गलातियों 1
1
नंमष्कार
1संत्त-पौलुस के जू ना आदमी के ढबे शा, अरह् ना आदमी के जाँणें, परह् यीशू मसीया अरह् परंम-पिता पंण्मिश्वर के जाँणें, जिन्ऐं तेसी मरे अंदे मुझ्षा जियाल़ा प्रभू यीशू के खास-चैला असो, 2अरह् बादे भाऐ की ढबे शा, जू मेरी गईलो असो, गलातियों की कलीसियों के नाव: 3परंम-पिता पंण्मिश्वर अरह् अमाँरे प्रभू यीशू मसीया के ढबे शी तुँओं खे कृपा अरह् शाँण्त्ति भेंटी चेंई। 4तिन्ऐ ही आपु-आप्खे अमाँरे पापो की ताँईऐं देऐ दिता, के जू कुँऐं अमाँरे पंण्मिश्वर के हिछ़या, के मुताबिक आँमों ईयों बुरी संईसारी शे छुड़ाऐ दियों। 5तिनकी सतुति अरह् बड़ियाऐं ज़ूगौ-ज़ूगौ तोडी हंदी रंह्। आमीन।
कुँऐं ओकी खुषख्बरी ने आथी
6मेरे तूरंबाणच़ूंटे, के जिन्ऐं तुँओं मसीया के कृपा दे बईदी थुऐ, तिनू आरी शे, तुँऐं ऐत्रे शिघे पाछू फीरियों कोसी ओकी ही खुष्खबरी की ढबे ज़ाँदें लागे। 7परह् सेजी ओकी खुषख्बरी बिल्कुल भे आथी ही ने: परह् बात ऐजी असो, के कैतोड़े ऐष्णें असो, जू तुँओं दुबिदा दे पाँऐयों डराऐ दियों; अरह् मसीया की खुषख्बरी बिगाड़ी देंणी चहाँव। 8परह् जे आँमों कैई कुँऐं स्वर्गो के दूत भे ईयों खुषख्बरी छुड़ियों, जुण्जी आँमें तुँओं कैई शी शुणाऐं थऐ, ईन्दें के सुवाऐं कुँऐं ओकी खुषख्बरी शुणाव तअ से सदा खे निरभाग असो। 9जेष्णों आँमें आगे बुली थो, तैष्णों ही हाँव ऐबे हजो बुलू, के सेजी खुषख्बरी छुड़ो जियों तुँऐं माँनी थऐ, जे कुँऐं ओकी खुषख्बरी शुणाँव तअ से सदा खे निरभाग असो। 10कियों ईन्दें लई तुवाँरे ऐशो जाँणियों, के हाँव आदमी की सहाऐता चहाँऊ? के ऐजो, के मुँह पंण्मिश्वर के सहाऐता भेटी चेंई? के हाँव आदमी खुशी कर्णें चहाऊँ? परह् जे हाँव आदमी खुशी करदा तअ हाँव मसीया के दास जेष्णाँ ने हंदा।
संत्त-पौलुस केशा दाँई प्रभू यीशू का खास-चैला बंणा
11हे भाऐ बंईणों, हाँव तुँओं खे बुली देऊँ, के जू खुषख्बरी मुँऐ शुणाऐ थऐ, सेजी आदमी की ढबे शी ने आथी। 12किन्देंखे के ऐ मुँह आदमी कैई शी ने भेंटी रंई, अरह् ना कोसी आदमी ऐ मुँह कैई ईन्दें की शिक्क्षा देऐ थई; परह् यीशू मसीया ऐ मुँह कैई पर्गट हऐयों देऐ थऐ। 13यहूदी मत्त शा जू आगे मेरी चाल-ढाल थी, तिन्दे के बारे दो तुँऐं शुणी थो, के हाँव पंण्मिश्वर की कलीसिया बैजाऐ ही सताऊँ थिया, अरह् नाँष कर्णो की कोशिष करू थिया। 14आप्णे जात्ती वाल़े, जुण्जे मेरी ऊमरी के थिऐ; तिनू हाँव यहूदी मंत्त दे बैजाऐ बंड़ाऊँ थिया; अरह् आप्णे नाँना-बाबा के रिती-रूवाज के मुँताबिक बैजाऐ होंस्ले दा थिया। 15परह् पंण्मिश्वर ऐं जिन्ऐं मुँह माँई खी कुँखी शा ही मुँह छाँटी-चूणी थुवा थिया, अरह् आप्णी कृपा शा बय्दी थुवा; 16जबे पंण्मिश्वर के ऐजी हिछ़ा हऐ, के मुँदा आप्णें बैटे का ज्ञाँन पर्गट करा, के बै-बिश्वाषी लोगो मुँझी खुषख्बरी का प्रचार करू, तेसी बख्ते मुँऐं कोसी आदमी की सलाह्-मशोहरा ने करी। 17अरह् ना हाँव हजो पाछू यरूशलेम खे तिन कैई हुटी, जू मुँह शे आगे प्रभू यीशू मसीया के चैले बंणी रूऐ थिऐ, परह् तैख्णी हाँव अरब देश खे हुटा, अरह् तबे तेथै शा दमिश्क नगर दा पाछू आया। 18तबे च़ींन साल पाछ़ी हाँव कैफा कैई शा भेंटिदा यरूशलेम खे हुटा, अरह् तेस कैई पुन्द्रंह् देसो तोड़ी तेथी रूआ। 19परह् प्रभू के भाऐ याकूब के सुवाऐ, ओका कोसी भी प्रभू यीशू के चैले कैई शा ने भेटी। 20हाँव पंण्मिश्वर हाजिर जाँणियों बुलू, के जू किऐं मुँऐं लिखी लुओं, तिन्दो किऐं भे झुठों ने आथी। 21ईन्दें पाछी हाँव सीरिया अरह् किलिकिया के इलाके दा आया। 22परह् यहूदिया के कलीसिया ऐ जू मसीया दी थी, तिन्ऐं मेरो मुँह कद्दी ने दे:खी थई थी। 23परह् से लोगो कैई शो ऐजो ही शुणों थिऐ, के “आगे जुण्जा आदमी आँमों सताँव थिया, से ऐबे तेसी ही मत्त अरह् बिश्वाष की खुषख्बरी शुणाँव, जियों खुषख्बरी से नाष कर्णो की कोशिष करह् थिया। 24अरह् मेरे जाँणें तिन्ऐं पंण्मिश्वर की बड़ियाऐं करी।”
Právě zvoleno:
गलातियों 1: sri
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2022, Wycliffe Bible Translators, Inc. All rights reserved.