꤣꤧ꤬ꤛꤢꤧ꤭ ꤢ꤬ꤖꤢꤨꤖꤚꤢꤩ꤬ꤋꤢꤨ꤭ ꤗ꤫ꤢ꤬ꤟꤣꤧ ꤠꤢꤧ꤭ꤣꤧ꤭ ꤢ꤬ ꤊ꤫ꤢꤦ꤬ ꤘꤢꤧꤟꤢꤧ꤭ꤔ꤫ꤤ꤬ ꤢꤪꤜ꤫ꤥ꤬ ꤘꤣ ꤗꤢꤪꤜꤢꤩ꤭ ꤕꤢ꤭ ꤚꤣꤧ꤬ ꤢ꤬ ꤊ꤫ꤢꤦ꤬ ꤥ꤬ꤜꤣꤙꤢ꤭ ꤡꤣꤧ ꤔꤢꤧ ꤢ꤬ ꤒꤢꤩ꤬ꤖꤚꤥ꤬ꤒꤢꤩ꤬ꤖꤚꤢꤧ꤬ ꤔꤢꤧ ꤢ꤬ ꤒꤢꤩ꤬ꤒꤣꤧ꤬ꤚꤣꤧ꤭ꤘꤢꤨ꤬ ꤒꤣꤧ꤬ꤚꤣꤧ꤭ꤓꤢꤨ꤭ ꤘꤣ ꤢ꤬ꤏꤝꤢ꤬ꤢ꤬ꤏꤢꤪ꤭ ꤣꤧ꤭ꤔꤣꤧ꤬ꤒꤣꤧ꤬ꤟꤢꤩ꤬ ꤕꤢ꤭꤯#ꤘꤢ꤬ꤔꤤ꤬ꤢꤩꤜꤢ꤬ ꤇:꤁꤃, ꤞꤣ꤬ꤋꤢ꤬ꤚꤣ꤬ꤛꤢ꤬ ꤁꤂:꤁꤀-꤁꤄, ꤒꤢꤩ꤬ꤘꤣꤧꤜꤥ꤭ꤓꤢꤧ꤬ ꤁:꤇ 31ꤢꤨ꤭ ꤊ꤫ꤢꤦ꤬ ꤥ ꤖꤚꤢ꤬ꤏꤝꤢ꤬ꤓꤢꤧ꤬ ꤊꤝꤢ꤬ ꤕꤢ꤭꤯ ꤚꤣꤧ꤬ ꤊꤣꤧ꤬ꤛꤢꤧ꤭ ꤘꤣ ꤙꤢꤧ꤬ꤡꤢꤩ꤬ ꤔꤝꤢꤓꤢꤧ꤬ ꤓꤥ꤭ꤟꤣꤧ ꤛꤢꤩ꤬ꤞꤤ꤭ ꤚꤣꤧ꤬ ꤢ꤬ ꤥ꤬ ꤜꤢ꤭ꤋꤢꤧ꤭ ꤘꤣ ꤟꤢꤩ꤬ꤋꤢꤨ꤬ ꤜꤝꤤ꤭ꤊꤛꤢ꤭ꤜꤝꤤ꤭ꤔ꤫ꤢ꤬, ꤡꤢꤓꤢꤧ꤬ ꤘꤣ ꤗꤢꤪꤘꤢ ꤊꤢꤧ꤭ꤏꤢ ꤒ꤫ꤥ꤬ꤘꤣ ꤗꤢꤪꤘꤢ ꤒꤣꤧ꤬ꤘꤢꤦ꤬ ꤕꤝꤢ꤭꤮ ꤒꤣ꤬ꤖꤚꤢꤩ꤬ꤔꤣꤧ꤬, ꤡꤢꤪꤗꤣꤧ꤬ꤚꤢꤧ꤬ ꤊ꤫ꤢꤦ꤬ ꤔꤢꤪ꤭ꤟꤢꤧ꤭ꤜꤢꤧ꤬ ꤒꤣꤧ꤬ꤔꤢꤩꤖꤢꤨ ꤒꤣꤧ꤬ꤟꤢꤩ꤬ ꤕꤢ꤭ ꤚꤣꤧ꤬ ꤢ꤬ ꤊ꤫ꤢꤦ꤬ ꤟꤢꤧ꤭ꤢꤩꤥ꤬ꤕꤜꤢꤪ ꤒ꤫ꤣ꤬ꤜꤢꤪ꤭ ꤛꤢꤩ꤬ꤞꤤ꤭ ꤜꤢꤪ꤭꤮ ꤕꤜꤤ꤭ ꤕꤢ꤭꤯
ꤖꤛꤢꤔ꤫ꤤ꤬ ꤒꤢꤩ꤬ꤤ꤬ꤞꤝꤢ ꤘꤣ ꤊꤣꤧ꤬ꤘꤝꤤꤗ꤫ꤢꤪ꤬ ꤢ꤬ ꤥ꤬
(ꤗꤢ꤬ꤊꤢꤨ ꤁꤃:꤂꤈-꤃꤁, ꤜꤢꤨꤊꤢ꤬ ꤂꤁:꤂꤉-꤃꤃)
32“ꤊꤢꤨꤔ꤫ꤢꤧ꤬ꤚꤣꤧ꤬ ꤖꤛꤢꤔ꤫ꤤ꤬ ꤜꤢ꤭ꤋꤢꤧ꤭ ꤒꤢꤩ꤬ꤤ꤬ꤞꤝꤢ ꤒꤣ꤬ꤡꤣ꤬ ꤘꤣ ꤊꤣꤧ꤬ꤘꤝꤤꤗ꤫ꤢꤪ꤬ ꤢ꤬ꤜꤥ꤬ ꤣꤧ꤭ꤔꤣꤧ꤬꤯ ꤢ꤬ ꤘꤢ꤭ ꤜꤢꤩ꤬ ꤘꤢꤧꤡ꤫ꤢꤩ꤬ ꤒꤣꤧ꤬ꤗ꤫ꤢ꤬ꤓꤢꤩ꤬ꤟꤣꤧ, ꤢ꤬ꤜꤢꤩ꤬ ꤙꤢꤩ꤬ꤟꤣꤧ ꤟꤢꤩꤚꤣꤧ꤬ ꤞꤤ꤭ ꤞꤤꤑꤢꤩ꤭ ꤔꤢꤧ ꤊ꤫ꤢꤩ꤬ꤊ꤫ꤢꤨ꤬ꤋꤢꤩ꤭ ꤖꤢꤦ꤬ꤟꤢꤧ꤭ ꤒꤥ꤬ꤟꤣꤧ꤯ 33ꤟꤢꤨꤔꤣꤧ꤬ꤟꤣꤧ ꤙꤣꤧ ꤞꤤ꤭ ꤗꤢꤧꤓ꤫ꤣꤧ꤬ꤟꤣꤧ ꤜꤢꤪ꤭ ꤒꤢꤩ꤬ꤣꤧ꤭ ꤒꤣꤧ꤬ꤟꤢꤩ꤬ ꤓꤝꤢ꤭ꤓꤢꤧ꤬ꤟꤣꤧ ꤢ꤬ꤋꤢꤩ꤭ꤕꤢ꤭ꤔꤣꤧ꤬, ꤞꤤꤑꤢꤩ꤭ ꤜꤢ꤭ꤋꤢꤧ꤭ ꤔꤢꤧ ꤖꤚꤢꤩ꤬ꤜꤢꤨ꤬ꤊꤣꤧ꤬ꤛꤢꤧ꤭ ꤢ꤬ꤖꤢꤨꤖꤚꤢꤩ꤬ꤋꤢꤨ꤭ ꤗ꤫ꤢ꤬ꤟꤣꤧ ꤠꤢꤧ꤭ꤣꤧ꤭ ꤢ꤬ ꤟꤢꤧ꤭ꤖꤢꤦ꤬ꤒ꤫ꤥ꤬ꤟꤣꤧ ꤘꤣ ꤊꤣꤧ꤬ꤘꤢ꤭ꤊꤢꤨ꤭ꤓꤢꤦ꤭ ꤟꤣꤧ ꤔꤤ꤮꤯ 34ꤠꤢꤧ꤭ ꤟꤢꤩꤜꤥ꤭ ꤡꤢꤪꤡꤢꤪ꤮ ꤕ꤫ꤢꤩ꤬ ꤡꤣꤧ ꤞꤤ꤭, ꤜꤢꤪ꤭ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤥ꤬ꤞꤣꤧ꤭ꤖꤚꤢꤩ꤬ ꤊꤢꤨꤔ꤫ꤢꤧ꤬ꤣꤧ꤭ꤒꤣ꤬ꤓꤢꤦ꤭ ꤒꤣꤧ꤬ꤟꤢꤩ꤬ ꤞꤣꤧ꤭ꤜꤢꤪ꤭ ꤒꤢꤧ꤬ꤜꤢ꤭ꤟꤤꤒꤥ꤬ ꤔꤣꤧ꤬, ꤒꤢꤩ꤬ꤣꤧ꤭ꤒꤣꤧ꤬ꤟꤢꤩ꤬ ꤊ꤫ꤢꤦ꤬ ꤓꤝꤢ꤭ꤓꤢꤧ꤬ ꤜꤢꤪ꤭ ꤕꤢ꤭꤯#24:34 ꤖꤚꤢꤩ꤬ꤞꤤꤖꤢꤩꤖꤢꤨ ꤘꤣ ꤢ꤬ ꤞꤤꤑꤢꤩ꤭ ꤜꤤ꤬ꤓꤢꤩ꤭ꤞꤢꤪ꤬ꤖꤢ ꤒꤣꤧ꤬ꤟꤢꤩ꤬ꤟꤢꤩ꤬ ꤔꤣꤧ꤬, ꤢ꤬ ꤛ꤫ꤢꤦ꤬ꤢꤩ꤬ ꤔꤢꤧ ꤛꤢꤩ꤬ꤏꤛꤢꤨ ꤟꤢꤩ ꤖꤢꤧ ꤠꤤ꤭ꤛꤢ꤬ꤚꤢꤨꤏꤛꤢ꤬ꤜꤢꤩ꤬ ꤊ꤫ꤢꤦ꤬ ꤕꤛꤢꤊꤢꤧ꤭ ꤕꤢ꤭ ꤖꤢꤧ꤯ ꤢ꤬ ꤟꤢꤩ ꤔꤢꤧ ꤟꤢꤩ꤬ꤋꤢꤨ꤬ ꤒꤣꤧ꤬ꤘꤢꤦ꤬ ꤕꤢ꤭ ꤢ꤬ꤚꤤ꤬ꤢ꤬ꤊꤢꤧ꤭ ꤔꤣꤧ꤬ ꤗ꤫ꤢ꤬ꤒꤥ꤬꤯ 35ꤗꤢꤪꤋꤢꤨ꤬ ꤔꤢꤧ ꤟꤢꤩ꤬ꤋꤢꤨ꤬ ꤊ꤫ꤢꤦ꤬ ꤥ꤬ꤗ꤫ꤢꤩ꤬ꤊꤢꤧ꤭ ꤕꤢ꤭ ꤒꤣꤧ꤬ꤘꤢꤦꤚꤣꤧ꤬ ꤠꤢꤧ꤭ꤜꤢ꤭ꤠꤢꤧ꤭ꤍ꤫ꤥ꤬ ꤣꤧ꤭ꤒꤣꤧ꤬ꤟꤢꤩ꤬ꤔꤣꤧ꤬ ꤢ꤬ ꤥ꤬ꤗ꤫ꤢꤩ꤬ꤊꤢꤧ꤭ ꤕ꤫ꤢꤩ꤬ ꤒꤣꤧ꤬ꤋꤢꤧ꤮ ꤒꤥ꤬꤯
ꤗ꤫ꤢꤪ꤬ꤔꤣꤧ꤭ꤗ꤫ꤢꤪ꤬ꤞꤢꤩ꤭ ꤣꤧ꤭ꤔꤣꤧ꤬ ꤢꤨ꤭ ꤞꤤꤑꤢꤩ꤭ ꤒꤣ꤬ꤖꤚꤢꤩ꤬꤮ ꤒꤥ꤬
(ꤗꤢ꤬ꤊꤢꤨ ꤁꤃:꤃꤂-꤃꤇, ꤜꤢꤨꤊꤢ꤬ ꤁꤇:꤂꤆-꤃꤀, ꤁꤇:꤃꤄-꤃꤆)
36“ꤗꤢ꤬ꤔꤢꤧꤚꤣꤧ꤬ ꤒꤢꤩ꤬ꤣꤧ꤭ꤒꤣꤧ꤬ꤟꤢꤩ꤬ ꤊ꤫ꤢꤦ꤬ ꤓꤝꤢ꤭ꤓꤢꤧ꤬ ꤗ꤫ꤢꤪ꤬ꤔꤣꤧ꤭ꤗ꤫ꤢꤪ꤬ꤞꤢꤩ꤭, ꤢ꤬ꤏꤣꤧꤢ꤬ꤋꤢꤩ꤭ ꤙꤢꤪꤋꤢꤩ꤭ꤒꤢꤩ꤭ ꤕꤢ꤭ꤔꤣꤧ꤬ ꤢꤨ꤭ ꤞꤤꤑꤢꤩ꤭ ꤒꤣ꤬ꤖꤚꤢꤩ꤬꤮ ꤒꤥ꤬꤯ ꤒꤣꤧ꤬ꤔꤢꤩꤖꤢꤨ ꤥ꤬ ꤘꤣ ꤗꤢꤪꤋꤢꤨ꤬ ꤔꤣꤧ꤬ꤒꤣꤧ꤬ꤟꤢꤩ꤬ ꤡꤣꤧ ꤙꤢꤩ꤬ꤙꤢꤩ꤬ ꤢ꤬ ꤞꤤꤑꤢꤩ꤭ ꤒꤥ꤬꤯ ꤢ꤬ꤖꤢꤨꤖꤚꤢꤩ꤬ꤋꤢꤨ꤭ ꤔꤢꤧ ꤢ꤬ꤔ꤫ꤢꤩ꤬ ꤣꤧ꤭ꤒꤣ꤬ꤖꤚꤢꤩ꤬ ꤡꤣꤧ꤮ ꤙꤢꤩ꤬ꤙꤢꤩ꤬, ꤢ꤬ ꤞꤤꤑꤢꤩ꤭ ꤒꤥ꤬ꤒꤥ꤬꤯ ꤢ꤬ ꤞꤤꤑꤢꤩ꤭ ꤖꤢꤧꤒꤢꤦ ꤠꤢꤧ꤭ꤖꤢꤩ꤭ ꤒꤣ꤬ꤖꤚꤢꤩ꤬ꤒꤥ꤬ ꤖꤢꤧ꤯ 37ꤟꤢꤨ ꤢ꤬ ꤓꤝꤢ꤭ꤓꤢꤧ꤬ ꤘꤣ ꤖꤢꤩ꤭ꤔꤥꤢ꤬ ꤓꤢꤦ꤭ꤋꤢꤩ꤭ꤔꤣꤧ꤬, ꤖꤚꤢꤩ꤬ꤜꤢꤨ꤬ꤊꤣꤧ꤬ꤛꤢꤧ꤭ ꤢ꤬ꤖꤢꤨꤖꤚꤢꤩ꤬ꤋꤢꤨ꤭ ꤗ꤫ꤢ꤬ꤟꤣꤧ ꤠꤢꤧ꤭ꤣꤧ꤭ ꤊ꤫ꤢꤦ꤬ ꤟꤢꤧ꤭ꤕꤢ꤭ ꤢ꤬ꤋꤢꤩ꤭ꤔꤣꤧ꤬, ꤢ꤬ ꤊ꤫ꤢꤦ꤬ ꤓꤝꤢ꤭ꤓꤢꤧ꤬ ꤞꤢꤧꤊꤣꤧ꤭ꤘꤢꤦ꤬ ꤟꤢꤨꤔꤣꤧ꤬ ꤕꤢ꤭꤯ 38ꤗꤢꤩ꤬ꤒꤢꤩ꤭ꤟꤢꤩꤚꤣꤧ꤬ ꤙꤣꤧ ꤓꤣꤧ꤭ꤘꤢꤨ꤬ꤙꤤ ꤒꤢꤧ꤬ꤜꤢ꤭ꤟꤤꤒꤥ꤬ ꤢ꤬ꤋꤢꤩ꤭ꤔꤣꤧ꤬, ꤢꤨ꤭ꤢꤩ꤬ꤢꤨ꤭ꤥ꤭, ꤊꤢ꤬ꤏꤥ꤭ꤘꤢꤧ꤬ꤏꤥ꤭ꤗꤢꤩ꤭ ꤒ꤫ꤥ꤬ ꤡꤣꤧ ꤙꤣꤧ ꤖꤢꤩ꤭ꤔꤥꤢ꤬ ꤔꤥ꤭ ꤘꤣ ꤞꤢꤪ꤬ꤊꤜꤣꤧ꤭ꤘꤢꤨ꤬ꤊꤢꤨ꤭ ꤔꤣꤧ꤬ꤒꤣ꤬ꤔꤣꤧ꤭ ꤡꤣꤧ꤯#ꤟꤢꤩ꤬ꤋꤢꤨ꤬ꤓꤝꤢ꤭ꤜꤢꤨ ꤆:꤅-꤈ 39ꤒꤢꤩ꤬ ꤊ꤫ꤢꤦ꤬ꤚꤢꤩ꤭ ꤓꤝꤢ꤭ꤓꤢꤧ꤬ ꤟꤢꤨꤣꤧ꤭ ꤕꤢ꤭ꤔꤣꤧ꤬, ꤒ꤫ꤥ꤬ ꤡꤣꤧ ꤙꤣꤧ ꤓꤣꤧ꤭ꤟꤢꤧ꤭ ꤘꤢꤨ꤬ꤙꤤ ꤞꤣꤧ꤭ꤊꤢꤧ꤭ ꤜꤢꤪ꤭ ꤡꤣꤧꤟꤣꤧ ꤛꤢꤩ꤬ꤞꤤ꤭ ꤢ꤬ꤋꤢꤩ꤭ ꤡꤣꤧ ꤔꤣꤧ꤬꤮, ꤢ꤬ ꤞꤤꤑꤢꤩ꤭ꤜꤢ꤭ꤟꤤ ꤜꤢ꤭ꤋꤢꤧ꤭ ꤒꤣ꤬ꤡꤣ꤬꤮ ꤒꤥ꤬꤯ ꤏꤢ꤮ ꤖꤚꤢꤩ꤬ꤜꤢꤨ꤬ꤊꤣꤧ꤬ꤛꤢꤧ꤭ ꤢ꤬ꤖꤢꤨꤖꤚꤢꤩ꤬ꤋꤢꤨ꤭ ꤗ꤫ꤢ꤬ꤟꤣꤧ ꤠꤢꤧ꤭ꤣꤧ꤭ ꤊ꤫ꤢꤦ꤬ꤚꤢꤩ꤭ ꤟꤢꤧ꤭ꤟꤣꤧ ꤕꤢ꤭ ꤢ꤬ꤋꤢꤩ꤭ꤔꤣꤧ꤬, ꤢ꤬ ꤊ꤫ꤢꤦ꤬ ꤓꤝꤢ꤭ꤓꤢꤧ꤬ ꤞꤢꤧꤊꤣꤧ꤭ꤘꤢꤦ꤬ ꤟꤢꤨꤣꤧ꤭ꤔꤣꤧ꤬ ꤕꤢ꤭꤯#ꤟꤢꤩ꤬ꤋꤢꤨ꤬ꤓꤝꤢ꤭ꤜꤢꤨ ꤇:꤆-꤂꤄ 40ꤙꤣꤧꤔꤣꤧ꤬ꤋꤢꤩ꤭ꤕꤢ꤭, ꤖꤚꤢꤩ꤬ꤋꤢꤨ꤭ ꤞꤤꤔꤣꤧ꤭ ꤘꤣ ꤢ꤬ ꤚꤢꤧ꤬ ꤚ꤫ꤥ꤬ꤜꤢꤨ꤭ ꤒꤢꤩ꤬ ꤘꤣ ꤜ꤫ꤢꤧ꤬ꤋꤢꤨ꤬ ꤔꤣꤧ꤬, ꤒꤣ꤬ꤖꤚꤢꤩ꤬ ꤚꤣꤧ꤬ ꤢꤨ꤭ ꤊ꤫ꤢꤦ꤬ ꤢꤩꤊꤢ꤬ꤊꤢꤧ꤭ ꤜꤢꤨ꤭ ꤕꤢ꤭, ꤒꤣ꤬ꤖꤚꤢꤩ꤬ ꤚꤣꤧ꤬ ꤢ꤬ ꤊ꤫ꤢꤦ꤬ ꤥ꤬ꤊꤢꤧ꤭ ꤕꤢ꤭꤯ 41ꤖꤚꤢꤩ꤬ꤗꤢꤪ꤬ ꤤ꤬ꤏꤢꤒꤢꤦ꤭ꤏꤢꤦ꤬ ꤜꤢꤨ꤭ ꤙꤥꤊꤢꤨ꤬ꤜꤢ꤭ ꤞꤤꤔꤣꤧ꤭ꤔꤣꤧ꤬, ꤡꤢꤪꤗꤣꤧ꤬ꤚꤢꤧ꤬ ꤊ꤫ꤢꤦ꤬ ꤢꤩꤊꤢ꤬ꤊꤢꤧ꤭ ꤢ꤬ ꤒꤣ꤬ꤖꤚꤢꤩ꤬ ꤕꤢ꤭꤯ ꤒꤣ꤬ꤖꤚꤢꤩ꤬ꤚꤣꤧ꤬ ꤢ꤬ ꤊ꤫ꤢꤦ꤬ ꤘꤢꤧ꤬ꤥ꤬ꤊꤢꤧ꤭ ꤜꤢꤨ꤭ ꤕꤢ꤭꤯
42“ꤗꤢꤩ꤬ꤟꤢꤨꤔꤣꤧ꤬ꤚꤣꤧ꤬ ꤥ꤬ꤞꤢ꤬ꤞꤢꤩ꤭ ꤜꤢ꤭ꤋꤢꤧ꤭, ꤗꤢꤩ꤬ꤒꤢꤩ꤭ꤟꤢꤩꤚꤣꤧ꤬ ꤞꤤ꤭ꤙꤢꤧ꤬ꤡꤢꤩ꤬ ꤊ꤫ꤢꤦ꤬ ꤟꤢꤧ꤭ ꤙꤣꤧꤒꤢꤩ꤭ ꤒꤣ꤬ꤔꤣꤧ꤭ ꤕꤢ꤭ ꤔꤣꤧ꤬ ꤞꤤ꤭ ꤞꤤꤑꤢꤩ꤭ ꤒꤥ꤬꤯ 43ꤗꤢ꤬ꤔꤢꤧꤚꤣꤧ꤬ ꤞꤤꤔ꤫ꤢꤩ꤬ ꤜꤢ꤭ꤋꤢꤧ꤭ ꤔꤢꤧ, ꤟꤤ꤬ꤙꤢꤧ꤬ꤡꤢꤩ꤬ ꤊꤢꤩ꤬ ꤞꤤꤑꤢꤩ꤭ ꤔꤢꤧ ꤖꤚꤢꤩ꤬ꤢꤩ꤬ꤟꤥ꤬ ꤊ꤫ꤢꤦ꤬ꤚꤢꤩ꤭ ꤟꤢꤧ꤭ ꤙꤣꤧꤒꤢꤩ꤭ ꤒꤣ꤬ꤞꤢꤩ꤭ꤒꤢꤩ꤭ ꤕꤢ꤭ ꤟꤢꤩꤔꤣꤧ꤬, ꤢ꤬ ꤊ꤫ꤢꤦ꤬ ꤥ꤬ꤕ꤫ꤢꤪ꤬ꤏꤢꤦ꤬ ꤕꤢ꤭ ꤚꤣꤧ꤬ ꤖꤚꤢꤩ꤬ꤢꤩ꤬ꤟꤥ꤬ ꤟꤢꤧ꤭ꤔꤥ꤭ ꤢꤩ꤬ꤟꤥ꤬ꤡ꤫ꤢꤧ꤬ꤒꤥ꤬꤯#ꤜꤢꤨꤊꤢ꤬ ꤁꤂:꤃꤉-꤄꤀ 44ꤟꤢꤨꤔꤣꤧ꤬ ꤢ꤬ꤋꤝꤢ꤬ꤢ꤬ꤋꤛꤢ꤭, ꤞꤤ꤭ ꤣꤧ꤭ꤒꤣꤧ꤬ꤟꤢꤩ꤬ꤔꤣꤧ꤬ ꤙꤢꤩ꤬ꤙꤢꤩ꤬, ꤥ꤬ꤒꤣꤧ꤬ꤚꤤ꤬ꤒꤣꤧ꤬ꤚꤢꤧ꤭ ꤥ꤬ꤔꤢꤩ꤬ ꤊꤣꤧ꤭ ꤜꤢ꤭ꤋꤢꤧ꤭ ꤞꤤ꤭ꤔ꤫ꤢꤩ꤬ ꤔꤤ꤮, ꤗꤢꤩ꤬ꤒꤢꤩ꤭ꤟꤢꤩꤚꤣꤧ꤬ ꤏꤣꤧꤋꤢꤩ꤭ ꤙꤣꤧ ꤞꤤ꤭ ꤒꤣꤧ꤬ꤔꤢꤩ꤬ꤒ꤫ꤥ꤬ ꤒꤥ꤬ ꤕꤢ꤭ꤔꤣꤧ꤬, ꤖꤚꤢꤩ꤬ꤜꤢꤨ꤬ꤊꤣꤧ꤬ꤛꤢꤧ꤭ ꤢ꤬ꤖꤢꤨꤖꤚꤢꤩ꤬ꤋꤢꤨ꤭ ꤗ꤫ꤢ꤬ꤟꤣꤧ ꤠꤢꤧ꤭ꤣꤧ꤭ ꤊ꤫ꤢꤦ꤬ ꤟꤢꤧ꤭ ꤕꤢ꤭꤯
ꤖꤚꤢꤩ꤬ꤗꤢꤩ꤬ꤒꤢꤩ꤬ꤖꤢꤨ ꤘꤣ ꤢ꤬ꤡꤢꤪ ꤔꤢꤧ ꤢ꤬ꤍ꤫ꤥ꤬ ꤔꤢꤧ ꤖꤚꤢꤩ꤬ꤗꤢꤩ꤬ꤒꤢꤩ꤬ꤖꤢꤨ ꤘꤣ ꤢ꤬ꤡꤢꤪ ꤔꤢꤧ ꤢ꤬ꤍ꤫ꤥ꤬ ꤒꤥ꤬
(ꤜꤢꤨꤊꤢ꤬ ꤁꤂:꤃꤅-꤄꤈)
45“ꤖꤚꤢꤩ꤬ꤗꤢꤩ꤬ꤒꤢꤩ꤬ꤖꤢꤨ ꤘꤣ ꤢ꤬ꤡꤢꤪ ꤚꤣꤧ꤬ ꤢ꤬ ꤕꤜꤥ꤭ꤖꤢꤩ ꤒꤣ꤬ꤖꤚꤢꤩ꤬ꤗꤢ꤬ ꤢꤨ꤭ꤕꤢꤩ꤭? ꤖꤚꤢꤩ꤬ꤗꤢꤩ꤬ꤒꤢꤩ꤬ꤖꤢꤨ ꤘꤣ ꤢ꤬ꤡꤢꤪ ꤒꤣ꤬ꤖꤚꤢꤩ꤬ ꤗꤢ꤬ꤗ꤫ꤢ꤬ꤟꤣꤧ ꤢ꤬ꤙꤢꤧ꤬ꤡꤢꤩ꤬ ꤘꤣꤧꤒꤢ꤭ ꤜꤢꤨ꤭ ꤒꤢꤩ꤬ꤗꤢꤩ꤬ ꤘꤣ ꤢ꤬ ꤙꤢꤩ꤬ ꤗꤢꤧꤡꤢꤧ꤬ ꤙꤥ꤬ꤢꤩ꤬ꤙꤥ꤬ꤥ꤭ꤚꤣꤧ ꤖꤚꤢꤩ꤬ꤗꤢꤩ꤬ꤒꤢꤩ꤬ꤖꤢꤨ ꤘꤣ ꤢ꤬ꤚꤥ꤬ ꤒꤣꤧ꤬ꤟꤢꤩ꤬ ꤘꤣ ꤜꤢꤨ꤭ ꤊꤢꤨꤛꤢ꤭ꤊꤢꤨ꤭ ꤚꤣꤧ꤬ ꤢ꤬ ꤙꤥ꤬ꤢꤩ꤬ ꤒꤥ꤭ꤏꤣꤧꤒꤥ꤭ꤋꤢꤩ꤭ ꤛꤢꤩ꤬ꤞꤤ꤭ ꤣꤧ꤭ꤒꤣ꤬ꤖꤚꤢꤩ꤬ꤔꤣꤧ꤬ ꤟꤣꤧ꤯ 46ꤢ꤬ꤙꤢꤧ꤬ꤡꤢꤩ꤬ ꤊꤢꤩ꤬ ꤊꤢ꤬ꤗꤢꤧꤓ꤫ꤣꤧ꤬ ꤔꤢꤧ ꤢ꤬ꤖꤚꤢꤩ꤬ꤗꤢꤩ꤬ꤒꤢꤩ꤬ꤖꤢꤨ ꤣꤧ꤭ꤒꤣ꤬ꤖꤚꤢꤩ꤬ ꤗꤢꤩ꤬ ꤒꤢꤩ꤬ꤗꤢꤩ꤬ ꤊꤢꤩ꤬ꤟꤢꤩꤚꤣꤧ꤬ ꤢ꤬ ꤊ꤫ꤢꤦ꤬ ꤘꤣꤧ ꤜꤢꤨ꤭ ꤒꤢꤩ꤬ꤗꤢꤩ꤬ꤔ꤫ꤤ꤬ꤋꤝꤢꤊꤢꤩ꤬ ꤕꤢ꤭꤯ 47ꤠꤢꤧ꤭ ꤟꤢꤩꤡꤢꤪꤡꤢꤪ꤮ ꤡꤣꤧ ꤞꤤ꤭, ꤙꤢꤧ꤬ꤡꤢꤩ꤬ ꤣꤧ꤭ꤒꤣ꤬ꤖꤚꤢꤩ꤬ ꤢ꤬ ꤒꤢ꤭ꤗ꤫ꤥ꤬ꤒꤢ꤭ꤒꤢꤩ꤬ ꤜꤢꤪ꤭꤮ ꤕꤜꤤ꤭ꤔꤣꤧ꤬ ꤢ꤬ ꤊ꤫ꤢꤦ꤬ ꤘꤣꤧꤒꤢ꤭ꤜꤢꤪ꤭ ꤘꤣ ꤜꤢꤨ꤭ ꤊꤣꤧ꤬ꤘꤢ꤭ꤊꤢꤨ꤭ ꤕꤢ꤭ ꤚꤣꤧ꤬ ꤢ꤬ ꤊ꤫ꤢꤦ꤬ ꤔꤢꤪ꤭ꤗꤢꤧꤔꤢꤪ꤭ꤡꤢꤧ꤬ ꤚꤣꤧ ꤔꤢꤧ ꤜꤢꤨ꤭ ꤕꤢ꤭꤯ 48ꤗꤢ꤬ꤔꤢꤧꤚꤣꤧ꤬ ꤟꤢꤩꤊꤥꤚꤣꤧ ꤖꤚꤢꤩ꤬ꤗꤢꤩ꤬ꤒꤢꤩ꤬ꤖꤢꤨ ꤘꤣ ꤢ꤬ꤗꤢꤨꤗ꤫ꤢꤧ꤬ ꤒꤣ꤬ꤖꤚꤢꤩ꤬ꤔꤣꤧ꤬, ꤢ꤬ ꤊꤢꤩ꤬ ꤒꤣꤧ꤬ꤔꤢꤩ꤬ ꤔꤢꤧ, ‘ꤠꤢꤧ꤭ꤙꤢꤧ꤬ꤡꤢꤩ꤬ ꤊꤢ꤬ꤋꤛꤢ꤭ ꤜ꤫ꤢꤩ꤬ꤖꤚꤢꤧ꤭ ꤔꤢꤧ ꤜꤢ꤭ꤟꤤꤒꤥ꤬,’ ꤢ꤬ ꤒꤣꤧ꤬ꤔꤢꤩ꤬ ꤚꤣꤧ꤬, 49ꤢ꤬ ꤊ꤫ꤢꤦ꤬ꤗꤢꤦ꤭ꤊ꤫ꤢꤦ꤬ꤕꤢꤪ꤬, ꤕ꤫ꤢꤩ꤬ꤢꤩ꤬ꤕ꤫ꤢꤩ꤬ꤥ꤭ ꤖꤚꤢꤩ꤬ꤗꤢꤩ꤬ꤒꤢꤩ꤬ꤖꤢꤨ ꤘꤣ ꤢ꤬ꤚꤥ꤬ ꤒꤣꤧ꤬ꤟꤢꤩ꤬ ꤕꤢ꤭, ꤚꤣꤧ꤬ ꤢ꤬ ꤊ꤫ꤢꤦ꤬ ꤢꤩ꤬ꤗꤢꤦ꤬ꤥ꤭ꤖꤚꤢꤧ ꤒ꤫ꤣ꤬ꤔꤢꤧ ꤊꤣꤧ꤬ꤛꤢꤧ꤭ ꤜ꤫ꤢꤩ꤬ꤊꤜꤥ꤭ ꤢꤩ꤬ꤗꤢꤦ꤬ꤥ꤭ꤗꤢꤦ꤬ ꤒꤣꤧ꤬ꤟꤢꤩ꤬ ꤕꤢ꤭꤯ 50ꤚꤣꤧ꤬ ꤏꤣꤧꤋꤢꤩ꤭ ꤙꤣꤧ ꤢ꤬ ꤒꤣꤧ꤬ꤔꤢꤩ꤬ ꤒ꤫ꤥ꤬ꤒꤥ꤬ ꤚꤣꤧ꤬ ꤢ꤬ ꤢꤩ꤬ꤥ꤭ꤒꤣꤧ꤬ꤕꤢ꤬ ꤒꤣ꤬ꤔꤣꤧ꤭ꤔꤣꤧ꤬, ꤢ꤬ꤙꤢꤧ꤬ꤡꤢꤩ꤬ ꤊ꤫ꤢꤦ꤬ ꤊꤢ꤬ꤋꤛꤢ꤭ꤒꤥ꤭ ꤙꤣꤧꤔꤣꤧ꤬ ꤒꤣ꤬ꤔꤣꤧ꤭ ꤕꤢ꤭꤯ 51ꤢ꤬ꤙꤢꤧ꤬ꤡꤢꤩ꤬ ꤊ꤫ꤢꤦ꤬ ꤘꤣꤧꤡꤢ꤭ꤡꤢ꤭ ꤘꤣꤧꤡꤢ꤭ꤡꤢꤦ꤬ ꤜꤢꤨ꤭ ꤕꤢ꤭ ꤚꤣꤧ꤬ ꤢ꤬ ꤊ꤫ꤢꤦ꤬ ꤘꤢꤧ꤬ꤔꤥ꤭ ꤒ꤫ꤣ꤬ꤊꤢꤧ꤭ ꤜꤢꤨ꤭ ꤔꤢꤧ ꤙꤣꤧ ꤊꤣꤧ꤬ꤛꤢꤧ꤭ ꤢꤧꤡꤢꤪꤢꤧꤒꤢꤩ꤬ ꤢ꤬ꤔ꤫ꤢꤩ꤬ ꤔꤣꤧ꤬ꤒꤣꤧ꤬ꤟꤢꤩ꤬ ꤜ꤫ꤢꤩ꤬ꤥ꤬ ꤔꤣꤧ꤬ ꤕꤢ꤭꤯ ꤜ꤫ꤢꤩ꤬ꤥ꤬ ꤙꤣꤧꤔꤣꤧ꤬ ꤒꤣ꤬ꤖꤥ꤬ꤔꤣꤧ꤬ ꤢꤨ꤭ ꤊ꤫ꤢꤦ꤬ꤍ꤫ꤥ꤬ꤊ꤫ꤢꤦ꤬ꤟꤢꤩ꤬, ꤢꤨ꤭ ꤊ꤫ꤢꤦ꤬ ꤢ꤫ꤢ꤬ ꤒꤣꤧ꤬ꤡꤤ꤭ꤒꤣꤧ꤬ꤡꤢ ꤡꤣꤧ ꤢꤨ꤭ꤊꤢꤨ꤬ꤋꤣꤧ꤭ ꤡꤣꤧ ꤕꤢ꤭꤯
Právě zvoleno:
ꤗꤢꤞꤢꤧ 24: eky-Kali-MM
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
Wycliffe USA
