ZAKKAARIYAASI 1
1
MAGANU MANNASI ISIWA HIGANNO GEDE WOSHSHI
1Daariyoosi Faarisi gobbara moohihunni layinki diro settikki aganira, Maganu Iddora beettu beetti Berakiya ilinohu himanaanchu Zakkaariyaasi widoonni qole coyi'rino himani aane nooho: 2Olantote Mootichi Kaaliiqi Zakkaariyaasi mannaho, «Ani Kaaliiqi akaakka'nera lowo geeshsha hanqoommo; 3xa kayinni ki'nera yeemmo'neti: Ani ki'newa higeemmona, ki'neno anewa higge. 4Akaakka'ne ha'ruma hadhinoonte; insa albi himanaano, busha doogonsanninna bushu loosinsanni higganno gede qorophisiissinonsa; insa kayinni, qaale'ya dimacciishshitino; hajajo'yano diwonshitino. 5Akaakka'neno ikkito insa yannara noo himanaano kune xa lubbotenni dino. 6Soqqamaano'ya ikkitino himanaano widoonni qole akaakka'nera hajajonna qorophishiishsha oommonsa; insa kayinni lashshi assitino daafira, shettote qarri amadinonsa; hakkunni gedensaanni aagintaabbe, ‹Olantote Mootichi Kaaliiqi qaafonkenna loosinke garinni, ninkera malino qoricha isi hedinoha uyinonketa huwantoommo› yitino» yii.
FARADU DANINNI LEELTINO AJUUJA
7Daariyoosi moohihunni layinki diro, Shabaaxi yinannihu tonaa mitikki agani eihunni lemiina shoolki barra, Maganu hashsha ajuujatenni kulinoe coyi konneeti: 8Mittu sokkaasinchi duumo farashsho gulufe nooha afoommo; isino lagichu giddo uddote haqqe mereero uurre no; isira badheenni duumu, hamarunna waajju faradi uurre no. 9Anino, «Mooticha'ya, kuni faradinna faradaasine mayinnite?» yee xa'mummo. Isino, «Mayinnitero leellisheemmohena agari; 10insa Kaaliiqi baatto dooyyitara soyinoreeti» yiie. 11Faradaasineno uddote haqqe mereero uurre noohura Kaaliiqi sokkaasinchira, «Baatto baalanta gaangaambe la'noommo; kuneeti baattote aana noo manni baalu kadame sammi yee no» yite kultusi.
12Sokkaasinchuno, «Olantote Mooticha Kaaliiqa'ya! Yerusaalametenna Yihudu katamma baalantera hanqittonkunni kuneeti xa 70 dirooti; maarattonsara kunni ka'a mageeshshi yanna gattino?» yee xa'mi.
13Kaaliiqino ane ledo hasaawanni noo sokkaasinchira, hagiirsiisannonna jawaachishanno qaalinni coyi'risi. 14Kunnira, ane ledo hasaawanni noo sokkaasinchi, «Olantote Mootichi Kaaliiqi, ‹Qullaawu Katami'yara Yerusaalamete lowo baxillinna lowo laala nooe. 15Boonaleeyyete wole gobba dagara, lowo geeshsha hanqoommo; kaimuno, ani manna'ya shiima geeshsha calla qorichishate hede hee'reenna, insa kayinni quwa sayisse gawajjitinonsahuraati. 16Kunnira, Yerusaalamete Katama maarammora galagale dayemmo; Qullaawu Mini'yanna katamu gatamaramanno› yiino yite lallawi» yiie.
17Sokkaasinchu layinkimeeshshono, «Olantote Mootichi Kaaliiqi, ‹Katamma'ya galagalte lowo geeshsha qawaaxxidhanno; Yerusaalamete mannano galagale jawaachisheemmo; qoleno umi'yare assi'reemmonsa› yiino» yii.
BUUDDATE DANINNI LEELTINO AJUUJA
18Wole ajuujanni, 4 handu buudda afummo. 19Ledo'ya hasaawanni noo sokkaasincho, «Tini buudda mayinnite?» yee xa'mummo.
Isino, «Tini buudda Yihudu, Israeeletenna Yerusaalamete manni billaallanno gede assituri wolqaataamma gosaati» yiie.
20Hakkunni gedensaanni, Kaaliiqi siwiilu meencho amaddinore siwiila tuntannore 4 manna leellishie. 21Anino, «Kuni manni ma assara dayinoho?» yee xa'mummo.
Isino daware, «Insa Yihuda co'o assite huntara, mannu billaalle ba"anno gede assitara dagate gashshaano masissaranna cancantara dagginoreeti» yiie.
Právě zvoleno:
ZAKKAARIYAASI 1: QulMax
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© The Bible Society of Ethiopia; Sidama Holy Bible BSE-UBS 262 P 2014