Naanearü ügüchiga 41
41
Yúche rü nanango̱xẽxẽ ga yema Faraóü̃ nagu ãnegüxü̃
1Rü yemawena rü taxre ga taunecü nangupetü. Rü wüxi ga chütaxü̃gu rü naxãnegü ga Faraóü̃. Rü nanegüwa rü taxtü ga Nírucutügu nachi.
2Rü yema taxtüwa rü 7 ga woca ga ingüexüchixü̃ rü imexẽchixü̃ ínachoõchi rü yema taxtüanacüwa maxẽ nangõ̱xgü.
3Rü yemawena ínachoõchi ga to ga 7 ga woca ga ichixemarexü̃ rü ixaexüchixü̃. Rü yema togüxü̃tagu nayachigü ga taxtüanacüwa.
4-5Rü yemawena ga yema wocagü ga ichixemarexü̃ rü ixaexüchixü̃, rü yema 7 ga woca ga ingüexüchixü̃ rü imexẽchixexü̃ ínagagü. Rü yexguma ga nüma ga Faraóü̃ rü naba̱i̱xãchi, natürü wenaxarü nape rü to ga nanegügu naxãnegü. Rü yema nanegüwa rü nüxü̃ nadau ga 7 ya̱xa ga trigu ga ixããcune rü imexya̱xaxüchíne ga wüxĩnewatama nguxü̃ne.
6-7Rü gumawenatama rü yemanewatama nanguxü̃ ga nai ga 7 ya̱xa ga trigu ga ingeãcune rü buanecümaxã ipagüne. Rü guma 7 ya̱xa ga ipagüxü̃ rü ínanagagü ga guma 7 ya̱xa ga ixããcune rü ime̱xyaxane. Rü yexguma ga nüma ga Faraóü̃ rü naba̱i̱xãchi, rü nüxü̃ nicua̱xãchi nax wüxi ga nanegümare yixĩxü̃.
8Rü moxü̃ãcü ga pa̱xmama rü poraãcü naxoegaãxẽ naxca̱x ga yema nanegü. Rü naxca̱x nangema ga guxü̃ma ga yema iyuüxü̃ rü duü̃xü̃gü ga nüxü̃ cua̱xüchigüxü̃ ga Equítuanecüã̱x. Rü nüma ga Faraóü̃ rü namaxã nüxü̃ nixu ga nanegü. Natürü taxuxü̃ma ga yema yuüexü̃ nüxü̃ nacua̱x nax ta̱xacüchiga yixĩxü̃ ga yema nanegü.
9-10Rü yexguma ga gumá baeruü̃güarü ãẽ̱xgacü rü Faraóü̃maxã nüxü̃ nixu rü ñanagürü: —Pa Chorü Ãẽ̱xgacüx, rü ñu̱xchaama nüxna chacua̱xãchi nax ñuxãcü chixexü̃ chaxüxü̃ yerü taguma cumaxã nüxü̃ chixuchiga ga wüxi ga ngextü̱xücü ga poraãcü choxü̃ rüngü̃xẽẽcü. Rü yexguma namaxã cunuxgu ga yema paũarü üruü̃güarü ãẽ̱xgacü rü chomaxã rü ta cunu, rü yema curü purichíaarü capitáü̃patawa yexmaxü̃ ga poxcuchicaxü̃gu toxü̃ cumugü.
11Rü wüxi ga chütaxü̃gu ga paũarü üruü̃güarü ãẽ̱xgacü rü naxãnegü, rü choma rü ta chaxãnegü. Rü wüxichigü ga yema nagu taxãnegüxü̃ rü tama nüxü̃ tacua̱x nax ta̱xacüchiga yixĩxü̃.
12Rü yéma poxcupataü̃wa tomaxã nayexma ga wüxi ga ngextü̱xücü ga Ebréutanüxü̃ ixĩcü. Rü nüma rü poxcupataü̃arü ãẽ̱xgacüarü puracütanüxü̃ nixĩ. Rü namaxã nüxü̃ tixu ga tonegü. Rü nüma rü nüxü̃ nacua̱x nax ta̱xacüchiga yixĩxü̃ ga tonegü.
13Rü guxü̃ma ga yema tomaxã nüxü̃ yaxuxü̃rüü̃ãcütama ningu. Rü choma rü wenaxarü chorü puracüca̱x chataegu, natürü ga yema chomücü rü purichíagü nanawẽxnaxãgü —ñanagürü.
14Rü yexguma ga nüma ga Faraóü̃ rü Yúcheca̱x nangema. Rü yexgumatama Yúchexü̃ poxcupataü̃wa ínamuxũchigü. Rü mea niyoeru rü mexü̃ ga naxchirugu ínacuxuchi. Rü yemaacü Faraóü̃pe̱xewa naxũ.
15Rü nüma ga Faraóü̃ rü ñanagürü nüxü̃: —Ngewa̱xarü chütaxü̃gu rü choxü̃́ nangexma i wüxi i chaunegü. Natürü tataxuma ya texé ya nüxü̃ cuáxe nax nüxü̃ tixuxü̃ nax ta̱xacüchiga yixĩxü̃. Natürü cuxü̃ chacuáxchiga rü ngẽxguma cuma nüxü̃ cuxĩnügu i wüxi i nanegü rü nüxü̃ cucua̱x nax nüxü̃ quixuxü̃ nax ta̱xacüchiga yixĩxü̃ —ñanagürü ga Faraóü̃.
16Rü yexguma ga Yúche rü nanangãxü̃ rü ñanagürü: —Pa Chorü Ãẽ̱xgacüx, ngẽma rü tama chowa nangẽxma, natürü Tupana tá nixĩ ya cuxca̱x nango̱xẽẽcü —ñanagürü.
17Rü yexguma ga Faraóü̃ rü Yúchexü̃ ñanagürü: —Chaunegüwa rü taxtü ga Nírucutügu chachi.
18Rü yéma taxtüwa ínachoõchi ga 7 ga woca ga ingüexüchixü̃ rü imexẽchixü̃. Rü taxtüanacüwa maxẽne nanangõ̱xgü.
19Rü yemawena ínachoõchi ga to ga 7 ga woca i chixemarexü̃ rü ixaexüchixü̃. Rü taguma ñuxgu nüxü̃ chadau i woca i nangexgumaraxü̃xü̃ i chixexü̃ i guxü̃ma i nua Equítuanewa.
20Rü yema wocagü ga ixaexüchixü̃ rü ichixemarexü̃, rü yema 7 ga woca ga ingüexü̃xü̃ ínagagü.
21Natürü ga woo yema woca ga ingüexü̃xü̃ nax ínagagüxü̃, rü aixrügumarüü̃tama nixaexüchi. Rü yexguma rü chaba̱i̱xãchi.
22Rü yemawena rü wena chaxãnegü. Rü yema chaunegüwa rü nüxü̃ chadau ga 7 ya̱xa ga trigu ga ixããcuxü̃ rü imexya̱xaxü̃ ga wüxĩnewatama nguxü̃xü̃.
23Rü yemawena yemanewatama nanguxü̃ ga to ga 7 ya̱xa ga trigu ga ingeãcuxü̃ rü buanecümaxã ipagüxü̃.
24Rü yema 7 ya̱xa ga ipagüxü̃, rü yema imexya̱xaxü̃xü̃ ínagagü. Rü ñaa taxre i chaunegü, rü ngẽma chorü duü̃xü̃gü i iyuǘexü̃maxã nüxü̃ chixu, natürü taxuxü̃ma i ngẽma yuüexü̃ rü nüxü̃ nacua̱x nax nango̱xẽẽãxü̃ nax ta̱xacüchiga yixĩxü̃ i ngẽma taxre i chaunegü —ñanagürü.
25Rü yexguma ga Yúche rü Faraóü̃xü̃ nangãxü̃, rü ñanagürü: —Pa Chorü Ãẽ̱xgacüx, ngẽma taxre i cunegügü rü wüxitama i ĩnüchiga nixĩ. Rü Tupana rü cumaxã nüxü̃ nixu i ngẽma nüma tá naxüxü̃.
26Rü ngẽma 7 i wocagü i imexẽchixü̃, rü 7 ya taunecüchiga nixĩ. Rü ngẽmachigatama nixĩ i ngẽma 7 ya̱xa i trigu i mexẽchixü̃. Rü ngẽma taxre i cunegü rü ngẽmachigatama nixĩ.
27Rü ngẽma 7 i woca i ixaexüchixü̃ rü ichixemarexü̃ ga yema togüarü wixweama íchoõchixü̃, rü 7 ya taunecüchiga nixĩ. Rü ngẽmachigatama nixĩ i ngẽma 7 ya̱xa i trigu i buanecümaxã ipagüxü̃. Rü ngẽma rü nüxü̃ nixu nax 7 ya taunecü tá ngebüanexü̃, rü tá taiya ínguxü̃.
28Rü ngẽmachiga nixĩ ya Tupana cumaxã nüxü̃ ixuxü̃, Pa Chorü Ãẽ̱xgacüx. Rü ngẽmaãcü tá nanaxü ya Tupana.
29Rü 7 ya taunecü tá naxãbüane i guxü̃ma i Equítuanewa.
30Rü ngẽmawena rü 7 ya taunecü tá poraãcü nangebüane. Rü ngẽmagagu rü taxúetama nüxna tacua̱xãchi ga gumá taunecügü ga nagu naxãbüanecü ga Equítuanewa. Rü ngẽma taiyagagu rü tá taxü̃ i guxchaxü̃wa nangẽxma i ñaa nachixü̃anewa.
31Rü tá nataxüchixü̃ i ngebüane. Rü ngẽmaca̱x nataxutama i ta̱xacüwa nüxü̃ idauxü̃ nax ñuxãcü naxãbüanexü̃ ga ü̃pa.
32Pa Ãẽ̱xgacüx, taxree̱xpü̱xcüna nagu cuxãnegü i ngẽmatama nanegü, erü nüma ya Tupana rü aixcüma tá nanaxü i ngẽma. Rü paxatáma nanaxü.
33Rü ngẽmaca̱x, Pa Chorü Ãẽ̱xgacüx, rü name nixĩ nax naxca̱x cudauxü̃ ya wüxi ya yatü ya nüxü̃ cua̱xüchicü nax naxme̱xgu cunaxüxü̃ca̱x i ñaa nachixü̃ane.
34Rü name nixĩ nax nüxü̃ cuxunetaxü̃ i togü i ãẽ̱xgacügü nax guxü̃ i ñaa nachixü̃anegu yaxĩãgütanüxü̃ca̱x, rü guxü̃ i duü̃xü̃gütanüwa yadeetanüãxü̃ca̱x i trigu i nua Equítuanewa nabugüxü̃ nagu ya yimá 7 ya taunecügü ya nagu naxãbüanecü. Rü ngẽma 5 wetaxü̃ i triguwachigü rü tá cuxca̱x ínanaxüxüchi i wüxiwetaxü̃ nax namaxã cunguxü̃xü̃ca̱x.
35Rü ngẽmaãcü tá nixĩ i nanutaque̱xeãxü̃ i guxü̃ma i ngẽma trigu i nagu ya yimá 7 ya taunecü ya nagu namucü. Rü ñu̱xũchi name i wüxichigü ya ĩanewa ngẽxmaxü̃ i trigupataü̃gu namaxã nanguxü̃gü nax ngéma cuma namaxã icucuáxü̃ca̱x nax duü̃xü̃gü tayauxgüxü̃ca̱x i ngẽxguma taiya ínguxgu.
36Rü ngẽmaãcü i ngẽma trigu rü tá mea namaxã nanguxü̃gü naxca̱x i cuchixü̃ane nax tama taiyamaxã nayuexü̃ca̱x i duü̃xü̃gü i ngẽxguma ínanguxgu ya yimá 7 ya taunecü ya nagu tá nangebüanecü i nua Equítuanewa —ñanagürü ga Yúche.
Yúche rü ãẽ̱xgacüxü̃ ningucuchi ga Equítuanewa
37Rü yema Yúchearü ucu̱xẽ rü Faraóü̃ca̱x name, rü norü ngü̃xẽẽruü̃gü rü ta norü me nixĩ.
38Rü yemaca̱x ga Faraóü̃ rü ñanagürü norü duü̃xü̃güxü̃: —¿Ngextá chi nüxü̃ iyarünga̱u̱xü̃ i to i yatü i ñaa Yúcherüxü̃ Tupanaãxẽ nawa ngẽxmaxü̃? —ñanagürü.
39Rü yexguma ga Faraóü̃ rü Yúchexü̃ ñanagürü: —Dücax, rü nataxuma i cuxü̃ rüyexeraxü̃ nax nüxü̃ nacuáxü̃, erü cuma nixĩ ya Tupana cuxü̃ nüxü̃ cua̱xẽẽxü̃ i guxü̃ma i ngẽma nagu chaxãnegüxü̃.
40Rü cuma tá nixĩ i chopatamaxã icucuáxü̃. Rü guxü̃táma i chorü duü̃xü̃gü rü tá cuga naxĩnüe. Rü chaxica tátama nixĩ i cuxü̃ charüyexeraxü̃ erü choma rü ñaa nachixü̃anearü ãẽ̱xgacü chixĩ.
41Dücax, ñu̱xma rü choma rü cuxü̃ chaxuneta nax cuma tá ãẽ̱xgacü quixĩxü̃ i guxü̃ma i ñaa Equítuanewa —ñanagürü.
42Rü yexguma yema ñaxgu ga Faraóü̃ rü nügüme̱xẽwa ngĩxü̃ nanangoxochi ga norü ãnera ga cua̱xruxü̃ ngĩwa yexmacü, rü Yúcheme̱xẽwa ngĩxü̃ ningucuchi. Rü ñu̱xũchi norü duü̃xü̃güxü̃ namu nax mexẽchixü̃ ga naxchirugu yacu̱xẽẽgüaxü̃ca̱x, rü úirumaxã naxüchagügüãxü̃ca̱x.
43Rü yemawena rü ñu̱xũchi nayamue nagu ga guma caru ga Faraóü̃arü caruweama üxü̃ne ga cowaru itúchigüne. Rü duü̃xü̃güxü̃ namu nax nape̱xewa ñaxü̃maxã aita naxüexü̃: —¡Penaxüchica! —ñaxü̃maxã. Rü yemaacü nixĩ ga Yúche ga guxü̃ma ga Equítuanemaxã inacuáxü̃.
44Rü ñu̱xũchi ga Faraóü̃ rü ñanagürü Yúchexü̃: —Choma nax Equítuanearü ãẽ̱xgacü chixĩxü̃, rü cuxna chaxãga nax cuxme̱xwa nangẽxmaxü̃ i guxü̃ma i Equítuane —ñanagürü.
45Rü yexguma ga Faraóü̃ rü Equítuanecüã̱xégamaxã Yúchexü̃ naxüéga. Rü Cháfenax-panéagu nanaxüéga. Rü ñu̱xũchi nanaxüxma̱x ngĩmaxã ga Achená ga chacherdóte ga Potiféraxacü. Rü nüma ga ngĩnatü rü ĩane ga Óü̃arü chacherdóte nixĩ. Rü yemaacü nixĩ ga Yúche ga Equítuanearü ãẽ̱xgacü yixĩxü̃.
46Rü nüma ga Yúche rü 30 ga taunecü nüxü̃́ nayexma ga yexguma Faraóü̃ ga Equítuanearü ãẽ̱xgacüpe̱xewa nagagüãgu rü nüma ga Faraóü̃ namücüxü̃ yangucuchixẽẽgu. Rü nüma ga Yúche rü Faraóü̃xü̃ narümoxẽ rü inaxũãchi. Rü guxü̃ma ga Equítuanegu nixũãgüchigü.
47Rü 7 ga taunecügu rü meama nayae ga trigu rü poraãcü naxãbüane ga guxü̃wama ga Equítuanewa.
48Rü nüma ga Yúche rü 7 ga taunecügu nananutaque̱xe ga guxü̃ma ga yema trigu ga ãẽ̱xgacüna üxü̃ ga Equítuanewa. Rü wüxichigü ga ĩanewa yexmane ga ãẽ̱xgacüarü trigupataü̃gu namaxã ninguxü̃chigü ga yema trigu ga guma ĩanena ngaicamaxü̃ ga naanewa nabuxgüxü̃.
49Rü Yúche rü nananutaque̱xe ga trigu, rü ñoma márpechinüwa ngẽxmacü ya naxnücüte̱xewarüxü̃ nixĩ ga nax namuxũchixü̃. Rü yema nax namuxũchixü̃gagu rü düxwa tama nixugü.
50Rü naxü̃pa ga nax inaxügüxü̃ ga nax nangebüanexü̃, rü marü Yúcheaxü̃́ itaxrexacü ga naxma̱x ga Achená.
51Rü gumá yacü ga nane rü Manachégu nanaxüéga yerü ñanagürü: —Tupana rü choxü̃ nüxü̃ inayarüngümaxẽxẽ i guxü̃ma ga yema guxchaxü̃gü ga choxü̃ ngupetüxü̃, rü ñu̱xma rü marü tama chautanüxü̃ca̱x changechaü̃ —ñanagürü.
52Rü guma rübumaecü ga nane rü Efraíü̃gu nanaxüéga, yerü ñanagürü: —Tupana rü ñaa nachixü̃ane i nawa ngúxü̃ chingexü̃wa choxna nanamu ya chaune —ñanagürü.
53Rü nangupetü ga gumá 7 ga taunecü ga nagu trigu muxũchicü ga Equítuanewa.
54Rü inaxügü ga gumá 7 ga taunecü ga nagu ngebüane íngucü, yematama Yúche nüxü̃ ixuxü̃rüxü̃. Rü guxü̃ma ga togü ga nachixü̃anewa rü poraãcü taiya nangu̱x. Natürü ga Equítuanewa rü tama taiya nangu̱x, yerü nayexma ga nabü ga namaxã nanguxü̃güxü̃.
55Rü yexguma yema Equítuanecüã̱x marü igu̱xbügügu, rü Faraóü̃xü̃tawa naxĩ nax trigu nüxna tayacagüxü̃ca̱x. Rü yexguma ga nüma ga Faraóü̃ rü guxü̃ma ga Equítuanecüã̱xmaxã nüxü̃ nixu rü ñanagürü: —¡Yéa Yúchexü̃tawa pexĩ, rü penaxü̱x i ngẽma nüma pemaxã nüxü̃ yaxuxü̃! —ñanagürü.
56Rü yexguma marü guxü̃ma ga Equítuanewa nangebüanegu, rü nüma ga Yúche rü nayawãxnagü ga guma trigupataü̃gü nax yema Equítuanecüã̱xgüxü̃ namaxã nataxexü̃ca̱x, yerü niyexeraguchigü ga taiya.
57Rü guxü̃ma ga yema togü ga nachixü̃anecüã̱x ga duü̃xü̃gü rü Equítuanewa naxĩ nax Yúchexü̃tawa naxca̱x nataxegüxü̃ca̱x ga trigu. Yerü taxuxü̃ma ga to ga nachixü̃anewa nayexma ga nabü.
Právě zvoleno:
Naanearü ügüchiga 41: tcaP
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2022, Wycliffe Bible Translators, Inc. All rights reserved.