Amakorwa ga Abhatumwa 26
26
1Nho, Agiripa akamukeerya Pauro ega, “Wikiririibhwe okwibhagirira.” Ego, Pauro akeenura okubhoko, akaamba okwibhagirira ega, 2“Ee omukama Agiripa, reero ndeerora wa eriruguto, kwa okubha nimiriiri embere yaaho, okwibhagirira kugonsego ganú Abhayahudi bharanjongera. 3Ndagamba ego, ekinene kwa okubha uuwe omanyiri bhujomu emigiro gyonsego gya Abhayahudi, na gonsego ganú bhaabha bharahakaananʼya. Kwa ego, ndakusabha wikongʼererye okunyitegeerera.
4“Abhayahudi bhonsego bhamanyiri bhujomu enteemo inú naaringa nayo mukyaro kyani, okurwa obhwana bhwani, okuhikira eribhaga rinú naamenya mumugi gwa Yerusaremu. 5Bheeki bhamanyiri kwa eribhaga eritambi, na hanú bhareende bharanyimiririra ega, naaringa ndagwata emigiro gyonsego gya Abhafarisaayo. Na Abhafarisaayo, mbo bhaana ekituunyo kya okugwata amaragiriryo gonsego ga Ekiyahudi, kora okukira abhandi bhonsego bha edini yeetu. 6Bhoono, nimiriiri hanu, mbuturirwe ekiina kwa okubha ndeesigira endago inú Waryubha yaaraga bhajaaji weetu. 7Endago iyo, ngʼyo amakabhira ekumi na gabhiri ga ekyaro kyetu, garaganyirira okurora ereebhuka. Kiyo nkyo kirakora bharamusyengera Waryubha omubhasu na obhutiku. Na oni reero, ee omukama, ndajongerwa na Abhayahudi kwa okwisigira endago iyo. 8Kwaki bheenyu muraanga ega, Waryubha atakutura okuhyukya abhaku?
9“Oni omwene naaringa ndakanya ega, ndeenderwa okukora gonsego ganú ndatura, naho okwanga eriina rya Yeesu wa Najareeti. 10Gayo ngo, naakoranga Yerusaremu eyo. Kwa obhutungi okurwa kubhasyengeri abhakuru, naabhohanga abheekirirya abhaaru mwigereja. Na hanú bhaabhuturirwanga ekiina okukwa, oni nonse, naaringa mubhanú bhaaringa bharabhabhuturira ekiina. 11Mara kaaru naagyanga mumasinagogi gonsego, naho okubhabhuturira ekiina, kweki naaringa ndabhabhandirirya bhamwange Yeesu. Enkoro yaani kubheene, yaakora nkagya mumigi egindi gya ebhyaro ebhindi, naho okubhanyankya.
12“Orusiku rumwi, naaringa kunjira ndagya mumugi gwa Damasikasi, okukora ego, kwa obhutungi na amaragiriryo okurwa kubhasyengeri abhakuru. 13Ee omukama, hanú naaringa kunjira iyo, eribhaga rya omubhasu, nkarora endingaasi enduru bhukongʼu, okurwa murwire. Endingaasi iyo, yookanga okukira eryubha. Kimwi, ekammirika mbaara gyonsego, hamwi na bhanú naaringa nabho. 14Bhonsego tukagwa hansi. Nho, nkeegwa eriisi rirankeerya mu Kiebhurania ega, ‘Sauri, Sauri! Ndeegwa orannyankya? Ndora oreenyahaara bhusa kya entikiri inú erabharaja engʼimbo ya omukuru waaye!’
15“Nonse nkabhuurya ega, ‘Ee Omukuru, uuwe nuuwe-wi?’ Wonse akankyukya ega, ‘Oni nooni Yeesu, unú uuwe oranyankya. 16Bhoono, imuka wimirire! Nkwibhukiiri, naho nkukore obhe omugaya waani. Oraakomereryenga abhantu abhandi, amangʼana ganú oruuji reero, na ganú ndaabhenga ndakoorokya. 17Ndaabhenga ndakutuurya okurwa ku Bhayahudi abharikyaho, na kubhantu bhanú bhataringi Abhayahudi. Ndaakutumenga kubhayo, 18naho obharibhure ameeso, bheehunjure okurwa mukisunte, bhasohe mundingaasi, bharwe mubhutungi bhwa Erisambwa,#26:18 Erisambwa. Maaha eringʼana rinu mu Moonjooro eguru ya Amangʼana Amakongʼu. bhamwihunjurire Waryubha. Kwa okukora ego, nho bharyabhirwa obhusarya bhwabho, bharibha hamwi na abhandi bhonsego, bhanú bhaaraamwa kwa enjira ya okunyikirirya oni.’
19“Kwa ego, ee omukama Agiripa, ntaatiga okugwata obhurori bhuyo okurwa murwire. 20Nawe, nkaamba okwihigirya abhantu bha Damasikasi ega, bhatige obhusarya bhwabho, bhamwihunjurire Waryubha na okukora ganú garoorokya ega, bheehunjwiri mumitima gyabho. Kweki nkeehigirya amangʼana gayogayo, kubhantu bha Yerusaremu, na kubhantu bha mukyaro kyonsego kya Yudea. Kora kubhantu bhanú bhataringi Abhayahudi, neehigiryanga egoego. 21Gayo ngo gaakora Abhayahudi bhakangwata, hanú bhaannyoora mwisyengerero erikuru rya Waryubha, bhakeenda okunyita. 22Nawe, Waryubha yambeereri okuhikira orusiku rwa reero. Kiyo nkyo kirakora ndeemirira embere ya abhantu, abhakuru na abhake, okugamba amangʼana ganú naarora. Gatariho amangʼana agandi ganú ndagamba, nawe garyagarya gaagambwa na abharooti na Musa#26:22 Musa. Maaha eringʼana rinu mu Moonjooro eguru ya Amangʼana Amakongʼu. ega, gariibhuka. 23Bhonsego bhaagamba ega, Kiristu Omutuurya#26:23 Kiristu Omutuurya. Maaha Kiristu mu Moonjooro eguru ya Amangʼana Amakongʼu. arinyankibhwa, na ega, weeki aribha owa okwamba okuhyuka okurwa mubhaku, naho araarike ega, amangʼana amajomu eguru ya obhutuurya, bhoono garangʼarabhira abhantu bhonsego, Abhayahudi na abhantu bhanú bhataringi Abhayahudi.”
24Hanú Pauro yaaringa akyeebhagirira, omwanangwa Fesito akamubhuturya kwa eriisi erinene ega, “Uuwe Pauro, odangeeni! Kasi obhusomi bhwaho obhwaru, bhwakujuurirye?”
25Kimwi, Pauro akamukyukya ega, “Ee omusuukwa Fesito, oni ntaringi omujuuru. Amangʼana ganú ndagamba n-ga obhuheene na obhungʼeeni. 26Kora omukama amanyiri bhujomu eguru ya amangʼana ganu. Mmanyiri ega, ritariho eringʼana kora rimwi gati ya ganu rinú atamanyiri, kwa okubha gataakorekanga kwa obhwibhise. Kwa ego, nkaamukeererye gayo, bira okoobhoha. 27Ee omukama Agiripa, gonsego ganú gaagambwa na abharooti, orageekirirya? Oni mmanyiri bhujomu ega, orageekirirya.”
28Hayo, Agiripa akamubhuurya ega, “Oramanya ega, ngʼungʼeenererya mbe Omukiristu kwa amangʼana amake kya ganu?” 29Pauro akamukyukya ega, “Ebhe n-kwa amangʼana amake, kasi kwa amaaru, ndamusabha Waryubha eguru yaaho, na eguru ya abhandi bhonsego bhanú bharanyitegeerera reero ega, mubhe kya ego oni ndingi, nawe bira okubhohwa na eminyororo ginu.”
30Hayo omukama akeemirira, hamwi na omwanangwa Fesito na Bhenike, na abhandi bhanú bhaaringa bheekeeri hamwi. 31Hanú bhaaringa bharagya, bhakatongerana ega, “Omuntu unu ataakora eringʼana ryoryonse rinú rikaakoreri yeetwe, kasi abhohwe mwigereja.” 32Kimwi, Agiripa akamukeerya Fesito ega, “Uuja okunyoora ega, omuntu unu ataasabha ekiina kyaye kyamurwe na Kaisari, akaahaatiirwe.”
Právě zvoleno:
Amakorwa ga Abhatumwa 26: Kabwa
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
© 2022, Wycliffe Bible Translators, Inc. All rights reserved.