Псалм 139
139
[138-р.с.] 1Хоро́скирэ Дирижоро́скэ. Давидо́скиро Пса́лмо.
О, Раё Дэ́вла, Ту роздыкхцян лачхэ́с ман, и Ту джинэ́са ман. 2Ту джинэ́са, ке́ли мэ бэшава и уштава; ту ґалёса дурипнастыр, со мэ думинава. 3Ту дыкхэ́са пирда́л (скрозь) миро дром и миро пасибэн и сарэ́ мирэ́ дрома́ исын джиндлэ́ Ту́кэ; 4пал-дова́ со ишчо (инкэ́) нанэ лав пэ мири́ чиб, соб (кай) Ту акана́ тэ на джинэсас миштэ́с лэс. 5Ту облыян ман пала́л и анги́л, и Тыро́ васт исын чхудо пэ ма́ндэ. 6Дасаво Тыро́ джиныбэ́н пал ма́ндэ дивинэла ман, дава́ исын вучо́ годыпэ́н, мири́ годы́ на доджа́ла кэ дава́. 7Карик мэ джа́ва криг Тырэ́ Духо́стыр? Ци карик мэ кэравпэ Тырэ́ якхэ́ндыр? 8Ко́ли мэ джа́ва кэ Болыбна́скиро Раё, Ту сан одо́й; ці, ко́ли мэ кэра́ва чхуибэ́н дро лю́но (преисподнё), акэ, Ту сан одо́й; 9Ко́ли мэ ла́вас злокоскирэ пхака́ (кры́лы) и вурнявава тэ джива́в пэ са́мо морёскиро (дэрьявэ́скиро) яго́ро (краё), 10аж и одо́й Тыро́ васт лыджа́ла ман, и Тыро́ чачо́ (право) васт рикирэ́ла ман. 11Ко́ли мэ пхэнавас: “Мэк тэ учхакирэл калыпэ́н (цямлыпэ́н) ман, и мэк тэ явэ́л дуд (свэ́то) ратяса трусця́л ма́ндэ; 12аж и цямлыпэ́н на гаравэла ман Ту́тыр, и рат зяинэла дыцьлэс сыр дывэ́с: цямлыпэ́н исын дасаво – паць, сыр дуд. 13Пал-дова́ со Ту создыян мирэ́ андратунэ́ паша́, Ту чхудя́н кхэтанэ́ ман дрэ мирэ́-дакири лочови́. 14Мэ ява́ва тэ парикира́в Ту́кэ, пал-дова́ со мэ сом создыно́ дивнэс кэ дар. Древа́н ди́вна исын Тырэ́ бутя́, и миро ди джинэ́ла миштэ́с дава́. 15Мирэ́ кокалы́ на сыс ґарадэ́ Ту́тыр, ке́ли мэ бариём тэ явав пэ свэ́то дро гарадо́ штэ́то, и ке́ли ман кхувэнас дро екхипэ́н дро хор штэ́то. 16Тырэ́ якха́ дыкхнэ́ ман, ке́ли мэ со́мас тыкно́ джидо́ и сарэ́ мирэ́ масэнгирэ паша́ сыс зачхиндлэ́ дрэ Тыри́ лылвари́; адя́кэ-паць одо́й сыс сарэ́ мирэ́ дывэса́, ке́ли ишчо (инкэ́) ни екх дывэ́с на сыс. 17Нэ сыр дро́га исын ма́нгэ Тырэ́ ду́мы, о Дэ́вла! Кицы́ бут исын лэн. 18Ко́ли мэ пиригинавас лэн, лэн явэ́лас буты́р сыр прахинки дро пра́хо. Сыр мэ джангадёвава, мэ сароекх сом Ту́са. 19О, Дэ́вла! Тэ мулякирэс Ту фуе́ манушэ́н! Тэ джа́н криг ма́ндыр тумэ́, савэ́ исын нахрата кэ чу́жо рат. 20Ёнэ ракирэ́на киркэс пал Ту́тэ, Тырэ́ вэ́рги, ёнэ ивья́ (напра́снэс) причхувэна фуипэ́н кэ Тыро́ лав. 21О, Раё Дэ́вла! Ци мэ бидыкхава одолэ́н, савэ́ бидыкхэна Тут? Ци на ячнэ́ джунгалэ́ (на брыдиндлэ) ма́нгэ одолэ́, кон ґаздэ́лапэ пэ Ту́тэ? 22Мэ бидыкхава лэн сарэ́ илэ́стыр, ёнэ ячнэ́ мирэ́ вэргэнца. 23Роздыкх лачхэ́с ман, о Дэ́вла и уджин миро ило́; спробин ман и уджин, со мэ думинава; 24и дыкх, ци исын, саво́ ж фуипэ́н дрэ ма́ндэ, и лы́джа ман дро ве́чно джиибэ́н.
Právě zvoleno:
Псалм 139: ROMBALT
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
maintained by the United Bible Societies for the Baltic Romani Mission