Chhut Âi-khi̍p Ki 4

Song-chú Yin-hí Mô-sî Hàng Sṳ̀n-chiak

1Mô-sî en Song-chú kóng: “Na-he Yî-set-lie̍t-ngìn m̀-sin ngài, m̀-thâng ngài ke fa, kóng Ngì m̀-sṳt hiong ngài hién-hien ko, ngài oi ngióng-pân hó nè?”

2Song-chú mun kì: “Ngì sú nâ-tén ke he má-ke?”

Kì en-kóng: “He koái-kun-é.”

3Song-chú kóng: “Chiông kì fit-to thi-song.” Mô-sî chiông koái-kun-é yit-fit hâ-hi, kun-é chhiu pien-cho sà; kì chhiu sám-khôi. 4Song-chú tui Mô-sî kóng: “Chhûn-sú hi-chok sà-mî.” Mô-sî chhiu chhûn-sú chok-tó sà-mî, sà yu pien-chón koái-kun-é. 5Song-chú kóng: “Án-ngiòng chhiu cho-tet hiong Yî-set-lie̍t-ngìn chṳn-mìn, Song-chú — kì-têu chú-siên ke Song-ti, chhiu-he Â-pak-lâ-hón ke Song-ti, Yî-sat ke Song-ti, lâu Ngâ-kok ke Song-ti, sṳt hiong ngì hién-hien.”

6Song-chú yu tui Mô-sî kóng: “Chiông sú chhûn-ngi̍p hiûng-chhièn ke sâm-tú.” Mô-sî chhiu chiông sú chhûn ngi̍p-hi; chhû chhut-lòi ke sṳ̀, sú chhiu pot thái-kô, chhiong siet án-pha̍k. 7Song-chú yu-kóng: “Chai chiông sú chhûn-ngi̍p hiûng-chhièn ke sâm-tú.” Mô-sî chhiu cheu án-ngiòng cho, chai chhû chhut-lòi ke sṳ̀, sú yí-kîn fî-fu̍k, lâu sṳ̂n-thí ke khì-thâ phu-fun khiung-yong. 8Song-chú kóng: “Na-he kì-têu m̀-sin ngì, ya-he m̀-sin thi-yit chak sṳ̀n-chiak, án-ngiòng liá yit-chak sṳ̀n-chiak yit-thin voi sṳ́ kì-têu siông-sin. 9Na-he liá lióng-chak sṳ̀n-chiak hàn-mò phan-fap sṳ́ kì-têu siông-sin, kì-têu hàn-he m̀-thâng ngì ke fa, ngì chhiu nâ yit-si̍t Nì-lò hò ke súi, phat chhai thi-song, súi voi pien-cho hiet.”

10Chúng-he Mô-sî kóng: “Song-chú â, ngài yit-liu-lî mò choi-mâ; Ngì lâu ngài kóng-fa yî-heu ya mò kói-pien. Ngài pún-lòi chhiu-he yit-ke choi-thun sa̍t-khu̍t ke ngìn.”

11Song-chú tui kì kóng: “Má-ngìn pûn ngìn khiéu-chhòi? Má-ngìn sṳ́-ngìn ngí-lûng, á-khiéu? Má-ngìn sṳ́-ngìn khon tet-tó? Má-ngìn sṳ́-ngìn mô-muk? Kám m̀-he Ngài — Song-chú. 12Ngì cho-ngì hi; Ngài voi su ngì khiéu-chhòi, Ngài voi kâu ngì yin-kôi kóng ke fa.”

13Chúng-he, Mô-sî en-kóng: “M̀-hó! Chú â, chhiáng Ngì phai phe̍t-ngìn hi.” 14Só-yî, Song-chú tui Mô-sî fat-khién, kóng: “Ngì kám m̀-he yû yit-ke â-kô Li-vi-ngìn Â-lùn? Ngài tî kì tông-yû khiéu-chhòi. Kì tú-hó chhut-lòi ngiàng-chiap ngì; kì yit-thin tông fôn-hí khon-tó ngì. 15Ngì lâu kì kóng yin-kôi kóng má-ke; Ngài voi su ngì lâu kì yû khiéu-chhòi; Ngài voi kâu ngì-têu yin-kôi cho má-ke. 16Kì oi cho ngì ke choi, thoi ngì hiong mìn-chung kóng-fa; ngì chhiu-chhiong Song-ti yit-yong, chṳ́-sṳ kì kóng má-ke. 17Ngì oi tai-tén liá-kî koái-kun-é, yîn-vi ngì oi yung kì lòi-hàng sṳ̀n-chiak.”

Mô-sî Chón-to Âi-khi̍p

18Só-yî, Mô-sî chón-to kiâ chhông-mîn-ló Ya̍p-thi̍t-lò ke-vi hi, tui kì kóng: “Chhiáng ngì pûn ngài chón Âi-khi̍p hi, khon ngài ke chhîn-ngìn he m̀-he hàn-chhôi.” Ya̍p-thi̍t-lò tui Mô-sî kóng: “Cho-ngì ôn-sîm hi!”

19Tông Mô-sî hàn chhai Mí-thien ke sṳ̀, Song-chú tui kì kóng: “Ngì oi chón Âi-khi̍p hi! Ke-têu sióng-oi chhṳ̀ ngì ke ngìn chhiòn-phu sí-thet lé.” 20Yèn-heu Mô-sî tai-tén kì ke pû-ngiòng lâu lióng-ke lai-é, pûn kì-têu khì lì-è, chón Âi-khi̍p; kì ke sú khià-tén Song-ti ke koái-kun-é.

21Song-chú yu tui Mô-sî kóng: “Chón-to Âi-khi̍p yî-heu, Ngài oi su ngì nèn-li̍t hàng kok-yong ke sṳ̀n-chiak, ngì oi chhai Âi-khi̍p-vòng mien-chhièn hàng chhut-lòi. Chúng-he Ngài oi sṳ́ kì sîm-ngang, m̀ piong Ngài ke chṳ́-mìn chéu. 22Ke-sṳ̀, ngì oi lâu Âi-khi̍p-vòng kóng: ‘Song-chú án-ngiòng kóng: Yî-set-lie̍t he Ngài ke lai-é, Ngài ke chóng-chṳ́. 23Ngài tui ngì kóng-ko: Chún Ngài ke lai-é hi kin-pai Ngài. Ngì m̀-hén, só-yî Ngài oi chhṳ̀ ngì ke lai-é, ngì ke chóng-chṳ́.’ ”

24Chhai chón Âi-khi̍p ke lu-song, Mô-sî tap chong-phùng ko-ya, Song-chú chhai ke-vi tù-tó kì, sióng-oi chhṳ̀ kì. 25-26Só-yî kiâ pû-ngiòng Sî-pô-lâ nâ yit-te tông-li ke sa̍k-phién, kot-thet kiâ lai-é ke pâu-phì, yung kì pen Mô-sî ke kiok#4:25-26 “Mô-sî ke kiok” ya-he yi̍t-cho “kiâ lai-é ke kiok”. “kiok” ya khó-nèn he chṳ́ “yòng-vu̍t” vùn-ngá ke kóng-fap.. Chhiu-he yîn-vi liá-ke kot-lî, Sî-pô-lâ chang tui Mô-sî kóng: “Ngì he ngài yung kot-lî ke hiet von-lòi ke sîn-lòng.” Án-ngiòng, Song-chú chang mò chhṳ̀ Mô-sî.

27Ke-sṳ̀, Song-chú tui Â-lùn kóng: “Ngì hi khóng-yâ ngiàng-chiap Mô-sî.” Só-yî Â-lùn hi, chhai Song-ti ke sân tù-tó Mô-sî, lâu kì chîm. 28Mô-sî chiông Song-chú oi kì hi-kóng ke fa, oi kì hàng ke sṳ̀n-chiak chhiòn-phu lâu Â-lùn kóng. 29Mô-sî lâu Â-lùn chhiu hi Âi-khi̍p, seu-si̍p Yî-set-lie̍t ke-têu chóng-ló. 30Â-lùn chiông Song-chú lâu Mô-sî kóng ke fa chhiòn-phu lâu kì-têu kóng; Mô-sî ya chhai ngìn-mìn mien-chhièn hàng Song-chú oi kì hàng ke sṳ̀n-chiak. 31Ngìn-mìn chhiòn-phu siông-sin; Yî-set-lie̍t-ngìn yit thâng-tó Song-chú khon-ku kì-têu, ya tî Song-chú khon-tó kì-têu su-khú ke chhìn-hìn, chhiu chhiòn-phu phu̍k hâ-lòi kin-pai.

Právě zvoleno:

Chhut Âi-khi̍p Ki 4: THV12Rdb

Zvýraznění

Sdílet

Kopírovat

Chceš mít své zvýrazněné verše uložené na všech zařízeních? Zaregistruj se nebo se přihlas

Zjisti více o HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-sṳ pán)