Npfong 17

Ka̱bvung a̱ truk a Tasalonika

1Bulut bu Sila ba cong a̱ si hyok Amfibolit a̱ si seyak Aboloniya a̱ nat Tasalonika, ka̱ yemi bat a̱duwa ba̱nyet Yahuda na ku yin shyi. 2Bulut a̱ si nwa ba̱ mba i bat a̱duwa na ka̱sak ka na̱ nan yya ni, a̱ yya A̱sa̱ba̱t a̱tat na̱ sseng a̱cecet ba̱ mba a̱ ba̱ twang nkyang a ba jem ka̱yat ba̱ryat Ka̱za ka ni. 3A̱ ba̱ tyyang ba̱ryat Ka̱za ba a̱ ba̱ tyyei ka̱sak ka dolet Kristi a̱ sswa ka̱bvung hat a̱ bo ta̱za nyyai a̱yabyen ka ni. A̱ hywa da̱ mba, “Yesu a̱ni n ya tyyei ni a̱mi a̱ yet Kristi nu.” 4Ba̱yanyet mba a̱ shim a̱ brak a̱ shyi bu Bulut bu Sila. Ba̱nyet ba̱yaan ba̱gingang ba a̱ yet Helenawa na a̱ pfong ka̱wun Ka̱za ni, nta̱mak bu ba̱nyring ba a̱ sseng ba̱nyet i ka̱nkrang ka ni, a̱ ma̱n brak a̱ shyi bu ba̱nyet Bulut.

5Ma ba̱nyet Yahuda na nkpa swam a̱ tung ba̱kpam ba̱nyet bu diba̱ra̱ntong a̱ hwwut sa̱rei ba̱nyet ka̱nkrang ba ba tyyi ba̱suswak, a̱ nat a̱ si kpa ka̱ryi Yasan a̱ cat ba̱nyet Bulut a̱ ga wruk ba̱ mba a̱ ba mi di ba̱nyet ba. 6Ba bu shya Bulut bu Sila ba, ba pyyem Yasan bu ba̱nyet tssup ba̱yaan a̱ ba̱ kwak a̱ nat di a̱ta̱ssi ba̱cecet ka̱nkrang ba. A̱ si krok nkun a̱ hywa, “Ba̱nyet bani a̱mi a̱ ba a̱ cong bu rikyici ji ko ke. Ba̱nyying ba seyak a̱ ba i ka̱nkrang njit ka, 7hat Yasan a̱ bu ba̱ san a̱ sak a̱gbang nu. Ba byai truwang A̱gwam Rom na, rot ba hywa da̱ a̱gwam a̱yaan a̱n shyi ban yei Yesu.” 8Bu taka̱i ba̱ryat ani ba tyyi ndya ba̱nyet a bu ba̱cecet ka̱nkrang ba tyyi ba̱ pfupfut. 9Ba̱cecet ka̱nkrang ba a̱ sak Yasan bu ba̱nyet nu ba ka̱tan, ba tan ba si ba̱ kaai a̱ wwon.

Ba nat Biriya

10Ka̱tuk ka bu kwwat, ba̱nyet tssup ba a̱ tun Bulut bu Sila a̱ tom i Biriya. Ba si nwa a̱ nat ka̱bvwa bat a̱duwa ba̱nyet Yahuda ka. 11To, ba̱nyet Yahuda na yin shyi Biriya ka ni a̱ yin byyi ka̱myrang a̱ ra̱u ba̱nyyi Tasalonika ba. Ba rot a̱pfo ansham a̱ hok ba̱ryat Ka̱za ba, brak kozan ka̱tuk ba na myyam ba̱ryat Ka̱za ba, a̱ ga ryi ki kyang a Bulut na̱ ryat i yet ka̱ryong. 12Ba̱nyet ba̱gingang ka̱yat mba a̱ san ba̱ryat ba nta̱mak bu ba̱nyring ba̱yaan ba a̱ yin sseng ba̱nyet ka̱nkrang ka a̱ yet Helenawa ni, hat bu ba̱ntyok Helenawa ba a̱ wrak ka̱ryong. 13To, ba̱nyet Yahuda na shyi Tasalonika ka ni bu hok di Bulut a̱ yya wa'azi Biriya, ba nyyai a̱ ba Biriya ka a̱ bu nwa gye a̱ hwwut diba̱ra̱ntong. 14Ba̱nyet tssup ba a̱ tun Bulut ba ahwa na̱ nat a̱mbeyang kei ba̱shekwot ka, ma Sila bu Timoti a̱ yen hwan Biriya ka. 15Ba̱nyet ba a̱ yin tyei Bulut ryen na ni a̱ nat ba̱ nu a̱ si kpang Atina, a̱ si brek a̱ ba Biriya. Bulut a̱ ba̱ tom ba si tyyei Sila bu Timoti ba ba a̱ bu ku shya ahwa.

Nkyang a Bulut na̱ yya Atina ni

16Ka̱ram ka Bulut na̱n shyi i tot Sila bu Timoti Atina ni, rya nu na i byyan ka̱ram ka na̱n dyi ba kok ntong di nkyang a ba yya mbvak mba ni ko ke ka̱yat ka̱nkrang ka. 17Na̱ nwa bat a̱duwa ba̱nyet Yahuda na a̱ ya a̱cecet ba̱ mba bu nwap nzaan na tssup Ka̱za ni; kozan ka̱tuk ka̱zzu ka bu ba̱nyet ba a̱ shyi ka̱ yemi ni. 18Ba̱yanyet a̱ yin shyi ba ba̱ yei Abikuriyawa a̱ bo yei ba̱yanyet Sitokiyawa, ba yin byyi bvwo ba̱t, a̱ ya a̱cecet bu Bulut. Ba̱yanyet mba a̱ hywa, “A̱cwrya a̱nzan a̱yin a̱ni na̱ ryat?” Ba̱yanyet a̱ hywa, “Kanye zi hok na̱ yya wa'azi na̱za ba̱nyet ba̱yaan na njit ba bvwo ni ba.” Ba yin dyat a̱mi rot ban hok Bulut na̱ yya wa'azi Yesu ni, bu ka̱sak ka na̱n ta̱za a̱yabyen ni.

19Ba nat bu Bulut ka̱rek ka̱tung ba̱cecet ka̱nkrang ba, ba yin yei ka̱bvwa ka̱tung ka “A̱gut Arasa.” A̱ si hywa di Bulut, “Zi cat i hok a̱hwai zzek u a za ba mi ni. 20Nkyang nzaan na a ryat i yet a̱hwai da̱ njit, njit ba cat i bvwo kyang a na yet i.” 21(Ba̱nyet Atina ba bu ba̱yecen ba a̱ shyi ka̱ yemi ni a̱ yin byyi ka̱kpeyang cat swat a̱ tsaai nkhang a̱ bo pfong a̱hwai nkyang u a̱ yin nwai ni.)

22Bulut a̱ ta̱za a̱ sseng a̱katyyi ka̱tung ka, a̱ hywa, “Ba̱nyet Atina, n dyi yi yet ba̱nyet tssup ba̱t. 23Rot ka̱ram ka n nin cong n krang ka̱nkrang ka ni, n dyi na̱bvwa ba̱hyum, se ka̱bvwa ka̱yring ban jem, ‘A̱nyyi Ka̱za nu zi cyi ni.’ To, Ka̱za iya yi tssup i, da̱ nyin ba bvwo diyrek nka ti ba ni, n cat ya tyyei a. 24Ka̱za ka a̱ yya ka̱sa ka ni bu kozan kyang ka̱yat ka̱sa ka, nka a̱mi a̱ yet A̱gwam ka̱byen bu Tazwa; di na̱ swat i na̱bvwa a̱duwa na ba̱nyet ba nok di mbvak ni ba. 25Di na̱ cat kyang a ba̱nyet ba yya a̱ ni ku ryi ni ba. Nu a̱mi a̱ wwat sso bu sucet bu kozan kyang a ba̱nyet ba byyi ni. 26A̱ yin yya a̱tuba a̱yring, nu a̱mi kpikpit ba̱nyet a ba wruk a nu; a̱ si bo trak ba̱nyet ba a̱ tyak ka̱sa ka. Nyyai na̱ ka̱n yya ba̱nyet ba ba, a̱ ba̱ saai na̱ram bu na̱bvwa na ba nin swat i. 27A̱ yin yya a̱mi ba̱nyet ba a̱ ga ku cat a̱ ku bam a ryi ki ba ni ku shya. Ma brak, Ka̱za a̱ shyi gbang ba̱ njit ba, 28da̱ni da̱ a̱yanyet na̱ ka̱n hywa ni,

‘Nu a̱mi an byyi zin swat, bvan bu nsso.’

A̱bvom nyin a̱yaan na ka̱n hywa,

‘Njit ma zi ma̱n yet na̱won nu.’

29Zi yet na̱won Ka̱za; rot a̱mi zi ryok hwa di Ka̱za a̱ ryi di a̱zurfa ko zinariya ko na̱sham nkpang a ba̱nyet ba bvwo shap di mbvak mba ni ba. 30Ka̱za a̱ yin wwon ba̱nyet ba ka̱ram ka ba yin ka̱ cyi ni. Ma ba̱nyying a̱ yei sa̱rei ba̱nyet koke ban shyi ba wwon a̱ka̱tukyya mba nu a̱ brak a̱ ka̱ tssup. 31Ka̱za a̱ ka̱n tssa nom yring a̱ sak a̱ nin yya ba̱nyet ka̱sa ba a̱zizrak shirya. A̱ bo tssa a̱tuba a̱yring u na̱ ni ku tyyi shirya ji mbvak nu ni. A̱ ka̱n za tyyei a̱ yemi ba̱zizrak i tun a̱tuba a̱ywu nyyai a̱yabyen.”

32Ba bu hok Bulut na̱ hywa di ba tun a̱yin nyyai a̱yabyen, ba̱yanyet a̱ nwa ku mai, ma ba̱yanyet a̱ hywa, “Zi cat i bu hok ba̱ryat nwan ba brak.” 33Bulut a̱ drok ka̱bvwa ka̱tung ka. 34Ba̱yanyet a̱ ku tssup a̱ san ba̱ryat ba a̱n tyyi rya. A̱neyring mba ba yin yei Diyonisiya, a̱ yin shyi i ka̱tung ba̱cecet ka̱nkrang ba, ba̱ a̱ra̱mbyring a̱yaan ban yei Damarit bu ba̱yanyet ba̱yaan.

Právě zvoleno:

Npfong 17: kaj

Zvýraznění

Kopírovat

Porovnat

Sdílet