Kucangtsi 3
3
Itijwunnsi Unde
1Uwae ibye kutur ti Yaweh Rimam kyae meme, ikentibi site itsab tí kufur ti skeb titag. Awu rang unda wu baa, “Kubenti ti Rimam fa ni kusen baa, ani na ci-ni awaen ituku iki ufang ike be né?” 2Unda wu ri te ikentibi baa, “Iyee, ati u ci awaen ituku ti ta ufang ike ne, 3amaa, Rimam fa ti kusen risu awaen kutuku ti ta kutampwa ufang wune baa, ati na ci-ti ayi be, ati na sa kujwo tekunn-ti ayi be, be ati na u cwu.”
4Ikentibi ri te unda wu baa, “Ani u cwu-ni be. 5Rimam nung ti ani a ci, ayib-ni u mbubta, ani u te wu pang atso, u nungye itinyang ti itibi.”
6Ti unda wu nung baa, awaen kutuku wu na nyang ti ci, u nyang ti sae, ama na ku nda ande itinungye tí ben-ayib, awu kwaen u ci, u pu ariki ba na ubaen-wu, ubaen-wu pu ci. 7Tiri ayib-ba mbubta, aba nungye ti aba tsi ribam. Ikyaen yine aba kyaeb atsing kutuku skaen.
8Adamu ti uwa-wu fxen akyae ikyin ti Yaweh Rimam ku kyang uwae risaen ufang atang ti usir sunn ku pu wu. Aba sha imbyi kufub, u ka tam atang ti Rimam na nungye-wu aba be. 9Ama Yaweh Rimam kunn unde wu, u rang wu baa, “Afu ta-fu aka?”
10Awu cwe ira u ri baa, “Ame fxen ikyae afxen-fu ti ku ba uwae ufang ike, ama ikyenricwu ye m, ikyaen ti ame tsi ribam, nee iken ti nde ame ba titam.”
11Rimam rang wu baa, “Aye ti ri te fu baa afu na tsi ribam? Awaen kutuku ti ame fa fu kusen baa, afu na ci-fu be né, afu ci pu fu awu be a.”
12Adamu ri baa, “Unda wu ti afu pu na m ti wu na som te m né, awu ti kwaen na m awaen kutuku wu, ama ame ci.”
13Yaweh rang unda wu baa,
“Imi ti afu nde ne?”
Unda wu ri baa,
“Mbaa ikentibi ti kyaefa m,
nee ame ci awaen kutuku wu re.”
14Yaweh Rimam
ri te ikentibi wu baa,
“Ikyaen iken ti afu nde ne,
kufwag ta risu-fu
skeb ana iken ti shi
ti ibye kutur ti tsitsi meme!
Uwae unyang-fu,
afu u ten ti rishwu u ci isa.
15Ame u sa kuka tsi
kutampwa-fu, ti unda wu,
kutampwa utso-fu, ti utso unda wu.
Afu u pye wu ti ukyig kufxen,
awu ama u jwog mbub risu-fu.”
16Unda wu ama,
Rimam ri te wu baa,
“Ayi u si fu ti kicaeb timambe
kiye umbae ti mbae.
Ijaen-fu ama
u tsi kunn rimenn ubaen-fu,
awu u ta risu-fu.”
17Adamu ama,
Rimam ri te wu baa,
“Afu fxen uwa-fu,
u ci awaen kutuku
ti ame fa fu kusen risu-wu,
ti afu na ci-fu be.
Ikyaen yine,
ame faen riben kufaen ikyaen-fu.
Afu u tóm, u nde rikaen titawe
afu u ci u ngwa
kaa sang usir ti afu u cwu.
18Irum ti acwong ti ikajwo
u shab tsoye riben ikyaen-fu.
19Tí atsam-fu, afu u ci wuci-fu
kaa kwer ti usir ti afu
u kafe si ti yi riben,
ikyaen ti afu tsoye riben.
A kyae fu ru ye riben,
afu u kafe si ti riben.”
20Adamu fa rinyi uwa-wu baa, “Awa” ti ku tso baa, awu na si iya ande ti site unyang meme. 21Yaweh Rimam pu apwa ibye na Adamu ti uwa-wu ti a na cwun kyi ribam-ba.
22Ama Yaweh Rimam ri baa, “Tine, unde kafe pu wu pangma kinjo uwae-ti, awu nung pu wu itinyang ti itibi. Ti byangkyi wu, be, awu kaa kwaen awaen kutuku na unyang ci, ama u cwu-wu cwucwo be.” 23Ikyaen yine, Yaweh Rimam rwae unde ru ye uwae ufang Eden, ti wu na ka tom riben uwog ti a kyae wu tsoye atang. 24Isim ti awu rwae unde wu ru ye pu wu, awu pu kerubi#3:24 Kerubi si pangma itumu amaa, ayi site risu pangma ana unde, ti asae pangma ana inung. Ayi ku nde na Rimam wande. iki tsi kyi uwe usir ti kiskinn, fengo ti ku sang yi uwog kutuku na unyang ti ta ufang Eden. Ayi ye su kisum wen ti ku jae mang mang atang ti aba na kong kutuku unyang wu.
Právě zvoleno:
Kucangtsi 3: kubNT
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© Wycliffe Bible Translators, Inc. and
© The Nigeria Bible Translation Trust 1995, 2017