Kô-lìm-tô Chhièn-sû 15

Kî-tuk ke Fu̍k-fa̍t

1Hiûng-thi chí-moi â, ngài oi ngì-têu ki-tet ngài yî-chhièn chhòn-pûn ngì-têu ke fuk-yîm; liá fuk-yîm ngì-têu yí-kîn liâng-su, ya yung kì lòi cho sin-sîm ke kî-chhú. 2Na-he ngì-têu chṳp-sú liá fuk-yîm, chhiu-he ngài só chhòn-pûn ngì-têu ke tho-lî, ngì-têu yit-thin voi tet-kiu; chhù-fî ngì-têu ke sin he chhín-chhín chhái-chhái ke#15:2 “chhín-chhín chhái-chhái ke” ya-he yi̍t-cho “mò kîn-kí ke” ya-he “khûng-khûng ke”..

3Ngài só liâng-su ke tho-lî, ngài yí-kîn chhòn-pûn ngì-têu, chui chhung-yeu ke chhiu-he: Cheu Sṳn-kîn só kóng, Kî-tuk yí-kîn vi ngài-têu ke chhui sí lé, 4pin pûn-ngìn mài-chong lé; yu cheu Sṳn-kîn só kóng, thi-sâm-ngit fu̍k-fa̍t lé. 5Kì sṳt hién-hien pûn Pí-tet khon, yu hién-hien pûn sṳ̍p-ngi-ke sṳ́-thù khon. 6Yî-heu, kì sṳt yit-pái tui ńg-pak-làng ke thèn kì ke ngìn hién-hien; liá-têu ngìn thai-phu-fun hàn chhôi, sûi-yèn yû-têu yí-kîn ko-sṳ̂n lé. 7Heu-lòi, kì hién-hien pûn Ngâ-kok khon, yu tui só-yû ke sṳ́-thù hién-hien.

8Chui-mî, kì ya hién-hien pûn ngài khon; ngài chhiong-he yit-ke màng chiuk-ngie̍t chhiu chhut-se ke ngìn#15:8 “màng chiuk-ngie̍t chhiu chhut-se ke ngìn” ya-he yi̍t-cho “chó-sán-yì”.. 9Chhai sṳ́-thù chûng-kiên, ngài he chui se ke, khâm-m̀-tet chhṳ̂n-cho sṳ́-thù, yîn-vi ngài sṳt pet-hoi Song-ti ke kau-fi. 10Chúng-he, ngài sàng-cho kîm-pû-ngit ke ngài, he cheu Song-ti ke ên-tién. Kì su-pûn ngài ke ên-tién mò lo̍k-khûng; fán-chón, ngài pí khì-thâ ke sṳ́-thù hàn-kha sîn-khú kûng-chok; khì-sṳ̍t, m̀-he ngài, he Song-ti ke ên-tién thùng ngài khiung-ha kûng-chok. 11Kiet-kó khiung-yong, mò-lun he ngài ya-he phe̍t ke sṳ́-thù, ngài-têu án-ngiòng chhòn, ngì-têu ya án-ngiòng sin.

Lun Sin-thù ke Fu̍k-fa̍t

12Ki-yèn ngài-têu chhòn-kóng Kî-tuk yí-kîn tui sí fu̍k-fa̍t, ngióng-pân ngì-têu chûng-kiên yû-ngìn kóng mò sí-ngìn fu̍k-fa̍t liá-khien sṳ nè? 13Na-he mò sí-ngìn fu̍k-fa̍t liá-khien sṳ, Kî-tuk chhiu mò fu̍k-fa̍t lé. 14Kî-tuk na mò fu̍k-fa̍t, ngài-têu só chhòn ke chhiu-he khûng ke, ngì-têu só sin ke ya he khûng ke. 15-16Ká-sṳ́ mò sí-ngìn fu̍k-fa̍t liá-khien sṳ, Song-ti chhiu mò sṳ́ Kî-tuk fu̍k-fa̍t lé, yîn-vi, na-he mò sí-ngìn fu̍k-fa̍t liá-khien sṳ, Kî-tuk chhiu mò fu̍k-fa̍t lé. Án-ngiòng, ngài-têu kien-chṳn Song-ti yí-kîn sṳ́ Kî-tuk fu̍k-fa̍t, chhiu pien-cho ngài-têu he vi Song-ti cho ká kien-chṳn lé. 17Kî-tuk na mò fu̍k-fa̍t, ngì-têu ke sin-ngióng chhiu mò ka-chhṳ̍t, ngì-têu hàn mì-sṳt chhai chhui ke tî-poi. 18Liá yi-sṳ chhiu-he, ke-têu ko-sṳ̂n ke Kî-tuk-thù ya lûng-chúng me̍t-mòng lé. 19Ngài-têu sin Kî-tuk ke ngìn na chṳ́-yû chhai kîm-sên yû hî-mong#15:19 “Ngài-têu ... hî-mong” ya-he yi̍t-cho “Ngài-têu tui Kî-tuk ke hî-mong na chṳ́-yû han-chhai kîm-sên”., ngài-têu chhiu pí sṳ-kiên khì-thâ ke ngìn hàn-kha khó-lièn lé.

20Sṳ-sṳ̍t-song, Kî-tuk yí-kîn tui sí fu̍k-fa̍t; liá he oi pó-chṳn ko-sṳ̂n-thet ke ngìn ya oi thèn kì fu̍k-fa̍t. 21Ki-yèn sí he tui yit-ke ngìn lòi, sí-ngìn ke fu̍k-fa̍t ya he tui yit-ke ngìn lòi. 22Khiung-yong, chung-ngìn ke sí he yîn-vi kì-têu thùng Â-tông kiet-lièn, chung-ngìn ke fu̍k-fa̍t he yîn-vi kì-têu thùng Kî-tuk kiet-lièn. 23Chúng-he, tak-sà oi cheu sun-si lòi fu̍k-fa̍t: Thèu-yit-ke he Kî-tuk; yèn-heu, chhai kì chai-lòi ke sṳ̀, chang he su̍k kì ke ngìn. 24Yèn-heu ma̍t-khì voi to; ke-sṳ̀ Kî-tuk oi sêu-me̍t yit-chhiet lìn-kie ke chṳp-chṳn-chá, chóng-khièn-chá, lâu yû nèn-li̍t ke, chiông vòng-khièn kâu-vàn Â-pâ Song-ti. 25Yîn-vi Kî-tuk tit-khok oi chóng-khièn, chhṳ̍t-to Song-ti yàng-ko yit-chhiet sù-thi̍t, pûn kì-têu hòng-fu̍k chhai kì ke kiok-hâ. 26Chui-mî su fí-me̍t ke sù-thi̍t chhiu-he sí. 27Yîn-vi Sṳn-kîn kóng: “Song-ti sṳ́ van-vu̍t chhiòn-phu hòng-fu̍k chhai kì ke kiok-hâ.” Chhin mìn-hién ke, liá-vi só-kóng ke “van-vu̍t” mò pâu-hàm Song-ti chhṳ-kâ, yîn-vi sṳ́ van-vu̍t hòng-fu̍k chhai Kî-tuk kiok-hâ ke chhiu-he Kì. 28To van-vu̍t hòng-fu̍k Kî-tuk ke sṳ̀, Lai-é pún-sṳ̂n ya oi sun-fu̍k sṳ́ van-vu̍t hòng-fu̍k kì ke Song-ti, hó pûn Song-ti vàn-chhiòn thúng-chhṳ yit-chhiet#15:28 “vàn-chhiòn thúng-chhṳ yit-chhiet” ya-he yi̍t-cho “chhai van-vu̍t chṳ̂-chûng, chhai van-vu̍t chṳ̂-song”..

29Na m̀-he án-ngiòng, ke-têu thoi sí-ngìn liâng-su sé-lî ke yû má-ke yi-sṳ nè? Kì-têu só hî-mong ke he má-ke nè? Na-he mò sí-ngìn fu̍k-fa̍t liá-khien sṳ, kì-têu ngióng-pân hàn thoi sí-ngìn liâng-su sé-lî cho má-ke? 30Ngài-têu yu ngióng-pân oi sṳ̀-sṳ̀ khiet-khiet mo-hiám nè? 31Hiûng-thi chí-moi â, ngài tak-ngit tû mien-tui sí! Ngài kám án-ngiòng kóng, yîn-vi ngài só khoâ-khiéu ke he ngì-têu thùng ngài khiung-ha chhai ngài-têu Chú Kî-tuk Yâ-sû sâng-miang tî-poi. 32Ngài chhai Yî-fut-só thùng ke-têu ham-cho “yâ-sâng ke khìm-chhu” piang-miang, na-he cheu ngìn ke thung-kî, tui ngài yû má-ke li-yit nè? Na mò sí-ngìn fu̍k-fa̍t liá-khien sṳ, ngài-têu chhiong siu̍k-ngî só kóng: “Hien sṳ̍t hien hó, voi sí sèu-chó!” án-ngiòng hàng chhiu hó lé.

33M̀-hó pûn-ngìn phien-hi; oi ki-tet: “Fái phèn-yû voi phai-fai hó tet-hen!” 34Hó-siáng lé, oi hàng chṳn-lu, m̀-hó chai fam-chhui; yîn-vi ngì-têu chûng-kiên yû ngìn mò ngin-sṳt Song-ti. Ngài kóng liá-ke fa he oi pûn ngì-têu tî kien-seu.

Ngiuk-thí ke Fu̍k-fa̍t

35Yû ngìn voi mun: “Sí-ngìn oi ngióng-pân fu̍k-fa̍t nè? Kì-têu voi yû ngióng-pân ke hìn-thí nè?” 36Ngì ngióng án ngong! Ngì ve chhai nài tî-poi ke chúng-chṳ́, na mò siên sí-thet, chhiu mò fap-thu sâng chhut-lòi. 37Ngì só ve ke he ma̍k-é, ya-he phe̍t-yong ke chúng-chṳ́, lûng-chúng he yit-lia̍p yit-lia̍p ke, pin m̀-he heu-lòi só sâng chhut-lòi ke hìn-thí. 38Chúng-he, Song-ti cheu chhṳ-kâ ke yi-sṳ pûn kì hìn-thí; Kì pûn kok-yong chúng-chṳ́ yû kok-yong ke hìn-thí.

39Kok-yong ke thung-vu̍t ya yû mò khiung-yong ke ngiuk-thí: Ngìn yû ngìn-thí, khìm-chhu yû khìm-chhu ke hìn-thí, fî-niâu yû fî-niâu ke hìn-thí, ǹg yû ǹg ke hìn-thí.

40Hàn-yû thiên-táng ke hìn-thí, lâu thi-song ke hìn-thí; chúng-he thiên-táng ke hìn-thí yû yit-chúng ke yùng-kông, thi-song ke hìn-thí yû nang-ngoi yit-chúng ke chiâng. 41Ngit-thèu yû ngit-thèu ke kông, ngie̍t-kông yû ngie̍t-kông ke kông, sên-é yû sên-é ke kông; sṳm-chṳ liá-chak sên-é lâu ke-chak sên-é ke kông ya mò khiung-yong.

42Sí-ngìn ke fu̍k-fa̍t ya he án-ngiòng. Mài-chong ke sṳ̂n-thí he voi fú-lan ke; fu̍k-fa̍t heu ke sṳ̂n-thí he m̀-voi hiú-lan ke. 43Mài-lo̍k-hi ke he chhin mò thí-mien ke, fu̍k-fa̍t ke he chhin yùng-kông ke; mài-lo̍k-hi ke he ngiôn-ngio̍k ke, fu̍k-fa̍t ke he khiòng-chong ke; 44mài-lo̍k-hi ke he hiet-ngiuk ke sṳ̂n-thí, fu̍k-fa̍t ke he su̍k-lìn ke sṳ̂n-thí. Ki-yèn yû hiet-ngiuk ke sṳ̂n-thí, ya chhiu yû su̍k-lìn ke sṳ̂n-thí. 45Sṳn-kîn án-ngiòng kóng: “Thèu-yit-ke ngìn Â-tông su-chho sàng-cho yû sâng-miang ke ngìn”; chúng-he, ma̍t-heu ke Â-tông he su sâng-miang ke Lìn. 46M̀-he siên yû su̍k-lìn ke; he siên yû hiet-ngiuk ke, yèn-heu chang yû su̍k-lìn ke. 47Thèu-yit-ke Â-tông he yung thi-song ke nài cho ke; thi-ngi-ke Â-tông he tui thiên-táng lòi ke. 48Ke yung nài cho ke ngióng-pân, ke-têu su̍k nài ke ngìn ya ngióng-pân; ke tui thiên-táng lòi ke ngióng-pân, ke-têu su̍k thiên ke ngìn ya ngióng-pân. 49Ngài-têu yí-kîn yû su̍k nài ke ngìn ke hìn-siong, chiông-lòi ya voi yû#15:49 “chiông-lòi ya voi yû” yû-têu kú-kién he “ngien ngài-têu ya yû”. ke tui thiên-táng lòi ke ngìn ke hìn-siong.

50Hiûng-thi chí-moi â, ngài só-oi kóng ke he: Hiet lâu ngiuk ke sṳ̂n-thí cho-m̀-tet sṳ̀n-su Song-ti ke koet, voi fú-lan ke cho-m̀-tet sṳ̀n-su m̀-voi hiú-lan ke.

51-52Ngì-têu oi chu-yi thâng liá-khien o-meu ke sṳ: Ngài-têu pin m̀-he chhiòn-phu voi sí; chhai yit-ha-é, yit-ngiap-muk chṳ̂ kiên, chui-heu yit-pái ho-thùng hióng ke sṳ̀-chiet, ngài-têu chhiòn-phu voi kói-pien. Chui-heu yit-pái ho-thùng yit hióng, sí-ngìn voi fu̍k-fa̍t sàng-cho m̀-voi hiú-lan ke, ngài-têu hàn sâng ke ngìn ya voi kói-pien. 53Yîn-vi voi fú-lan ke oi pien-cho m̀-voi hiú-lan ke, voi sí ke oi pien-cho m̀-voi sí ke. 54To voi fú-lan ke yit pien-cho m̀-voi hiú-lan ke, ke voi sí ke yit pien-cho m̀-voi sí ke, Sṳn-kîn só kóng liá-ki fa chhiu sṳ̍t-hien lé: “Sí-mòng yí-kîn pûn sṳn-li thûn-me̍t lé!”

55Sí â! Ngì ke sṳn-li chhai nai-vi?

Sí â! Ngì ke thu̍k-net chhai nai-vi?

56Sí ke thu̍k-net he tui chhui lòi ke, chhui ke khièn-sṳ he tui fap-li̍t lòi ke. 57Chúng-he, kám-chhia Song-ti! Kì sṳ́ ngài-têu thûng-ko ngài-têu ke Chú Yâ-sû Kî-tuk tet-tó sṳn-li lé!

58Só-yî, chhîn-oi ke hiûng-thi chí-moi â, ngì-têu oi khî-chhai, m̀-hó yèu-thung. Oi sòng-sòng ngin-chṳ̂n cho Chú ke kûng-chok; yîn-vi tî, ngì-têu vi Chú só-cho ke kûng-chok yit-thin m̀-voi khûng-khûng.

Právě zvoleno:

Kô-lìm-tô Chhièn-sû 15: THV12Rdb

Zvýraznění

Sdílet

Kopírovat

Chceš mít své zvýrazněné verše uložené na všech zařízeních? Zaregistruj se nebo se přihlas

Zjisti více o HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-sṳ pán)