1 Korinti 4
4
Ba̱pfong Kristi
1Rot a̱mi, ku myim yi za breng di ba̱pfong Kristi ni, ba̱nyet ba Ka̱za ka ba̱ tyyi ba tyyei ka̱ryong nka ka a̱ yin shyi nrang a ni. 2Kyang a ba cat da̱ a̱tsatsak a̱pfong i nkpa yet ba bu shya na̱ byyi ka̱ryong an kyang a ba ku tyyi yya na ni. 3Nzuk n dam ba, ki nyin a̱mi n yya shirya ji, ko kozan bat shirya ba̱neywu. Nzuk ma n maai yya diccu nzuk shirya ba. 4Ka̱za ba̱diyin nka a̱ maai n yya shirya ji. Nzuk n bvwo kyang a n yya n byyan ni ba, ma iyemi maai tyyi n hywa di n sang hywak ba. 5Rot a̱mi ku myim yi yya a̱yin shirya ka̱ram ka ka wi yya ba. Yi ryok se A̱gwam Yesu a̱ ba. Nu a̱mi a̱ ni tyyang a̱gbyik nkyang u a̱ shyi i nyyak i, bu nkyang a shyi an ndya ba̱nyet i. Ka̱ram iya a̱mi koyan na̱ nin san gwai a yet nnu ni di Ka̱za.
6Nzuk bu Apollot njit yet ka̱mak nkyang a n dyat i, yi gi myyam kyang a gan ji zi na hywa ni: ryok seyak kyang a ba jem ni ba. Rot a̱mi ku myim yi gba a̱yanyet i wwon a̱yanyet ba. 7A̱nyan a̱ na̱ gang bu kpikpit ba̱nyet a? A̱nzan a byyi da̱ nwan ba san ba? Ki a san, ba̱ a̱nzan a̱n byyi an ya yet a̱mi anye a san ba?
8Yi byyi sa̱rei kyang a yi cat i! Yi tyyi zwa! Yi yet ba̱gwam bu n za byyi ba! N cat se yi yet ba̱gwam di ka̱ryong, zi gi ma̱n shya yet ba̱gwam ba ba̱ nyin! 9Rot n dyi anye Ka̱za a̱ za brak, njit ba̱nyet ba yet ba̱pfong Kristi ba ni, a̱n yya kyang kak, di ba̱nyet ba a̱ shyi ka̱nu dikwu ni! Zi brak tyyi kyang cyang di ka̱sa ka bu ba̱pfong Ka̱za ba bu ba̱nyet! 10Pfong Yesu tyyi ba za brak a̱n yya ba̱bvwon, wwon nyin i wu yet ba̱nyet a̱za̱ncyi i diyrek Yesu! Zi tyak cet, nyin yi tyyi cet! Ba za byyai, nyin ba ya ryi shii! 11Ko ba̱nyying, cihywat bu na̱shyi za ya; ba̱kikyak ba̱tro zi tssup, kozan ka̱ram zi sswa tsot; da̱ njit ba byyi na̱sa ba! 12Zi yya pfong di mbvak njit nza. A̱yin nu a̱ za shyi ni zi ku pfwa nda! Ki ba za jyet ka̱bvung, zi sseng i ka̱ sswa! 13Ki ba ma̱n za ryat a̱ka̱tuk ba̱ryat, zi shim di a̱tsatsak ba̱ryat! Zi brak tyyi a̱shishik nkyang bu dibvwo i ka̱sa ka har bu tat ka̱ram kani!
14N ya jem nkyang ani n ga ya tyyi nsum ba, ma n ga ya zzek da̱ a̱tyyi na̱ nan zzek na̱won na na̱ cat i. 15Ko yi si bu byyi ba̱nyet ya zzek da̱ni da̱ a̱nzan ni, ka̱yat Yesu a̱tyyi nyin nu a̱ shyi ba̱ a̱yring. Rot ka̱bvwa Yesu nzuk n yet a̱tyyi nyin nu, rot nzuk n yin bu ya tyyei Ka̱sham Ba̱ryat nu ka. 16Nkpa n byyi n ni ya naai yi cong taka̱i ka̱cyet a n cong i. 17Nkpa tyyi n nin tom Timoti da̱ nyin. Nu a̱ yet ka̱won nzuk ka ka̱yat ntyyi rya, n pfong ansham nu. A̱ ni ya yring a̱hwai ka̱cyet nzuk u ka̱yat Yesu, nu a̱ yet kyang a n zzek kpikpit ba̱nyet tssup a koke ni.
18Ba̱yanyet nyin a̱ nwa ya cin, anye n bo n bai da̱ nyin ba. 19Ma ki Ka̱za a̱n shim i n bai da̱ nyin a̱zi nom ani. Ki n ba n ni hok cet na ba̱nyet yayet iya ba byyi ni, ba bu kyang a ba maai ryat ni ba. 20Rot Dityok Ka̱za ti yet tinying ba̱ryat a̱cwrya ba, ma ti yet tinying cet. 21A̱nzan yi tssa? N ba da̱ nyin ba̱ a̱yo o? Ki n ba i ba̱gwai bu hakuri?
Právě zvoleno:
1 Korinti 4: kaj
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
© 2011, Wycliffe Bible Translators, Inc. All rights reserved.