Egberima-Ẹkwẹn 4
4
Nimi ḅụ Ḅoarị Iḅi-aị
1Ị̀ tụḅọ, ị́ ḍa kẹ í tolumarị ye pokii. Anị kẹ ye-sịn, anịsakị í yefieye naa nyana ḅa. 2À kẹ í tolumarị ye mẹ iḅim, ọkọ ẹrẹsị anịmgba kẹ ḅiokoromaa. 3À paa kala wararị sakị ḅụ, ị̀ ḍa-na-iyingi-na ngẹrị tụḅọ ḅara ḅụ, 4ị̀ ḍa ye kẹ ì toluma ḅẹ tẹ ḅẹẹ-ḅẹẹm, “À ḍukoarị ye kẹ ḅiokoromaa, gbala-gbala anị kẹ ḅioḅọrọma ma. Arị ị́ ḅẹ ḅara mịẹẹ, anị sakị í ḍumo ḅa. 5Nimi na ye ḅio sime ye-lekiri na nyana-a! À ḍukoarị ye kẹ ḅioḅọrọma ma, anịanịa kẹ ye-sịn-a ḅara kẹ anị kẹ gbin koroma-so. 6Nimi kẹ gbin koroma-so ma, anịsakị árị ị́ gbaịn ḅọrọma ḅa; á ḅẹlẹmaa, anịsakị árị í koko tẹ ye ḅarị ị́ la ḅịa. 7Nimi nyana mẹ anie kụrọ nyana tẹịn ye tẹ í inetẹ mịẹ ḅarịye. Ḅẹẹ-jenye-jenye tẹ ị́ nyanarị ye goyegoye, yefieye lekiri nyana-a. 8Nimi ḅẹlẹmaa, anịsakị árị ị́ mịẹ tẹ í opu sọ ḅa. Á fịnamaa, anịsakị á kụn ọkị-ḅo ị́ pịrị ḅa. 9Árị ebube amada-sun sọ kẹ ị́ pịrị ḅa ị́ sịḅị ọgọnọ.”
10Ị̀ tụḅọ, ì pokii. À ḍuko ị́ pịrịarị ye mẹ kẹ kụrọ-nyana wararị ye ḅara ọkị, anịsakị ị́ nangwọ ḍumo kọn ḅa. 11À nimi kẹ í toluma tẹẹ, pịkị ḍumo kọn-kọn karakara ḅara na. 12Í nimi ḅara kẹ mẹnjịarị ogbo kpọkpọ gberie-sọ ị́ dasịẹma ḅịa, tẹ ị́ mangị sakị ị́ pụmbụ ḅịa. 13Sakị mamgba ị́ ḍawọ tẹ ye mẹ kẹ ḅiokoroma. Ị́ ḍawọ ḍịntẹ ye mẹ anie í ḍumo — anị koko kpaịnmaa. 14Si atomi muarị anga mu ma. Si-sịḅịḅio-sụa apụ ma ḍumo mẹ ḍikima ma. 15Mịẹ ma! siye ḅụ ị́ ḅụụ wẹrị ḅelema. Anị sịkị tẹ ị́ jụ muu. 16Si-sịḅịḅio-sụa apụ atomi inetẹ mono-mono-a ini iri-ye mịẹ-a ogbo. In mono-a tẹ yaụ-sime nwenii in ḅo ye kẹ kịnị lamarị. 17Si-sịḅịḅio-sụa amịẹaị na kụrọ-kụrọ amịẹaị na ịna ḅụ fịye na ḅuu-ḅuu ye na kịkam.
18Karakaraye-mịẹapụ ma mẹnjị muarị etela mẹ saakị paka-ḅoarị ịrụa na kịkam, anị ḅịya kụrọ-kụrọ nwenii ḅo eneḅaka ogbo laarị. 19Anị sime-ḅara sime-ḅara sọ, Si-sịḅịḅio-sụa apụ ma etela mẹ ḍin kanakana ḅara kanakana wararị. Ịn ḅịkịarị, kụma ini inetẹ ịna aḅụọ bịan tẹ ịn pụmbụ ye sọ ẹrị-a.
20Ị̀ tụḅọ, à ḍukoarị ye kẹ ye-sịn. Ị̀ ẹkwẹn ma pokii. 21Gbala-gbala ḍụkụ tẹ arị ị́ ḅara pẹlẹ-so ma. Arị kẹ ḅiokoroma tẹ kẹ í ḅioḅẹngbọ ḅụ kokoo. 22Arị ḍumo na obi ofori oju na kẹ ḅẹḅọ-ḅẹḅọ tẹ arị fiearị aị naarị ḅọ pịrị ḅa. 23Ị́ ḅẹrẹ kẹ ḅiokoromarị ḅara ẹbịị; í kuromarị arị mie í ḍumo kẹ anị simearị ḅara wẹrịarị. 24Gbala-gbala karakara-a gbọrụ ẹkwẹn sọ kọnma. Iruo aị na kịnị da-irimarị ẹkwẹn ma na gbọrụ mịẹ sọ nyana ma. 25Da-da tọrụ saakị tẹ kẹ tọrọkọ-jụ ḍikii, karakara ḅiokpọ ḅụ; ḍụkụ tẹ ḅụụ-jịrị ị́ sịḅị-tuu ma. 26#Hib 12.13Ẹbị ḅara kẹ ị́ mịẹ ḅẹ ye tọn pẹlẹ, tẹ ị́ mịẹarị ye mịẹarị ye ḅo kuraye sọ ḅarị ḅara. 27Siye kọkọrọ tẹ da-da mẹnjị tọrọkọ muu. Karakara etela mẹ ḅụ, gbọrụ ḅụọ sọ kẹ gbisini so ma.
Právě zvoleno:
Egberima-Ẹkwẹn 4: KBTP
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
(C) The Bible Society of Nigeria