Kejadian 1
AYZ
1
Allah yfen tabam refo
1Tinyi rau to Allah yfen bormabyo msya tabam refo. 2Tabam refo mabo aro fefares, tna aya sawan betru beta. Tna mamur toni ye. Menohe Har ro Allah mnah-nah abyõ mam aya mata. 3Tna Allah yawe, “Mrok maah!” Tibyo maah reto snok. 4Allah ymat he maah reto moof. Tibyo Ait yno maah to mhau hayah, tna yno mamur to mhau hayah. 5Tna ytu maah to yawe reen. Mamur to yawe mti. Hreha firwas tna snok rabu. Reto mrat ayõ ro tinyi.
6Tna Allah yawe, “Aya myi mamo saim anya: baro mhau mte hayah tna baro mhau mam uu hayah.” 7Tna Ait yoo foos yse wa. Tibyo aya myi saim anya: baro mam mte tna baro mam u. Tna bo reto to mabo oh. 8Tna Allah ytu bormabyo to masom ayoh. Hreha firwas tna snok rabu. Reto mrat ayõ ro ewok.
9Tna Allah yawe, “Aya ro mhau mte to myi mamo mhau mam yuk sau hayah. Tna tabam ro ngkaat to mhau hayah.” Tna bo weto to mabo oh. 10Allah ytu tabam ro ngkaat reto yawe mne. Tna mbair ro aya to yawe masom sawan. Allah ymat he bo weto beta moof. 11Tna Allah ybis yawe, “Tabam fo mitsnok kmoh aro rau-rau ro tna me moo maut: Ara ro kbe make msya bosafom ro kbe snok makan.” Tna bo weto mabo oh. 12Feto to tabam mitsnok kmoh weto beta: me moo ara ro make msya bosafom ro snok makan aro rau-rau. Allah ymat he bo weto beta moof. 13Hreha firwas tna snok rabu. Reto mrat ayõ ro tuuf.
14Tna Allah yawe, “Jõ tfen kek baro tse mam ayoh mkah bo mno reen hayah tna mti hayah. Bo weto ja merif ayõ aro rau, snyi aro rau msya tahun aro rau. 15Tna tse bo weto mam ayoh mkah bo mno arin refo to maah.” Tna bo reto mabo oh. 16Tna Allah yfen bo ro mase to ewok: Sau masom ayõ, ro ja maah reen. Ro maku to snyi, ro mboh mti. Tna Ait yfen sken ye. 17Tna Allah yoo bo weto beta yse abyõ mam ayoh mno re tabam refo maah. 18Bo weto mbo baas msya mti, tna mno reen hayah tna mti hayah. Tna Allah ymat he bo weto beta moof. 19Hreha firwas tna snok rabu. Reto mrat ayõ ro jiit.
20Tna Allah yawe, “Mfo Jõ tfen syoh msya bo knik-knak beta ro mhau mam aya. Tna Jõ kbe tfen ruu ro fru mam u.” 21Tibyo Allah yfen syoh ro mase mhau mam aya sawan msya bombra beta ro mhau mam aya reto. Tna yfen ruu aro rau ye. Allah ymat he bo weto beta moof. 22Allah yawe yno bo ro moof kʼana yawe, “Tno anu meen nsis maku msis renti. Tna kbe nhau matot aya sawan, tabam, msya ayoh to mbetru.” 23Hreha firwas tna snok rabu. Reto mrat ayõ ro maat.
24Tna Allah yawe, “Kbe tabam refo mifrok kak aro rau: ro mase, ro kinyah, ro safo, msya ro mha ye.” Tna bo weto to mabo oh. 25Tna Allah yfen kak ro mase, ro kinyah, ro safo, msya ro mha ye. Tna Ait ymat he bo weto beta moof.
26Tna Allah yawe, “Nma Anu bfen raa mfi Anu fo ye. Tna kbe ana masen mbo bombra ro tabam refo beta. Kbe mbo syoh, ruu, kak ro safo, ro mha, ro mase msya ro kinyah ye.” 27Tna Allah yfen raa mfi Ait. Yfen ana raa sme tna yfen fnya ye. 28Tna Ait yawe yno bo ro moof kʼana yawe, “Jõ tno anu meen nsen nbe ku msis renti, tna kube wanu to meen masen mhau mam tabam refo mbetru. Nsen nbo bo beta: syoh, ruu msya kak ye.” 29Tna Allah yawe, “Nmat, bobat aro rau beta ro mhau mam tabam refo to, too tsan kʼanu nbat. Tna boit aro rau beta too tsan kʼanu niit ye. 30Tna ruu msya kak beta ro mhau mam tabam refo to, kbe jõ too hita msya bosafom tsan kʼana mabat.” Tna bo weto beta mabo oh. 31Allah ymat he bo ro Ait yfen weto beta moof toni. Hreha firwas tna snok rabu. Reto mrat ayõ ro ntamam.

© Yayasan Sumber Sejahtera, 2005

Zjisti více o Watum ro Tuhan Bosi ro Tna