Luka 22
22
Ko nā Taupulepulega ke Tāmate ia Iehu
(Mat 26.1-5; Mlk 14.1-2; Ioa 11.45-53)
1Kua tāli pa ki nā aho o te Fakamanatuga o te Falaoa Hē Fakafefetea, tēia e takua ko te Pāheka. #Eho 12.1-27 2Ko nā ohitāulaga pule ma nā faiākoga o te Tūlāfono nae mātataku i tagata, ko te mea ia nae hākilikili ai e kilātou he auala ke tāmate munimuni ai ia Iehu.
Kua Malie ia Iuta ke Fakalata e Ia ia Iehu
(Mat 26.14-16; Mlk 14.10-11)
3Oi na ulufia ai e Hatani te loto o Iuta te Ihikaliota, he tino o te kau hoko e toka hefulu lua. 4Ma na fano ai ia Iuta oi lea ki nā ohitāulaga pule fakatahi ma nā takitaki o nā leoleo o te Mālumalu, e ia mafaia oi fakalata ia Iehu. 5Na fiafia lele nā ohitāulaga pule, oi na tonu ai ke totogi e kilātou ia Iuta i ni tupe. 6Na malie ki ei ia Iuta, ma na kāmata ai loa oi tautuku e ia he avanoa ke ia tukulima atua ai ia Iehu kia te kilātou, kae hē iloa e tagata.
Kua Hāuni ia Iehu mo te Kaiga Fakamanatu o te Pāheka
(Mat 26.17-25; Mlk 14.12-21; Ioa 13.21-30)
7Kua pa ki te aho e tāmate ai nā punuāmāmoe mo te Pāheka, ka koi fakaauau lava te Kaiga Fakamanatu o te Falaoa Hē Fakafefetea. 8Oi na uga ai e Iehu ia Petelu ma Ioane ma te fakatonuga tēnei, “Olo oi tapena te kaiga o te Pāheka ke kakai ai kitātou.”
9Na lea vē mai kilāua, “Ko fea te fofou koe ke hāuni ai e kimāua te kaiga?”
10Na tali atu ia Iehu, “Kāfai koulua e olo ki te kakai, ka fetaui koulua ma he tamāloa e amoa he hiā vai. Olo oi mulimuli ki ei ke pa ki loto o te fale e fano ki ei, 11oi lea ai ki te tino e o ia te fale, ‘Ko te Faiākoga e lea atu kia te koe, Tēfea te potu ka kakai ai au ma oku hoko i te kaiga o te Pāheka?’ 12Ka fakahino atu e ia kia te koulua he potu lahi i te falealuga, kua iei nā meāfale, ma tapena ai e koulua i kinā nā mea uma.”
13Oi na olo ai kilāua, ma na ki lā maua atu nā mea uma lele e vē lava ona lea ake ai ia Iehu; ma na hāuni ai loa e kilāua te kaiga o te Pāheka.
Ko te Kaiga a te Aliki
(Mat 26.26-30; Mlk 14.22-26; 1 Kol 11.23-25)
14Kua pa ki te taimi o te kaiga, oi na nofo ai ki lalo ia Iehu i te laulau fakatahi ma te kau apohitolo. 15Na vāgana atu ia Iehu kia te kilātou, “Ko au kua fofou lahi lele ke kakai fakatahi kitātou i te kaiga tēnei o te Pāheka, ka ko hēki pa mai oku puapuagā! 16Auā e lea atu au kia te koutou, ka hē toe kai lele au ki ei, ke pa ki tona fakatinoga kātoatoa i te Mālō o te Atua.”
17Oi na tago ai ia Iehu ki he ipu, kua fakafetai ki te Atua, ma na vāgana vē atu ai, “Kavatu te ipu tēnei oi feinu uma koutou ki ei. 18E lea atu au kia te koutou, e kāmata atu i te aho nei, ko au ka hē toe inu lele ki te uaina tēnei, ke pa mai te Mālō o te Atua.”
19Oi na tago ai ki he falaoa, kua fakafetai ki te Atua, ma na tavaevae ai ma fōki kia te kilātou, ma na lea vē atu ai, “Ko toku tino tēnei, kua fōki atu mo koutou. Fai te mea tēnei ma fakamanatuga kia te au.” 20Na vēnā foki oi tuku atu e ia te ipu i te umaga o te kakai, ma na vāgana atu ai, “Ko te ipu tēnei o te feagaiga fōu a te Atua, kua fakamau fakailoga i toku toto e fakamaligi mo koutou.#22.20 Ko iētahi tuhituhiga e hē i loto ai nā kupu a Iehu i tua mai o te Ko toku tino tēnei i te fuaikupu 19, ma te fuaikupu 20 kātoa #Iel 31.31-34
21“Kae, kikila! Ko te tino ka ia fakalatagia au, e i kinei i te laulau fakatahi ma au! #Hal 41.9 22Auā ko te Ataliki o te Tagata ka oti lava e vē ona finagalo ki ei te Atua, kae heāloa la te tino e fakalata e ia!”
23Ma na kāmata ai oi fakataufai kilātou, pe ko ai to kilātou ka ia faia te mea tēnei.
Ko te Fīnauga pe ko Ai te Hili te Tāua
24Na fai te fīnauga a te kau hoko, pe ko ai o kilātou e hili ona tāua. #Mat 18.1; Mlk 9.34; Luk 9.46 25Oi na lea atu ai ia Iehu kia te kilātou, “Ko tupu o tagata nukukehe, e kātoatoa te lātou pule ki o lātou tagata uma, ma ko o lātou takitaki, e fofou ke iloa kilātou ‘Ni uō a Tagata.’ #Mat 20.25-27; Mlk 10.42-44 26Kae ko koutou e hē vēnā; ko te tino o koutou e hili atu te maualuga o tona tūlaga, e tatau ke kavea ia ke vē ko te tino e hili atu te maulalo o tona tūlaga, ma ko te takitaki e tatau ke vē ko te kaukauna. #Mat 23.11; Mlk 9.35 27Ko ai te hili, ko te tino e nofo ki lalo oi kai, pe ko te tino e tautua ki ei? E hē ko te tino nei e nofo ki lalo oi kai? Kae i taku māfutaga ma koutou, ko au ko he tino e tautua. #Ioa 13.12-15
28“I taimi uma e maua ai au i tofotofoga, ko koutou e tutū fakatahi lava ma au, 29ma e vē ona tuku mai e toku Tamana kia te au te avanoa ke pule ai, ka vēnā foki oi tuku atu e au kia te koutou te avanoa tēnā, 30kae ke mafai ai koutou ke kakai ma inu fakatahi ma au i toku Mālō, ma nonofo i luga o nā nofoāliki, ke pūlea ai e koutou nā puikāiga e hefulu lua o Ihalaelu. #Mat 19.28
Kua Vavalo e Iehu te Fakafiti a Petelu
(Mat 26.31-35; Mlk 14.27-31; Ioa 13.36-38)
31“Himona, Himona! Kikila, kua ia Hatani te fakatagaga mai te Atua ke ia tofotofoa ai koutou uma, ma tuku kehekehe nā tino lelei mai nā tino kino, e vē ona tuku kehekehe e te faifātoaga te haito ma te atigi haito. 32Kae ko au kua tatalo mō koe Himona, ke nahe uma tō fakatuatua; ma kāfai e toe liliu mai koe kia te au, ke mafai ke fakamākeke koe ki nā uho o koe.”
33Na tali atu ia Petelu, “Te Aliki, ko au kua hāuni ke olo ma koe ki te falepuipui, ma ke oti fakatahi ma koe!”
34Ma na lea vē mai ia Iehu, “E takutino atu e au kia te koe Petelu, ka hē vivini lele ia moa i te pō nei, heiloga koe kua fakafiti fakatolu, e hē kē iloa au.”
Taga tupe, Ato malaga, ma he Pelu
35Oi na fehili atu ia Iehu ki ona hoko, “I te kō uga atuga o koutou e aunoa ma he taga tupe, he ato malaga pe ni hēvae, na iei nei he mea na fofou koutou ki ei kae e hēki koutou maua?” #Mat 10.9-10; Mlk 6.8-9; Luk 9.3; 10.4
Na tali mai kilātou, “E hēki iei lele he mea e fokotahi.”
36Oi na lea atu ai ia Iehu, “Ka ko te taimi nei la, ko te tino e iei hana taga tupe pe he ato malaga, oi kave; ma ko te tino e hēai hana pelu,#22.36 taga tupe… ato malaga… pelu Ko nā mea iēnei, e kave e he tino i he faigāmalaga e ono tutupu ai ni fakafītāuli. Ko Iehu e lea ki ona hoko, ke hāuni mo ho he mea e ono tutupu. E fōliga e mālamalama kilātou i te uiga o te tala a Iehu (kikila ki te 22.49-51) e tatau ke fakatau atu tona kofutatao ke maua mai ai he tupe ke fakatau ai hana pelu. 37Auā e lea atu au kia te koutou, ko te tuhituhiga paia e lea mai, ‘Na faitau fakatahi ia ma tagata holi tūlāfono,’ e tatau ke taunuku kia te au, auā ko te mea tēnei na tūhia e uiga kia te au, e taunuku lava.” #Iha 53.12
38Kua lea atu te kau hoko, “Te Aliki, kikila, iēnei nā pelu e lua!”
Na tali mai ia Iehu, “Hōia loa!”#22.38 Hōia loa pe Nahe toe talanoa ki te mea tēnā
Kua Tatalo ia Iehu i te Mauga o Olive
(Mat 26.36-46; Mlk 14.32-42)
39Kua fano kehe ia Iehu mai te kakai, ma kua fano ki te Mauga o Olive, e vē lava ko te mea kua māhani ai ia; ma na mulimuli atu kia te ia ona hoko. 40Kua pa atu ia ki ei, oi na lea atu ai ki ona hoko, “Tatalo ke nahe maua koutou i ni fakaohōhoga.”
41Oi na tūmuli atu ai ia Iehu ki he mea e hē mamao lahi atu ma kilātou, kua tōtuli ki lalo ma na tatalo ai vē, 42“Te Tamana, kāfai koe e finagalo ki ei, kave kehe kō te ipu tēnei o puapuagā mai ia te au. Kae nahe faia toku loto, kae fai tō finagalo.” 43Oi na fakakitea ai he āgelu mai te lagi kia Iehu, ma fakamākeke kia te ia. 44Ko te popole lahi o tona loto, na ātili ai oi tatalo fakatauānau; ko tona āfu kua vēia ni motimoti toto e pakukū ifo ki te kelekele.#22.44 Ko iētahi tuhituhiga e hē i loto ai nā fuaikupu 43-44
45Kua uma tana tatalo, oi na tū ai ki luga kua toe liliu ki ona hoko, ma na ia maua atu e momoe ona kua fai vāivai i to lātou loto fakanoanoa. 46Na lea vē atu ai ia kia te kilātou, “Heā te momoe ai koutou? Nonofo ki luga oi tatalo ke nahe maua koutou i ni fakaohōhoga.”
Kua Puke Fakapāgotā ia Iehu
(Mat 26.47-56; Mlk 14.43-50; Ioa 18.3-11)
47Ka koi tautala atu ia Iehu kae pa mai he kaifenua, e takitaki mai e Iuta, tētahi o te kau hoko e toka hefulu lua. Kua hau ki tafa o Iehu ke hogi atu kia te ia. 48Kae na lea vē atu ia Iehu ki ei, “Iuta, e fakalata e koe te Ataliki o te Tagata i he hogi?”
49I te kitea atuga e nā hoko nae fakatahi ma Iehu te mea ka tupu, oi na fehili vē atu ai, “Te Aliki, ka fakaaogā a mātou pelu?” 50Oi na ta ai e hētahi o kilātou hētahi o kaukauna a te Ulu Ohitāulaga, ma na motu ai tona taliga taumatau.
51Kae kua vāgana atu ia Iehu, “Hōia loa!” Oi na tago ai ki te taliga o te kaukauna ma na toe lelei ai.
52Oi na lea atu ai ia Iehu ki nā ohitāulaga pule, nā leoleo o te Mālumalu, ma te kau toeaina na ōmamai ke puke ia, “Ko au nei he tino kaihohoa kua ōmamai ai koutou ma nā pelu ma nā pōvai? 53I aho uma ko au e fakatahi ma koutou i loto o te Mālumalu, kae e hēki koutou pukea au i kinā. Kae ko tēnei te taimi e fakatino ai e koutou te pule a te pogihā.”#22.53 pule a te pogihā pe a te tiāpolo #Luk 19.47; 21.37
Kua Fakafiti ia Petelu e hē Ia iloa ia Iehu
(Mat 26.57-58, 69-75; Mlk 14.53-54, 66-72; Ioa 18.12-18, 25-27)
54Na puke ai e kilātou ia Iehu ma kave ki te fale o te Ulu Ohitāulaga; ma ko Petelu na mulimuli mamao atu i tua. 55Nae tafu he afi i lototonu o te lōtoā, oi na fano ai ki ei ia Petelu ma nofo ki lalo i te mea nae iei ai nā tino i tafa o te afi. 56I te kitea atuga e hētahi o nā kaukauna fafine ko Petelu e nofo i tafa o te afi, oi na kikila hako ai ki ei ma lea vē, “Ko te tino foki tēnei nae fakatahi ma Iehu!”
57Kae na fakafiti ia Petelu, ma lea vē atu, “Te māfine, e hē kō iloa te tino tēnā!”
58E hēki mataloa kae kitea atu e hētahi tamāloa ia Petelu, oi na lea atu ai ki ei, “Ko koe foki tētahi tino o kilātou!”
Kae na tali mai ia Petelu, “Te taulealea, e hē ko au!”
59Mulimuli ake, pe kua kātoa he itūlā, oi na fīnau mālohi ai lava hētahi foki tamāloa, kua lea vē, “E mautinoa lelei lava ko te tagata tēnei nae fakatahi ma Iehu, auā ko ia foki ko he tino Kalilaia!”
60Kae na tali atu ia Petelu, “Te taulealea, e hē kō iloa te mea tēnā e lea mai ai koe!”
I te taimi lava tēnā, ka koi tautala ia Petelu, kae vivini te moa. 61Na liliu mai ai te Aliki ki ona tua, kua kikila hako atu kia Petelu, ma na manatua ai loa e Petelu te lea vē akega o te Aliki kia te ia, “Ka ko hēki vivini te moa i te pō nei, ka kua fakafiti fakatolu koe e hē kē iloa au.” 62Oi na fano ai ia Petelu ki fafo, kua tagi aueuē ai.
Kua Fakatauemu nā Tino kia Iehu ma Kini e Kilātou
(Mat 26.67-68; Mlk 14.65)
63Ko nā tāulelea nae leoleo e kilātou ia Iehu, kua kāmata oi fakatauemu kia te ia ma kini e kilātou. 64Kua nonoa e kilātou nā mata ma lea vē ki ei, “Lea mai ake la pe na hei tukia koe?” 65E lahi foki iētahi a lātou kupu fāifai na fai kia te ia.
Kua Kave ia Iehu ki Mua o te Taupulega
(Mat 26.59-66; Mlk 14.55-64; Ioa 18.19-24)
66Kua malama te tāeao o te aho na hohoko ai, oi na fono fakatahi ai ia toeaina, nā ohitāulaga pule, ma nā faiākoga o te Tūlāfono, ma na kave ai ia Iehu ki mua o te Taupulega. 67Na lea vē atu ai kilātou kia te ia, “Kāfai ko koe ko te Mehia, lea mai la kia te kimātou?”
Na tali mai ia Iehu, “Kāfai au e tali atu, ko koutou e hē talitonu; 68ma kāfai au e fehili atu, ka hē tali mai foki koutou. 69Kae e kāmata atu nei, ko te Ataliki o te Tagata ka nofo i te itū taumatau o te Atua Mālohihilihili.”
70Ma na lea atu ai kilātou uma, “Ko koe la ko te Ataliki o te Atua?”
Na tali mai ia Iehu, “E vē ona lea ai koutou, ko au ko Ia.”
71Ma na lea vē ai kilātou, “Ni molimau aumā te toe fofou kitātou ki ei? Tēnā kua fakalogo uma kitātou ki tana fakamatalaga na fai mai!”
Právě zvoleno:
Luka 22: TOKU
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Bible Society New Zealand Charitable Trust
