Kejadian 39
39
Yusuf kerja di Potifar pu ruma
39:1-6a
1Orang-orang Ismael su bawa Yusuf sampe di Mesir. Disana, dong jual Yusuf ke orang Mesir satu, yang de pu nama Potifar. Potifar ni raja Mesir pu orang penting. De tu kepala dari pasukan raja#39:1 pasukan raja ‒ Liat catatan di Kejadian 37:36. Mesir. 2Waktu Yusuf tinggal di de pu tuan orang Mesir pu ruma, TUHAN yang ada sama-sama deng dia, sampe apa saja yang Yusuf de kerja, pasti smua jadi bagus skali. 3Brapa lama begini, Yusuf pu tuan sadar kalo TUHAN yang ada sama-sama deng Yusuf, trus TUHAN yang bikin sampe apa saja yang Yusuf de kerja tu, pasti jadi bagus skali. 4Dari situ Potifar de mulai snang deng Yusuf. Trus de angkat Yusuf jadi pesuru kusus. Potifar kas tugas Yusuf untuk urus de pu urusan di ruma sama atur de pu barang-barang smua. 5Mulai dari Yusuf dapa tunjuk untuk jaga liat Potifar pu ruma deng barang-barang, TUHAN kas berkat orang Mesir ini de pu barang-barang smua juga: yang di ruma ka, yang di kebun ka, de pu binatang-binatang piara ka, TUHAN kas berkat smua. 6aItu jadi, apa saja yang Potifar de punya, de kasi Yusuf yang atur smua. Karna Yusuf su urus smua, jadi Potifar de cuma perlu atur de pu makanan saja, tra perlu sibuk deng de pu barang-barang yang lain lagi.
Yusuf dapa rayu tapi de tra mau
39:6b-20
6bYusuf ni de muka bagus baru de badan juga bagus. 7Lewat brapa lama begini, Potifar pu istri mulai liat Yusuf trus de mau-mau dia. Jadi de bilang, “Yusuf, mari suda, tong dua pigi tidur sama-sama.”
8Tapi Yusuf de tolak, de bilang begini,
“Bapa Potifar de tra kuatir deng de pu barang-barang karna su percaya sa untuk urus itu smua. 9Memang bapa Potifar su kasi sa kuasa untuk urus de pu barang-barang smua, jadi disini trada yang pu kuasa lebi besar dari saya. Tapi hanya nyonya saja yang sa tra bole kore karna nyonya ni bapa Potifar pu istri. Sa trakan bikin barang yang jahat begitu! Kalo sa sampe bikin begitu, sa su bikin dosa ke Allah.”
10Tiap hari Potifar pu istri tinggal ganggu trus minta Yusuf pigi tidur deng dia, tapi tetap Yusuf de tra mau, sampe Yusuf de tra mau dekat deng Potifar pu istri.
11Satu kali begini, Yusuf de masuk ke Potifar pu ruma mo kerja. Baru hari itu tu pas orang kerja dong trada sama skali dalam ruma situ. 12Kaget begini, Potifar pu istri tarik Yusuf pu pakean baru bilang, “Yusuf, mari tidur deng sa suda!” Yusuf langsung lari kluar, kas tinggal de pu pakean di Potifar pu istri pu tangan. 13Waktu de liat Yusuf su lari kluar, baru Yusuf pu pakean masi tatinggal di de pu tangan, 14Potifar pu istri panggil anana laki-laki yang kerja di dong situ baru de bilang dong begini,
“Kam liat! Potifar pu orang Ibrani yang de bawa datang tu, de mo kas tipu kitong! Orang itu de masuk ke sa pu kamar baru paksa mo tidur deng sa, tapi sa langsung batariak besar-besar. 15De dengar sa batariak tu yang de langsung lari kluar. Ini kam liat! De pu pakean ada tatinggal di sa ni.”
16Jadi Potifar pu istri simpan Yusuf pu pakean tu di dia, sampe nanti de pu suami pulang. 17Waktu de pu suami pulang, de crita lagi begini, “Orang kerja Ibrani yang ko bawa kesini tu, de tadi mo bikin kurang ajar deng saya! 18Tapi sa langsung batariak kras-kras, itu yang de langsung lari kluar. Ini ko liat! De pu pakean ada tatinggal ni.”
19Dengar de pu istri crita tu, Yusuf pu tuan de emosi skali. 20Langsung de suru de pu orang-orang pigi tangkap Yusuf baru kas masuk de ke penjara, di tempat raja biasa kurung-kurung orang. Jadi begitu suda, Yusuf de dapa kurung di penjara situ.
TUHAN tetap tolong Yusuf waktu di penjara
39:21-23
21Waktu Yusuf de di penjara, TUHAN yang ada sama-sama deng dia. TUHAN tra perna stop kas tunjuk De pu sayang sama Yusuf.#Kisah Para Rasul 7:9-10 TUHAN yang bikin sampe kepala penjara tu, de snang deng Yusuf. 22Kepala penjara ni de kas tugas sama Yusuf untuk urus smua orang yang dapa tahan dalam penjara, trus untuk bikin smua kerja yang ada di penjara itu juga. 23Karna TUHAN yang ada sama-sama deng Yusuf jadi TUHAN bikin smua yang Yusuf de kerja jadi bagus skali. Itu yang, kepala penjara ni, de juga su tra perlu jaga liat Yusuf pu kerja lagi.
Právě zvoleno:
Kejadian 39: MPapua
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
© 2023 (Active), Wycliffe Bible Translators, Inc. All rights reserved.