Naanearü ügüchiga 44
44
Yúchepáü̃ ga nawa naxaxexü̃chiga
1Rü yemawena ga Yúche rü nanamu ga yema yatü ga napatamaxã icuáxü̃, rü ñanagürü: —¡Trigumaxã mea nüxü̃́ yaxüãcugü i norü chacugü i ngẽma duü̃xü̃gü! ¡Rü ngẽxmatama wüxichigüarü chacugügu ngĩxü̃ nanu i norü diẽru!
2Rü ngẽxgumarüxü̃ ta i chorü axepáxü̃ i diẽrumünaxca̱x, rü ngẽma rübumaexü̃ i naenexẽarü chacua̱xgu tá cuyaxǘcuchi ngĩmaxã i ngẽma diẽru i trigutanü ngĩxü̃ inaxãgücü —ñanagürü.
3Rü moxü̃ãcü ga yexguma noxri iyanagóxgu ga üa̱xcü, rü Yúche inanamuãchitanü ga naenexẽgü namaxã ga norü búrugü.
4-5Rü yexguma taxũta yáxü̃wa nangugügu, rü Yúche rü norü duü̃xü̃xü̃ namu, rü ñanagürü nüxü̃: —¡Nawe nangẽ i ngẽma duü̃xü̃gü! Rü ngẽxguma nüxü̃ icuyangauxgu, rü ñacugürü tá nüxü̃: “¿Rü tü̱xcüü̃ i chixexü̃maxã penatáeguxẽxẽ i ngẽma mexü̃ i chorü cori pexca̱x üxü̃? ¿Rü tü̱xcüü̃ naxca̱x pengĩ́xü̃ i ngẽma chorü coriarü axepáxü̃ i diẽrumünaxca̱x i nawa naxaxexü̃ rü nawa nüxü̃ nacuáxü̃ ega ta̱xacü i ẽxü̃guxü̃ ngupetügu? Rü ngẽmaãcü poraãcü chixexü̃ pexüe”, ñacugürü tá nüxü̃ —ñanagürü ga Yúche.
6Rü yexguma Yúchearü duü̃xü̃ naenexẽgüxü̃ iyangauxgu, rü yematama ore ga Yúche namaxã nüxü̃ ixuxü̃ãcütama nüxü̃ nixu.
7Rü nüma ga naenexẽgü rü nanangãxü̃gü, rü ñanagürügü: —¿Tü̱xcüü̃ ngẽma ñacurügü toxü̃? Rü toma rü taguma ngẽma taxü.
8Rü yexguma noxri Canaáü̃wa ne taxĩxgu, rü yema diẽru ga torü chacugügu ngĩxü̃ itayangaugücü, rü marü pexü̃́ ngĩxü̃ tawoeguxẽxẽ. ¿Rü ñuxũcürüwa nagu perüxĩnüexü̃ nax perü coripatawa naxca̱x tangĩ́xü̃ i norü diẽrumü rüe̱xna norü úiru?
9¡Rü ẽcü tayux ya yíxema tümaarü chacuwa nüxü̃ icuyanga̱u̱xe i ngẽma axepáxü̃! Rü woo i toma rü ta perü puracütanüxü̃ tá tixĩgü —ñanagürügü.
10Rü yexguma ga yema Yúchearü duü̃xü̃ rü ñanagürü: —Ngẽma pema nüxü̃ pixuxü̃ãcüma tá pemaxã chanaxü. Natürü ya yíxema tümaxü̃tawa nüxü̃ ichayangauxe i ngẽma axepáxü̃, rü yíxexicatátama tixĩ ya chorü duü̃xü̃xü̃ ixĩxẽ. Rü yíxema taxuxü̃ma i chixexü̃ ügüxe rü tá tüxü̃ chinge̱xgü —ñanagürü.
11Rü yexguma ga wüxichigü rü paxa ínananuü̃ ga norü trigupüxü̃, rü nayawẽgü.
12Rü yexguma ga yema Yúchearü duü̃xü̃ rü wüxichigüarü chacugu nidaugüchigü. Rü yema rüyamaexü̃arü chacuwa inanaxügü ñu̱xmata rübumaexü̃arü chacuwa nangu. Rü Bẽyamíü̃arü chacugu nixĩ ga nüxü̃ iyangauxü̃ ga yema axepáxü̃.
13Rü yexguma ga guxü̃ma ga yema nügüenexẽgü rü norü ngechaü̃maxã nügü narügáutechirugü. Rü ñu̱xũchi wüxichigü norü búruétügu nananugü ga norü trigupüü̃gü, rü gumatama ĩane ga Yúche nawa yexmaneca̱x nawoegu.
14Rü yexguma Yúchepatawa nangugügu ga Yudá namaxã ga naenexẽgü, rü nüma ga Yúche rü napatawatama nayexma. Rü yema naenexẽgü rü nape̱xegu ñaxtüanegu nanangücuchitanü.
15Rü yexguma ga Yúche rü nüxna naca, rü ñanagürü: —¿Ta̱xacü nixĩ i pexüxü̃ i pemax? ¿Tama ẽ̱xna nüxü̃ pecua̱x nax tüxü̃ chacua̱xamaxü̃ ega ta̱xacü ixüxgux? —ñanagürü.
16Rü yexguma ga Yudá rü nanangãxü̃, rü ñanagürü: —¿Ta̱xacüxü̃ chi cumaxã tixugüxü̃? ¿Rü ñuxãcü chi cuxca̱x tanango̱xẽẽxü̃ nax toxü̃́ cuyaxõxü̃ca̱x nax tama toma yixĩxü̃ nax cuxü̃́ tangĩ́xü̃? Bexmana Tupana rü torü chixexü̃gagu toxü̃ napoxcue. Rü daxegü tixĩgü. Rü guxãma i toma rü curü duü̃xü̃güxü̃ toxü̃ ixĩgüxẽxẽ wüxigu namaxã ya yimá axepáxü̃xü̃ naxü̃tawa nüxü̃ ipeyangauxcü —ñanagürü.
17Natürü ga Yúche rü nanangãxü̃ rü ñanagürü: —Taxuca̱xma guxãma nua tarücho. Rü yimá axepáxü̃xü̃ naxü̃tawa nüxü̃ iyangauxcüxicatama tá nixĩ ya chorü puracüruxü̃ ixĩcü. Rü pema rü marü name i penatüca̱x pewoegu. Rü taxúetama pexü̃ tachixewe —ñanagürü.
Yudá rü Bẽyamíü̃étüwa nachogü
18Rü yexguma ga Yudá rü Yúcheca̱x nixũ, rü ñanagürü nüxü̃: —Pa Chorü Corix, rü cuxü̃ chaca̱a̱xü̃ nax cuxicatama cumaxã nüxü̃ chixuxü̃ i wüxi i ore. ¡Rü taxṹ i chomaxã cunuxü̃, erü nüxü̃ chacua̱x nax cuma rü marü Faraóü̃rüü̃tama quixĩxü̃!
19-20Cuma rü toxna naxca̱x cuca ga yexguma rü tamaxü̃gu ya tonatü rü nangẽxma i to i toenexẽ. Rü toma rü cuxü̃ tanangãxü̃ rü cumaxã nüxü̃ tixu rü tonatü rü marü tayaxü̃. Rü ñu̱xũchi cumaxã nüxü̃ tixu nax nangẽxmaxü̃ i wüxi i toenexẽ i ngextü̱xüxü̃ ga yexguma tonatü marü ya̱xgu íxracü. Rü yimá toenexẽ rü tonatü poraãcü nüxü̃ nangechaü̃, erü yixicatama nixĩ ya tümane ya íyaxücü ga wüxitama ga mamáwaü̃cü. Yerü gumá nai ga naenexẽ rü marü nayu.
21Rü yexguma ga cuma rü toxna naxca̱x cuca nax nua tanagaxü̃ca̱x erü nüxü̃ cudauxchaü̃.
22Rü toma rü cumaxã nüxü̃ tixu nax tama tonatü nua namuxü̃ ya yimá toenexẽ ya ngextü̱xücü, erü ngẽxguma chi nua naxũxgux rü ta̱xacü nüxü̃ ngupetügu rü chi ngechaü̃maxã tayu ya tonatü.
23Natürü ga cuma rü tomaxã nüxü̃ quixu rü ngẽxguma taxũtáma towe naxũxgu rü taxũtáma toxü̃ cuyaxu.
24Rü yexguma noxri nua tayawoeguxgu, rü tonatümaxã nüxü̃ tixu ga guxü̃ma ga yema tomaxã nüxü̃ quixuxü̃.
25Natürü yexguma marü nagu̱xgu ga torü trigu rü tonatü rü wenaxarü nua toxü̃ tamugü nax nua tríguca̱x tayataxegüxü̃ca̱x.
26Natürü ga toma rü tümamaxã nüxü̃ tixu ga yema cuga, rü ñatagürügü: “Taxuacüma ngéma taxĩ ega tama towe naxũxgu ya yimá toenexẽ ya rübumaecü ya Bẽyamíü̃. Erü ngẽxguma tama towe naxũxgu, rü taxucürüwatama ãẽ̱xgacüxü̃tawa tangugü”, ñatagürügü tüxü̃.
27Rü tüma ga tonatü rü ñatagürü toxü̃: “Pema rü meama nüxü̃ pecua̱xgü ga yema cho̱xma̱x ga Raqué rü taxrexicatama nixĩ ga ngĩne.
28Rü wüxi rü marü choxna inayarütaxu, rü yexgumacürüwa marü taguma nüxü̃ chadau. Rü nüxü̃ chacua̱x rü aixcüma nixĩ ga ai nax nangṍxü̃.
29Rü ñu̱xma ega choxna peyagaxgu ya yimá chaune ya Bẽyamíü̃, rü ngürüãchi ta̱xacürü chixexü̃ nüxü̃ üpetügu, rü pegagu tá nixĩ nax ngechaü̃maxã nayuxü̃ i ñaa yaxguã̱x”, ñatagürü ga tonatü.
30-31Rü ngẽmaca̱x cumaxã nüxü̃ chixu ya torü papa rü poraãcüxüchima nüxü̃ tangechaü̃ ya yimá tümane ya bucü. Rü ngẽmaca̱x i ñu̱xma ega tama tomaxã nataegu̱xgu, rü tüma ya tonatü rü tá tayu ega tama tomaxã ínanguxgu. Rü ngẽmaãcü togagu tá nixĩ i ngechaü̃maxã nayuxü̃ ya yimá yacü ya tonatü.
32Rü choma rü tümamaxã nüxü̃ chixu ga chorü papa rü chomatátama nüxna chadau ya yimá toenexẽ ya rübumaecü. Rü ñachagürü tüxü̃: “Rü ngẽxguma tama cuxca̱x chanataeguxẽẽgux, rü choma tá nixĩ i guxü̃gutáma chayangexü̃ i ngẽma guxchaxü̃”, ñachagürü tüxü̃.
33Rü ngẽmaca̱x cuxü̃ chaca̱a̱xü̃, Pa Ãẽ̱xgacüx, nax chomawaxi nuxã cuxü̃tagu charüxã́ũxü̃ nachicüxü ya yimá chauenexẽ ya rübumaecü. ¡Rü ẽcü íyamu i nüma nax naenexẽgümaxã nataeguxü̃ca̱x!
34¿Rü ñuxãcü tá chaunatüca̱x chataeguxü̃ ega tama chowe nataeguxgu i ngẽma chauenexẽ? Rü tama nüxü̃ chadauxchaü̃ i ngẽma ngechaü̃ i chaunatü tá naxca̱x ingexü̃ —ñanagürü ga Yudá.
Právě zvoleno:
Naanearü ügüchiga 44: tcaP
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2022, Wycliffe Bible Translators, Inc. All rights reserved.