Ore i mexü̃ ga Márcu ümatüxü̃ 7
7
Ngẽma Tupanape̱xewa duü̃xü̃güxü̃ chixexẽxẽxü̃
(Mt. 15.1-20)
1Rü Ngechuchuca̱x naxĩ ga Parichéugü namaxã ga ñuxre ga ngúexẽẽruü̃gü ga mugüwa ngu̱xẽẽtaegüxü̃ ga Yerucharéü̃wa ne ĩxü̃.
2Rü yexguma nüxü̃ nadaugügu nax ñuxre ga Ngechuchuarü ngúexü̃gü tama naya̱u̱xme̱xgüãcüma nachibüexü̃ rü chixri nachiga nidexagü, yerü yema ngúexü̃gü rü tama nagu naxĩ ga yema Yudíugücüma nax naya̱u̱xme̱xgüxü̃ nax Tupanape̱xewa yamexü̃ca̱x naxü̃pa nax nachibüexü̃.
3Rü nümagü ga Parichéugü rü guxü̃ma ga yema togü ga Yudíugü rü nagu naxĩ ga norü o̱xigücüma nax naya̱u̱xme̱xgüxíraxü̃ nax Tupanape̱xewa yamexü̃ca̱x naxü̃pa nax nachibüexü̃.
4Rü yexguma taxepataü̃wa ne naxĩxgu ga nümagü rü tama nachibüe ga yexguma tama nügü naya̱u̱xme̱xíragügu. Rü nayexmagü ta ga muxü̃ma ga togü ga nacümagü ga nagu naxĩxü̃. Rü yema nixĩ nax mea nayauxgüãxü̃ i naxpáxü̃gü rü norü baepáxü̃gü rü norü paneragü ga cobrenaxca̱x rü norü pechicaxü̃gü nax Tupanape̱xewa yamexü̃ca̱x.
5Rü yema Parichéugü rü yema ngúexẽẽruü̃gü ga mugüwa ngu̱xẽẽtaegüxü̃ rü yemaca̱x nixĩ ga Ngechuchuna nacagüexü̃, rü ñanagürügü: —¿Tü̱xcüü̃ i curü ngúexü̃gü i tama nagu naxĩxü̃ i ngẽma tórü o̱xigücüma rü tama torüxü̃ naya̱u̱xme̱xgüxü̃ naxü̃pa nax nachibüexü̃? —ñanagürügü.
6Natürü Ngechuchu nanangãxü̃ rü ñanagürü: —Pa Mea Maxẽnetagüxü̃x, rü pechiga nixĩ ga yema Tupanaarü ore ga norü orearü uruxü̃ ga Ichaía nüxü̃ ixuxü̃ ga ñaxü̃:
“Ñaa duü̃xü̃gü rü naxã̱xmaxãmare choxü̃ nicua̱xüü̃gü,
natürü naãxẽwa rü tama chaugu narüxĩnüe.
7Rü taxuwama name nax choxü̃ yacua̱xüü̃güxü̃.
Erü guxü̃ma i ngẽma norü ngu̱xẽẽtae rü yatügüarü mugümare nixĩgü”,
ñaxü̃.
8Rü pema rü nüxü̃ perüxoe i Tupanaarü mugü nax nagu pexĩxü̃ca̱x i ngẽma duü̃xü̃gücümamare ixĩxü̃ —ñanagürü.
9Rü yexgumarüxü̃ ta ñanagürü nüxü̃: —Pema rü nüxü̃ perüxoe i Tupanaarü mugü nax nagu pexĩxü̃ca̱x i pecümagütama.
10Yerü ga Moiché rü ñanagürü:
“¡Tüxü̃ nangechaü̃ ya cunatü rü cué!”
ñanagürü. Rü ñanagürü ta:
“Texé ya tümanatümaxã rüe̱xna tümaémaxã chixexü̃ ixugüxe,
rü tá yu tümamaxã naxuegu”,
ñanagürü.
11Natürü pema rü ñaperügügü: “Marü name ega wüxi ya yatü nanatüxü̃ rü naéxü̃ ñaxgu: ‘Taxucürüwama chorü ngẽmaxü̃maxã cuxü̃ charüngü̃xẽẽxü̃, erü guxü̃ma i chorü ngẽmaxü̃ rü marü Tupanana chanaxã’ ”, ñanagürü.
12Rü ngẽxguma texé ngẽma ñagügu, rü pexca̱x rü marü namexü̃ nax tama tümanatüxü̃ rü tümaéxü̃ tarüngü̃xẽẽxü̃.
13Rü ngẽmaãcü ipeyanaxoxẽxẽ i Tupanaarü mugü, nax nagu pexĩxü̃ca̱x i pecümagü i togüwa pexüexẽẽxü̃. Rü ngẽxgumarüxü̃ ta muxü̃ma i to i pecümagü i ngẽmarüxü̃ ixĩxü̃gu pexĩ —ñanagürü.
14Rü yexgumawena duü̃xü̃güca̱x naca ga Ngechuchu, rü ñanagürü nüxü̃: —¡Mea choxü̃́ iperüxĩnüe, rü nüxü̃ pecuá i ñaa chorü ore!
15Rü taxuxü̃ma i ta̱xacü i düxétüwa ne ũxü̃ rü taa̱xwa ixücuxü̃ nixĩ i Tupanape̱xewa tüxü̃ chixexẽẽxü̃. Natürü ngẽma taãẽwa ne ũxü̃, rü ngẽmawaxi nixĩ i tüxü̃ chixexẽxẽxü̃ i Tupanape̱xewa.
16Rü ngẽxguma pixãchi̱xẽgu, ¡rü nüxü̃ pexĩnüe i ngẽma ore! —ñanagürü.
17Rü yexguma Ngechuchu duü̃xü̃güna ixũgachigu rü ĩpatagu naxücu̱xgu, rü norü ngúexü̃gü nüxna nacagü nachiga ga yema ngu̱xẽẽtae.
18Rü nüma rü ñanagürü nüxü̃: —¿Ẽ̱xna pema rü ta tama nüxü̃ pecua̱x i ngẽma? ¿Ẽ̱xna tama i nüxü̃ pecuáxü̃ nax taxuxü̃ma i ta̱xacü i düxétüwa ne ũxü̃ rü taa̱xwa ixücuxü̃ yixĩxü̃ i Tupanape̱xewa tüxü̃ chixexẽẽxü̃?
19Erü guxü̃ma i ngẽma düxétüwa ne ũxü̃ rü taa̱xwa ixücuxü̃, rü tama taãẽwa nangu. Natürü taanüwa naxũmare nax yixcama taxünewa ínaxũxü̃xü̃ca̱x —ñanagürü. Rü yemaacü nüxü̃ nixu nax guxü̃ma i õna rü namexü̃ nax nangṍxü̃.
20Rü ñanagürü ta: —Rü ngẽma duü̃xü̃ãẽwa ne ũxü̃, rü ngẽmawaxi nixĩ i Tupanape̱xewa nachixexẽẽxü̃ i ngẽma duü̃xü̃.
21-22Erü norü aixepewa i naãxẽwa ne naxĩ i muxü̃ma i chixexü̃gü ngẽxgumarüxü̃ nax chixexü̃gu naxĩnüxü̃, rü naxü̃nearü ngúchaü̃gu nax namaxü̃xü̃, rü nangĩ́xü̃, rü namáetaxü̃, rü nai i ngexü̃maxã namaxü̃xü̃, rü togüarü ngẽmaxü̃ nüxü̃́ ngúchaü̃xü̃, rü chixexü̃gu namaxü̃xü̃, rü nawomüxẽẽwa̱xexü̃, rü chixexü̃ i nacümagü, rü naxauxãchiwa̱xexü̃, rü naxoregüta̱xáxü̃, rü nügü yacua̱xüxü̃xü̃, rü tama mea naãxẽxü̃ nacuáxü̃.
23Rü guxü̃ma i ngẽma chixexü̃gü rü duü̃xü̃arü aixepewa nixĩ i ne naxĩxü̃, rü ngẽma nixĩ i Tupanape̱xewa nachixexẽẽxü̃ —ñanagürü.
Wüxi ga ngecü ga to ga nachixü̃anecüã̱x ga Ngechuchuaxü̃́ yaxõcüchiga
(Mt. 15.21-28)
24Rü yemawena rü Tíruanewa naxũ ga Ngechuchu. Rü yéma wüxi ga ĩpatagu naxücu, natürü tama nanaxwa̱xe nax texé nüxü̃ cuáxü̃ ga yéma nax nanguxü̃. Natürü taxuacüma nügü inicu̱x.
25Rü paxa nüxü̃ icuáchiga ga wüxi ga nge ga ngĩxacüwa ngo̱xo yexmacü. Rü yéma ixũ, rü Ngechuchupe̱xegu iyacaxã́pü̱xü.
26Rü yema nge rü tama Yudíu iyixĩ rü to ga nachixü̃anecüã̱x ga Chirofeníchiacüã̱x iyixĩ. Rü Ngechuchuca̱x iyaxũ, rü nüxü̃ ica̱a̱xü̃ nax ngĩxacüwa ínata̱xüchiãxü̃ca̱x ga yema ngo̱xo.
27Natürü ga Ngechuchu rü ñanagürü ngĩxü̃: —Name nixĩ i ta̱xacügüxü̃xíra tachibüexẽxẽ. Erü tama name i ta̱xacügüna tanayaxu i norü õna nax airugüna naxãxü̃ca̱x —ñanagürü.#7.27 Rü yema ñanagürü yerü nümagü ga Yudíugü rü nügü nixugüe nax Tupanaxacügüxüchi yixĩgüxü̃ rü yema togü rü ñoma airugürüxü̃ nax yixĩgüxü̃.
28Natürü ngĩma ga yema nge rü inangãxü̃, rü ngĩgürügü: —Aixcüma nixĩ i curü ore, Pa Corix, natürü woo airugü rü ta nanangõ̱x i ngẽma õnatüchi i mechatüü̃gu nayixẽẽxü̃ i ngẽma ĩpataarü yoraxacügü —ngĩgürügü.
29Rü yexguma ga Ngechuchu rü ñanagürü ngĩxü̃: —Aixcüma name nixĩ i ngẽma nüxü̃ quixuxü̃. Rü marü name i cutaegu, erü ngẽma ngo̱xo rü marü ínaxũxũ ngĩwa i cuxacü —ñanagürü.
30Rü yexguma ngĩpatawa nanguxgu ga yema nge, rü ngürücarewa ngĩxü̃ iyanguéxü̃ ga yema ngĩxacü. Rü yema ngo̱xo rü marü ngĩwa ínaxũxũ.
Ngechuchu nanamexẽxẽ ga wüxi ga yatü ga ngauchiẽ̱xcü rü moxü̃cü
31Rü Tíruanewa ínaxũxũ ga Ngechuchu. Rü Chidóü̃wa naxüpetü, rü ñu̱xũchi Gariréaarü naxtaxawa nangu ga Decaporíchiuanewa.
32Rü yéma naxü̃tawa nanagagü ga wüxi ga yatü ga ngauchiẽ̱xcü rü moxü̃cü. Rü nüxna nacagü ga nüxü̃ nax yangõgüxü̃ca̱x.
33Rü yexguma ga Ngechuchu rü noxrüwama duü̃xü̃güna nanaga. Rü naxmachixẽgu nixuxme̱x, rü naxbü̱xágümaxã nügü yawaixme̱xẽẽãcüma norü conügu ningõgü.
34Rü yemawena rü daxũ nadawenüãcüma yáxna narüngü, rü gumá yatüxü̃ ñanagürü: —¡Efatá! —ñanagürü. Rü ngẽma rü: “¡Ingoxna, Pa Naxmachixẽ!” ñaxü̃chiga nixĩ.
35Rü yexgumatama ningo̱xnamachi̱xẽ ga gumá ngauchi̱xẽxcü, rü norü conü rü marü narüme rü mea nidexa.
36Rü Ngechuchu rü duü̃xü̃güxü̃ namu nax taxúemaama nüxü̃ yaxugüexü̃ca̱x. Natürü yexguma yexeraãcü duü̃xü̃güna nachúxãgu ga nax taxúemaama nüxü̃ yaxugüexü̃ca̱x ga nachiga rü yexeraãcü nüxü̃ nixugüeama.
37Rü poraãcü naba̱i̱xãchiãẽgü ga duü̃xü̃gü, rü ñanagürügü: —Guxü̃ma i ngẽma naxüxü̃ rü namexẽchi. Rü woo ngauxchi̱xẽgüxü̃ rü nayango̱xnamachi̱xẽxẽẽgü, rü ngea̱xgüxü̃ rü nayadexagüxẽxẽ —ñanagürügü.
Právě zvoleno:
Ore i mexü̃ ga Márcu ümatüxü̃ 7: tcaP
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2022, Wycliffe Bible Translators, Inc. All rights reserved.
