1 Corintoyguakuérape 13
13
Mborayhu añetegua
1Che añe’ẽ ramojepe opaichagua tetãyguakuéra ñe’ẽme térã yvága remimbou ñe’ẽme jepe, ha ndaporohayhúi ramo, che ningo brónce opararãva térã ña’ẽmbe pararã reínte.
2Ha che aprofetizakuaa ramo, ha aikuaa ramo opaite mba’e ñemimby ha opaite kuaapy, ha aguereko ramojepe pe jerovia ikatúva oguerova peteĩ cérro, ha ndaporohayhúi ramo, che ndaha’éi mba’eve.
3Ha ame’ẽmba ramo, aguerekóva guive (mboriahukuérape) ha ame’ẽrõ che rete ojehapy hag̃ua, ha ndaporohayhúi ramo opaite ko’ã mba’e ndovaléi mba’eve chéve g̃uarã.
4Pe mborayhu añetegua oha’arõkuaa, ipy’a porã, pe mborayhu noñemohakate’ỹi, pe mborayhu noñembotuichái ni ndojererovúi,
5pe mborayhu naitie’ỹi (ndojapói mba’e iky’áva), ndohekái imba’évante, ndaipochýiri, ndaipy’a rasýi avave ndive,
6ndovy’ái ohendúvo hapicha oikoha hekope’ỹ, ovy’a añetegua reheve uvei.
7Pe mborayhu añeteguáva ogueropu’aka opaite mba’e ha opaite mba’e oguerovia, opaite mba’e oha’ãrõ ha ogueropu’akapa.
8Pe mborayhu añetegua máramo ndopái, pe profecía opava’erã, pe ñe’ẽ ojekuaa’ỹva opava’erã, pe kuaapy arandu opava’erã.
9Umi mba’e jaikuaáva ndahetái, ha umi mba’e ojeprofetizáva ndahetái avei.
10Ha ou vove pe omoĩ porãmbaitéva, opava’erã pe naiporãmbáiva.
11Che mitã ramoguare añe’ẽva’ekue, apensa ha ajepy’amongetava’ekue peteĩ mitãicha. Akakuaapáma ramo katu apoi che mitã rekógui.
12Ko’ág̃a ningo ndajahecha porãmbái jahechávaicha espéjo rupi, uperire katu ñama’ẽ ojováre; ko’ág̃a ningo ndaikuaapái Ñanderuetépe, uperire katu che aikuaapáta ichupe, Ha’e chekuaa háicha ko’ág̃a.
13Ko’ág̃a ningo opyta gueteri jerovia, esperánza ha mborayhu, ko’ã mbohapy apytégui, pe mba’e tuichavéva ningo pe mborayhu añeteguáva.
Právě zvoleno:
1 Corintoyguakuérape 13: ÑÑP2015
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Ñanderuete Ñe’ẽ Porã © MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015.