1 Korinti 11
11
1Yi n myep da̱ni di n ni n myep Yesu ni.
Ba̱nyring a̱ tssup a̱ccu mba ka̱ram a̱duwa
2N ya dyep ba̱gingang rot yi n bring ba i si bu shyi yya kyang a n yin san n si n bo ya zzek ni. 3Ma kyang yring a̱mi n cat yi bvwo: Yesu a̱ shyi tazwa kozan a̱ra̱ntyok, a̱ra̱ntyok a̱ ma̱n shyi tazwa a̱ra̱mbyring, Ka̱za a̱ ma̱n shyi tazwa Yesu. 4Rot a̱mi kozan a̱ra̱ntyok u a̱ yya a̱duwa ko a̱ ssang ba̱ryat Ka̱za a̱ tyyei ka̱yat ka̱tswa ba̱nyet bu tagiya diccu nu ni, a̱ byyai Yesu. 5A̱ra̱mbyring u a̱ ma̱n yya a̱duwa ko a̱ ssang ba̱ryat Ka̱za a̱ tyyei ni ka̱yat ka̱tswa ba̱nyet, di na̱ rop a̱diko diccu nu ti ni ba, a̱ byyai a̱ntyok nu nu. A̱ shyak ba̱ a̱ra̱mbyring u a̱ kot diccu nu ti ni ba. 6Ka̱ a̱ra̱mbyring a̱ ni rop a̱diko diccu nu ba, na̱ bvun bu rya a̱ kot diccu ti. Ma da̱ni kun yet kyang sum a̱ra̱mbyring a̱ kot i, to, ku myim na̱ zzop diccu ti. 7Ku yet dolet a̱ra̱ntyok a̱ tyyi bvung ba, rot a̱ tai Ka̱za a̱ si bo tyyei shii Ka̱za, ma a̱ra̱mbyring a̱ si bo ma̱n tyyei shii a̱ra̱ntyok. 8Rot ba yin tun a̱ra̱mbyring i rwam a̱ra̱ntyok, ma ba yin tun a̱ra̱ntyok i rwam a̱ra̱mbyring ba. 9Di ba yin yya a̱ra̱ntyok i hywak a̱ra̱mbyring ba, seko a̱ra̱mbyring ba wa yin yya zi hywak a̱ra̱ntyok. 10Nkpa n byyi kun yet ka̱sham a̱ra̱mbyring a̱ rop a̱diko diccu nu ti a̱ ga tyyei ba̱pfong Ka̱za ka̱sak ka na̱n pfong a̱ntyok nu nu ni. 11Ma i swat njit a ka̱yat A̱gwam Yesu ku myim ba̱nyring a̱ swat a̱n sang ba̱ntyok ba, di ku myim ba̱ntyok a̱ swat a̱n sang ba̱nyring ba. 12Ka̱sak ka a̱ra̱mbyring na̱n wruk nyyai da̱ a̱ra̱ntyok i, a̱mi meyang a̱ra̱ntyok na̱n yet byin a̱ra̱mbyring, ma sa̱rei nkyang a nyyai di Ka̱za.
13Nyin ma n cat yi cyang ansham i ryi ki ku myim a̱ra̱mbyring a̱ yya a̱duwa i ka̱tswa ba̱nyet a̱ sang a̱diko diccu nu. 14A̱huhwa nyin ma a̱ maai a̱ ya tyyei ka̱sak ka kun yet kyang sum a̱ra̱ntyok a̱ wwon diccu nu gbyuk ni baa? 15Ka̱ a̱ra̱mbyring a̱ ma̱n byyi a̱cat diccu ba̱gingang, iyemi yet diywa nu a̱mi, rot Ka̱za a̱ ku nang a̱cat a gingang na̱ ga n kup diccu nu ti. 16Ka̱ a̱yin a̱ ri nbyyi a̱cecet, ryok n hywa: njit bu ba̱nyet tssup Yesu ba bu byyi alada a̱yaan ba.
Sswa jibi
17Nkyang nzaan na n ni ryat ba̱ nyin ni n ya dyep ba, rot na̱tung nyin na a̱ ya cong da̱ a̱ka̱tuk, ba a̱tsatsak ba 18Ka̱tsitsrang dei, n hok da̱ nyin ba̱nyet tssup ba na si tung n nwa ba̱ a̱cecet; n bvat ba̱cincong n shim, ku yet ka̱ryong. 19Ku yet kyang ka̱hat ba a̱cecet na̱n shyi ka̱yat nyin a̱mi, yi gi ryi ba̱nyet ba a̱ breng ka̱ryong Ka̱za ka ni. 20Ka̱ram ka yi na sin mon ni, n dyi anye ya jibi yi cong ba. 21Rot ka̱ram ka yi nan shyi ya ni, ba̱yanyet a̱ na si nwa ya na a̱ bo tot ba̱yaan ba, ba̱yanyet ba cong ka̱hwa ka kwot, ba̱yanyet a̱ sswa a̱ hyong. 22Yi byyi na̱sa na yi nin za i sswa ni baa? Ki di yi bvwo yi byyai ba̱nyet tssup Yesu ba bu tyei ba̱yanyet ka̱yat mba ba a̱ byyi dizot ni nsum? Ka̱t! N hywa ni da̱ nyin? Yi cat n ya dyep o? Ko ba̱cincong!
23Kyang a n ni ya zzek ni, n san di A̱gwam Yesu. A̱ta̱tuk ka̱tuk ka ba yin ku ryap i, na̱ sook burodi na, 24a̱ gwai Ka̱za mi, a̱ sam a̱ ba̱ ka, a̱ hywa, “Dinam nzuk tintii, yi ya i gi na nin yring.” 25Ba bu tyak ya burodi na, na̱ bo sook ka̱bandyet ka a̱ hywa, “Ka̱bandyet kani nka a̱ yet a̱hwai ba̱ryat u Ka̱za ka ryat a̱ sak bu ka̱sa i ba̱sok nzuk ba ni. Kozan ka̱ram yi swrang ni sswa, yi yring dikwu nzuk ti.” 26Rot kozan ka̱ram yi nan shyi i sswa na, bu ya na yi tyyei dikwu nu ti bu tat nom brek nu na.
27Rot a̱mi a̱yin nu a̱ ya burodi na a̱ bo sswa i ka̱bandyet ka ba bu rya yring ni ba, na̱ bvwo a̱ byyai rwam Yesu na bu ba̱sok nu ba. 28Rot a̱mi se koyan a̱ na ya cyang ansham, a̱ jyi rya nu na a̱ si wa bvwa a̱n za burodi na a̱ bo sswa i ka̱bandyet ka. 29Rot a̱yin nu a̱ ya a̱ sswa i cii ka̱sak ka rwam Yesu kun shyi ni a̱ ya a̱ bo sswa diccu nu shirya. 30Nkpa n byyi ba̱yanyet nyin ba̱gingang ban tyak ncet, a̱ bo myyi nhywu, ba̱yanyet ma a̱ ka̱n kwi. 31Ma ki zi yya cam a̱ccu njit, Ka̱za a̱ ni za yya shirya ba. 32Ma ka̱ram ka Ka̱za kan na za yya shirya ni, ka na za nyep ho zi bu nwa shirya jring bu ba̱nyet ka̱sa ba.
33Rot a̱mi ba̱wumbeyang nzuk, ki yi nan si tung swrang ka̱bvwa ya jibi ka, yi yen ya pfong. 34Ka̱ a̱yin a̱ ma̱n pfong cihywat a̱ ya kyangya ka̱ryi a̱ si wa bvwa a̱n wruk, ho yi bu nwa shirya Ka̱za ka̱ram ka yin tung ni. A̱wwon kpikpit nkyang a, n ni ba n na̱ jyi.
Právě zvoleno:
1 Korinti 11: kaj
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
© 2011, Wycliffe Bible Translators, Inc. All rights reserved.