Ínachoxü̃xü̃chiga 1
1
Iraétanüxü̃ rü ngúxü̃ ningegü ga Equítuanewa
1-4Ñaa nixĩ i naégagü ga Acóbu nanegü ga namaxã wüxigu naxma̱xgümaxã rü naxacügümaxã Equítuanewa ngugüxü̃. Rü Rubéü̃ nixĩ ga wüxi rü Chimeóü̃ nixĩ ga to, rü Lebí, rü Yudá, rü Ichacá rü Chaburóü̃ rü Bẽyamíü̃ rü Dáü̃, rü Netarí, rü Gáx, rü Aché.
5Rü guxü̃ma ga yema Acóbutanüxü̃ ga Equítuanewa ngugüxü̃ rü 70 nixĩ. Rü nüma ga Yúche rü woetama marü Equítuanewa nayexma.
6Rü nüma ga Yúche rü nayu, rü naenexẽgü rü guxü̃ma ga yema togü ga natanüxü̃ ga yexguma maxẽxü̃, rü nayue.
7Natürü ga yema Iraétanüxü̃ rü nimuxacü. Rü yemaacü paxãma nimu, rü pora nüxü̃́ nayexma yerü namuxũchi. Rü nanapáxẽẽgü ga guxü̃ma ga Equítuanewa yexmaxü̃.
8-9Natürü yemawena ga Equítuanewa rü nixücu ga wüxi ga ãẽ̱xgacü ga tama Yúchexü̃ cuácü. Rü nüma rü norü duü̃xü̃gümaxã ñanagürü: —Ngẽma duü̃xü̃gü i Iraétanüxü̃ rü namuxũchi rü tüxü̃ narüporamaegü.
10¡Rü ngẽmaca̱x, ngĩxã naxca̱x tadaugü nax ñuxãcü íyachaxãchixẽẽxü̃ nax yamuxü̃! Erü ngẽxguma chi ngürüãchi to i nachixü̃ane tamaxã nügü daixgu, rü nüma i Iraétanüxü̃ rü tá tórü uanügütanügu naxãgü nax tüxü̃ nada̱i̱xü̃ca̱x rü ñu̱xũchi ngẽmaãcü nayoxniegü nax tüxna naxĩgüxü̃ —ñanagürü.
11Rü yemaca̱x ga yema Equítuanecüã̱xgü rü nüxü̃ naxuneta ga ñuxre ga yatügü ga puracümaxã icua̱xgüxü̃ nax poraãcü yema Iraétanüxü̃xü̃ napuracüexẽẽxü̃ca̱x. Rü nüxü̃ nanaxüxẽxẽ ga taxre ga ĩanegü ga Pitóü̃gu ãégane rü Ramchégu ãégane. Rü guma ĩanegügu nixĩ ga namaxã nanguxü̃xü̃ ga õnagü ga Equítuanecüã̱xarü ãẽ̱xgacü ga Faraóü̃.
12Natürü yexguma yexeraãcü chixriãcü namugüã̱xgu, rü yexeraãcü nimuetanüama ga Iraétanüxü̃. Rü yemaca̱x nixĩ ga Equítuanecüã̱xgü ga poraãcü nüxü̃ namuü̃exü̃.
13-14Rü nüma ga Equítuanecüã̱xgü rü yexeraãcü chixri namaxã nachopetü rü poraãcü nanapuracüexẽẽxü̃chi. Rü yemaacü yema Iraétanüxü̃xü̃ nachixeãẽgü. Rü mairaxü̃arü puxmücharawa nanamugü nax ladriyune naxügüxü̃ca̱x rü dexámaü̃arü üwa nanapuracüexẽxẽ nax naanewa nayáxü̃ca̱x ga taxtüarü dexá. Rü yemaacü nixĩ ga yema Iraétanüxü̃maxã chixri inacua̱xgüxü̃.
15-16Rü nüma ga Equítuanecüã̱xarü ãẽ̱xgacü rü ngĩmaxã nidexa ga Chifá rü Fuá ga Iraétanüxü̃arü buexacüxẽẽruxü̃. Rü ñanagürü ngĩxü̃: —Ngẽxguma penaxíraxacüxẽẽ̱xgu i ngẽma Iraétanüxü̃arü ngexü̃, rü ega nayatüxacügu rü tá peyama̱x i ngẽma naxacü, natürü ega nangexgu rü taxũtáma peyama̱x —ñanagürü.
17Natürü ga ngĩmagü ga yema buexacüxẽẽruü̃gü rü Tupanaxü̃ imuü̃e. Rü yemaca̱x tama inaxü ga yema Equítuanecüã̱xarü ãẽ̱xgacü ngĩmaxã nüxü̃ ixuxü̃. Rü tama tüxü̃ idai ga guxema õxchanagü ga iyatüxe.
18Rü yexguma ga gumá ãẽ̱xgacü ga Equítuanecüã̱x rü ngĩxca̱x nangema ga yema buexacüxẽẽruü̃gü, rü ñanagürü ngĩxü̃: —¿Tü̱xcüü̃ penamaxẽxẽxẽ i ngẽma buxü̃gü i yatüxü̃? —ñanagürü.
19Rü yexguma ga ngĩmagü rü inangãxü̃ rü ngĩgürügügü: —Erü ngẽma Iraétanüxü̃ i ngexü̃gü rü tama Equítuanecüã̱x i ngexü̃gürüxü̃ nixĩgü. Rü ngexü̃gü i paxãma íxraxacügüxü̃ nixĩgü, rü taxũta ngéma ngĩxü̃tawa tangugügu rü marü ixíraxacügü —ngĩgürügügü.
20-21Rü yemaacü ga yema Iraétanüxü̃ rü nimuetanüama, rü wüxichigü ga taunecügu rü niyexeragüchigü nax naporaexü̃. Rü yema nax Tupanaxü̃ namuü̃exü̃ ga yema buexacüxẽẽruü̃gü, rü Tupana rü ngĩxü̃ narüngü̃xẽxẽ nax ngĩmagü rü ta yamuxãcügüxü̃ca̱x.
22Rü yemaca̱x ga nüma ga Faraóü̃ rü norü duü̃xü̃güxü̃ namu nax taxtü ga Níruwa tüxü̃ nawoü̃xü̃ca̱x ga guxema Iraétanüxü̃arü õxchanagü ga iyatüxe. Natürü ga guxema i ngexe ga õxchanagü rü tama tüxü̃ nadai.
Právě zvoleno:
Ínachoxü̃xü̃chiga 1: tcaP
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2022, Wycliffe Bible Translators, Inc. All rights reserved.