Ore i mexü̃ ga Márcu ümatüxü̃ 9

1Rü yexgumarüxü̃ ta ga Ngechuchu rü ñanagürü nüxü̃: —Aixcüma pemaxã nüxü̃ chixu rü ñuxre i duü̃xü̃gü i nua ngẽxmagüxü̃ rü taxũtáma nayue ñu̱xmatáta nüxü̃ nadaugü nax norü poramaxã núma nanguxü̃ ya Tupana ya guxü̃arü ãẽ̱xgacü ixĩcü —ñanagürü.

Ngechuchu rü toraxü̃ãcü nango̱x

(Mt. 17.1-13; Lc. 9.28-36)

2Rü 6 ga ngunexü̃guwena rü Ngechuchu rü wüxi ga ma̱xpǘnewa naxũ. Rü ínayagagü ga Pedru rü Chantiágu rü Cuáü̃xicatama. Rü yéma yema ngúexü̃güpe̱xewa toraxü̃ãcü nango̱x ga Ngechuchu.

3Rü niyauracüxü ga naxchiru rü nacómüxü̃chi. Rü nataxuma i yauxchiruxü̃ i ñoma i naanewa i nüxü̃ cuáxü̃ nax ngẽmaãcü nacómüxẽẽãxü̃.

4Rü nüma ga yema ngúexü̃gü rü nüxü̃ nadaugü ga Ería rü Moiché ga yéma Ngechuchumaxã idexagüxü̃.

5Rü yexguma ga Pedru rü ñanagürü Ngechuchuxü̃: —Pa Ngúexẽxẽruxü̃, namexẽchi nixĩ nax nua ingẽxmagüxü̃. Rü tá tanaxü ya tomaepü̱x ya düxenü, rü wüxi ya cuxca̱x, rü nai ya Moichéca̱x, rü nai ya Eríaca̱x —ñanagürü.

6Rü yema nax poraãcü naba̱i̱xãchiãẽgüxü̃ ga yema ngúexü̃gü, rü yemaca̱x ga Pedru rü tama nüxü̃ nacua̱x ga nax ñuxü̃ ñaxü̃.

7Rü yexgumatama wüxi ga caixanexü̃ ínarüxĩ, rü natanügu nayanga̱i̱xema. Rü yema caixanexü̃wa inanaxũ ga wüxi ga naga ga ñaxü̃: —Daa nixĩ ya Chaune ya nüxü̃ changechaü̃xü̃chicü. ¡Rü naga pexĩnüe! —ñaxü̃.

8Rü yexgumatama nügücüwagu ínadaueguãchitanü, rü taxúexü̃ma ga toguxexü̃ nadaugü, rü Ngechuchuxü̃xicatama.

9Rü yexguma ínaxĩgügu nawa ga guma ma̱xpǘne, rü Ngechuchu nüxna naxãga nax taxúemaama nüxü̃ yaxugüexü̃ ga yema yéma nüxü̃ nadaugüxü̃, ñu̱xmatáta yuwa ínadaxgu ga nümax.

10Rü yemaca̱x ga yema ngúexü̃gü rü bexma nüxica nüxü̃ nacua̱xgü ga yema nüxü̃ nadaugüxü̃. Natürü nügüna nacagüe nax ta̱xacüchiga yixĩxü̃ ga yema Ngechuchuarü ore ga ñaxü̃: “Yuwa ínadaxgu”, ñaxü̃.

11Rü ñu̱xũchi ga yema norü ngúexü̃gü rü Ngechuchuna nacagü, rü ñanagürügü: —¿Tü̱xcüü̃ i ngẽma ngúexẽẽruü̃gü i mugüwa ngu̱xẽẽtaegüxü̃ rü ñanagürügü: “Ería tá nixĩ ya nüxíra cuxü̃pa núma ũcü?” —ñanagürügü.

12Rü Ngechuchu nanangãxü̃, rü ñanagürü nüxü̃: —Aixcüma nixĩ i Ería tá nüxíra núma naxũxü̃ nax chauxü̃pa namexẽxẽãxü̃ca̱x i guxü̃ma. ¿Natürü tü̱xcüü̃ i ore i ümatüxü̃wa i ñaxü̃:

“Tupana Nane ya duü̃xü̃xü̃ ixĩcü rü tá ngúxü̃ ninge,

rü duü̃xü̃gü rü tá nüxü̃ naxoe”,

ñaxü̃?

13Natürü i choma rü pemaxã nüxü̃ chixu, rü Ería rü marü núma naxũ. Natürü ga duü̃xü̃gü rü nümagü nanaxwa̱xegüxü̃ãcüma poraãcü chixri namaxã nachopetü, yexgumarüxü̃ ga ore ga ümatüxü̃wa nüxü̃ yaxuxü̃rüxü̃ —ñanagürü.

Ngechuchu nanamexẽxẽ ga wüxi ga buxü̃ ga ngo̱xo nawa yexmaxü̃

(Mt. 17.14-21; Lc. 9.37-43)

14Rü yexguma yema togü ga norü ngúexü̃gütanüwa nangugügu, rü yéma nüxü̃ nadaugü ga muxü̃ma ga duü̃xü̃gü ga yema ngúexü̃güxü̃ íchomaeguãchixü̃. Rü ñuxre ga ngúexẽẽruü̃gü ga Moichéarü mugüwa ngu̱xẽẽtaegüxü̃, rü yéma niporagatanücüü namaxã ga yema ngúexü̃gü.

15Rü yexguma Ngechuchuxü̃ nadaugügu ga yema muxü̃ma ga duü̃xü̃gü, rü poraãcü naba̱i̱xãchiãẽgü. Rü guxü̃ma naxca̱x nibuxmü nax nüxü̃ yanamõxẽgüxü̃ca̱x.

16Rü nüma ga Ngechuchu rü nüxna naca, rü ñanagürü nüxü̃: —¿Ta̱xacü nixĩ i naxca̱x ípiporagatanücüüxü̃? —ñanagürü.

17Rü wüxi ga yema duü̃xü̃gü ga yéma yexmagüxü̃ rü nanangãxü̃, rü ñanagürü: —Pa Ngúexẽxẽruxü̃, nua cuxca̱x tüxü̃ chaga ya chaune, erü tümawa nangẽxma i wüxi i ngo̱xo i tüxü̃ ngegaxẽẽxü̃.

18Rü ngextá ítangexmaxü̃wa rü ngẽxguma tüxü̃ naxüxgu rü waixü̃müanegu tüxü̃ naña. Rü tarüchia̱x, rü tixü̃́xchapüta, rü ngẽxma tiyuãchi. Rü marü nüxü̃ chaca̱a̱xü̃ i curü ngúexü̃gü nax tümawa ínata̱xüchigüãxü̃ca̱x i ngẽma ngo̱xo, natürü tama nüxü̃́ inaxĩnü —ñanagürü.

19Rü Ngechuchu nanangãxü̃, rü ñanagürü: —Pa Duü̃xü̃gü i Tama Yaxõgüxü̃, ¿ñuxguratáta i pemaxã chanuxmaxü̃ rü yáxna pemaxã chaxĩnüxü̃? ¡Nua penaga ya yimá bucü! —ñanagürü.

20Rü Ngechuchuxü̃tawa nanagagü ga gumá bucü. Natürü yexguma Ngechuchuxü̃ nada̱u̱xgu ga yema ngo̱xo, rü gumá bucüxü̃ niyuãchixẽxẽ. Rü yexma ñaxtüanegu nayangu. Rü yexma nidixegugü, rü narüchia̱x.

21Rü Ngechuchu rü gumá bucünatüna naca, rü ñanagürü: —¿Rü ñuxgumama nixĩ ga naxca̱x inaxügüxü̃ ga yema? —ñanagürü. Rü gumá bucünatü nanangãxü̃ rü ñanagürü: —Nabuxgumamatama.

22Rü muẽ̱xpü̱xcüna i ngẽma ngo̱xo rü üxüxétügu rü dexágu nanañaü̃xü̃ nax ngẽmaãcü yamáaxü̃ca̱x. Rü ngẽmaca̱x ega cumaxã nanguxü̃gu nax ta̱xacü toxca̱x cuxüxü̃, ¡rü cuxü̃́ tangechaü̃tümüxü̃gü, rü toxü̃ rüngü̃xẽxẽ! —ñanagürü.

23Rü yexguma ga Ngechuchu rü ñanagürü nüxü̃: —¿Rü tü̱xcüü̃ “ega chomaxã nanguü̃xgu”, ñacurügü? Erü guxü̃ma natauxcha tümaca̱x ya yíxema yaxṍxe —ñanagürü.

24Rü yexguma ga gumá bucünatü rü tagaãcü ñatarügü: —Chayaxõ. ¡Choxü̃ rüngü̃xẽxẽ nax yexeraãcü chayaxõxü̃ca̱x! —ñatarügü.

25Rü yexguma Ngechuchu nüxü̃ da̱u̱xgu nax muxü̃ma ga duü̃xü̃gü marü yexma ngutaque̱xexü̃, rü nananga ga yema ngo̱xo. Rü ñanagürü nüxü̃: —Pa Ngo̱xo i Ngegaxẽxẽruxü̃ rü Ngauchi̱xẽxẽẽruxü̃, ¡choma cuxü̃ chamu nax nawa ícuxũxũxü̃ ya daa bucü, rü tagutáma wena nagu cuyaxücuxü̃! —ñanagürü.

26Rü yexguma ga yema ngo̱xo rü aita naxü, rü wenaxarü gumá bucüxü̃ niyuãchixẽxẽ. Rü ñu̱xũchi nawa ínaxũxũ, rü ñoma nayuxuchixü̃rüxü̃ yéma nanata̱x. Rü yemaca̱x ga muxü̃ma ga duü̃xü̃gü rü ñanagürügü: —Marü nayuxuchi nixĩ —ñanagürügü.

27Natürü ga Ngechuchu rü naxme̱xgu nayayauxãchi, rü ínanadaxẽxẽ. Rü nüma ga gumá bucü rü inachi.

28Rü yemawena ga Ngechuchu rü wüxi ga ĩpatagu nayaxücu namaxã ga norü ngúexü̃gü. Rü yéma nüxica nüxna nacagü, rü ñanagürügü nüxü̃: —Pa Corix, ¿tü̱xcüü̃ i toma rü taxuacüma ítanata̱xüchi i ngẽma ngo̱xo? —ñanagürügü.

29Rü Ngechuchu nanangãxü̃ rü ñanagürü: —Tama ngẽmaãcümare ítanata̱xüchi i ngẽmarüxü̃ ixĩxü̃ i ngo̱xo. Natürü tanaxwa̱xe i Tupanana tanaxuaxü̃ i tórü yumüxẽwa nax nüma ínata̱xüchiãxü̃ca̱x. Rü ngẽmaãcüxicatama nixĩ i ínaxũxũxü̃ —ñanagürü.

Ngechuchu rü wenaxarü nanaxunagü ga norü yuchiga

(Mt. 17.22-23; Lc. 9.43-45)

30-31Rü yéma inaxĩãchi rü Gariréaanewa nachopetü. Natürü ga Ngechuchu rü tama nanaxwa̱xe nax texé nüxü̃ cuáxü̃ nax yéma nayexmaxü̃, yerü norü ngúexü̃güxü̃ ínangúexẽxẽ. Rü ñanagürü nüxü̃: —Tupana Nane ya duü̃xü̃xü̃ ixĩcü, rü tá nayayauxgü rü tá nayama̱xgü. Natürü tomaepü̱x i ngunexü̃gu rü wena tá ínarüda —ñanagürü.

32Natürü nüma ga yema ngúexü̃gü rü tama nüxü̃ nacua̱xgü ga ta̱xacüchiga nax yixĩxü̃ ga yema ore, rü namuü̃e ga nüxna nax nacagüexü̃.

¿Texé tá tixĩ ya guxãarü yexera ixĩxe?

(Mt. 18.1-5; Lc. 9.46-48)

33Rü Capernáü̃arü ĩanewa nangugü. Rü yexguma ĩxwa nayexmagügu, rü Ngechuchu nüxna naca, rü ñanagürü: —¿Rü ta̱xacü nixĩ ga pegümaxã naxca̱x piporagaetanüxü̃ ga namawa? —ñanagürü.

34Natürü ga nümagü rü nangea̱xgümare, yerü ga namawa rü nachigagu nügümaxã niporagaetanü rü texé tixĩxü̃ ya natanüwa rüyexeramaexe.

35Rü yexguma ga Ngechuchu rü ínarüto, rü naxca̱x naca ga yema 12 ga norü ngúexü̃gü, rü ñanagürü nüxü̃: —Rü ngẽxguma texé naxwa̱xegu nax guxãétüwa taxüxü̃, rü name nixĩ i wixweama taxü rü guxãarü ngü̃xẽẽruxü̃ tixĩ —ñanagürü.

36Rü yemawena norü ngãxü̃tanügu nayachixẽxẽ ga wüxi ga buxü̃. Rü ñu̱xũchi nüxna nana̱i̱xãchiãcüma ñanagürü:

37—Rü texé ya chauégagu mea nayaxúxe i wüxi i buxü̃ i ñaarüxü̃, rü choxü̃ nixĩ i tayaxuxü̃. Rü texé ya choxü̃ yaxúxe, rü tama choxü̃xicatama tayaxu, natürü yimá núma choxü̃ mucü ya Chaunatüxü̃ rü ta nixĩ i tayaxuxü̃ —ñanagürü.

Yíxema tama guxchaxü̃ tüxna ãxe rü tatanüxü̃ tixĩ

(Mt. 10.42; Lc. 9.49-50)

38Rü yexguma ga Cuáü̃ rü ñanagürü nüxü̃: —Pa Ngúexẽxẽruxü̃, nüxü̃ tadau ga wüxi ga yatü ga cuégagu ngo̱xogü íwoxü̃xü̃. Natürü toma rü nüxna tanachu̱xu ga yema, yerü tama tatanüxü̃ nixĩ ga nümax —ñanagürü.

39Natürü Ngechuchu nanangãxü̃, rü ñanagürü: —Tama name i nüxna nax penachu̱xuxü̃. Erü texé ya chauégagu naxǘxe i wüxi i mexü̃ i Tupanaarü poramaxã üxü̃, rü taxucürüwama yixcama chixri chauchiga tidexa.

40Erü yíxema tama guxchaxü̃ tüxna ãxe rü tatanüxü̃ tixĩ.

41Rü yíxema woo wüxitama i pochíyuãcu i dexá pexna ãxẽ naxca̱x nax chorü duü̃xü̃gü pixĩgüxü̃, rü aixcüma pemaxã nüxü̃ chixu rü tá tüxü̃́ nangẽxma i tümaarü ãmare —ñanagürü.

Naxãũcüma nax texéxü̃ pecadugu ingu̱xẽxẽxü̃

(Mt. 18.6-9; Lc. 17.1-2)

42Rü ñanagürü ta: —Texé ya pecadugu nanguxeẽ́xẽ i wüxi i ñaa buxü̃gü i choxü̃́ yaxõxü̃, rü tümaca̱x rü narümemae nixĩ i noxtacüma wüxi ya nuta ya tacü tümanaxãwa tayangacuchi, rü ngẽmaãcü márwa tüxü̃ tayatáe.

43-44Rü ngẽxguma chi wüxi ya cuxme̱x pecadugu cuxü̃ nguxẽẽgu, rü name nixĩ i noxtacüma ícunadae. Erü narümemae nixĩ i cuboxme̱xãcüma cunayaxu i curü maxü̃, rü tama guxü̃ne ya cuxme̱x ya mexü̃nemaxã nawa quita̱xcuchixü̃ca̱x ya yima üxü ya taguma ixoxü̃ne.

45-46Rü ngẽxguma chi wüxi ya cucutü pecadugu cuxü̃ nguxẽẽgu, rü name nixĩ i noxtacüma ícunadae. Erü narümemae nixĩ i cubocutüãcüma cunayaxu i curü maxü̃, rü tama guxü̃ne ya cucutü ya mexü̃nemaxã nawa quita̱xcuchixü̃ca̱x ya yimá üxü ya taguma ixoxü̃ne.

47-48Rü ngẽxguma chi wüxi ya cuétü pecadugu cuxü̃ nguxẽẽgu, rü name nixĩ i noxtacüma ícunacaxüchi. Erü narümemae nixĩ i wüxitama ya cuxetümaxã Tupana ãẽ̱xgacü ixĩxü̃wa quixücu, rü tama guxü̃ne ya cuétü ya mexü̃nemaxã nawa quita̱xcuchixü̃ca̱x ya yimá üxü ya taguma ixoxü̃ne i ngextá õxmigü taguma íyuexü̃wa.

49Rü guxü̃ma i duü̃xü̃gü rü guxchaxü̃wa tá nachopetü ñoma üxüwa nachopetüxü̃rüxü̃.

50Name ya yucüra. Natürü ngẽxguma chi nangeacagu, ¿rü ñuxãcü tá wenaxarü naxããca? ¡Rü mea pegüna pedaugü nax ñoma yucüra ya mecürüxü̃ pimexü̃ca̱x rü guxãma i pema rü aixcüma pegü pengechaxü̃güãcüma pemaxẽxü̃ca̱x! —ñanagürü.

Právě zvoleno:

Ore i mexü̃ ga Márcu ümatüxü̃ 9: tcaP

Zvýraznění

Sdílet

Kopírovat