Ezikẹẹrị 10
10
Aa rị Ijerusarẹmị ịra
1 #
Ezk 1.26; Ẹtẹ 4.2 Ezikẹẹrị ka, ọnị ộ kana eyi, dị ọnị re ịsị ẹ si mẹẹ utu avọọ ẹbẹẹba anggẹẹrị ana a hí Ikerubi nịnị ẹnẹẹ nị. Ọnị ô re ịsị ẹ sị mẹ anka aga ohinọyị ana a sị ịrẹta akàaka ana aā hị́ ịsahwaya mẹ ẹbẹẹba ẹnịnị. 2#Ẹtẹ 8.5Ọ kà Ohomorihi ộ kà a yị ọza ana kụ ẹnya ọvwọọvụ hi ẹngụ ịjọọ ka, ọ̀ nọ ịnị akakana ịsị e vene ahụ ụkẹkẹ ana yà akẹtẹ icherubi nịnị ẹnẹnị, dị ọ̀ na nyị akịna rị ụvọ hụụ ịzọọ. Ọ kà ọ̀ọ sị akịna nyị, dị ọ̀ na gara a hi Ijerusarẹmị. Di oni re e ọ́ maa na nị. 3Icherubi ẹnẹnị vị ana jẹẹ eyi ụvẹtẹ Irehi Ohomorihi dị ọza ọnọọ na ngụ ịzọọ, dị eguhi vana dà ve ku ohweje ana a mẹ tụ ịnị ịnẹ Irehi Ohomorihi nị. 4Ẹnẹyịmavara ộ kwẹẹtẹ ịnị ụbanyị anị na jẹẹ enoze irehi anị. Di eguhi vana chaka ku irehi ọnọọ nị. Ụbanyị Ẹnẹyịmavara ộ mẹ̀ ka ohweje irehi Ohomorihi ọọ zẹtẹ. 5Aza ene hi ịnị ohweje ana á dà tụ ẹhẹ ệ wụ avaka ikerubi ẹnẹnị maa sụ́ ịrẹyị. Vị ịsị anaa sụ́ ịrẹyị sị mẹẹ anka Ohomorihi àa kà ịrẹyị avọọ nị. 6Ẹnẹyịmavara mẹ kà a yị ọza ana kụ́ ẹnya ọvwọọvụ hi ẹngụ aanị ka ọ̀ na nyị ịra hụụnị akakana ịsị ẹ mẹẹ anka ahụ ụkẹkẹ ana yà akẹtẹ Icherubi nịnị ẹnẹnị, dị ọza ọnọọ na, dị ọ́ na jẹẹ akaha ịsị ẹ sị mẹẹ ahụ ụkẹkẹ ẹnẹẹ ọnya nị. 7Ọnyara ịnị Icherubi ẹnẹnị ộ jị ụvọ ngụ ịra ana yà ịnị akakana ẹnịnị, dị ọ́ nyị akịna, dị ọ́ vàa hi ọza ana kụ ẹnya ọvwọọvụ hi ẹngụ aanị ụvọ nị. Ọ sị ọ dọ, dị ọ́ hụụ ịzọọ nị. 8Ezikẹẹrị ka ọnị ô re ka Icherubi ẹnẹnị ọzọza ộ nyị ịsị ẹ sị mẹẹ ụvọ ọza avọọ tụ iruvo avaka ẹnịnị. 9#Ezk 1.15-21Ọnị ô re re ịsị ẹ sị mẹẹ ahụ ụkẹkẹ avọọ ẹẹna. Icherubi ọzọza vị ana nyị ikonyi ikonya. Ịsị ẹ sị mẹẹ ahụ ụkẹkẹ aanị vị anaa za nyanga-nyanga anị ka ịrẹta ọkatarihi avọọ. 10Ẹnịnị vị ene vene ẹngụ, dị ọ́ sị mẹẹ anka vị a sị ahụ ụkẹkẹ ẹnyị chire ọsa ịnẹ, ẹvẹnẹ-ẹvẹnẹ nị. 11Ịjị Icherubi ẹnẹnị ẹ̀ẹ ka ẹnị aa zị use, ẹnịnị ẹ́ zụ zị oze ọnyọọnya; dị ẹ́ yi nyị ka ẹ̀ vareyi. Eyi ẹnẹ ẹ̀ẹ ka ẹnị aa nọ kẹnẹ, dị avaba ẹnịnị vavọọ aa na, ẹ́ yị nyị ka ẹnịnị ẹ̀ vara eyi. 12#Ẹtẹ 4.8Avaba ọchẹngụ ẹnịnị, ịrẹma, ụvọ ọnịrị avaka ẹnịnị vị eyi-eyi ene ee si re ẹtẹ. Avọọ ahụ ụkẹkẹ ẹnịnị mẹ rẹ nyị eyi kara ẹngụ nị. 13Ezikẹẹrị ka ọnị ộ wụ ka â hị́ ahụ ịkẹkẹ ẹnẹnị o jesi ọza viri-viri. 14#Ezk 1.10; Ẹtẹ 4.7Icherubi ẹnẹnị ọzọza vị ana nyị eyirẹsụ ẹnẹẹna. Ệ nyị eyirẹsụ Icherubi, eyirẹsụ ọza, eyirẹsụ idu ọnịrị eyirẹsụ ukokoro. 15Dị Icherubi ẹnẹnị hira vahịrẹ nị. Ẹnịnị ẹ vị ịsa anaa yara ọnị ọnị vịdị re ụtọ Irehu ịchẹẹba nị. 16Ịjị Icherubi ẹnẹnị ẹ̀ẹ zị ụsẹ, dị ịsị ẹ sị mẹẹ ahụ ụkẹkẹ aanị aa dụ wa akaha-akaha. Ịjị ẹnịnị ẹ̀ẹ kụ̀rà avaka ka ẹnị è hira tụ ẹba dị ịsị ẹ sị mẹẹ ahụ ụkẹkẹ aanị vavọọ yịị yà akaha ẹnịnị. 17Ịjị Icherubi ẹnịnị ẹ̀ẹ jẹẹ, dị ẹnị rẹ vavọọ jẹẹ sii. Ịjị ẹnịnị ẹ̀ẹ hira tụ ẹba, dị ịsị ẹ sị mẹẹ ahụ ụkẹkẹ aanị re hira saasa wa; agụvị ka ụkata icherubi ẹnẹnị aa sị waa zị nị. 18Dị ẹtohweyi anaa zaa kara Ẹnẹyịmavara rẹ hụrị enoze irehi Ohomorihi, dị ọ na ya ẹbẹẹba icherubi ẹnẹnị nị. 19Ezikẹẹrị ka avọọ ọnị mee yii re wa, dị icherubi ẹnẹnị hira hụrị ẹtẹ nị. Ahụ ụkẹkẹ ẹnịnị ẹnẹnị vị ana rẹ saasa wa. Ẹnịnị ệ jẹẹ chẹẹ oze ọbanyị ana a zịị ngụ ịnị Irehi Ohomorihi eyi ọnị ọyị zịị hụrẹẹ vẹ, dị ẹtohweyi anaa za kara Ohomorihi Anisirẹrị vavọọ yà ẹbẹẹba ẹnịnị nị. 20Ẹsẹnị ẹ vị ịsa anaa yara ọnị re akẹtẹ Ohomorihi Anisirẹrị ụtọ irehu ịchẹẹba nị. Dị ọnị yẹ ka Icherubi ẹnịnị vị nị. 21Ikonyi kọnyara ẹnịnị vị ana nyị eyirẹsụ ọnịrị avaka ẹnẹẹna, dị ẹnịnị nyị ịsị e vene ụvọ ọza tụ iruvo avaka ẹnịnị nị. 22Eyirẹsụ ẹnịnị ọnịrị eyirẹsụ ọnị vịdị re ụtọ irehu Icheba vị ọnyọọnya. Icherubi ọzọza vị ana vavọọ aa nọ ịzị o va eyi ka.
Právě zvoleno:
Ezikẹẹrị 10: EBTP
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
Ebira First Bible © Bible Society of Nigeria, 2014.