मरकुस 15
15
पीलातुस नी अगळ ईसु
(मत्ती 2:1-2; 11:14; लुका 23:15; युहन्ना 18:28-38)
1ह़वारे वेगीत, मंदीर ना डायला पुंजारा नी, अने पुडार्या नी, युहदी-धरम ह़ीकाड़न्या, अने आखी पंचु नी बठक हयी, अने तीहया आखा मेळीन वीच्यार काड्या अने ईसु ने बांदीन पीलातुस ना हात मे ह़ोप देदा। 2अने पीलातुस ईसु ने पुछ्यो, “तु युहदी माणहु नो राजो से ह़ु?” ईसु पीलातुस ने केदो, “तु आह़फोत की र्यो।”
3मंदीर ना डायला पुंजारा तीनी पोर घणी ढेरकी वात कीन गुनो लगाड़ र्या हता 4पीलातुस तीने अळी पुछ्यो, “आहया तारी वीरोद मे ढेरेत वात कीन गुनो लगाड़ र्या; तने जपाप नी आपवा हय ह़ु?”
5पण ईसु हजु बी कंय नी जपाप आप्यो, एतरे पीलातुस वहराय ज्यो!
ईसु ने मोत नो डंड आपे
(मत्ती 27:15-31; लुका 23:13-25; युहन्ना 18:39–19:16)
6फसह ना तीवार ना दाड़े युहदी माणहु नी मरजीन तेम यहुद्या राजवाड़ा ना राज करन्यो एक केदड़ा ने छोड़्या करतो हतो। 7बरब्बा नाम नो एक माणेह हतो, तीने सीपायड़ा बीजा दंगो करन्या हत्यारा नी भेळतो जेल मे कुंड देदला। 8आखी गड़दी ना माणहु पीलातुस ने तां जीन ईसम रावण्या करवा बाज ज्या, “जीसम तु अमारी वाटु फसह तीवार ना मोखा पोर एक केदड़ा ने सोड़तो आय र्यो तेमेत कर।” 9-10पीलातुस जाणतो हतो के मंदीर ना डायला पुंजारा ईसु ने कुहराये धरावला से। एतरे पीलातुस तीमने केदो, “मे युहदी माणहु ना राजा ने सोड़ देम, ईसम तमारी मरजी से ह़ु?”
11पण डायला पुंजारा, माणहु ने ईसम कीन जोर वदाड़्या, तमु पीलातुस ने ईसम केवो “तु अमारी वाटु बरब्बा ने सोड़ दे।” 12पण आहयु ह़मळीन पीलातुस तीमने पुछ्यो, “ता, जीने तमु युहदी माणहु नो राजा केय, तीनु मे ह़ु करु?”
13तीहया आड़ीन केदा, “तु हीने ते कुरुस पोर चड़ावीन खुटा ठोकाड़ीन मराय दे।”
14पीलातुस तीमने केदो, “काहा, मराय देम, आहयो कंय गुनो करलो से?” पण तीहया अळी ज्योरेत आड़ीन केदा, “हीने कुरुस पोर चड़ावीन खुटा ठोकीन मराय दे।”
15तत्यार पीलातुस माणहु ना मेळा ने खुस करवा करीन, बरब्बा ने सोड़ देदो, अने ईसु ने ह़ड़का देवाड़ीन तीने कुरुस पोर चड़ावीन खुटा ठोकाड़वा करीन आह़फा ना सीपायड़ा ना हात मे ह़ोप देदो।
सीपायड़ा ईसु नी हाही उड़ावे
(मत्ती 27:27-31; युहन्ना 19:2,3)
16अने सीपायड़ा ईसु ने तीहया हवेली वाळा कीला ना मोय वाळा आंगणा मे ली ज्या, आहया कीला ने प्रीटोरीयुन केय, अने तीहया सीपायड़ा आखा बीजा सीपायड़ा ने बोलाय लाया। 17तीहया ईसु ने जामण्या लुगड़ा पेराया अने काटा नु मुळ्यु गुथीन तीना मुंडा पोर मेक देदा; 18अने तीहया ईसु नी हाही उडाड़ीन ईसु ने केदा, “ए युहदी माणहु ना राजा, वारलो से के?” 19अने तीहया तीना मुंडे वाहण नी ह़ोटी देवा बाज ज्या, अने तीनी पोर थुपवा बाज ज्या अने तीहया मांड्या वळीन ईसु ने वांदवा ना ढोंगड़ा कर्या। 20ईसम करीन तीहया ईसु नी हाही उडाड़ता जीन वारु मजा ली लेदा; अने अळतेण जामण्या डगला नीकाळ देदा; अने तीनात डगला पेराया, अने तीने कुरुस पोर चड़ावीन खुटा ठोकीन मारवा करीन बड़े ली ज्या।
ईसु ने कुरुस पोर चड़ाव्वा
(मत्ती 27:32-44; लुका 23:26-39; युहन्ना 19:17-19)
21 #
रोमीयो 16:13
ईसु भारलु कुरुस उचली-उचलीन थाक ज्यो। तीहयीत टेमे एक सीमोन नाम नो माणेह तां माय्न सरक्यो। आहया सीमोन ने सीपायड़ा जबराण धरीन ईसु नु कुरुस उचलाड़्या आहयो सीमोन कुरेन ह़ेर वाळो हतो अने आहयो सीकन्दर अने रुफुस नो#रोमीयो 16:13 बाह हतो। 22अने सीपायड़ा ईसु ने गुलगुता नाम ना जागा मे ली ज्या, तीनु मतलब से, “माणहु ना मुंडा नो जागो।” 23तां तीहया तीने मोर्र नाम नी दवा भेसकायलो अंगुर नो रोह पीवाड़वा बाज ज्या; पण तीहयो नी पीदो। 24अने अळतेण तीहया तीने कुरुस पोर चड़ावीन खुटा ठोक्या अने तीना लुगड़ा कोयने-कोयने जड़वा जोवे करीन तीहया चीट्ठी नाखीन देख्या, अने ईसम करीन तीना लुगड़ा वाट लेदा।#भजन सहीता 22:18 25अने तीहया ईसु ने ह़ीराण दाड़े नव बजे कुरुस पोर चड़ावीन खुटा ठोक्या। 26अने तीना वीरोद मे जे झुटो गुनो लगाड़ीन तीना बारा मे एक लाकड़ा नी पट्टी पोर लीखीन तीना मुंडा गेथु उपर कुरुस पोर ठोक देदा, तीहयी पट्टी पोर लीखलु हतु, “आहयो युहदी माणहु नो राजा से।” 27अने तीहया ईसु ना आड़े-धेड़े बे चोट्टा ने बी कुरुस पोर चड़ावीन खुटा ठोक्या, एक तीनी जमणी धेड़े अने एक तीनी डाखरी धेड़े। 28ईसम करीन जे बोल खरला सास्तर मे लीखलु हतु तीहयु पुरु हय ज्यु के “तीहयो पापी ह़ाते गीणायहे।”
29 #
मरकुस 14:58; युहन्ना 2:19 अने कुरुस धेड़े माय्न सरकीन जवा वाळा माणहु मुंडु डोलाड़ी-डोलाड़ीन, तीनो वाक काडीन केता हता, “ओहोय लाला! भगवान ना मंदीर ने ओदारवा वाळा, अने तीन दाड़ा मे बणाव्वा वाळा!#भजन सहीता 27:7; 109:25; मरकुस 14:58; युहन्ना 2:9 30कुरुस पोर गेथो हेटो उतरीन आव, अने आह़फा ने बी बचाड़ ले।”
31एमेत कीन मंदीर ना डायला पुंजारा, अने युहदी-धरम ह़ीकाड़न्या ईसु नी हाही उडाड़ता जीन एक-बीजा ने केदा, “हीय्यो बीजा ने बचाड़्यो, हाव आह़फा ने नी बचाड़ सके ह़ु? 32हीय्यो ईस्रायल नो राजा मसी, हाव कुरुस पोर गेथो उतरीन आवे ता आपणु ईने खरो जाणीन ईनी पोर भरहो करया।” अने जे ईसु ह़ाते आड़े-धेड़े जे कुरुस पोर चड़ावीन खुटा ठोकला हता, तीहया बी तीनी हाही उडाड़ता हता।
ईसु नु मरवु
(मत्ती 27:45-56; लुका 23:44-49; युहन्ना 19:28-30)
33अने माथे दाड़े गेथु आखा देस मे मांजणीक दाड़े लग आखी धरती पोर अंदारलु सवायलु र्यु। 34मांजणीक दाड़े ईसु ज्योरेत आड़ीन केदो, “एली, एली, लमा सबकतनी?” ईनु मतलब से, “ए मारा भगवान, ए मारा भगवान, तु मने काहा वीहरीन सोड़ देदो?”#भजन सहीता 22:1
35जे धेड़े उबा हय र्या हता तीमनी मेना थोड़ाक आहयु ह़मळीन केदा, “देखो आहयो ते भगवान वगे गेथी वात केण्या एलीया ने आड़ीन बोलाव्वा बाज र्यो।” 36अने एक जणो दवड़ीन जाय्न पोतु ने बगड़ला रोह मे डुबाड़्यो, अने पोतु ने वाहण ना टोकरा पोर सींडे मेकीन ईसु ने चुहाड़्यो#भजन सहीता 69:21 अने केदो, “हंगा, देखो, एलीया आने उतारवा आवे के नी आवे।” 37अने अळतेण ईसु ज्योरेत आड़्यो अने तीनो जीव सांड ज्यो।
38अने भगवान नो मंदीर नो पड़दो#नीरगमन 26:31-33 उपर गेथो हेटो लग फाटीन बे टुकड़ा हय ज्यो। 39सीपायड़ा नो एक डायलो, ईसु ना कुरुस अगळ उबो हय र्यो हतो, जत्यार तीहयो ईसु ने ईसम आड़ीन मरत्लो देख्यो, ता केदो, “ह़ाचली, आहयो माणेह भगवान नो सोरो हतो।”
40 #
लुका 8:2,3 थोड़ाक बयरा बी आहयु आखु नाम्बे रीन देख र्या हता; तीहया बयरा मे मरीयम मगदलीनी, अने नान्ला याकुब नी अने योसेस नी आय्ह़ मरीयम, अने सलोमी बी हती। 41जत्यार ईसु गलील जीला मे हतो ता आहया बयरा तीनी ह़ाते जाय्न तीनी सेवा-चाकरी करता हता। अने तां बीजा ढेरेत बयरा बी हता, जे ईसु ह़ाते गलील जीला मे गेथा यरुसलेम मे आवला हता।#लुका 8:2-3
ईसु ने मड़ाट्या मे मेकीन वगे करे
(मत्ती 27:57-61; लुका 23:50-56; युहन्ना 19:38-42)
42आहयो दाड़ो अराम ना दाड़े गेथो पेले वाळो दाड़ो हतो, जे दाड़ो तीयारी नो दाड़ो केवायतो हतो, अने ह़ांतु हय जेलु हतु। 43अरीमीतीया ह़ेर मे रेवा वाळो युसुफ नाम नो एक माणेह हतो, अने आहयो युहदी जाती ना पंचु नो नामह़ाद्यो मेहमर हतो, अने आहयो भगवान ना राज नी वाट जोवतो हतो; आहयो युसुफ हीमम्त करीन पीलातुस ने तां ज्यो अने ईसु नो धोड़ मांग्यो। 44युसुफ नी आहयी वात ह़मळीन, पीलातुस वहराय ज्यो के ईसु एतरो छोटो कीसम मर ज्यो एतरे तीहयो सीपायड़ा ना डायला ने बोलावीन पुछ्यो, “ईसु मरलो ढेरेत टेम हय ज्यी ह़ु?” 45अने पीलातुस सीपायड़ा ना डायला नी लारे ईसु ना बारा मे आखी वात जाण लेदो ता तीनो धोड़ युसुफ ने अपाड़ देदो। 46तत्यार युसुफ लेफड़लु कफन नु लुगड़ु वेचातु लेदो, अने धोड़ ने उतारीन तीहया लुगड़ा मे बांद लेदो, अने एक मड़ाट्या मे मेक देदो, जे चाफर्या मे खोदलो हतो। अने मड़ाट्या ना झापला पोर एक मोट्लो दगड़ो ढबळाय देदा। 47अने मरीयम मगदलीनी अने योसेस नी आय्ह मरीयम ईसु ना धोड़ ने मेलत्ला देख री हती।
Právě zvoleno:
मरकुस 15: PPt2025
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
The Paliya Bible © The Word for the World International and Yisu Por Bherho Karanya Paliya Mandli, Rajpur, Barwani, MP, 2025
